Nte Usụn̄ Eberede Idahaemi Ọnọ Fi Ndisiak Usụn̄?
1 Ibuotikọ isua nnyịn eke 1999 eti nnyịn nte ke nnyịn isụk idu ke “usen edinyan̄a” Jehovah. (2 Cor. 6:2) Edi usen edinyan̄a esie ọyọsọp ndikụre. Ekem “usen ikpe” esie ọyọtọn̄ọ. (2 Pet. 2:9) Ke adan̄aemi Jehovah akade iso ndinọ ubonowo ifet ndinyene edinyan̄a, edi n̄kpọ nduaidem didie ntem ndikụt nte ediwak ibat owo oro ẹkade-ka iso ndikọri ẹyerede ikot!
2 Ikọt Jehovah ẹmenam n̄kpọ ẹban̄a n̄kpọ-ata eke edisịm mbon oro ẹnyenede udọn̄ mbemiso ini ebede akaha. Ye ediwak mme asuanetop Obio Ubọn̄, emi ọwọrọ edidụk utom usiakusụn̄. Nte usụn̄ eberede idahaemi ọnọ fi ndisiak usụn̄? Ntak emi nnyịn ibụpde?
3 Esịtekọm Oro Ẹwụtde: Nte ẹketọtde ke Utom Obio Ubọn̄ Nnyịn eke January 1999, ẹsụhọde ibat hour oro ẹyomde ẹto mme asiakusụn̄ ofụri ini ye eke unọ un̄wam. Man ẹsịm obufa ibat hour ẹyomde mi, oyom mme asiakusụn̄ ofụri ini ẹsịn hour 70 ke utom ukwọrọikọ mmọ kpukpru ọfiọn̄ man ẹsịm ofụri ibat hour 840 ke isua utom kiet. Mme asiakusụn̄ unọ un̄wam ẹyebiat hour 50 ke utom ukwọrọikọ ke ọfiọn̄ kiet kiet. Ẹmi ẹdi ibat ibat ke otu ediwak ikọ esịtekọm oro ẹbọde ke ntak ukpụhọde emi:
“Nso eti enọ oro otode Ete nnyịn eke heaven ke emi edi ntem!”
“Ikọ idụhe ndida ntịn̄ idatesịt, ima, ye esịtekọm oro ẹnyenede ẹban̄a ndutịm emi!”
“Enye eyenen̄ede anam edi mmemmem ndikụre se inyenede ke ndutịm nnyịn!”
“Akam nnyịn edi nte ediwak owo ẹdụk utom ukwọrọikọ uyọhọ ini idahaemi ẹnyụn̄ ẹdara mme edidiọn̄ oro ẹtode edinam n̄kpọ Jehovah ke usụn̄ oro okponde.”
4 Nte nnyịn isan̄ade ikpere ata utịt usen edinyan̄a Abasi emi, etịm an̄wan̄a nte ke Jehovah oyom ikọt esie ẹfiori akpatre ọkpọsọn̄ mfiori itoro. Udomo ye odudu etop emi ọkọri ebe ke (1) enyene-iwụk n̄kọri ke ibat mme anditan̄a etop Obio Ubọn̄ ye (2) owo kiet kiet ndiyom ndikọri se enye ekemede ndinam ke utom ukwọrọ Obio Ubọn̄. Jehovah, enye emi “ọnọde n̄kọri,” amanam ẹkụt unen ke usụn̄ mbiba ebe ke ndidiọn̄ unyịme unyịme edu eke kpukpru mbon ẹmi ẹnyịmede edinyan̄a.—1 Cor. 3:6, 7; Ps. 110:3.
5 Ẹkûyak Ọwọrọ Ikpîkpu: Ekedi se iban̄ade usen edinyan̄a Jehovah akanam Paul ọnọ mme ekemmọ Christian item ete: “Nte mme abuana-utom ye Abasi, nnyịn ikpe mbufo ubọk ite, ẹkûyak mfọn Abasi, emi mbufo ẹkebọde, ọwọrọ ikpîkpu.” Nnyịn ‘idiyakke ọwọrọ ikpîkpu’ edieke nnyịn idade ini emi nte “ini mfọn-ido” ndinam n̄kpọ mban̄a edinyan̄a mbon efen ke kpukpru ifet. (2 Cor. 6:1, 2) Mfịn, ikọ Paul etịm edi usọp usọp akan. Mme Christian oro ẹwụtde ima ofụri esịt ẹnọ Jehovah ẹbat ke edi ifetutom ndibuana ọyọhọ ọyọhọ nte ẹkekeme ke utom ukwọrọikọ oro enye ọnọde nnyịn. Nte afo emekeme ndibuana ata ọyọhọ ọyọhọ ke utom ukwọrọikọ nte asiakusụn̄ ofụri ini?
