NTE AFO EMETI?
Nte afo ama etịn̄ enyịn okot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:
Didie ke owo ekeme ndida Bible nte n̄kpọ n̄kpemeidem?
Ediwak usụn̄ odu emi mme owo ẹdade Bible nte n̄kpọ n̄kpemeidem, utọ nte ndikụbọde Bible n̄ka ebiet ekededi n̄kere ke iyenyene ndausụn̄ Abasi ke itie oro. Ata mme Christian isimụmke ndomo. Utu ke oro, mmọ ẹsikpep Bible man ẹnyene nnennen ifiọk ye ndausụn̄ Abasi.—12/15, page 3.
Nso idi “ererimbot” emi edibede ifep?
“Ererimbot” emi edibede ifep edi mme owo emi mîmaha ndidu uwem nte Abasi etemede. (1 John 2:17) Owo idisoboke nti owo ye isọn̄.—1/1, page 5-7.
Didie ke Abel osụk etetịn̄ ikọ ọnọ nnyịn okposụkedi emi enye ama akakpa? (Heb. 11:4)
Mbuọtidem esie etịn̄ ikọ ọnọ nnyịn. Imekeme ndikpep n̄kpọ nto enye nnyụn̄ n̄kpebe mbuọtidem esie. Owo ifreke mbuọtidem esie tutu emi.—1/1, page 12.
Nso idi ndusụk n̄kpọ emi akpanade ikpeme mbak ẹdidian̄ade nnyịn ikpọn̄ Abasi?
Ndusụk mmọ ẹdi emi: utom m̀mê ubọkọkọ nnyịn, edinam ini nduọkodudu ye unọ idem inemesịt oro imekde, ndidian idem ye iman nnyịn oro ẹma ẹkesio ẹfep ke esop, nte idade kọmputa ye n̄kpọ ilektrọnik inam n̄kpọ, ima okụk, ndikere ke ekikere nnyịn ọfọn akan, m̀mê ndida ifetutom ke n̄kpọ n̄kaha.—1/15, page 12-21.
Nso ke ikeme ndikpep nto nsụhọdeidem Moses?
Utu ke Moses ndiyak odudu oro ẹkenọde enye okpon enye ibuot, enye ekeberi edem ke Abasi, iberike ke ifiọk idemesie. Ikpanaha iyak odudu oro ẹnọde nnyịn m̀mê se ikemede ndinam okpon nnyin ibuot; utu ke oro, nnyịn ikpọbuọt idem ye Jehovah. (N̄ke 3:5, 6)—2/1, page 5.
Mbon oro ẹnamde ẹset ẹdidụn̄ ke m̀mọ̀n̄?
Ibat ibat owo—144,000—ẹdiset ikodụn̄ ke heaven. Edi ẹdinam mbon eken ẹset ẹdidu uwem ke isọn̄ ẹnyụn̄ ẹnyene idotenyịn edidụn̄ mi ke nsinsi.—3/1, page 6.
Nso ke ndidọhọ ke nditọ Israel ‘ikanaha mbobi ke esịt’ ọwọrọ? (Jer. 9:26)
Ọwọrọ ke mmọ ẹma ẹnen̄ede ẹsọn̄ ibuot ndien ke akana ẹsion̄o mme n̄kpọ oro ẹkenamde esịt mmọ okûkop item ẹfep, oro edi, ndision̄o ekikere, udọn̄, ye uduak emi mîkemke ye uduak Abasi mfep ke esịt mmọ. (Jer. 5:23, 24)—3/15, page 9-10.
Didie ke Jesus ekenịm uwụtn̄kpọ nte owo emi okopde inem uwem?
Enye ama esịn idem anam uduak Abasi. Enye ama enen̄ede ama Ete esie onyụn̄ ama mme owo. Ntem, Jesus ama ọfiọk ke Ete imọ ama imọ onyụn̄ enyịme se imọ inamde. Se ikanamde enye okop inem uwem edi oro.—4/1, page 4-5.
Nso ye nso isịne ke ikpehe esop Abasi eke isọn̄?
Otu Ukara, mme kọmiti n̄kọk itieutom, mme esenyịn oro ẹsan̄ade-san̄a, mme otu mbiowo, mme esop, ye mme asuanetop kiet kiet.—4/15, page 29.
Ntak emi ikemede ndidọhọ ke Abasi ndikosobo mme idiọkowo iwụtke ke enye edi ibak?
N̄kpa idiọkowo idatke Jehovah esịt. (Ezek. 33:11) Abasi owụt ke mbemiso isobode mme idiọkowo, ke imesikpe mmọ ubọk ite ẹkabade esịt. Emi ekeme ndinam idori enyịn ndibọhọ nsobo ini iso.—5/1, page 5-6.
Ndi nditọ Israel ẹkesikọkọn̄ mme abiatibet ke eto ẹwot?
Baba. Ndusụk idụt ke eset ẹma ẹsinam oro, edi nditọ Israel ikesinamke. Ke ini ẹkewetde N̄wed Abasi Usem Hebrew, ẹma ẹsibem iso ẹwot mme anamidiọk, utọ nte nditọn̄ọ mmọ ke itiat. (Lev. 20:2, 27) Ekem ẹma ẹkeme ndiyịri okpo mmọ ke eto man ẹsịn mbon en̄wen ndịk ke idem.—5/15, page 13.
Ntak emi emem mîdụhe ke ererimbot emi-e?
Kpa ye oro mme owo ẹnamde ediwak n̄kpọ, owo ikobotke mmọ man mmọ ẹkara idem. (Jer. 10:23) Satan akara ererimbot emi, ntre owo ikemeke ndida emem ndi. (1 John 5:19)—6/1, page 16.