Nte Afo Ayanam Utom Usiakusụn̄ Unọ Un̄wam?

1. Ntak emi ini Editi edide eti ini ndinam ekese ke an̄wautom?

¹ Ini Editi edi eti ini ndinam ekese ke an̄wautom. Emi edi ini emi isitiede ikere iban̄a akwa ima oro Jehovah enyenede ke ndinọ Eyen esie nte ufak. (John 3:16) Emi esinam iwụt esịtekọm iban̄a se Jehovah anamde tutu enen̄ede ọdọn̄ nnyịn nditịn̄ nnọ mbon en̄wen mban̄a se enye anamde ọnọ ubonowo. (Isa. 12:4, 5; Luke 6:45) Ini emi n̄ko ke nnyịn isinam san̄asan̄a ubịnikọt ndikot mme ọdiọn̄ọ nnyịn ye mme owo ke efakutom nnyịn ẹditiene nnyịn ẹdụk Editi. Ke oro ebede, nnyịn iyodomo ndifiak n̄ka mbịne mbon oro ẹnyenede udọn̄, emi ẹkedụkde Editi. Ndi afo ayanam ekese ke an̄wautom ke ndinam usiakusụn̄ unọ un̄wam ke March, April, m̀mê May?

2. Nso inam March edi ata eti ọfiọn̄ ndinam utom usiakusụn̄ unọ un̄wam?

² Nam March Edi Ata Akpan Ọfiọn̄: March edidi ata eti ọfiọn̄ ndinam utom usiakusụn̄ unọ un̄wam. Mbon oro ẹyomde ndinam ẹkeme ndimek ndinọ hour 30 m̀mê hour 50. Edieke esenyịn circuit edikade ekese esop ke March oro, mme asiakusụn̄ unọ un̄wam ẹkeme nditiene ndụk mbono oro enye esinyenede ye mme asiakusụn̄ ofụri ini ye mme akpan asiakusụn̄, ọtọn̄ọde ke ntọn̄ọ tutu esịm utịt. Ẹnam ini ubịnikọt n̄kot mme owo ẹdidụk Editi, emi ẹdinịmde ke Tuesday, March 26, 2013, ọniọn̄ akan nte ekesidide ke mme isua ifan̄ emi ẹkebede, ndien enye editọn̄ọ ke March 1. N̄ko, March enyene utịturua ition. Ntre, ntak mûtịmke ukere m̀mê emekeme nditiene nnam ọfiọn̄ emi edi ata akpan ọfiọn̄ ke isua?

3. Didie ke ikeme ndinam ndutịm man inam ekese ke an̄wautom?

³ Tọn̄ọ ldahaemi Nam Ndutịm: Ini edi emi afo ndidụn̄ọde ndutịm fo nse ebiet emi ekemede ndinam ukpụhọde man ekeme ndinam utom usiakusụn̄. Oyoyom ubon ẹdiana kiet, ntre ke ini mbubreyo Utuakibuot Ubon, ẹneme se mbufo ẹduakde ndinam ẹnyụn̄ ẹwet ẹnịm. (N̄ke 15:22) Edieke mûkemeke ndinam utom usiakusụn̄ unọ un̄wam, kûyak idem emem fi. Ndi emekeme ndinam ndutịm man odu ke an̄wautom ebịghi? Ndi emekeme ndiwọrọ an̄wautom usen kiet efen ke urua ndian do?

4. Nso ufọn ke idibọ edieke inamde ekese ke March, April, ye May?

⁴ Nte inamde ekese ke March, April, ye May, ntre ke idatesịt oro inyenede ke ndinam n̄kpọ Jehovah ye ke ndinọ mbon en̄wen ini nnyịn edikpon. (John 4:34; Utom 20:35) Ke akande oro, utom n̄waidem oro inamde ayadat Jehovah esịt.—N̄ke 27:11.