6 Enye Edi Eti Utịtmbuba: Ke Nigeria, utịtmbuba nnyịn edi ndikụt mme asiakusụn̄ ofụri ini 25,000 ẹnamde utom ke September 1. Nnyịn inịm ite ke emi edi utịtmbuba oro owụtde eti ibuot emi ẹnyụn̄ ẹkemede ndisịm. Ntak inyenede mbuọtidem ntre? Ke March 1997 nnyịn ima ikụt nditọete iren ye iban 19,218 oro ẹkenamde usiakusụn̄ unọ un̄wam, ndien ke April 1998 se ikperede 17,000 ẹma ẹnam ntre. Ata ediwak ẹketọt hour 60—sụk hour 10 ọwọrọ ọkpọn̄ obufa ibat oro ẹyomde ẹto mme asiakusụn̄ ofụri ini! Idem ọkpọkọm owo 4,000 kpọt ke otu mbon oro ẹkenamde usiakusụn̄ unọ un̄wam ẹsịn enyịn̄ nte mme asiakusụn̄ ofụri ini mbemiso utịt isua utom emi, nnyịn imekeme ndida asiakusụn̄ uyọhọ ini 25,000 m̀mê awakde akan oro ntọn̄ọ September!
7 Ẹyom Ndutịm: Nte etie fi nte hour 70 ke utom an̄wautom ke ọfiọn̄ ọsọn̄ ndisịm? Eyedi ndikere ke afan̄ eke hour 17 ke urua ayan̄wam. Adade uwụtn̄kpọ ndutịm ke page oro etienede, domo ndinyene ndutịm usiakusụn̄ ofụri ini oro edikemde ye mme ọkpọkpọ idaha fo. Ke ndinam ndutịm emi, neme ye mme asiakusụn̄ oro ẹnyenede mbufiọk ndikop item mmọ kaban̄a nte mmọ ẹnamde utom usiakusụn̄ ada ukem ukem ye mbiomo ubon. Bụp esenyịn circuit fo nte mme asiakusụn̄ ke circuit ẹdiomide utom mmọ ke urua kiet kiet. Ekem beri edem ke Jehovah ndidiọn̄ mme ndutịm fo ndisiak usụn̄.—N̄ke 16:3.
8 Nam Edi Iso Utom Ubon: Nte afo emekere aban̄a ndinam usiakusụn̄ edi iso utom ubon? Afo emekeme nditie nnyụn̄ nneme nte ubon nte—otode eti ndutịm ye edidianakiet—andibuana kiet m̀mê iba ke ubon ẹkpekemede ndisiak usụn̄. Nte an̄wan̄ade, ndusụk owo ẹyekụt nte ke edidụn̄ọde mme idaha mmimọ ke esịt akpanikọ iyakke mmọ ẹnam usiakusụn̄ ofụri ini idahaemi. Ke edide ntre, nam usiakusụn̄ edi utịtmbuba ini iso fo. Edi tọn̄ọ ndinam ndutịm mbịne akpan usenọfiọn̄ emi editọn̄ọde usiakusụn̄. Iso-ọfọn emekeme ndisiak usụn̄ unọ un̄wam ediwak ini ke isua man ebe odụk utom usiakusụn̄ ofụri ini.
9 Se iwakde ibe asiakusụn̄ ofụri ini 22,000 ẹmi enyịn̄ ẹdude idahaemi ke n̄wed ke Nigeria ẹdu ke nsio nsio idaha. Idịghe kpukpru ẹnen̄ede ẹkop nsọn̄idem, ndien ediwak ẹnyene ubon ye mme mbiomo okụk. Ndusụk ẹsọn̄ ke isua emana, ke adan̄aemi mmọ eken ẹdide n̄kparawa oro mîdọhọ ndọ. Ediwak ẹdi nditọete oro ẹnyenede mbiomo ubon ye eke esop. Kpukpru mmọ “ẹdedep ifet” ndisiak usụn̄, emi ke ediwak idaha ọwọrọde edidu mmemmem uwem ẹnyụn̄ ẹtịmde ẹkop uyụhọ.—Col. 4:5.
