Ndutịm Edibọp Ufọkmbono Obio Ubọn̄ Ke Aka Iso
1 Ke Mbono District “Edidianakiet Obio Ubọn̄” oro ẹkenịmde ke 1983 ke United States, ẹma ẹtọt ẹte ke ẹyetịp san̄asan̄a okụk ndida n̄n̄wam ke edibọp nnyụn̄ ndiọn̄ mme Ufọkmbono Obio Ubọn̄ ke ofụri United States ye Canada. Edi nnyịn ikọfiọkke mme edidiọn̄ emi ekpri ndutịm oro ẹketọn̄ọde do edidade edi. Nnyịn ima itọn̄ọ ndikụt ọyọhọ ọyọhọ se Psalm 92:4 ọdọhọde nte odotde ete: “Koro afo, O Jehovah, amadat mi esịt ke utom fo: nyadara ke se ubọk fo anamde.”
2 Nnyịn imenen̄ede ikop idatesịt idahaemi ke se ẹnamde. Ndutịm edibọp Ufọkmbono Obio Ubọn̄ usọp usọp ke ofụri ekondo ke aka iso mfịn. Kpukpru nnyịn imenyene ifet ndibuana ke utom emi ke usụn̄ kiet m̀mê eken. Nnyịn inam emi ebe ke nditịp ekpri m̀mê ediwak okụk man ẹda ẹbọp mme itie utuakibuot efen efen ke ofụri ererimbot. Ediwak nditọete n̄ko ẹnyịme ndida n̄kpọutom ọkọrọ ye ini, ukeme, ye usọ mmọ nnam utom emi. Se inamde ofụri ndutịm emi okụt unen edi ndausụn̄ ye un̄wam Jehovah, ye akpakịp edidiọn̄ esie ke ukeme oro nnyịn isịnde.—Psalm 127:1.
3 Ediwak n̄kọk itieutom ẹtiene uwụtn̄kpọ ndutịm emi ẹketọn̄ọde ẹnọ mme esop ke United States mi. Ke mme Ufọkmbono Obio Ubọn̄ ke ediwak idụt, ekebe odu oro mme asuanetop ẹsisịnde Okụk Ufọkmbono Obio Ubọn̄. Ke United States, Utom Obio Ubọn̄ Nnyịn eke March 1997 ama ọtọt ukpụhọde oro ẹnamde ke ndutịm emi. Enye ọkọdọhọ ete: “Tọn̄ọ nte ẹketọn̄ọ ndutịm Okụk Ufọkmbono Obio Ubọn̄ N̄ka ke 1983, nditọete ẹtat ubọk ẹtịp etịbe, anamde ẹkeme ndinyene okụk nnọ ebuọt ẹda ẹbọp Ufọkmbono Obio Ubọn̄. Kan̄a ke emi, n̄kpọ nte esop 2,700 ke United States ẹbọbọ ufọn ẹto ndutịm emi. Ediwak esop ikpekemeke ndibọp mbufa Ufọkmbono Obio Ubọn̄ m̀mê ndidiọn̄ mbon oro ẹyomde ẹdiọn̄ ke ndutịm emi mîkpodụhe. Idahaemi oyom ẹnọ mme esop oro ẹdude ke mme idụt emi n̄kpọ ọsọn̄de ndusụk ke otu okụk oro ẹtịpde mi ke ebuọt usọp usọp. N̄ka ye mme esop oro ẹbọde ufọn ẹto etịbe emi ẹnen̄ede ẹwụt esịtekọm ẹban̄a n̄kaiso ibetedem oro mbufo ẹnọde ndutịm emi.”
4 Ntọt oro ọkọnọ mme owo ikot nditiene mbuana ke ndutịm edibọp Ufọkmbono Obio Ubọn̄ usọp usọp. Ẹyeda Okụk Ufọkmbono Obio Ubọn̄ emi n̄ko ẹse ẹban̄a mme udọn̄ nditọete nnyịn ke mme idụt efen, ke adan̄aemi ẹkade iso ndinọ ebuọt man ẹda ẹbọp Ufọkmbono Obio Ubọn̄ ke idụt emi. Ibuotikọ efen ke nsiondi Utom Obio Ubọn̄ Nnyịn eke August 1997 ke United States ọkọdọhọ ete: “Enen̄ede oyom ẹbọp mme Ufọkmbono Obio Ubọn̄ ke ofụri ererimbot. Ke isua utom oro osụk okụrede, ẹma ẹtọn̄ọ mbufa esop 3,288. Ediwak ke otu mme esop emi ẹdu ke Africa, Asia, Ufọt Ufọt ye Edem Usụk America, ye N̄kan̄ Edem Usiahautịn Europe.”
