Ata Ifụre—Idahaemi Ye Ke Nsinsi
EYỊGHE idụhe nte ke Jehovah Abasi ekeme ndinọ ikọt esie ifụre. Enye edi “Ata Ọkpọsọn̄.” (Psalm 68:14) N̄wọrọnda enyịn̄ esie ọwọrọ “Enye Anam Akabade Edi.” Emi anam ẹdiọn̄ọ enye nte n̄kukụre Owo ke ekondo emi ekemede ndikan n̄kpọ ubiọn̄ọ ekededi man osu mme un̄wọn̄ọ esie onyụn̄ anam uduak esie. Abasi ke idemesie ọdọhọ ete: “Kpa ntre ke ikọ mi emi ọwọrọde mi ke inua editie: idifiakke itiene mi ubọk-ubọk, tutu enye anam se mmade, onyụn̄ okụt unen ke utom eke ndọn̄de enye.”—Isaiah 55:11.
Abasi ọnọ mbon oro ẹbuọtde idem ye enye ifụre. Ikọ esie ọsọn̄ọ emi. Enyene-ọniọn̄ Edidem Solomon ọkọdọhọ ke idak ndausụn̄ spirit Abasi ete: “Enyịn̄ Jehovah edi ọkpọsọn̄ tower: eti owo efehe odụk ke esịt, ndien odu ke ifụre.” Enye ama aka iso ọdọhọ ete: “Owo eke ọbuọtde idem esie ye Jehovah ẹmenede enye ẹnịm ke enyọn̄.”—Mme N̄ke 18:10; 29:25.
Ifụre Ẹnọde Mme Asan̄autom Abasi
Jehovah esinọ mbon oro ẹberide edem ke enye ifụre kpukpru ini. Ke uwụtn̄kpọ, prọfet Jeremiah ama enyene ukpeme Abasi. Ke ini udịmekọn̄ Babylon ẹkekande ọsọn̄ibuot Jerusalem ẹkụk, mme owo ẹkenyene ‘ndita uyo ke udomo ye ke nyekidem.’ (Ezekiel 4:16) N̄kpọ ama ọsọn̄ tutu ndusụk iban ẹtem nditọ mmọ ẹta. (Eseme 2:20; 4:10) Okposụkedi ẹkesịnde Jeremiah ke ufọk ukwak ini oro ke ntak uko uko ukwọrọikọ esie, Jehovah ama okụt ete ke “ẹda obukpa uyo kiet ke efak mme asan̄ uyo ẹnọ enye kpukpru usen, tutu ofụri uyo okụre ke obio.”—Jeremiah 37:21.
Ke ini Jerusalem ọkọduọde odụk ubọk mbon Babylon, owo ikowotke Jeremiah ikonyụn̄ idaha enye nte owo n̄kpọkọbi ika Babylon. Utu ke oro, “etubom mbon ukpeme [edide owo Babylon ama] ọnọ enye udia usụn̄ ye enọ, onyụn̄ ayak enye aka.”—Jeremiah 40:5.
Ediwak isua ikie ke ukperedem Jesus Christ ama ọsọn̄ọ etịn̄ ọnọ mme asan̄autom Abasi ete: “Ẹkûtịmede esịt ẹbụp ẹte, Nso ke nnyịn ididia? Nso ke nnyịn idin̄wọn̄? Nso ke nnyịn idisịne? Koro mme Gentile ẹyom kpukpru n̄kpọ ẹmi: koro Ete mbufo ke heaven ọmọfiọk ete ke kpukpru n̄kpọ ẹmi ẹnana mbufo. Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.”—Matthew 6:31-33.
Nte emi ọwọrọ ke mme asan̄autom Jehovah ẹyenyene ukpeme Abasi ndibọhọ kpukpru afanikọn̄ mfịn? Baba, iwọrọke ntre. Mme anam akpanikọ ibọhọke afanikọn̄. Mme ata Christian ẹsidọn̄ọ, ẹsobo ukọbọ, ẹdi mbon unọmọ ubiatibet, ẹkpa ke mbabuat n̄kpọntịbe, ẹnyụn̄ ẹkụt ukụt ke mme usụn̄ efen.
Okposụkedi Jehovah mînọhọ kan̄a ifụre ofụri ofụri ndibọhọ afanikọn̄, mme ntọt ẹwụt nte ke enye esida odudu esie ndise mban̄a mme asan̄autom esie nnyụn̄ n̄kpeme mmọ. Ẹkpeme mme Christian n̄ko ẹsio ke ediwak mfịna ke ntak emi mmọ ẹdade mme edumbet Bible ẹsịn ke edinam ke uwem mmọ. (Mme N̄ke 22:3) N̄ko-n̄ko, mmọ ẹnyene ifụre otode nsan̄a ofụri ererimbot eke ima ima nditọete iren ye iban eke spirit, ẹmi ẹn̄wamde kiet eken ke mme ini unana. (John 13:34, 35; Rome 8:28) Ke uwụtn̄kpọ, ke ndinam n̄kpọ mban̄a itie nnanenyịn nditọete mmọ ke Rwanda emi ekọn̄ an̄wanade, Mme Ntiense Jehovah ke Europe ẹma ẹsọsọp ẹtịp ẹnyụn̄ ẹnọ mmọ edisịnen̄kpọ odobide ke tọn 65 ye ibọkusọbọ, udia, ye mme n̄kpọ un̄wam efen emi ekọmurua edide $1,600,000 ẹsọk mmọ.—Men Utom 11:28, 29 domo.
