Domo Ndikpụhọde Usụn̄ Unyene Nneme Fo

Ata udọn̄ oro inyenede ke idem mme owo oyonụk nnyịn ndidụn̄ọde mfiọk se mmọ ẹyomde nnyụn̄ n̄wụt mmọ nte Obio Ubọn̄ edikọkde ofụri mfịna oro mmọ ẹsobode. (Phil. 2:4) Kiet ke otu usụn̄ oro ediwak mme asuanetop ẹkụtde ke ẹnyene uforo ke ndikpụhọde nneme mmọ edi ndidọhọ mme enyeneufọk ẹtịn̄ n̄kpọ ẹban̄a mme ndise paradise oro ẹdude ke mme n̄wed nnyịn, utọ nte mbon oro ẹkụtde ke ubọk nnasia page emi. Afo emekeme ndida kiet ke otu ntọn̄ọikọ oro ẹtienede mi nnyene nneme:

◼ “Ndi afo emekere ke tutu amama nnyịn iyokụt ubonowo ẹdarade mme utọ idaha oro ẹwụtde ke ndise emi?”

◼ “Kpukpru nnyịn ikpama nditọ nnyịn ẹdara mme utọ idaha oro ẹwụtde ke ndise emi. Afo ekere ke oyom nso man ẹnyene utọ idaha emi?”

◼ “Ndise emi owụt nte isọn̄ editiede ke ini uduak Abasi adade itie ke isọn̄ ukem nte edide ke heaven. Ndi omokụt n̄kpọ ekededi oro okpụhọrede ye uwem mfịn?”

◼ “Ndi akpama ndidu uwem ke mme idaha oro ẹwụtde mi? [Bet ibọrọ.] Ndi emekere ke emi ayada itie ke eyouwem nnyịn?”

Tịm nọ n̄kpan̄utọn̄ ke ibọrọ owo oro, nyụn̄ fiak bụp enye mbụme kiet m̀mê iba man ọfiọk ekikere esie. Edieke ndusụk owo ẹdọhọde ke mmimọ ikpamaha ndidu uwem ke mme utọ idaha oro ẹwụtde do, m̀mê ke mmimọ inịmke ke utọ n̄kpọ oro eyetịbe, kûsọsọp ubiere ke mmọ inyeneke udọn̄. Da mbufiọk bụp ntak oro mmọ ẹkerede ntre. Ibọrọ mmọ ẹkeme ndiwụt nte mme mfịna oro ubonowo ẹsobode, emi etiede nte owo ikemeke ndikọk, ẹnen̄erede ẹtụk mmọ.—Ezek. 9:4.

Ke ama ọkọfiọk mfịna enyeneufọk, kpụhọ nneme fo ekekem ye idaha oro. Neme akpan ikpehe etop Obio Ubọn̄ oro enen̄erede otụk mfịna esie. Wụt enye itie N̄wed Abasi kiet m̀mê iba oro etịn̄de n̄kpọ oro otụkde mfịna esie. (Se mme ekikere oro ẹdude ke ubọk nnasia.) Yak enye ke idemesie okụt se Ikọ Abasi etịn̄de. Edieke enye owụtde udọn̄, nọ enye n̄wed oro nyụn̄ nam ndutịm ndifiak n̄ka. Ka iso nditịn̄ ban̄a se ẹkenemede ke akpa ediwaha.

[Ekebe ke page 5]

Mme Uwụtn̄kpọ Ndise Paradise

N̄wed Andikpep: page 251-254

N̄wed Ifiọk: page 4-5, 188-189

Ediye uduot ekpri n̄wed Oyom: page 11, 13

N̄wed Tuak Ibuot nọ Abasi: page 92-93

[Ekebe ke page 5]

Mme N̄kpọ Oro Ẹfịnade Mme Owo

Akan̄, udia oro mînọhọ owo nsọn̄idem

Psalm 72:16;

Isaiah 25:6

Asari, utụk

Isaiah 11:3-5;

Utom 10:34, 35

Edibiat isọn̄

Ediyarade 11:18

Edifiomo mme unam

Mme N̄ke 12:10

Ekọn̄, edinam oyomonsia

Psalm 46:8, 9;

Micah 4:3, 4

Idiọk ukara

Psalm 146:3, 4;

Daniel 2:44

Mfụhọ

Psalm 34:8;

Isaiah 65:17-19

Mme mfịna ufọk, unana okụk

Isaiah 65:21, 22

N̄kpa, ntuan̄a

Isaiah 25:8;

Ediyarade 21:3, 4

N̄wo, ukwan̄ikpe

Isaiah 9:6, 7;

2 Peter 3:13

N̄wụre ke ido uwem

2 Timothy 3:1-5

Ubiatibet, afai

Psalm 37:10, 11;

Mme N̄ke 2:21, 22

Ubuene, ufịk

Psalm 72:12-14;

Ecclesiastes 8:9

Udọn̄ọ, ubiomo ndo

Isaiah 33:24; 35:5, 6