Nte Ẹdiade Inọ ke Ukara

Udia-inọ okpon etieti ke ukara. Ndusụk ikpọ owo ukara ẹsida akamba itie oro mmọ ẹkamade ẹforo. Idịghe mfịn ke utọ n̄kpọ emi ọkọtọn̄ọ. Ke uwụtn̄kpọ, ibet do ke Bible emi ọdọhọde owo okûbọ ubọkedem ke ini ẹkpede ikpe, ndien emi owụt ke utọ n̄kpọ emi ama ododu ke se ikande isua 3,500 emi ẹkebede. (Exodus 23:8) Edi udia-inọ ikụreke ke ndibọ ubọkedem. Ndusụk ikpọ owo ukara ẹsiyịp n̄kpọ, ẹda n̄kpọ ukara ẹnam n̄kpọ ẹnọ idemmọ, mîdịghe ẹyịp okụk. Mmọ n̄ko ẹsida ikpọ itie oro mmọ ẹkamade ẹfọn mme ufan ye iman mmọ mfọn.

Imọfiọk ke mme owo ẹkeme ndidia inọ ke mbubehe ekededi, edi etie nte ikpọ owo ukara ẹdia inọ ẹkan. Itieutom emi ẹsinamde ẹdiọn̄ọ idụt oro ẹdiade inọ ẹkan ke ofụri ererimbot ẹkedọhọ ke 2013 ẹte ke mme owo ke ofụri ererimbot ẹnịm ke mbon oro ẹdiade inọ ẹkan ẹdi n̄ka mbre ukara, mme bodisi, ikpọ owo ukara, mme ọbọpibet, ye mme ebiereikpe. Se se ẹtịn̄de ẹban̄a udia-inọ mi ke nsio nsio itie ke ererimbot.

• AFRICA: Ke 2013, ẹdọhọ ke ikpọ owo ukara 22,000 ke South Africa ẹma ẹdia inọ.

• SOUTH AMERICA: Ke 2012, ẹma ẹbiere ikpe ẹnọ ikpọ owo 25 ke Brazil emi ẹkemende okụk ukara ẹnọ mme owo man ẹda ye mmọ ke ukara. Kiet ke otu mbon oro ẹkebierede ikpe emi ẹnọ ekedi udiana adaibuot ukara.

• ASIA: Ke 1995, akamba ufọkurua ama ọduọ owot owo 502 ke Seoul ke South Korea. Ndụn̄ọde oro ẹkenamde ama owụt ke mbon oro ẹkekamade utom ufọk oro ẹma ẹnọ ikpọ owo obio ubọkedem man ẹyak mmọ ẹda mme n̄kpọ oro mîsọn̄ke idem ẹbọp ufọk oro.

• EUROPE: Cecilia Malmström emi edide akwa owo European Commission Home Affairs ọdọhọ ke udia-inọ okpon etieti ke Europe onyụn̄ ọdọhọ ke etie nte ukara inamke se akpanade ẹnam man ẹtre udia-inọ.

Ọsọsọn̄ ndinam ikpọ owo ukara ẹtre udia-inọ. Profesọ Susan Rose-Ackerman, ataifiọk emi esede aban̄a nte ẹkpetrede udia-inọ, ọkọdọhọ ke edieke ẹyomde nditre udia-inọ, ke ana “ukara ẹnen̄ede ẹkpụhọde nte mmọ ẹnamde n̄kpọ.” Okposụkedi etiede nte udia-inọ iditreke, Bible owụt ke eyetre.