Okposụkedi Jehovah esiyakde mme idomo ẹsịm mme ata Christian, mmọ ẹnyene mbuọtidem nte ke enye eyenọ mmọ odudu, un̄wam, ye ọniọn̄ ndiyọ. Ke ewetde n̄wed ọnọ ẹsọk ekemmọ mme andinịm ke akpanikọ, apostle Paul ama ọdọhọ ete: “Idomo ndomokiet ikosịmke mbufo ibọhọke se inade owo ndibiom. Edi Abasi edi akpanikọ, ndien idiyakke ẹdomo mbufo ẹbe se mbufo ẹkemede ndiyọ, edi Enye eyesiak usụn̄ ubọhọ ọnọ mbufo ke ufọt idomo man mbufo ẹkeme ndiyọ enye.”—1 Corinth 10:13.
Se Abasi Anamde Ọnọ Ikọt Esie
Mfịn, ediwak miliọn owo ẹkop inemesịt ndinam uduak Abasi. Owo inyịkke-nyịk mmọ ndinam n̄kpọ Abasi; mmọ ẹnam ntre koro mmọ ẹfiọkde ẹnyụn̄ ẹmade enye. Ke n̄kan̄ eken, koro Jehovah amade mme asan̄autom esie ẹmi ẹnyenede nsọn̄ọnda, enye ọn̄wọn̄ọ ndinam isọn̄ akabade edi paradise emi okopitem ubonowo edinyenede emem, nsọn̄idem, ye ifụre ke nsinsi.—Luke 23:43.
Abasi edinam emi ebe ke ukara eke heaven, emi enyenede Edidem oro enye emekde, kpa Jesus Christ, nte Andikara. (Daniel 7:13, 14) Bible etịn̄ aban̄a ukara emi nte “Obio Ubọn̄ Abasi” ye nte “Obio Ubọn̄ Heaven.” (1 Corinth 15:50; Matthew 13:44) Obio Ubọn̄ Abasi eyeda itie kpukpru ukara owo. Utu ke ndinyene ediwak ukara ke isọn̄, ukara kiet kpọt edidu. Enye eyekara ofụri isọn̄ ke edinen ido.—Psalm 72:7, 8; Daniel 2:44.
Jehovah ọnọ kpukpru owo ikot ndidu uwem ke idak Obio Ubọn̄ oro. Usụn̄ kiet oro enye anamde emi ebe ke edisuan Bible ntatara ntatara, kpa n̄wed oro anamde an̄wan̄a se Obio Ubọn̄ oro edinamde ọnọ ubonowo. Bible edi n̄wed oro ẹtịmde ẹsuan atara akan ke ererimbot, ndien enye odu idahaemi, ke ofụri ofụri m̀mê ke ubak ubak, ke se iwakde ikan usem 2,000.
Jehovah Abasi ke ima an̄wam mme owo ndifiọk se Bible ekpepde aban̄a Obio Ubọn̄ oro. Enye anam ntre ebe ke ndinọ mme owo ukpep nnyụn̄ ndọn̄ mmọ ẹkenam N̄wed Abasi an̄wan̄a mbon efen. Se ibede Mme Ntiense Jehovah miliọn ition ke ẹtan̄a eti mbụk Obio Ubọn̄ Abasi idahaemi ke se iwakde ikan idụt 230.
Ndi Ata Ifụre Eyedu ọnọ Kpukpru Owo?
Ndi kpukpru owo ẹyenyịme ikot edikabade ndi mme andidu ke idak Obio Ubọn̄ Abasi ebe ke ndidu uwem ekekem ye ndinen idaha esie? Baba, koro ediwak owo inyeneke udọn̄ ke ndinam uduak Abasi. Mmọ ẹsịn mme ukeme oro ẹsịnde ndin̄wam mmọ ẹkpụhọde uwem mmọ ẹnam ọfọn. Ke akpanikọ, mmọ ẹwụt idem nte ibietde mbon oro Jesus eketịn̄de aban̄a ete: “Esịt mbon ẹmi ama akabade odobi, utọn̄ mmọ onyụn̄ ọsọn̄ ndikop ikọ, mmọ ẹnyụn̄ ẹbọp enyịn; mbak mmọ ẹdida enyịn mmọ ẹkụt usụn̄, ẹnyụn̄ ẹda utọn̄ mmọ ẹkop ikọ, ẹnyụn̄ ẹda esịt mmọ ẹfiọk n̄kpọ, ẹnyụn̄ ẹtọn̄ọ ntak ẹkabade, ndien [Abasi anam] udọn̄ọ okụre mmọ.”—Matthew 13:15.