5 Nso idi utịp tọn̄ọ ke ini oro? 2001 Yearbook ọkọtọt ete: “Ẹda ndutịm emi ẹbọp Ufọkmbono Obio Ubọn̄ 453 kan̄a ke idụt 30, ke adan̄aemi ẹsụk ẹkamade utom ubọp Ufọkmbono Obio Ubọn̄ 727 efen efen ke ubọk. [Ke Nigeria, ẹma ẹbọp ẹnyụn̄ ẹyak mbufa Ufọkmbono Obio Ubọn̄ 171 ẹnọ ke isua utom 2002.] Ẹnen̄ede ẹnọ ntịn̄enyịn ke edida mme n̄kpọ ubọpufọk ye ido ubọpufọk n̄kann̄kụk mbọp Ufọkmbono Obio Ubọn̄ ke mme idụt kiet kiet. Ke Kenya, ẹsida itiat oro ẹdọkde ẹsion̄o ke isọn̄ ẹbọp ufọk; ke Togo ẹsiwak ndikama kọrikọri; ke [Nigeria ye] Cameroon ẹsida itiat oro ẹbuakde ye simen ẹbọp, ekem ẹda simen ẹnyọn̄ọ. Ke usụn̄ emi, nditọete n̄kann̄kụk ẹsisọp ẹnyene mme usọ oro ẹyomde man ẹse ẹban̄a mme akpan utom ke ndutịm ubọpn̄kpọ oro ẹnamde ke idụt mmọ.”
6 Ẹkeme ndikụt uyarade edidiọn̄ Jehovah ke ndutịm emi ke akwa ikpehe Africa. Nte afo ẹsede mme ndise ndusụk Ufọkmbono Obio Ubọn̄ oro ẹkebọpde ẹkụre mi, kere nte utọ ubọpn̄kpọ oro otụkde utom Mme Ntiense Jehovah! Ẹkụt emi ke n̄wọrọnda ikpehe ita—edidianakiet itie nditọete ofụri ererimbot nnyịn, utịp oro enye enyenede ke n̄kann̄kụk, ye n̄kọri ke ibat mme andidụk mme mbono esop. Ke adan̄aemi esịne-esịt emi owụtde mme Ufọkmbono Obio Ubọn̄ oro ẹbọpde ke Africa, mme nsiondi Utom Obio Ubọn̄ Nnyịn eke ini iso ẹdiwụk ntịn̄enyịn ke nte ndutịm edibọp Ufọkmbono Obio Ubọn̄ akade iso ke mme ikpehe eken ke ererimbot.
[Mme ndise ke page 3]
CENTRAL AFRICAN REPUBLIC
Bimbo, Bangui
Begoua, Bangui
[Mme ndise ke page 4]
Ukonga, Tanzania
[Ndise ke page 4]
Accra, Ghana
[Ndise ke page 4]
Salala, Liberia
[Ndise ke page 4]
Karoi, Zimbabwe
[Mme ndise ke page 4, 5]
Allada, Benin—akani Ufọkmbono Obio Ubọn̄
Allada, Benin—obufa Ufọkmbono Obio Ubọn̄
[Ndise ke page 5]
Kpeme, Togo
[Ndise ke page 5]
Sokodé, Togo
[Mme ndise ke page 4, 5]
Fidjrosse, Benin
[Ndise ke page 6]
Lyenga, Zambia—akani Ufọkmbono Obio Ubọn̄
[Ndise ke page 6]
Lyenga, Zambia—obufa Ufọkmbono Obio Ubọn̄
[Ndise ke page 6]
Kinshasa, Congo
[Ndise ke page 6]
Musambira, Rwanda