Nte Ẹkpedade Eti Mbụk Emi Otode Abasi!
Ẹnam N̄kpọ Obufa Ediye Uduot Ekpri N̄wed Emi Ẹtịmde Man An̄wam Nnyịn Inam Mfiakn̄ka Inyụn̄ Itọn̄ọ Ukpepn̄kpọ Bible
1. Ewe obufa n̄wed emi ẹkesiode ke Mbono District “Kpeme Esịt Fo!” ke ẹtịm man an̄wam nnyịn inam mfiakn̄ka inyụn̄ itọn̄ọ ukpepn̄kpọ Bible?
1 Ke Mbono District “Kpeme Esịt Fo!” nnyịn ima ikop inemesịt ndibọ obufa ediye uduot ekpri n̄wed ndin̄wam nnyịn inam mfiakn̄ka inyụn̄ itọn̄ọ ukpepn̄kpọ Bible. Eti Mbụk Emi Otode Abasi! ada itie n̄wed Oyom. Enye etie nte n̄wed Oyom sia mme ukpepn̄kpọ esie ẹdide mbio mbio. Emi ayan̄wam nnyịn ikeme ndida enye nnịm ukpepn̄kpọ Bible ke enyịnusụn̄ mme owo. Edi, ke adan̄aemi n̄wed Oyom enemede mme n̄kpọ emi oyomde mme Christian ẹnam, emi ẹkemede ndisọn̄ mbufa nditọ ukpepn̄kpọ ndinyịme, obufa n̄wed emi eneme eti mbụk oro odude ke Bible.—Utom 15:35.
2. Ntak emi ẹkesiode ediye uduot ekpri n̄wed Eti Mbụk?
2 Ntak emi ẹkesiode n̄wed emi? Nditọete ke ofụri ererimbot ẹma ẹsidọhọ ke iyom n̄wed oro ememde, emi edinamde mme owo ẹsọp ẹma akpanikọ onyụn̄ an̄wamde ẹtọn̄ọ ukpepn̄kpọ ke n̄wed Bible Ekpep, kpa akpan n̄wed emi isidade inịm ukpepn̄kpọ Bible. Mbon oro mîsimaha akamba n̄wed ẹsiwak ndinyịme ẹda ediye uduot ekpri n̄wed ẹkpep mmọ Bible. N̄ko, emem utom ndisọp n̄kabade ediye uduot ekpri n̄wed nsịn ke ediwak usem.
3. Didie ke n̄wed emi okpụhọde ye mme n̄wed ukpepn̄kpọ eken?
3 Nte Ẹtịmde N̄wed Emi: Ẹwet ediwak ke otu n̄wed nnyịn oro isidade ikpep mme owo n̄kpọ man owo ekeme ndikot ke idemesie nnyụn̄ mfiọk akpanikọ. Edi n̄wed enye emi enyene ukpụhọde. Owo ikemeke ndikpep enye ke idemesie, ana owo oro enyene andikpep. Mmọdo, ke ini ọnọde owo n̄wed emi, ọkpọfọn eneme ikpehe ekikere kiet m̀mê iba ye enye. Mme ikpehe ekikere ẹdi mbio mbio, ntre ẹkeme ndida ke enyịnusụn̄ owo m̀mê ke itie mbubehe esie nneme. Okposụkedi emi ọfọnde nditọn̄ọ ke akpa ibuot ukpepn̄kpọ, nnyịn imekeme nditọn̄ọ ukpepn̄kpọ ke ibuot ukpepn̄kpọ ekededi.
4. Didie ke n̄wed emi an̄wam nnyịn ida Bible ikpep mme owo n̄kpọ nnennen nnennen?
4 Ke ediwak n̄wed nnyịn, ẹkeme ndikụt ibọrọ mbụme ke mme ikpehe ekikere. Edi ke n̄wed emi, mme ibọrọ ẹdu akpan akpan ke Bible. Ediwak owo ẹyom ndikpep n̄kpọ nto Bible idịghe ke n̄wed nnyịn. Ntem, mme itien̄wed oro ẹkotde ẹsịn iwakke. Ẹnyene ndikot mme itien̄wed nto Bible. Emi ayan̄wam nditọ ukpepn̄kpọ ẹfiọk ke se mmimọ ikpepde oto Abasi.—Isa. 54:13.
