Nso Orụk Ifụre ke Afo Oyom?
NSIO nsio owo ẹnyene nsio nsio ekikere ẹban̄a ifụre. Ndusụk owo ẹse enye nte nsọn̄ọnda ke ufọt odudu ekọn̄ oro ọbiọn̄ọde kiet eken. Ke uwụtn̄kpọ, mme okopodudu n̄ka ukara ererimbot adianade ye mme ufan mmọ ẹdide mbon Europe ẹma ẹnyịme ye ekese edinam ndisụhọde n̄kpọndịk oro nte ke n̄kpri n̄kpọntịbe ẹkeme nditara n̄kosịm ekọn̄ nuclear ofụri ererimbot. Stockholm International Peace Research Institute Yearbook 1990 owụt n̄kpaidem oro odude kaban̄a unana udọn̄ oro mme idụt “ke mme ikpehe ererimbot eken” ẹwụtde ẹban̄a edinam emi.
Nte ededi, ye ediwak miliọn owo oro ẹdụn̄de ke mme idụt oro mînyeneke n̄kpọ, “ifụre” ọwọrọ ndinyene udia ye eti nsọn̄idem. Ataifiọk mbre ukara oro, Yash Tandon, anam an̄wan̄a ete, “Ke edide edisịm edikere mban̄a ‘emem ye ifụre,’ ekikere ntatenyịn Edem Usoputịn oro akarade, emi ediwak owo ẹnyịmede edi akakan. . . . Ẹkụt ‘ifụre’ nte mbubehe n̄kpọekọn̄ ye edisobo n̄kpọekọn̄ mfep, okpụhọrede ye udọn̄ ndinyene ifụre oro mbahade iba ke itie ikie ke otu mme andidụn̄ ererimbot oro mînyeneke udia ye ufọk ẹnyenede.”
Amaedi Bible, enye ọn̄wọn̄ọ ete ke ekọn̄ ididụhe ke idak Obio Ubọn̄ Abasi. “Enye anam ekọn̄ etre tutu osịm ke utịt ekondo; eyebụn̄ utịgha onyụn̄ osịbe eduat: eyenyụn̄ ọfọp mme chariot ke ikan̄.” (Psalm 46:9; Isaiah 2:4) Udọn̄ọ ikpọkidem edidi n̄kpọ eset. “Andidụn̄ ididọhọke ite, Ndọdọn̄ọ: ẹfen mme idiọkido mmọ eke ẹdụn̄de ke esịt.”—Isaiah 33:24.
Ke idak Obio Ubọn̄ oro, unana ifụre ndutịm uforo idisịnke baba owo kiet ndịk ke idem. “Ndien mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹto in̄wan̄ vine, ẹnyụn̄ ẹdia mfri mmọ. Mmọ idibọpke ndien owo en̄wen odụn̄; iditọhọ, ndien owo efen adia.”—Isaiah 65:21, 22.
Ke edide akpan n̄kpọ akan, nte ededi, Obio Ubọn̄ emi eyesio akpan ntak unana emem ye ifụre efep. Anie edi ntak anyan mbụk ukara ufịk eke owo oro mîkwe unen? Ke adan̄aemi Abasi, ye eti ntak, ayakde mmọ ẹkaiso ẹdu, owo oro anade ẹnyene nduduọhọ edi Satan, koro Bible ọdọhọde ete ke “ofụri ererimbot onyụn̄ esịne ke ubọk andidiọk.”—1 John 5:19.
Nso ubọhọ ke edidi ntem, adan̄aoro, ke ini, ke idak Obio Ubọn̄ Abasi ikọ Paul oro ekewetde ọnọ ẹsọk mbon Rome ẹdisude ke akpatre: “Ndien ibịghike-bịghi Abasi emem eyedịghi Satan anuak ke idak ikpat mbufo”! (Rome 16:20) Obio Ubọn̄ Abasi eke heaven ikpọn̄, ke idak Edidem Jesus Christ, ekeme ndinam emi. Ntem, edidi n̄kukụre ke idak Obio Ubọn̄ oro ke ẹdinam ofụri isọn̄ akabade edi paradise.—Genesis 1:28; Luke 23:43.
Ih, ifụre oro ẹn̄wọn̄ọde ke Bible ọfọn onyụn̄ atara akan n̄kpọ ekededi oro akanam owo anamde. Kamse, nnyịn ikot ite “n̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba”! (Ediyarade 21:4) Nte imekeme ndinịm utọ un̄wọn̄ọ oro ke akpanikọ? Ih, koro mmọ ẹto ata ọkpọsọn̄ Andibot, kpa Jehovah Abasi, emi ọdọhọde n̄ko ete: “Ikọ mi emi ọwọrọde mi ke inua . . . idifiakke itiene mi ubọk ubọk, tutu enye anam se mmade, onyụn̄ okụt unen ke utom emi ndọn̄de enye.” (Isaiah 55:11) In̄wan̄în̄wan̄ unen onịm mme edinam oro Jehovah Abasi anamde ke idem idahaemi idiọn̄ọ, ndida emem, ifụre, ye mfọnọn̄kpọ oro ebịghide onyụn̄ enemde owo esịt nsọk ubonowo ke ndiwụt unen nsinsi itie edikara Esie.