Nam Mbon En̄wen Ẹnyene Idotenyịn Nsinsi Uwem
1 Okposụkedi owo ama okoyom mme usụn̄ ndinam usọn̄ okûsọp edi nnyụn̄ nnam ini uwem esie ọniọn̄, usọn̄ ye n̄kpa ẹsụk ẹdi se owo mîkemeke ndifep. Nnyịn iwụt esịtekọm didie ntem nte ke Bible anam an̄wan̄a ntak mme owo ẹkọride ẹsọn̄ ẹnyụn̄ ẹkpade, ọkọrọ ye nte ẹdibiatde ndiọi utịp usọn̄ ẹdinyụn̄ ẹsiode n̄kpa ẹfep. Ẹnọ mme akpanikọ ẹmi ke usụn̄ oro ẹkemede ndinịm ke akpanikọ ke n̄wed Ifiọk Oro Adade Osịm Nsinsi Uwem. N̄wed oro ọbọrọ n̄kpọsọn̄ mbụme ẹban̄ade uwem ye n̄kpa in̄wan̄în̄wan̄, emende andikot owụt ini emi ẹdifiakde ẹwụk Paradise.
2 Ke March nnyịn idinọ n̄wed Ifiọk ye uduak editọn̄ọ mme ukpepn̄kpọ Bible. (Matt. 28:19, 20) Ekem nnyịn iyafiak ika ibịne kpukpru mbon oro ẹkewụtde udọn̄ ke etop Obio Ubọn̄. Ke usụn̄ emi nnyịn imekeme ndinam mbon en̄wen ẹnyene idotenyịn nsinsi uwem. (Titus 1:1, 2) Man ọyọhọ emi, afo emekeme ndikụt nte mme ekikere ẹtienede mi ẹdide n̄kpọ un̄wam.
3 Ke anamde akpa ediwaha, afo emekeme ndibụp mbụme emi:
◼ “Nte akanam afo emekere aban̄a ntak emi mme owo ẹyomde anyan uwem? [Bet ibọrọ.] Mbon Buddha, mme Christian, mbon Hindu, mbon Muslim, ye kpukpru mbon eken ẹnyene idotenyịn ke uwem ke owo ama akakpa.” Kụbọde n̄wed Ifiọk ka ibuot 6, “Ntak Emi Nnyịn Ikọride Isọn̄ Inyụn̄ Ikpade?,” nyụn̄ kot ikpehe ekikere 3. Buen ikọ ke mme itien̄wed Abasi oro ẹsiakde ẹsịn. Ke etịn̄de aban̄a mbụme iba oro ke utịt ikpehe ekikere oro, bụp enyeneufọk m̀mê enye akpama ndikụt ibọrọ ke idem esie. Edieke enye amade oro, ka iso neme ikpehe ekikere ifan̄ efen. Ẹtọn̄ọ ukpepn̄kpọ! Mîdịghe ntre, nọ n̄wed ke etịbe oro ẹsinọde man enye okot, nyụn̄ nam ndutịm ndifiak n̄ka, ke n̄kpọ nte usen kiet m̀mê iba ebede, ndineme mme ibọrọ.
4 Ke afiakde aka ebịne n̄wed “Ifiọk” oro ekenịmde, afo emekeme ndidọhọ:
◼ “Mmafiak ndi ndineme mbụme iba oro ẹban̄ade n̄kpa oro nnyịn mîkọbọrọke.” Ti enyeneufọk mme mbụme oro. Ekem neme ntọt oro odude ke ibuot 6 ke idak ekpri ibuotikọ oro “Ubi Ubi Ediomi.” Ọkọn̄ọde ke mme idaha, ka iso ke ukpepn̄kpọ oro mîdịghe da akpatre mbụme ke utịt ikpehe ekikere 7 sịn itiat idakisọn̄ nọ ini efen. Nam mme akpan ndutịm ndifiak n̄ka. Nọ enyeneufọk n̄wedikot, nyụn̄ tịn̄ ibio ibio ban̄a nte ẹsinịmde mme mbonoesop. Nọ enye ufiop ufiop ikot ndidụk.
5 Edide ke utom eke enyịnusụn̄ ke enyịnusụn̄ m̀mê ke edinọ ikọ ntiense ido nneme, afo emekeme nditọn̄ọ nneme ke ndidọhọ:
◼ “Nte akanam afo emekere m̀mê nso ke ini iso akama ọnọ nnyịn ye isọn̄? [Bet ibọrọ.] Bible etịn̄ aban̄a ini iso ke ikọ kiet—Paradise! Enye anam an̄wan̄a nte ke editọn̄ọ, Abasi ama anam ikpehe kiet ke isọn̄ edi ediye paradise emi enye ekesịnde ebe ye n̄wan emi enye okobotde. Akana mmọ ẹyọhọ ofụri isọn̄, sụn̄sụn̄ ẹnamde enye akabade edi paradise. Tịm fiọk edinam an̄wan̄a emi aban̄ade nte anade edi enye eketie ntre.” Kụbọde n̄wed Ifiọk ka page 8, nyụn̄ kot ikpehe ekikere 9, ke idak ekpri ibuotikọ oro “Uwem ke Paradise.” Ekem neme mme akpan n̄kpọ oro ẹdude ke ikpehe ekikere 10, nyụn̄ kot itien̄wed Abasi oro ẹsiakde ẹsịn, Isaiah 55:10, 11. Dọhọ ke iyaka iso ke nneme aban̄ade nte uwem ke Paradise oro ẹdifiakde ẹwụk editiede ndinyụn̄ n̄kụre ikpehe ekikere 11-16 ọtọkiet. Mîdịghe sịn udọn̄ nọ owo oro ndikot enye ke idem esie, nyụn̄ diomi ndifiak nsobo nnyụn̄ nneme enye.
6 Edieke mûkọtọn̄ọke ukpepn̄kpọ ke akpa ediwaha, afo emekeme ndinam ntre ke mfiakn̄ka ebe ke ndidọhọ:
◼ “Nte iketịn̄de iban̄a ke akpatre nneme nnyịn, edi uduak Abasi nte ofụri isọn̄ akabade edi paradise. Oro edemede mbụme oro, Paradise editie didie?” Kụbọde n̄wed Ifiọk ka ibuot 1, nyụn̄ kpep ikpehe ekikere 11-16, ke idak ekpri ibuotikọ oro “Uwem ke Paradise Oro Ẹfiakde Ẹwụk.” Ke oro ebede wụt ndise oro odude ke page 4-5, nyụn̄ wụt owo oro m̀mê enye akpama ndidu ke utọ ndiye n̄kann̄kụk oro. Ekem kot akpa udịmikọ ikpehe ekikere 17 ke page 10. Ọkọn̄ọde ke idaha, ka iso ke ukpepn̄kpọ mîdịghe dọhọ ke imọ ima ifiak idi iyanam an̄wan̄a se ẹyomde man owo odu ke Paradise oro ẹfiakde ẹwụk. Nọ n̄wedikot, nam ndutịm mbonoesop an̄wan̄a, nyụn̄ nọ owo oro ufiop ufiop ikot ndidụk ke Ufọkmbono Obio Ubọn̄.
7 N̄wed Ifiọk edi ata eti n̄kpọutom ndikama ke ndiyarade “nsinsi uwem oro” Abasi ọn̄wọn̄ọde nnọ mbon en̄wen. Afo ndinịm ukpepn̄kpọ Bible ye mme owo ekeme ndinam mmọ ẹnyene utịbe utịbe idotenyịn emi Abasi “emi mîkemeke ndisu nsu” ọnọde.