Ekikere Bible Kaban̄a Emem ye Ifụre
Ediwak owo ẹnyịme enyọn̄ enyọn̄ edinam unyene n̄kponn̄kan edidianakiet ererimbot ye emem ye ifụre oro emi ẹkemede ndida ndi. Mmọ ẹdori enyịn nte ke utọ edinam oro eyeda okosịm ererimbot oro ọfọnde akan. Edi Bible owụt ete ke se ikponde ikan enyọn̄ enyọn̄ uyarade abuana.
NNEME aban̄ade emem ye ifụre edi akpan n̄kpọ udọn̄ ọnọ mme Christian ke ntak se apostle Paul ekewetde ke idak odudu spirit ọnọ ẹsọk esop Christian eke akpa isua ikie. Ẹwet mme ikọ esie ke Bible ke 1 Thessalonica 5:3 ẹte: “Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ, nte emi uman abuatde n̄wan idịbi; ndien mmọ idikwe usụn̄ ubọhọ.” Itien̄wed emi edemede mme akpan mbụme.
Emem ye Ifụre —Ntọn̄ọ Nso?
Edieke afo okotde udọn̄ikọ ikọ Paul oro ẹkotde ke enyọn̄ emi, afo eyekụt ete ke mbon oro ẹdọhọde “emem ye ifụre” idịghe mme Christian oro ẹtabade idap, edi, utu ke oro, ẹdi mme owo oro ẹdede idap inyụn̄ inen̄ekede idiọn̄ọ se itịbede. Mmọ ẹdu ke idaha oro enyenede ndịk edi mmọ ifiọkke iban̄a emi koro mmọ ẹkerede ẹte ke n̄kpọ ke ẹnen̄ede ẹfọn nte mmọ ẹtiede. Kaban̄a mme Christian, nte ededi, Paul ọkọdọhọ ete: “Nditọete, inaha nte ẹwet baba n̄kpọ kiet ẹnọ mbufo ẹban̄a ini ye mme eyo.” (1 Thessalonica 5:1) Ih, nnyịn ikpenyene ndifiọk ini n̄kpọntịbe Abasi. Ntak-a? Koro Paul ọkọdọhọ ete ke ini mbabuat nsobo, oro ẹkotde “usen Ọbọn̄ [“Jehovah,” NW],” ke edi “nte inọ ke okoneyo.”—1 Thessalonica 5:2.
Nso ke nneme emem ye ifụre oro ẹkebemde iso ẹtịn̄ edisịne? Nte an̄wan̄ade, ana edi se ikponde ikan ikpîkpu nneme. Mme owo ẹsitịn̄ ẹban̄a emem ke ekperede ndidi adan̄a nte mmọ ẹn̄wanade ekọn̄. Anaedi mme ikọ Paul anyan ubọk owụt ini emi editiede nte mme idụt ẹnyene emem ye ifụre ke n̄wọrọnda usụn̄. Edi emi edidi sụk enyọn̄ enyọn̄. Enyọn̄ enyọn̄ emem ye ifụre oro adade osịm mbabuat nsobo nte an̄wan̄ade idịghe ata emem m̀mê ata ifụre.
Jesus n̄ko ama etịn̄ aban̄a mbabuat nsobo emi. Enye okokot enye “akwa ukụt . . . orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.” Ediwak isua ikie mbemiso Jesus, profet Daniel ama etịn̄ n̄ko aban̄a enye, ndien enye akanam enye an̄wan̄a nte “ini ukụt emi orụk esie akanam mîdụhe toto nte idụt okodu, tutu osịm ini oro.”—Matthew 24:21; Daniel 12:1.
Edide okot enye akwa ukụt m̀mê ini ukụṭ—ke idaha ekededi, nte ekemde ye mme prọfesi, enye eyesọhi kpukpru idiọn̄ọ ndutịm Satan eke isọn̄ efep. Utu ke ndida mban̄a unyịme Abasi, nneme emem ye ifụre oro ẹketịn̄de ẹban̄a ada okosụn̄o ke se idide ata isio ye oro!—Men Zephaniah 3:8 domo.
Eyarade Mme N̄kpọ Ẹban̄ade Ini
Nte mme enyọn̄ enyọn̄ edinam eke ndondo emi kaban̄a edidianakiet ererimbot oro okponde akan ye idotenyịn ye ifụre oro osụn̄ode oto emi edi edisu eke mme ntịn̄nnịm ntọt Paul? Ọfọn, nte magazine emi esisiode owụt ndien ndien, ọtọn̄ọde ke 1914 nnyịn imokụt edisu ediwak prọfesi Bible ẹmi ẹnyenede ebuana ye edidu Jesus ke ukara Obio Ubọn̄ eke heaven. (Matthew, ibuot 24, 25; 2 Timothy 3:1-5; Ediyarade 6:1-8) Jesus okowụt nte ke usen Jehovah, emi mbabuat nsobo edidorode mme idiọkowo ke idem, eyedisịm ke adan̄aemi mbon emana mme owo oro ẹkekụtde ntọn̄ọ ini emi ẹsụk ẹdude uwem.—Luke 21:29-33.
