Bọ Ndọn̄esịt Nyụn̄ Dọn̄ Mbon En̄wen Esịt

Akpan n̄kpọ kiet oro esin̄wamde nnyịn iyọ edi ndọn̄esịt oro ubon, mme ufan, ye nditọete nnyịn ẹsinọde nnyịn.

Nti ye ndinem ikọ ufan nnyịn ekeme nditie nte ibọk usụk ubiak onyụn̄ enen̄ede enem nnyịn ke idem. (N̄ke 16:24; 18:24; 25:11) Edi ata mme Christian ikereke kpọt nte mbon en̄wen ẹkemede ndidọn̄ mmọ esịt. Mmọ ẹsisịn ukeme man “[ẹkpekeme] ndida ndọn̄esịt oro Abasi ọnọde [mmọ] ndọn̄ mbon oro ẹdude ke ukụt ekededi esịt.” (2 Cor. 1:4; Luke 6:31) Antonio, emi edide esenyịn district ke Mexico, ama okụt emi ke idemesie.

Ke ini ẹkekụtde ke enyene orụk kansa iyịp emi enye enyenede, enye ama ofụhọ etieti. Kpa ye oro, enye ama esịn ofụri ukeme esie mbak mfụhọ edikan enye ubọk. Akanam emi didie? Enye esidomo nditi mme Ikwọ Obio Ubọn̄ onyụn̄ ọkwọ mmọ man okpokop onyụn̄ ekere aban̄a ikọ ikwọ oro. Ndibọn̄ akam uyo ọwọrọ ye ndikot Bible esinen̄ede ọdọn̄ owo esịt n̄ko.

Edi idahaemi Antonio edifiọk ke nditọete imọ ẹsịne ke otu mbon emi ẹkenen̄erede ẹn̄wam imọ. Enye ọdọhọ ete: “Ke ini ekesitiede nte mfụhọ ọmọn̄ akan mi ye n̄wan mi ubọk, nnyịn ima isikot iman nnyịn emi edide ebiowo edi edibọn̄ akam ye nnyịn. Emi ama esidọn̄ nnyịn esịt onyụn̄ anam esịt ana nnyịn usụn̄.” Enye adian do ete: “Ke nditịm ntịn̄, ubon nnyịn ye nditọete nnyịn ẹken̄wam nnyịn, ndien emi ama anam nnyịn isọp ikan mfụhọ nnyịn.” Esịt ekenem enye didie ntem ndinyene utọ ndima ufan oro!

Edisana spirit oro ẹken̄wọn̄ọde edi n̄kpọ en̄wen oro esin̄wamde ke ini nnanenyịn. Apostle Peter ọkọdọhọ ke edisana spirit Abasi edi “enọ mfọn.” (Utom 2:38) Ẹma ẹkụt ke oro edi ntre ke ini ẹkedade edisana spirit ẹyet ediwak owo aran ke Pentecost 33 E.N. Edi kpukpru nnyịn imekeme ndinyene enọ emi. Enọ emi inyeneke adan̄a, ntre ben̄e Abasi enen̄ede ọnọ fi edisana spirit.—Isa. 40:28-31.

NEN̄EDE KERE BAN̄A MBON ORO UKỤT ESỊMDE

Apostle Paul ama ọyọ ekese nsọn̄ọn̄kpọ, onyụn̄ ekpere n̄kpa ndusụk ini. (2 Cor. 1:8-10) Edi Paul ikefeheke ndịk n̄kpa. Enye ndifiọk ke Abasi do ye imọ ama ọdọn̄ enye esịt. Enye ekewet ete: “Itoro enyene Abasi ye Ete Ọbọn̄ nnyịn Jesus Christ, kpa Ete mbọm ye Abasi kpukpru ndọn̄esịt, emi ọdọn̄de nnyịn esịt ke kpukpru ukụt nnyịn.” (2 Cor. 1:3, 4) Paul ikayakke mfịna esie emen enye emen. Utu ke oro, mfịna esie ama ekpep enye ndisikere mban̄a mbon en̄wen, ndien emi ama anam enye ekeme ndidọn̄ mbon en̄wen esịt ke ini mmọ ẹnyenede mfịna.

Antonio ama afiak ọtọn̄ọ utom district ke idem ama ọkọsọn̄ enye. Enye ama esikere aban̄a nditọete, edi idahaemi enye ye n̄wan esie ẹma ẹnen̄ede ẹsịn ukeme ndika n̄kese nnyụn̄ nsịn udọn̄ nnọ nditọete emi ẹdọn̄ọde. Ke uwụtn̄kpọ, ke Antonio ama akaka ekese eyenete emi ọkọdọn̄ọde ata idiọk udọn̄ọ, enye ama edikop ke eyenete oro ikoyomke ndisidụk mbono esop aba. Antonio ọdọhọ ete: “Ikedịghe ke ntak emi eyenete emi mîkamaha Jehovah m̀mê nditọete, edi enye ama ọdọn̄ọ tutu ekere ke imọ iwọrọke n̄kpọ ndomokiet.”

N̄kpọ kiet emi Antonio akanamde man an̄wam eyenete emi ọkọdọn̄ọde do ekedi ndidọhọ enye ọbọn̄ akam ke itie edinam. Eyenete oro ama enyịme ndibọn̄ akam oro kpa ye emi enye ekekerede ke imọ idotke. Antonio ọdọhọ ete: “Akam esie ama enen̄ede esịne ifiọk, ndien ke oro ebede, nte enye akanamde n̄kpọ ama enen̄ede okpụhọde. Enye ama okụt ke imọ imenyene ufọn.”

Kpukpru nnyịn imenyene ukụt oro iyọde ke uwem emi. Edi, kpa nte Paul eketịn̄de, ndiyọ ntem ekeme ndikpep nnyịn ndidọn̄ mbon en̄wen esịt ke ini mmọ ẹnyenede mfịna. Ke ntre, yak mfịna nditọete nnyịn ebehe nnyịn, ẹyak inyụn̄ ikpebe Jehovah Abasi nnyịn ke ndisidọn̄ mbon en̄wen esịt.