Ini Ewe ke Akpafiak Ekese Mbon Oro Ẹkenyenede Udọn̄?
1. Nso ke edinam mbet abuana?
1 Edinam mbet abuana edifiak n̄ka mbịne owo ekededi oro ekenyịmede ndikpep n̄kpọ mban̄a ndutịm Obio Ubọn̄ oro Jehovah anamde. (Matt. 28:19, 20) Ndutịm nnyịn ye eke owo oro enyenede udọn̄ ẹsibiere mfọnn̄kan ini ndinam mfiakn̄ka. Ntak emi ikpọsọpde ifiak ikese mbon oro ikosobode ke akpa ediwaha?
2, 3. Ntak emi ikpodomode ndifiak n̄ka usọp usọp nte ikekeme?
2 Ntak Emi Ikpọsọpde ifiak Ika? Utom edikwọrọ “eti mbụk obio ubọn̄ emi” aka anyan, ndien utịt editịm n̄kpọ emi emekpere. (Matt. 24:14; 1 Pet. 4:7) Ntre, ke adan̄aemi “usen edinyan̄a” osụk odude ọnọ mbon oro ẹnyenede udọn̄, ana inam ewụhọ oro ọdọhọde “isịn ifịk ikwọrọ ikọ,” ndien emi esịne ndifiak n̄kọkọri udọn̄ oro ẹkewụtde usọp usọp nte ikekeme.—2 Cor. 6:1, 2; 2 Tim. 4:2.
3 Satan oyom ndision̄o n̄kpasịp Obio Ubọn̄ ekededi oro isuande ke esịt owo oro owụtde udọn̄. (Mark 4:14, 15) Mbonubon, mme nsan̄autom, ye mbon efen ẹsiwak ndisak mbon oro ẹnyenede udọn̄. Ndisọsọp mfiak n̄ka esin̄wam nnyịn ikọri udọn̄ emi ikebemde iso ikụt mbemiso mbon enwen ẹnyene ufan̄ ndiwot udọn̄ oro.
4. Didie ke ikeme ndinam ndutịm nnọ mfiakn̄ka ke akpa ediwaha?
4 Nịm Ini Ndifiak N̄ka: Ke akpa ediwaha, ọfọn enịm ini oro edifiakde aka. Bụp mbụme oro edibọrọde ke afiakde aka. Oyom ewet mme n̄kpọ emi enịm. Emekeme ndidọhọ owo oro ke iyafiak idi edem usen m̀mê usen ifan̄ ebede edieke ndutịm fo ayakde. Edieke edide okosobo owo oro enyenede udọn̄ ke utịturua, enye ekeme ndinyịme afo afiak edi ke utịturua oro editienede edieke enye esinamde utom ke mme usen eken ke urua. Ke ini enịmde ini ọnọ owo, kụt ete ke amafiak aka nte ọkọdọhọde.—Matt. 5:37.
5. Didie ke nnyịn ndisọp mfiak n̄ka edin̄wam nnyịn inam utom edinam mbet oro Jesus ọkọdọn̄de nnyịn?
5 Imenyene nti ntak ndifiak n̄kese mbon oro ẹnyenede udọn̄ usọp usọp nte ikekeme. Ke ntre, nịm ini ndifiak n̄ka iwiwa, sia “ini emi osụhọde iniọn̄ke aba.” (1 Cor. 7:29) Nte isọpde ifiak ikese mbon oro ẹnyenede udọn̄ ke etop Obio Ubọn̄, ntre ke ukeme oro isịnde ẹkeme ndinyene nti utịp.