Apostle Paul n̄ko ama etịn̄ n̄kpọ aban̄ade ini. Enye ọkọdọhọ ete: “Ke adan̄aemi mmọ ẹsụk ẹnemede ẹban̄a emem ye ifụre, inikiet inikiet nsobo eyedoro mmọ ke idem.” Ukabade ikọ Paul emi ke The New English Bible owụt in̄wan̄în̄wan̄ nte ke akwa ukụt ada itie “ke adan̄aemi mmọ ẹsụk ẹnemede.” Nte inọ ke okoneyo—oro owo mîbemke iso ifiọk—nsobo eyebuat ke ini owo mîdorike enyịn, ke ini ntịn̄enyịn n̄wakn̄kan owo edide ke emem ye ifụre oro mmọ ẹdoride enyịn ẹban̄a. Ntre, ke adan̄aemi nnyịn idahaemi mîkemeke ndidọhọ ye akpatre ubiere nte ke idaha emem ye ifụre oro odude kemi osu mme ikọ Paul—mîdịghe ke nso udomo ke nneme emem ye ifụre edikaiso odu—akpanikọ oro nte ke ẹsụk ẹkop ẹban̄a utọ nneme oro ke udomo oro akanam owo mîkopke edemede mme Christian ndikụt ufọn editaba idap kpukpru ini.
‘Edinụk’ ke Ufọt Mme Odudu Ukara Ererimbot
Ke ini enye eketịn̄de aban̄a ini ukụt, prọfet Daniel n̄ko ama etịn̄ n̄kpọ aban̄ade ini. Enye okowụt ke ini ukụt edidu ke utịt en̄wan anyanini ke ufọt ikpọ odudu ukara iba, kiet ẹkotde “edidem edere” ndien enye eken “edidem usụk.” (Daniel 11:5-43) Ọtọn̄ọde ke utịt Ekọn̄ Ererimbot II, ẹwụt ikpọ odudu ẹmi nte ukara uforo “edidem usụk” ye ukara mbio obio “edidem edere.”
Daniel ama ebemiso etịn̄ ete ke ndot ndot en̄wan ke ufọt odudu ukara iba ẹmi, nte ẹkekụtde ke isua 45 ẹmi ẹkebede, edidi nte ‘edinụk,’ ukem nte an̄wana mbọk iba ẹdomode ndiyom idaha oro ọfọnde. Ke ndondo emi, etie nte edinụk emi osụhọde ubọk. Ke uwụtn̄kpọ, ke May isua oko, isụn̄utom esenidụt Soviet ama ọdọhọ ke En̄wan Ukaraidem etre. Ke June, magazine Time ama etịn̄ aban̄a mbono mme adaibuot ukara ke ufọt United States ye Soviet Union onyụn̄ ọdọhọ ete: “Ndusụk ediomi nditek ubọk ke n̄kpọekọn̄ ye edidomo n̄kpọekọn̄ nuclear nse ẹketie nte mbabuat edinam ke isua ifan̄ ẹmi ẹkebede. Idahaemi, idem ke ẹkerede ẹban̄a ofụri ediomi oro, mmọ ẹtie nte idịghe akpan n̄kpọ aba.”
Edide se itiede nte itieufan emi ke ufọt ikpọ odudu ukara iba oro edi eke ibio ini m̀mê nsinsi, ẹyefiọk nte ini akade. Nte ededi, n̄kpọ kiet ana in̄wan̄în̄wan̄. Ikpehe ini oro Jesus akasiakde otịm aka anyan. Ndien mme n̄kpọ oro ẹtịbede ke ererimbot ẹwụt nte ke nnyịn imasan̄a ikpere mme n̄kpọntịbe oro apostle Paul ye prọfet Daniel ẹkebemde iso ẹtịn̄. Idem okposụkedi oro mme edinam ukaraidem eke ndondo emi ke ndusụk udomo edide ntak odudu mme ufọkederi Christendom, mmọ ididaha ikosịm emem oro ebịghide. Uyarade edi nte ke mmọ ẹdida ikosịm se idide ata isio ye oro inọ mme idụt ererimbot.
[Mme ndise ke page 6]
Ẹyefiọk nte ini akade adan̄a nte se itiede nte itieufan ke ufọt ikpọ odudu ukara oro edibịghide
[Ebiet Ẹdade N̄kpọ Ẹto]
USSR Mission to the UN