5. Ntak emi edide akpan n̄kpọ ada ukpepn̄kpọ nditịm idem ọfọn nnọ ukpepn̄kpọ kiet kiet?
5 N̄wed emi inamke kpukpru itie N̄wed Abasi ẹn̄wan̄a. Ntak mînamke? Ẹnam enye man esịn udọn̄ ọnọ eyen ukpepn̄kpọ ndibụp mbụme, man ada ukpepn̄kpọ onyụn̄ ada ukeme ukpepn̄kpọ esie anam n̄kpọ. Mmọdo, edi akpan n̄kpọ nditịm idem ọfọn nnọ ukpepn̄kpọ kiet kiet. Edi kpeme, kûtịn̄ ikọ awak akaha. Nnyịn imesima ndinam mme itie N̄wed Abasi ẹn̄wan̄a. Edi ufọn esinen̄ede odu ke ini idọhọde eyen ukpepn̄kpọ etịn̄ nte itie N̄wed Abasi an̄wan̄ade enye. Edieke idade mbufiọk ibụp enye mme mbụme, nnyịn imekeme ndin̄wam enye ọkọk ibuot onyụn̄ ọfiọk se itien̄wed kiet kiet ọwọrọde.—Utom 17:2.
6. Didie ke ikeme ndida n̄wed emi nnam n̄kpọ: (a) ke ebiet emi mme owo mîmaha ndikop n̄kpọ mban̄a Abasi ye Bible? (b) ke ini ikwọrọde ikọ ke ufọk ke ufọk? (c) ke nditọn̄ọ ukpepn̄kpọ Bible nnennen nnennen? (d) ke ini inamde mfiakn̄ka?
6 Ukem nte mme n̄wed eken oro isidade inịm ukpepn̄kpọ, imekeme ndinọ mme owo n̄wed emi ini kiet ekededi inamke n̄kpọ m̀mê ewe n̄wed ke ẹnọ ke ọfiọn̄ oro. Ediwak owo ẹyema ndida enye ntọn̄ọ ukpepn̄kpọ nnennen nnennen ke enyịnusụn̄ mme owo. N̄ko, nte ẹketịn̄de ke mbono district, ndida enye nnam n̄kpọ ke ini ifiakde ika ibịne mbon oro ẹkewụtde udọn̄ “ekeme ndinam mfiakn̄ka enen̄ede emem utom!”—Se mme ekebe ke page 5-7.
7. Didie ke afo ekeme ndida ediye uduot ekpri n̄wed emi nnịm ukpepn̄kpọ Bible?
7 Nte Ikpenịmde Ukpepn̄kpọ: Nnyịn imekeme nditọn̄ọ nneme ke ndikot mbụme oro ẹwetde ke ndodobi ubọkn̄wed. Ekem, kot ikpehe ekikere ye itie N̄wed Abasi emi ẹwetde ke sịghisịghi ubọkn̄wed. Da mbufiọk bụp enyeneufọk mbụme man anam se itie N̄wed Abasi ọwọrọde an̄wan̄a enye. Ekem, mbemiso enemede ikpehe en̄wen, dọhọ enyeneufọk ọbọrọ mbụme oro ẹwetde ke ndodobi ubọkn̄wed man ọfiọk m̀mê se ẹkenemede an̄wan̄a enye. Ke akpa ini ifan̄ oro afiakde aka, ọkpọfọn eneme kiet kpọt ke otu mbụme oro ẹwetde ke ndodobi ubọkn̄wed. Nte ini akade, nnyịn imekeme ndikụre ukpepn̄kpọ kiet.