10 Ndi Oyom Anam Edi Mmemmem? Ndinam uwem fo edi mmemmem ekeme ndidi ukpọhọde oro ebererede usụn̄ ọnọ fi ndisiak usụn̄. Nte uwem fo etie nte akwa ufọk emi enyenede ediwak ubet ye n̄kpoduoho oro mînyeneke ufọn, emi oyomde ekese ini, okụk, ye utom man ese aban̄a? Ke edide ntre, ndikpụhọde nda ekekem ye ukeuke idaha ekeme ndiyak fi asiak usụn̄. Nte afo emekeme ndisụhọde udomo ini emi abiatde ke utom idịbi udia? Nte emekeme ndidep ini nto edinam oro mîdịghe akpan n̄kpọ m̀mê nditịm n̄wụt edida ukem ukem ke udomo ini abiatde ke unọ idem inemesịt?
11 Bible, ke 1 Timothy 6:8, ọnọ nnyịn item ete: “Edieke nnyịn inyenede se idiade ye se idade ifụk iferi, iyokụt ite oro ekem.” Ndiyụhọ ye esisịt edi akpan n̄kpọ ke nnyịn ndinam ofụri ukeme nnyịn ke utom Jehovah onyụn̄ anam edi mmemmem n̄kpọ ndinam udọn̄ n̄kpọ eke spirit edi ebeiso n̄kpọ. (Matt. 6:22, 33) Ke page 104 ke 1998 Yearbook ke mbụkutom ke Japan, ẹnọ ediwak ekikere ẹban̄a ntak oro utọ eti edu usiakusụn̄ emi odude ke idụt oro. Kere ban̄a kiet: “Edi ofụri akpanikọ nte ke ufọk mbon Japan edi ata ukeuke, ntem oyomde esisịt ini ndida ntịm enye, ndien ke ediwak idaha, nte ido edide mmọ ẹdu mmemmem uwem.” Nte oro idịghe se 1 Timothy 6:8 ọwọrọde?
12 Ke ofụri ererimbot, mme asan̄autom Abasi ke ẹkwọrọ eti mbụk ke udomo akade-kaiso ndikọri mbemiso usen edinyan̄a Jehovah esịmde utịt. Nte odotde itoro, ke isua oko se ikperede ndisịm owo 700,000 ke ẹbaharede ukem ukem ẹma ẹbuana ke ndusụk orụk utom usiakusụn̄ ke ọfiọn̄ ke ọfiọn̄. Nte afo emekeme ndinam ukpụhọde ke uwem fo man adiana ye mmọ? Nnyịn imọnọ fi ikot ndidụn̄ọde mme idaha fo ye ntịn̄enyịn ke akam nte afo ọbọrọde mbụme emi: “Nte usụn̄ eberede idahaemi ọnọ fi ndisiak usụn̄?”
[Se Ẹwetde ke Ikpọ Abisi ke page 3]
SE ẸYOMDE: ASIAKUSỤN̄ OFỤRI INI 25,000!
[Mme ekebe ke page 4]
Uwụtn̄kpọ Ndutịm Asiakusụn̄ Ofụri Ini
Se ẹyomde: Hour 17 ke urua
Usen Kiet ke Ufọturua ye Utịturua
Usen Hour
Friday 8
Saturday 6
Sunday 3
Ofụri Ibat Hour: 17
Usen Iba ke Ufọturua ye Saturday
Usen Hour
Tuesday 7
Thursday 7
Saturday 3
Ofụri Ibat Hour: 17
Usen Ita ke Ufọturua ye Sunday
Usen Hour
Monday 5
Wednesday 5
Friday 5
Sunday 2
Ofụri Ibat Hour: 17
Mbubịteyo Iba ye Utịturua
Usen Hour
Monday 3
Wednesday 3
Saturday 8
Sunday 3
Ofụri Ibat Hour: 17
Nam Ndutịm Usiakusụn̄ Ofụri Ini Okwommọ
Usen Hour
Monday
Tuesday
Wednesday
Thursday
Friday
Saturday
Sunday
Ofụri Ibat Hour: 17