Obio Ubọn̄ Abasi—Ukara Emi Udia-Inọ Mîdidụhe

Ndi ukereke ke sia mme owo ẹsidiade inọ, ke mme andikara emi ẹnyụn̄ ẹdide owo ẹdinam kpa ntre? Edieke edide ntre, ọwọrọ ukara emi udia-inọ mîdụhe ikemeke ndidi ukara owo. Bible etịn̄ aban̄a ukara emi udia-inọ mîdidụhe, oro edi, Obio Ubọn̄ Abasi, kpa ukara emi Jesus ekekpepde mme mbet esie ete ẹsibọn̄ akam ẹben̄e.—Matthew 6:9, 10.

Obio Ubọn̄ Abasi edi ata ukara emi ẹtiede ke heaven ẹkara. Enye edida itie ukara owo. (Psalm 2:8, 9; Ediyarade 16:14; 19:19-21) Kiet ke otu n̄kpọ emi Obio Ubọn̄ Abasi edinamde inọ nnyịn edi ndisio udia-inọ mfep ke ukara. Yak ineme n̄kpọ itiokiet emi ẹwụtde ke emi eyetịbe.

1. ODUDU UKARA

MFỊNA: Mbio obio ẹsitịp okụk ẹnọ ukara ẹda ẹse ẹban̄a obio. Mmọ ẹsiwak ndinam emi ke ndikpe tax. Nte okụk tax emi odụkde edi, ẹsidọn̄ ikpọ owo ukara ndiyịp okụk emi. Ndusụk owo n̄ko ẹsiyom ẹsio urua tax ẹnọ mmimọ, ntre mmọ ẹsinọ ikpọ owo ukara ubọkedem. Ukara ẹsisịn urua tax man ẹnyene okụk oro akatakde mmọ do, ndien emi esinam ẹdọdiọn̄ ẹdia inọ. Mbon oro mîsitieneke inam utọ n̄kpọ emi ẹsinen̄ede ẹbọ ufen ke utọ ini emi.

NTE MFỊNA EMI EDITREDE: Ata Ọkpọsọn̄ Abasi emi ekerede Jehovaha ọnọ odudu ẹda ẹnam kpukpru n̄kpọ ke Obio Ubọn̄ esie. (Ediyarade 11:15) Idịghe okụk tax mme owo ke ẹda ẹnam n̄kpọ ke Obio Ubọn̄ Abasi. Utu ke oro, sia Abasi “ọsọn̄de odudu” onyụn̄ enen̄erede atat ubọk, enye oyokụt ete ke kpukpru owo ke Obio Ubọn̄ imọ ẹnyene ofụri se inanade mmọ.—Isaiah 40:26; Psalm 145:16.

2. ANDIKARA

MFỊNA: Susan Rose-Ackerman oro iketịn̄de iban̄a ke akpa ibuotikọ ọdọhọ ke edieke ẹyomde nditre udia-inọ, ke “ana ẹtọn̄ọ ye ata ikpọ owo ukara.” Ke ini mme andikara ẹdomode ndinam mme bodisi ye mbon emi ẹsimụmde mme-akama-n̄kpọmbet ẹtre udia-inọ, edi inamke ata ikpọ owo ukara n̄kpọ ke ini mmọ ẹdiade inọ, mme owo isinyeneke mbuọtidem ke idem mme andikara. Ndien yak andikara ọfọn nte ọfọfọn, idụhe nte enye mîdinamke idiọk sia kpukpru nnyịn ikadada idiọkn̄kpọ imana. Bible ọdọhọ ke “baba edinen owo kiet idụhe ke isọn̄ eke anamde eti mînyụn̄ inamke idiọkn̄kpọ.”—Ecclesiastes 7:20.

NTE MFỊNA EMI EDITREDE: Jesus Christ, emi Abasi emekde ete akara Obio Ubọn̄ imọ, itiehe nte mme owo emi mîfọnke ima; idiọkn̄kpọ isidọn̄ke enye. Jesus ama owụt emi ke ini enye ekebede idomo Satan. Satan, emi edide andikara ererimbot emi, ama ọdọhọ ke edieke enye ọduọde ke isọn̄ atuak ibuot ọnọ imọ, ke iyọnọ enye “kpukpru mme obio ubọn̄ ererimbot ye ubọn̄ mmọ.” Idụhe ubọkedem emi akanam okponde ntem. (Matthew 4:8-10; John 14:30) Idem ke ini ẹkekọn̄de Jesus ke eto ndutụhọ, enye ama enen̄ede ebiere ndisọn̄ọ nda ye Abasi tutu esịn ndin̄wọn̄ n̄kpọ emi okpokosụhọrede ubiak esie, edi emi ekpeketịmerede enye mfre. (Matthew 27:34) Idahaemi Abasi ama akanam enye eset ọnyọn̄ okodu uwem ke heaven mi, Jesus owụt ke imọ imenen̄ede idot ndikara Obio Ubọn̄ oro.—Philippi 2:8-11.