8. Nso ke ikpetịn̄ ke ini iyomde ndisiak mme itie N̄wed Abasi, ndien ntak-a?
8 Mme itie N̄wed Abasi oro ẹwetde “kot” ẹdian ẹbọrọ mme mbụme oro ẹwetde ke ndodobi ubọkn̄wed nnennen nnennen. Ke ini oyomde ndisiak itie N̄wed Abasi, kûdọhọ, “Apostle Paul ekewet ete” m̀mê “Kop se Jeremiah eketịn̄de mi.” Enyeneufọk ekeme ndikere ke ikot ikọ owo. Ọkpọfọn idọhọ, “Ikọ Abasi ọdọhọ ete” m̀mê, “Kop se Bible eketịn̄de mi.”
9. Ndi ikpenyene ndikot kpukpru mme itie N̄wed Abasi oro ẹsiakde ẹsịn ke ini ikpepde owo n̄kpọ?
9 Ndi akpana ikot kpukpru mme itie N̄wed Abasi oro ẹsiakde ẹsịn mîdịghe ndi ikpokot sụk mbon oro ẹwetde “kot” ẹdian? Etiene nte n̄kpọ etiede. Owo isiakke mme itien̄wed isịn n̄kukụre ndiwụt ke se ẹtịn̄de oto Bible, kpukpru ẹnyene ufọn. Kpukpru mmọ ẹsịne mme akpan n̄kpọ oro ẹkemede ndineme. Edi ke ndusụk idaha, nnyịn imekeme ndikot sụk mme itien̄wed oro ẹwetde “kot” ẹdian edieke eyen ukpepn̄kpọ mînyeneke ini, m̀mê enyene n̄kpọ oro enye enyenede udọn̄ aban̄a, mîdịghe ikemeke ndikot n̄wed ọfọn.
10. Ini ewe ke ikpokpụhọ ikama n̄wed Bible Ekpep?
10 Ini Oro Ikpokpụhọde Ikama N̄wed Bible Ekpep: Ke ima ikenyene nneme inyụn̄ inịm ukpepn̄kpọ oro ediwak ini, nnyịn imekeme ndikpụhọ n̄kama n̄wed Bible Ekpep mîdịghe isụk ika iso ke ediye uduot ekpri n̄wed Eti Mbụk tutu nnyịn ikpep enye ikụre. Mme asuanetop ẹkeme ndibiere ini emi mmọ ẹkpekpụhọde n̄wed. Ke ima ikokpụhọ ikama n̄wed Bible Ekpep, ndi akpana ikọtọn̄ọ ke akpa ibuot? Owo ibiereke-biere se ẹkpenamde ke afan̄ emi. Ukeme nditọ ukpepn̄kpọ edi nsio nsio. Nte ededi, ediwak nditọ ukpepn̄kpọ ẹyebọ ufọn ke ndifiak n̄kpep ukem ibuotikọ oro ntatara ntatara ke n̄wed Bible Ekpep.
11. Ntak emi ikpadade obufa ediye uduot ekpri n̄wed emi inam n̄kpọ nte ọfọnde?
11 Ke ererimbot emi owo mîsiwakke ndikop eti mbụk, imenyene akwa ifet nditan̄a mfọnn̄kan mbụk emi ẹkemede ndikop, oro edi, ke Obio Ubọn̄ Abasi ke akara ndien ke ibịghike enye ayanam inyene obufa ererimbot emi edinen ido edidụn̄de! (Matt. 24:14; 2 Pet. 3:13) Imenịm ke ediwak owo emi ẹdikopde etop emi ẹyetiene ẹtịn̄ mme ikọ emi ẹkedade odudu spirit ẹwet ẹte: “Ikpat owo emi adade eti mbụk edi ke enyọn̄ ikpọ obot eye didie ntem, enye emi ọkwọrọde emem, enye emi adade eti mbụk eti n̄kpọ edi, enye emi ọkwọrọde edinyan̄a, enye emi ọdọhọde Zion ete: ‘Abasi fo amakabade edi edidem!’” (Isa. 52:7) Nnyịn ikpakam ida obufa ediye uduot ekpri n̄wed emi inọ mbon oro itọn̄ asatde ke efakutom nnyịn eti mbụk emi otode Abasi!
