Ndusụk N̄wed Emi Ẹsiakde ke N̄wed Mbono Esop Uwem ye Utom Nnyịn
SEPTEMBER 19-25
MME AKPAN N̄KPỌ KE IKỌ ABASI | PSALM 135-141
Yom N̄kpọuto ke Ikọ Abasi
it-1 783 ¶5
Israel Ẹwọrọ ke Egypt
Jehovah ama ada akwa odudu esie anam enyịn̄ esie asana onyụn̄ anyan̄a nditọ Israel. Ke mmọ ẹma ẹkebe Ididuot Inyan̄, Moses ama ada mmọ usụn̄ ke ikwọ. Miriam adiahaeka esie, emi ekedide prọfet an̄wan, emen ekọmọ, kpukpru iban ẹnyụn̄ ẹmen ekọmọ ẹtiene enye ke edem ke ẹnek unek. Ntre ekedi irenowo ẹma ẹkwọ, mmọ ẹbọ. (Ex 15:1, 20, 21) Ntem ke Jehovah akadian̄ade ikọt esie ofụri ofụri ọkpọn̄ mme asua mmọ. Ke mmọ ẹma ẹkekpọn̄ Egypt, Jehovah ikayakke owo m̀mê idiọk unam anam mmọ n̄kpọ; ebua ikakam ikpọike mmọ. (Ex 11:7) Kpa ye oro n̄wed Exodus mîdọhọke ke Pharaoh ama etiene udịmekọn̄ esie odụk Ididuot Inyan̄, Psalm 136:15 ọdọhọ ke Jehovah ama otop “Pharaoh ye udịmekọn̄ esie ọdọn̄ ke Ididuot Inyan̄” onyụn̄ osobo kpukpru mmọ do.
SEPTEMBER 26–OCTOBER 2
MME AKPAN N̄KPỌ KE IKỌ ABASI | PSALM 142-150
Yom N̄kpọuto ke Ikọ Abasi
it-2 448
Inua
Abasi ọkọnọ nnyịn inua man isida idia udia inyụn̄ itịn̄ ikọ. Ntre akpana isitoro enye ke kpukpru se itịn̄de. (Ps 34:1; 51:15; 71:8; 145:21) Andiwet psalm ọkọdọhọ ke kpukpru mme odu-uwem n̄kpọ ẹyetoro Jehovah; ntre edieke iyomde ndidu uwem, ana itoro Jehovah. Apostle Paul ama anam mme owo ẹfiọk ke ndinịm ke ofụri esịt ke Abasi ye Eyen esie ẹdu, ikemke. Ana itetịn̄ n̄ko se inịmde emi inọ mme owo man inyene edinyan̄a.—Ps 150:6; Ro 10:10.
Sia Jehovah edide Andibot nnyịn, enye enyene odudu ye unen ndinam mme asan̄autom esie ẹtịn̄ se enye amade man ẹnam uduak esie. Enye ama ada spirit esie anam mme prọfet esie ẹtịn̄ se enye okoyomde mmọ ẹtịn̄. (Ex 4:11, 12, 15; Jer 1:9) Enyene ini emi enye akanamde unam etịn̄ ikọ nte owo. (Nu 22:28, 30; 2Pe 2:15, 16) Kpa ye oro Abasi mîdaha spirit esie inam mme asan̄autom esie ẹtịn̄ ikọ ke utịbe utịbe usụn̄ mfịn, enye anam mmọ ẹtịn̄ se idude ke Bible, emi ẹkedade edisana spirit esie ẹwet. Se idude ke Bible anam mmọ ẹkeme ndinam eti utom ekededi. (2Ti 3:16, 17) Mmọ itiehe aba ibet Christ ediwụt mmọ eti mbụk emi mmọ ẹkpekwọrọde, m̀mê ndiyom owo en̄wen editeme mmọ se ẹkpekwọrọde. Mmọ ẹnyenyene eti mbụk emi ẹnyụn̄ ẹben̄e idem ndikwọrọ enye. Ikọ Abasi ọdọhọ mmọ ete: “Ikọ [emi] emekpere fi, ke inua fo ye ke esịt fo.”—Ro 10:6-9; De 30:11-14.
Inua Ekeme Ndiwot Owo Onyụn̄ Ekeme Ndinyan̄a Owo. Jehovah oyom ikpekpeme se itịn̄de. Ikọ esie ọdọhọ ete: “Inua edinen owo edi idịm uwem.” (N̄ke 10:11) Omokụt do ke ana inen̄ede ikpeme se itịn̄de (Ps 141:3; N̄ke 13:3; 21:23), sia imekeme ndisịn idem ke fehesan̄ edieke nnyịn mîkpemeke se itịn̄de. (N̄ke 10:14; 18:7) Abasi oyokot nnyịn ikpe ke se ededi oro itịn̄de. (Mt 12:36, 37) Owo ekeme nditịn̄ ikọ ikereke, onyụn̄ ọn̄wọn̄ọ se enye mîkemeke ndinam. (Ec 5:4-6) Se owo etịn̄de ekeme ndinam owo akanam se enye mîkpanamke, ndien owo emi eketịn̄de ikọ oro iditreke ndibọ ufen. (N̄ke 26:28) Ntre, ana inen̄ede ikpeme se itịn̄de ke ini idude ke iso ndiọi owo mbak nnyịn ididue itịn̄ se mîsịneke ke N̄wed Abasi ndien mmọ ẹda oro ẹsụn̄i Jehovah; oro ekeme ndisụn̄ọ ke n̄kpa. (Ps 39:1) Jesus ama enịm eti uwụtn̄kpọ ọnọ nnyịn, osụhọde idem ayak Abasi ada enye anam uduak Esie, itọhọke, inyụn̄ isụn̄ike mbon oro ẹkekọbọde enye.—Isa 53:7; Ut 8:32; 1Pe 2:23.
Sia mme Christian mîfọn̄ke ima, ana mmọ ẹsikpeme se mmọ ẹtịn̄de kpukpru ini. Emi ọwọrọ ke ana mmọ ẹkpeme se mmọ ẹkerede. Jesus ọkọdọhọ ke idịghe se idụkde owo inua esisabade owo, edi ke se iwọrọde owo ke inua asabade, “koro oto uyọhọ esịt inua osio etịn̄.” (Mt 12:34; 15:11) Ntre ana inen̄ede ikpeme mbak nnyịn iditịn̄ ikọ, itiehe-tie ikere se ikọ oro edimande. Emi ọwọrọ ke ana isitie ikere nte ikpanamde kpukpru nti n̄kpọ emi ikpepde ke Bible.—N̄ke 13:3; 21:23.