Ke Akpanikọ, Nsiondi Eke Ukpepn̄kpọ Edi Emi!
Nnyịn imanam nsiondi eke ukpepn̄kpọ enen̄ede eye onyụn̄ an̄wam fi ekpep ọsọn̄urua Ikọ Jehovah emi edide akpanikọ.—Ps. 1:2; 119:97.
Isua inan̄ edi emi ikọtọn̄ọ ndisisio nsiondi Enyọn̄-Ukpeme iba ke ọfiọn̄, kiet edi eke ofụri owo enye eken edi eke nnyịn—Mme Ntiense Jehovah ye nditọ ukpepn̄kpọ Bible nnyịn emi ẹnamde n̄kọri.
Eyenete kiet emi ebịghide ke esop Jehovah ekewet ntem aban̄a nsiondi eke ukpepn̄kpọ: “Akpa nsiondi Enyọn̄-Ukpeme eke ukpepn̄kpọ ekedi utịbe onyụn̄ enen̄ede otụk mi. Nte enye akatatde ntotụn̄ọ akpanikọ Bible ama osụhọde odụk mi esịt. Ẹsọsọn̄ọ etieti ke ndinọ nnyịn utịbe utịbe obufa enọ emi.” Eyenete en̄wen ekewet ete: “Nsitetie mbet ndida ekese ini n̄kpep nsiondi eke ukpepn̄kpọ ye Bible mi ke ubọk.” Imenịm ke esinyụn̄ etie fi ntre.
Afo ọmọdiọn̄ọ ke ẹketọn̄ọ ndisio Enyọn̄-Ukpeme ke 1879, kpa akwa utom emi ẹkemede ndinam ke ntak emi spirit Jehovah ọnọde ibetedem onyụn̄ ọdiọn̄de. (Zech. 4:6) Ẹmekpụhọde ikpaedem magazine emi ediwak ini ke isua 133 emi ẹbede. Ke 2012, ikpaedem nsiondi eke ukpepn̄kpọ eyenyene ediye ndise emi owụtde nte ẹkwọrọde ikọ, man eti nnyịn utom emi Abasi ọnọde nnyịn ete inọ ọyọhọ ikọ ntiense iban̄a Obio Ubọn̄ Jehovah. (Utom 28:23) Ke page 2, oyokụt foto emi ẹdade ẹwet ndise ikpaedem oro, ọkọrọ ye ekpri n̄kpọ emi ẹwetde ẹban̄a se ẹnamde ye ebiet emi ẹnamde. Emi ẹyeti nnyịn ke ofụri isua emi nte ke ikọt Jehovah ke ẹkwọrọ eti mbụk “ke ofụri isọn̄.”—Matt. 24:14.
Mme ukpụhọde ewe ke ẹnam ke Enyọn̄-ukpeme? Ekebe ndụn̄ọde edidu idahaemi ke ntọn̄ọ ibuotikọ ukpepn̄kpọ kiet kiet. Emi ayanam fi ọfiọk akpan n̄kpọ emi ediyomde nte okotde onyụn̄ ekpepde ibuotikọ oro. Edi mme andinịm Ukpepn̄kpọ Enyọn̄-Ukpeme ẹdisụk ibụp mme mbụme oro ke utịt ukpepn̄kpọ. Oyokụt ke ẹnam ufan̄ oro ẹdude ke nnasia ye ufien ikpehe ekikere ẹfiak ẹn̄wan̄a esisịt, ndien ke nọmba page ye eke ikpehe ekikere ẹnen̄ede ẹwọrọ ẹda.
Nte ẹwụtde ke nsiondi enye emi, ẹsịn obufa ikpehe emi, “Oto Itieutom Ubon N̄kani N̄kpọ Nnyịn,” man ẹwụt mme akpan n̄kpọ oro ẹtịbede ke mbụk Mme Ntiense Jehovah eyomfịn. Ke adianade do, ndusụk ini ẹyesisịn mbụk eyouwem mme owo ke ibuotikọ emi “Mmọ Ẹma Ẹnọ Idemmọ Unyịme Unyịme.” Enye edinen̄ede itịn̄ idatesịt, uyụhọ, ye inemesịt emi nditọete nnyịn irenowo ye iban ẹnyenede ke ndikanam utom ke ebiet oro ẹnen̄erede ẹyom mme asuanetop Obio Ubọn̄.
Akpakam enen̄ede enem fi ndida magazine emi n̄kpep Ikọ Abasi!
Mme Andisio
[Ndise ke page 3]
1879
[Ndise ke page 3]
1895
[Ndise ke page 3]
1931
[Ndise ke page 3]
1950
[Ndise ke page 3]
1974
[Ndise ke page 3]
2008