[Ekebe ke page 5]
Ke Ebiet Emi Mme Owo Mîmaha Ndikop N̄kpọ Mban̄a Abasi ye Bible:
● Mme asuanetop ẹkụt ẹte ke mme owo ke ndusụk ebiet isimaha ndikop n̄kpọ mban̄a “Abasi” ye “Bible.” Edieke edide ntre, ke akpa ini emi iwahade, ọkpọfọn ineme mme n̄kpọ oro ẹbehede mmọ, utọ nte eti ukara, ebiet emi mme ubon ẹkemede ndikụt nti item, ye se iditịbede ke ini iso. Ke ima ikafiak ika ediwak ini ikeneme nte isan̄ade ifiọk ke Abasi odu ye ntak emi ikpenịmde se idude ke Bible, imekeme ndien ndinọ mmọ ediye uduot ekpri n̄wed Eti Mbụk.
[Ekebe ke page 6]
Ke Ini Ikwọrọde Ikọ ke Ufọk ke Ufọk:
● “Nnyịn idi edem fo man iwụt fi mmemmem usụn̄ emi ekemede ndifiọk se Abasi aduakde ọnọ ubonowo ke ini iso. Ndi akanam emekere m̀mê Abasi ayanam nnyịn ibọhọ ufen? [Bet ibọrọ.] N̄wed emi owụt ebiet emi afo ekemede ndikụt ibọrọ mbụme oro ke Bible. [Yak ediye uduot ekpri n̄wed kiet nọ enye, kot akpa ikpehe ekikere ke akpa ukpepn̄kpọ, nyụn̄ kot Jeremiah 29:11.] Ndi se ikotde oro anam fi ekere ke Abasi oyom n̄kpọ ọfọn ye nnyịn ke ini iso akan emi? [Bet ibọrọ.] Mmekeme ndikpọn̄ n̄wed oro nnọ fi edieke amade. Mma mfiak ndi, iyeneme ikpehe ekikere iba man ifiọk nte Bible ọbọrọde mbụme emi, ‘Didie ke Abasi edinam mme owo ẹbọhọ ufen?’” Edieke etiede nte ke enyeneufọk enyene ini ke akpa ini emi awahade, afo emekeme ndikot nnyụn̄ nneme ikpehe ekikere iba ye itie N̄wed Abasi ita oro ẹdude do. Diomi ndifiak n̄ka n̄keneme ọyọhọ mbụme iba ke ukpepn̄kpọ oro.
● “Ediwak owo ẹsima ndibọn̄ akam, akpan akpan ke ini mmọ ẹnyenede mfịna. Ndi afo emesibọn̄ akam ndusụk ini? [Bet ibọrọ.] Ndi emekere ke Abasi esikop kpukpru akam, mîdịghe ndi enyene ndusụk akam oro enye mîsikopke? [Bet ibọrọ.] Mmenyene n̄wed emi owụtde nte ekemede ndikụt ibọrọ oro Bible ọnọde ke mme mbụme oro. [Yak idem kiet nọ enye, neme akpa ikpehe ekikere ke ọyọhọ ukpepn̄kpọ 12 ye enye, nyụn̄ kot mme itie N̄wed Abasi oro ẹwetde “kot” ẹdian.] Ndi inemke fi ndifiọk nte ke Abasi ama ndikpan̄ utọn̄ nnọ nnyịn? Edi, ana itịm idiọn̄ọ Abasi man inen̄ede ibọ ufọn ito akam. [Kûbọde ka ọyọhọ ukpepn̄kpọ 2 nyụn̄ wụt enye n̄kpri ibuotikọ oro.] Edieke amade, mmekeme ndikpọn̄ n̄wed oro nnọ fi, ndien mma mfiak ndi, imekeme ndikot mme ibọrọ oro Bible ọnọde ke mme mbụme emi.”