3. OWO KIET ISIKARAKE IBỊGHI

MFỊNA: Ediwak idụt ẹsimek mbufa owo ẹdọn̄ ke ukara ke ini ke ini, ndien ẹdọhọ ke ẹsida ini emi ẹsion̄o mbon oro ẹketiede ke ifụm ukara ẹdia inọ. Edi idem ke mme idụt emi ẹforode, ẹsisụk ẹdadia inọ ke mme ini emi ẹsan̄ade ẹyom mbon oro ẹdisịnde n̄wed inọ mbon emi ẹyomde ndikara ẹnyụn̄ ẹdia n̄ko ke usen usịnn̄wed. Mme imọ owo ẹsinọ mbon emi ẹyomde ndikara okụk man ẹda ẹyom mbon oro ẹdisịnde n̄wed inọ mmọ. Oro anam mme imọ owo emi ẹsiwak ndibiere n̄kpọ nnọ mme andikara.

John Paul Stevens, emi edide ebiereikpe ke Esop Anana Ntọn̄ ke United States, ọkọdọhọ ke mme imọ owo ndibiere n̄kpọ nnọ mme andikara isiyakke ukara ọfọn, isinyụn̄ iyakke mme owo ẹnyene mbuọtidem ke idem mme andikara. Imosụk ise ediwak owo ke ererimbot ẹdọhọde ke n̄ka mbre ukara ẹdia inọ ẹkan.

NTE MFỊNA EMI EDITREDE: Sia Obio Ubọn̄ Abasi edikarade ke nsinsi, ọwọrọ owo idisan̄ake aba iyom mbon oro ẹdisịnde n̄wed inọ owo, owo idinyụn̄ idiaha inọ ke usen usịnn̄wed sia utọ n̄kpọ oro ididụhe aba. (Daniel 7:13, 14) Sia edide Abasi emek owo emi edikarade ke Obio Ubọn̄ emi, mme owo ikemeke ndidorode enye ke ukara. Ndien se Obio Ubọn̄ emi edinamde ọyọfọn ye mme owo ke nsinsi sia ukara emi edidu ke nsinsi.

4. IBET

MFỊNA: Owo ekeme ndikere ke ndibọp mbufa ibet ekeme ndinam ukara ọfọn. Edi nta mme anam-ndụn̄ọde ẹdọhọ ke ndibọp mbufa ibet ẹsikam ọnọnọ mme owo ifet ndidia inọ. N̄ko, ndibọp ibet emi ẹkerede ke ayanam ẹtre udia-inọ esikpa ediwak n̄kpọ, edi emi isitreke udia-inọ nte ẹkekerede.

NTE MFỊNA EMI EDITREDE: Mme ibet Obio Ubọn̄ Abasi ẹnen̄ede ẹfọn ẹkan mme ibet ukara owo. Ke uwụtn̄kpọ, utu ke nditeteme owo kpukpru se enye akpanamde ye se enye mîkpanamke, Jesus ọkọdọhọ ke Matthew 7:12 ete: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” Mme ibet Obio Ubọn̄ Abasi ẹban̄a se owo akpanamde ye ntak emi owo akpanamde n̄kpọ, ndien se ikam idide akpan n̄kpọ ikan edi emi. Jesus ọkọdọhọ ete: “Afo enyene ndima mbọhọidụn̄ fo nte idemfo.” (Matthew 22:39) Abasi ekeme ndifiọk se isịnede owo ke esịt. Ntre, enye ekeme ndifiọk mbon oro ẹnịmde ibet emi ye mbon oro mînịmke.—1 Samuel 16:7.

5. SE ISINAMDE ẸNAM N̄KPỌ

MFỊNA: Se isinamde mme owo ẹdia inọ edi idiọkitọn̄ ye ibụk. Ikpọ owo ukara ye mme owo ke obio ẹsinyene mme idiọk edu emi. Ke akpa ibuotikọ, ima itịn̄ iban̄a akamba ufọkurua oro ọkọduọde owot mme owo ke Seoul. Ikpọ owo ukara ẹma ẹbọ mbon oro ẹkekamade utom ufọk oro ubọkedem. Mbon oro ẹkekamade utom oro ẹma ẹdiọn̄ọ ke emem urua ndinọ ubọkedem akan ndidep nti n̄kpọ nda mbọp ufọk oro ọfọn.

