Ndise Mbe “Emem ye Ifụre” Oro Owo Anamde
Akpanikọ edi-o, mme owo ikemeke tutu amama ndida ata emem oro ebịghide ndi. Ntak mîkemeke? Koro idịghe mme owo ẹdi mme ata abiat emem, okposụkedi mmọ ẹbuanade ubiomikpe ke ntak mbụk uduọkiyịp mmọ. Ata abiat emem otịm okopodudu akan owo. Enye idịghe owo efen ikan Satan kpa Devil, emi ẹtịn̄de ẹban̄a ke Bible nte “andibian̄a ofụri ererimbot.”—Ediyarade 12:9.
Bible ọdọhọ ete: “Ofụri ererimbot onyụn̄ esịne ke ubọk andidiọk [Satan].” (1 John 5:19) Ntre, ndinyene ata emem ye ifụre oro ebịghide ana abuana edisio Satan mfep ke edinam ọkọrọ ye ke ndutịm ererimbot oro enye ọkọbọpde onyụn̄ otịmde akara nte an̄wan̄ade. (Men Isaiah 48:22; Rome 16:20 domo.) Mme owo ikemeke ndinam emi.
Didie, ndien, ke ẹkeme ndinyene emem ye ifụre? Ebe ke odudu Owo oro otịmde okop odudu akan Satan. Ata Ọkpọsọn̄ Abasi ama onịm ini ọnọ edinam Satan ke otu ubonowo. Ini oro ama ekem, ‘mbabuat nsobo’ eyesịm ererimbot emi odude ke idak odudu Satan mi. (1 Thessalonica 5:3-7) Kpukpru uyarade ẹda ẹsịm ubiere oro nte ke ibịghike emi eyetịbe.
Emem ye Ifụre Idahaemi!
Nso kaban̄a idahaemi, nte ededi? Idem mfịn emi ata emem ye ifụre odu ke esisịt udomo. Didie? Idịghe nte ediwak mme adaiso ido ukpono ẹkesịnde ukeme, ebe ke ndisịn idem ke mme mbre ukara ererimbot emi, edi, utu ke oro, ebe ke nditiene mme ewụhọ ye item Abasi.
Ndi utọ edinam oro enen̄ede osion̄o emem edi? Ih, enye osion̄o edi. Ke uwụtn̄kpọ, Mme Ntiense Jehovah ẹma ẹdomo enye ẹse ẹnyụn̄ ẹkụt nte ke ẹnen̄ede ẹkeme ndinyene ata emem ọkọrọ ye ndusụk udomo ifụre. Nditiene mme ewụhọ Abasi nte ẹwụtde ke Bible aman̄wam mmọ ndidiana ọtọkiet nte esop ofụri ererimbot ke ata emem, inamke n̄kpọ se idide orụk, idụt, m̀mê usem mmọ.—Psalm 133:1.
Ke n̄kopitem nnọ ibet Abasi, mmọ ke ndamban̄a usụn̄ ‘ẹma ẹda ofụt mmọ ẹdom n̄kpọ ufụn̄isọn̄ ndien mmọ ikpepke aba ekọn̄.’ (Isaiah 2:2-4) Mmọ ẹdu ke ifụre ke ima Abasi ẹnyụn̄ ẹnyene mbuọtidem nte ke nditọete mmọ eke spirit ẹnyene udọn̄ ẹban̄a mmimọ. (Rome 8:28, 35-39; Philippi 4:7) Edieke afo eyịkde m̀mê emi edi akpanikọ, imọnọ fi ikot ndika n̄kese mmọ ke kiet ke otu Ufọkmbono Obio Ubọn̄ mmọ man okụt emi ke idemfo.
Emem ye Ifụre ke Ofụri Ererimbot
Emi, nte ededi, idịghe akpatre edisu un̄wọn̄ọ Bible oro aban̄ade emem ye ifụre. Ikpetke-kpet ndidi! Enye akam edi ntabinse ke nte ererimbot emi ekpetiede edieke kpukpru owo ẹkpetienede item Abasi. Ibịghike ntabinse oro eyekabade edi ata idem n̄kpọ.
Apostle Paul ọkọdọhọ ete: “Ini mme owo [mbon oro mînamke n̄kpọ Abasi] ẹdọhọde ẹte, idu ke emem ye ifụre, [ẹkerede ke mmimọ ke akpatre imada emem ye ifụre idi ke usụn̄ idem mmimọ] kpa adan̄aoro ke nsobo abuat mmọ.” (1 Thessalonica 5:3) Abasi eyebiere ete ke Satan abian̄a ubonowo ke anyanini oro ekemde. Emi eyedi ini ndien ndisio enye ke edinam, ọkọrọ ye idiọk ndutịm ererimbot oro odude ke idak odudu esie. Adan̄aoro edidi ini prọfesi Daniel emi ndisu: “Ke eyo ndidem oro, Abasi enyọn̄ eyenam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye eyenuak onyụn̄ ama kpukpru mme idụt ẹmi, ndien enye eyeda ke nsinsi.”—Daniel 2:44.
Ndi emi edidi idiọk edinam ke n̄kan̄ Abasi? Idịghe ke baba usụn̄ kiet. Mbabuat nsobo edisịm mbon oro ẹdotde enye ikpọn̄îkpọn̄ nte ekemde ye ubiereikpe Abasi, mme edumbet Abasi. Nte afo ọmọbuọt idem ke Andibot ndibiere nte enende ke n̄kpọ emi? Ke akpanikọ nnyịn imekeme ndiyak n̄kpọ ifụre ifụre nsịn enye ke ubọk! Ndien nso ididi utịp utom ubiereikpe esie? N̄ke ọdọhọ ete: “Mbon edinen ido ẹyedụn̄ ke obio, mmọ eke ẹfọnde ẹma ẹyenyụn̄ ẹbịghi ke esịt. Edi ẹyesobo mme idiọkowo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.” (Mme N̄ke 2:21, 22) Ndi owo ekededi eyefụhọ ke nditaba idiọkowo?
Ye edisio mme abiat emem mfep ke isọn̄, ata emem ye ifụre eyedi udeme ubonowo ke ofụri ererimbot ke idak eti ukara Obio Ubọn̄ Abasi. “Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah eyeyọhọ ke ererimbot, kpa nte mmọn̄ ofụkde inyan̄.” (Isaiah 11:9) Ndi afo omonịm un̄wọn̄ọ Bible emi ke akpanikọ? Nte afo emenyene mbuọtidem nte ke mme n̄kpọ ẹmi ẹyetịbe ke mîbịghike? Edieke afo eyịkde, nnyịn imesịn udọn̄ inọ fi ndidụn̄ọde n̄kpọ emi n̄kaiso. Ke akpanikọ, usụn̄ Abasi edi n̄kukụre usụn̄ oro owo edinyenede utịtmbuba ata emem ye ata ifụre oro ọdọn̄de enye.
[Mme ndise ke page 8]
Ikọt Jehovah ẹdara ata emem ye eti udomo ifụre mfịn