● “Nnyịn iwaha edem fo koro mme owo ke ẹkere m̀mê nso ididi utịt ererimbot emi. Ndi emekere ke enyene ini emi n̄kpọ edifọnde? [Bet ibọrọ.] Akpa ediwak owo idem ndifiọk nte ke eti mbụk emi ekemede ndinam nnyịn inyene idotenyịn odu ke Bible. Se ndusụk mbụme oro Bible ọbọrọde mi.” Yak ediye uduot ekpri n̄wed kiet nọ enye, nyụn̄ dọhọ enye emek mbụme kiet oro enye amade akan ke edem n̄wed emi. Ekem kûbọde ka ibuot ukpepn̄kpọ oro nyụn̄ wụt enye nte isinịmde ukpepn̄kpọ Bible. Diomi ndifiak n̄ka n̄keneme mbụme oro etienede ke ibuot ukpepn̄kpọ oro.
[Ekebe ke page 7]
Domo Nditọn̄ọ Ukpepn̄kpọ Bible Nnennen Nnennen:
● “Nnyịn iwaha edem fo man isian fi obufa usụn̄ ndikpep Bible. N̄wed emi enyene ukpepn̄kpọ 15 emi ẹwụtde ebiet emi afo ekemede ndikụt ibọrọ mme akpan mbụme ke Bible fo. [Wụt enye iso ye edem n̄wed emi.] Ndi akanam omodomo ndifiọk se idude ke Bible? [Bet ibọrọ.] Yak n̄wụt fi nte mme ukpepn̄kpọ n̄wed emi ẹmemde. [Kûbọde ka ọyọhọ ukpepn̄kpọ 3, neme akpa ikpehe ekikere emi odude ke ọyọhọ mbụme 3, nyụn̄ kot Ediyarade 21:4, 5. Edieke odotde, neme ikpehe ekikere oro etienede ye mme itie N̄wed Abasi oro ẹwetde “kot” ẹdian.] Edieke amade, mmekeme ndikpọn̄ n̄wed oro nnọ fi. Nnyịn ikpama fi anam ikpep Bible ntem, ọkpọkọm ini kiet. Ndien edieke amade, emekeme ndika iso. Mma mfiak ndi, imekeme ndineme akpa ibuot ukpepn̄kpọ. Enye edi page kiet kpọt.”
[Ekebe ke page 7]
Nọ N̄wed Emi ke Ini Anamde Mfiakn̄ka:
● Ke ini ifiakde ika ibịne owo emi ekenyenede udọn̄, imekeme ndidọhọ: “Imenem esịt ndifiak n̄kụt fi. N̄kada n̄wed emi owụtde mme ibọrọ oro Bible ọnọde ke ediwak mbụme nsọk fi. [Yak n̄wed kiet nọ enye, nyụn̄ dọhọ enye ese edem n̄wed oro.] Ewe ke otu ibuotikọ emi ke afo enen̄ede ama? [Bet ibọrọ. Ekem kûbọde ka ibuot ukpepn̄kpọ emi enye ekemekde.] Yak n̄wụt fi nte ẹkpekụtde ibọrọ oro Bible ọnọde ke n̄wed emi.” Wụt enye nte ẹsinịmde ukpepn̄kpọ Bible ke ndineme ikpehe ekikere kiet m̀mê iba ye mme itie N̄wed Abasi oro ẹwetde “kot” ẹdian. Ukpepn̄kpọ Bible ke ọtọn̄ọ oro! Kpọn̄ n̄wed oro nọ enye, nyụn̄ diomi ndifiak n̄ka. Ke ẹma ẹkekụre ibuot ukpepn̄kpọ oro, afo emekeme ndineme ibuot ukpepn̄kpọ efen emi enyeneufọk emekde mîdịghe ọtọn̄ọ ke akpa ibuot ukpepn̄kpọ.