Ntem, man ẹtre udia-inọ, ana ẹkpep mme owo nditre idiọkitọn̄ ye ibụk. Edi ukara owo ikemeke ndinọ utọ ukpep emi, inyụn̄ iyomke-yom ndinọ.

NTE MFỊNA EMI EDITREDE: Obio Ubọn̄ Abasi ke ekpep mme owo nte ẹkpetrede mme ido emi ẹsinamde ẹdia inọ.b Utọ ukpep emi an̄wam mme owo “ẹkabade ẹdi obufa,” oro edi, ẹkpụhọde nte mmọ ẹdude uwem. (Ephesus 4:23) Mmọ ẹfiọk ke idiọkitọn̄ ye ibụk ifọnke, ntre mmọ ẹyụhọ ye se mmọ ẹnyenede ẹsinyụn̄ ẹkere ẹban̄a mbon en̄wen.—Philippi 2:4; 1 Timothy 6:6.

6. MME OWO

MFỊNA: Ọkpọkọm n̄kpọ ọfọn didie, ọkpọkọm ẹnyụn̄ ẹkpep mme owo ido adan̄a didie, ndusụk owo ẹdisụk idọdiọk. Nta mme anam-ndụn̄ọde ẹdọhọ ke oro anam ukara owo mîkemeke nditre udia-inọ. N̄kukụre se ukara owo ẹkemede ndinam edi ndinam udia-inọ osụhọde ubọk.

NTE MFỊNA EMI EDITREDE: Esop Edidiana Mme Idụt emi ẹsede ẹban̄a nte ẹkpetrede udia-inọ ẹdọhọ ke edieke ẹyomde udia-inọ etre, ke akpana ukara ẹdọhọ mme owo ẹsitịn̄ akpanikọ ẹsinyụn̄ ẹnam utom mmọ ọfọn. Se esop emi ẹdọhọde emi idiọkke, edi Obio Ubọn̄ Abasi idọhọke-dọhọ kpọt, se ẹyomde ẹto owo ekededi emi oyomde ndidụk Obio Ubọn̄ emi edi oro. Bible ọdọhọ ke “mbon idiọkitọn̄” ye “mme osu nsu” ididụkke Obio Ubọn̄ Abasi.—1 Corinth 6:9-11; Ediyarade 21:8.

Mme owo ẹkeme ndikpep ndinam se Abasi ọdọhọde emi, kpa nte akpa mme Christian ẹkenamde. Ke uwụtn̄kpọ, ke ini mbet emi ekerede Simon ọkọnọde mme apostle okụk ete ẹnọ imọ edisana spirit, mmọ ẹma ẹsịn ubọkedem emi ẹnyụn̄ ẹdọhọ enye ete: “Kabade esịt kpọn̄ idiọkn̄kpọ fo emi.” Ke Simon ama okokụt ke se idọn̄de imọ emi ọdiọk onyụn̄ ekeme ndisịn imọ ke fehesan̄, enye ama eben̄e mme apostle ete ẹkpe Abasi ubọk ẹnọ imọ man ikeme nditre utọ ido emi.—Utom 8:18-24.

SE AKPANAMDE MAN ODỤK OBIO UBỌN̄ ABASI

Afo emekeme ndidụk Obio Ubọn̄ Abasi, inamke n̄kpọ m̀mê oto m̀mọ̀n̄. (Utom 10:34, 35) Ke ẹkpep mme owo ke ofụri ererimbot ẹban̄a Obio Ubọn̄ Abasi ye se mmọ ẹkpenamde man ẹtiene ẹdụk. Mme Ntiense Jehovah ẹyema ndiwụt fi nte mmọ ẹsikpepde mme owo Bible ke mfọn, ọkpọkọm oyom ndikpep minit duop kpọt ke urua. Kiet ke otu se edikpepde edidi “eti mbụk obio ubọn̄ Abasi,” ndien emi esịne nte Abasi editreke udia-inọ ke ukara. (Luke 4:43) Mbọk yom usụn̄ kụt Mme Ntiense Jehovah ke edem mbufo mîdịghe ka ikpehe Intanet nnyịn emi jw.org/efi.