Ndusụk N̄wed Emi Ẹsiakde ke N̄wed Mbono Esop Uwem ye Utom Nnyịn
AUGUST 22-28
MME AKPAN N̄KPỌ KE IKỌ ABASI | PSALM 106-109
it-1 857-858
Ndidiọn̄ọ Nnyụn̄ Mbiere Se Owo Edidide
Ndi Abasi ama ebebiere enịm ke Judas edida Jesus inọ man osu prọfesi?
Judas ndida Jesus nnọ ama anam se N̄wed Abasi eketịn̄de osu onyụn̄ owụt ke Jehovah ye Eyen esie ẹkeme ndidiọn̄ọ se iditịbede ke ini iso. (Ps 41:9; 55:12, 13; 109:8; Ut 1:16-20) Edi emi iwọrọke ke Abasi ama ebebiere enịm ke Judas edida Jesus inọ. Nsio nsio prọfesi ẹkedọhọ ke owo emi ekperede Jesus idem edida enye inọ, edi prọfesi emi ndomokiet ikasiakke enyịn̄ owo oro. Mme n̄kpọ do ke Bible emi ẹwụtde ke Abasi ikebiereke ite ke Judas edida Jesus inọ. Apostle Paul ọkọdọhọ Timothy ete: “Kûsọsọp udori owo ekededi ubọk; kûnyụn̄ utiene ubuana ke idiọkn̄kpọ mbon en̄wen; nịm idem edisana edisana.” (1Ti 5:22; men 3:6 domo.) Mbemiso Jesus ekemekde apostle esie 12, enye ama ọbọn̄ akam ọnọ Ete esie ofụri okoneyo. Emi owụt ke enye okoyom ndimek mbon emi ẹtịmde ẹdot. (Lu 6:12-16) Ekpedi Abasi ama ebebiere ke Judas edida Eyen imọ inọ, ndi ekere ke Abasi akpakayak Jesus emek Judas apostle? Edieke Abasi akpanamde utọ n̄kpọ oro, enye ekpetiene abuana ke idiọkn̄kpọ Judas, nte 1 Timothy 5:22 etịn̄de.
Ntre, etie nte Judas ekedi ata eti owo ini Jesus ekemekde enye apostle. Enye ikekereke-kere ndida Jesus nnọ. Edi nte ini akade, enye ama ayak ‘ndotndot orụn̄ etịbe’ enye ke esịt, onyụn̄ anam enye akabade idiọk owo sụn̄sụn̄. Emi ama anam Judas ọkpọn̄ usụn̄. Utu ke enye ndiyak Abasi ada enye usụn̄, enye ama ayak Devil otụn enye usụn̄ tutu enye akabade inọ ye owo n̄kari. (Heb 12:14, 15; Joh 13:2; Ut 1:24, 25; Jas 1:14, 15; se JUDAS No. 4.) Ke uwem inọ ye nyakri emi ama akadia enye idem, ini emi ke Jesus okokụt esịt Judas onyụn̄ ọdọhọ ke idịghe kpukpru mbet imọ ẹsana.—Joh 13:10, 11.
Enyene se Jesus eketịn̄de ini kiet emi akanamde ndusụk mbet esie ẹtre nditiene enye. Ini oro ke John 6:64 ọdọhọ ke “toto ke editọn̄ọ Jesus ama ọfiọk mbon emi mînịmke ke akpanikọ ye owo emi edidade enye ọnọ.” Ke 2 Peter 3:4, ikọ oro “editọn̄ọ” (Gr., ar·kheʹ) ọwọrọ ini emi Abasi ọkọtọn̄ọde ndibot mme n̄kpọ. Edi ikọ emi ekeme ndiwọrọ n̄kpọ en̄wen n̄ko. (Lu 1:2; Joh 15:27) Ke uwụtn̄kpọ, ke ini apostle Peter ọkọdọhọde ke edisana spirit ama odoro mme Gentile ke idem “kpa nte okodorode [mmimọ] ke editọn̄ọ,” Peter iketịn̄ke iban̄a ini emi enye ọkọtọn̄ọde ndidi mbet Jesus m̀mê ini emi ẹkemekde enye apostle. Enye eketịn̄ aban̄a usen Pentecost, 33 C.E. emi Abasi ọkọtọn̄ọde ndin̄wan̄ade edisana spirit nduọk mbet Jesus ke idem. (Ut 11:15; 2:1-4) Se n̄ko se Lange etịn̄de aban̄a John 6:64 ke n̄wed esie emi ẹkotde Commentary on the Holy Scriptures (p. 227). Enye ọdọhọ ete: ‘Editọn̄ọ ke itie Bible emi idịghe ini emi Abasi ọkọtọn̄ọde ndibot n̄kpọ, idịghe ini emi Jesus ọkọtọn̄ọde ndidiọn̄ọ mbet esie kiet kiet, idịghe ini emi enye ọkọtọn̄ọde ndinyene mme mbet, m̀mê ini emi enye ọkọtọn̄ọde utom esie nte Messiah. Utu ke oro, ada aban̄a ini emi ikọ esie ọkọtọn̄ọde ndinam ndusụk mbet ẹtre nditiene enye. Ntre n̄ko Enye ọkọdiọn̄ọ owo emi edidade enye inọ ini emi owo oro ọkọtọn̄ọde ndidu idiọk uwem.’—P. Schaff akakabade n̄wed esie emi ke 1976; men 1Jo 3:8, 11, 12 domo.
AUGUST 29–SEPTEMBER 4
MME AKPAN N̄KPỌ KE IKỌ ABASI | PSALM 110-118
w87 3/15 21 ¶5
Abasi Idatesịt, Mbon Idatesịt!
◆ Ps 116:3—Nso ẹdi “mme urụk n̄kpa” ẹmi?
Enye eketie nte n̄kpọ eke n̄kpa akadade mme urụk eke mîkemeke ndikịbe ọbọp andiwet psalm otịm ọsọn̄ nte n̄kpọ eke ubọhọ mîkemeke ndidu. Mme urụk oro ẹdade ẹbọp owo ubọk m̀mê ukot ọkpọsọn̄ ọkpọsọn̄ ẹsinọ ubiak, m̀mê ndutụhọ, ndien nsiondi eke Greek Septuagint akabade ikọ Hebrew oro ẹkotde “urụk” nte “ubiak.” Ntre, ke ini Jesus Christ akakpade, enye okodu ke ọkpọsọn̄ ubọk, m̀mê ubiak n̄kpa. Mmọdo, ke ini Jehovah akanamde Jesus eset, Enye ‘akatat ubiak n̄kpa’ oro.—Utom Mme Apostle 2:24.