Didie ke ata ifụre okpodu ke isọn̄ ke otu mbon oro ẹsịnde ndidu uwem ekekem ye ndinen usụn̄ Abasi? Ikemeke ndidu. Mbon unana uten̄e Abasi ẹsịn ifụre mbon oro ẹyomde ndinam n̄kpọ Jehovah ke itiendịk.
Abasi inyịkke-nyịk owo ndikpụhọde, edi enye idinyụn̄ iyọhọ idiọkido ke nsinsi. Okposụkedi Jehovah ke ime akade iso ndidọn̄ Mme Ntiense esie ete ẹkpep mme owo ẹban̄a mme usụn̄ ye mme uduak esie, enye idikaha iso inam ntre ebịghi. Jesus Christ ama ebem iso ọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.
Nso ke “utịt” ediwọrọ ọnọ mbon oro ẹsịnde mme idaha Abasi? Ediwọrọ ubiomikpe ye nsobo ọnọ mmọ. Bible etịn̄ aban̄a “edisio usiene [nnọ] mmọ ẹmi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus. . . . [Mmọ] ẹdibọ ufen nsinsi nsobo.”—2 Thessalonica 1:6-9.
Ke Akpatre —Ata Ifụre ke Nsinsi!
Ke etienede nsobo mbon oro ẹsịnde mme usụn̄ emem Jehovah, Obio Ubọn̄ Abasi eyeda ubọn̄ ubọn̄ ini ifụre edi kaban̄a ufọn ndinen owo ke isọn̄. (Psalm 37:10, 11) Obufa ererimbot oro edikpụhọde didie ntem ye enyeemi nnyịn idude mfịn!—2 Peter 3:13.
Akan̄ ye biọn̄ ididụhe aba. Kpukpru owo ẹyenyene ekese n̄kpọ ndidia. Bible ọdọhọ ete ke ‘kpukpru owo ẹyedara akamba udia eke enyenede isek.’ (Isaiah 25:6) Udia idinanake, koro “uwak ibokpot ẹyedu ke isọn̄ ke nsom ikpọ obot.”—Psalm 72:16.
Mme owo ididụn̄ke aba ke mme ataya ye ntaha ufọk. Ke idak Obio Ubọn̄ Abasi, kpukpru owo ẹyenyene nti ufọk, ndien mmọ ẹyedia udia oro ẹkọride ke idụt mmọ. Bible ọn̄wọn̄ọ ete: “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ.”—Isaiah 65:21.
Utu ke ntatara unana utom, utom oro enyenede ufọn eyedu, ndien mme owo ẹyenyene nti utịp ẹto enye. Ikọ Abasi ọdọhọ ete: “Edimek ikọt mi ẹyedia se ubọk mmọ ẹnamde. Mmọ idinamke utom ke ikpikpu.”—Isaiah 65:22, 23.
Ke idak ukara Obio Ubọn̄, mme owo idibọhọ ufen idinyụn̄ ikpaha ke udọn̄ọ. Ikọ Abasi ọsọn̄ọ ọnọ nnyịn ete: “Andidụn̄ ididọhọke ite, Ndọdọn̄ọ.”—Isaiah 33:24.
Ke Paradise isọn̄ oro edidide ata idem n̄kpọ ke mîbịghike mi, ẹyesio ndutụhọ ye ubiak, mfụhọ ye n̄kpa, ẹfep. Ih, idem n̄kpa! Mme owo ẹyedu uwem ke nsinsi ke Paradise! Bible asian nnyịn ete ke Abasi “eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:4.
Ke idak itie ukara Jesus Christ, kpa “Ọbọn̄ Emem,” uwem ke isọn̄ eyenyene ata ifụre ke akpatre. Ke akpanikọ, ifụre ofụri ererimbot eyedu ke idak edinen ima ima ukara kiet—Obio Ubọn̄ Abasi.—Isaiah 9:6, 7; Ediyarade 7:9, 17.
[Se Ẹwetde ke Ikpọ Abisi ke page 4]
“Ifụre otode owo edi mbuọtidem ẹnyenede ẹban̄a n̄kpọn̄, . . . [mbuọtidem ke] ukaraidem ye idaha ndutịm uforo oro enyenede nsọn̄ọnda.”—N̄wan kiet emi odụn̄de ke Asia
[Se Ẹwetde ke Ikpọ Abisi ke page 5]
“N̄kpọ emi enen̄erede anam fi okûnyene ifụre edi afai ye nsọn̄ibuot.”—Eren kiet emi odụn̄de ke Edem Usụk America
[Se Ẹwetde ke Ikpọ Abisi ke page 6]
“Ami n̄kodụhe ke ifụre ke ini . . . ẹkedade ekọn̄ ẹdụk. Edieke idụt an̄wanade ekọn̄, mme owo ẹkpesan̄a didie ẹdu ke ifụre?”—Eyen ufọkn̄wed praimari ke Ufọt Ufọt Edem Usiahautịn
[Se Ẹwetde ke Ikpọ Abisi ke page 7]
“Ami nyedu ke ifụre ke ini mfiọkde nte ke mmekeme ndisan̄a ke mme efak ke okoneyo ye unana edidi se ẹdan̄de ke n̄kanubọk.”—Eyen ufọkn̄wed edide n̄wan ke Africa