Ndusụk N̄wed Emi Ẹsiakde ke N̄wed Mbono Esop Uwem ye Utom Nnyịn
MARCH 13-19
w88 4/1 11-12 ¶7-8
Jeremiah—Prọfet Oro Owo Mîmaha Emi Ọnọde Ubiereikpe Abasi
7 Jehovah ama ọtọt ete, “Ndien mmọ eyen̄wana ekọn̄ ye afo; edi idikemeke ubọk ye afo.” (Jeremiah 1:19) Kemi, ntak emi mme Jew ye mme andikara mmọ ẹkpeyomde ndin̄wana ye prọfet emi-e? Koro etop esie akasuade ọnọ ntan̄idem ye ikpîkpu orụk utuakibuot mmọ. Jeremiah iketekke ifịk ke nsuannọ esie: “Sese, mmọ ẹbat uyo Jehovah ke n̄kpọ bụt; enye inemke mmọ esịt. Koro kpukpru mmọ, ọtọn̄ọde ke n̄kpri, tutu osịm ikpọ, ẹsịn enyịn; kpukpru mmọ, ọtọn̄ọde ke prọfet, tutu osịm oku [kpa mmọemi ẹkpekam ẹdide mme andikpeme nyom ufọn eti ido uwem ye ufọn n̄kpọ spirit] ẹnyụn̄ ẹnam nsunsu.”—Jeremiah 6:10, 13.
8 Edi akpanikọ, mmọ ẹkesụk ẹdada idụt oro usụn̄ ndiwa mme uwa. Mmọ ẹkesụk ẹkakaiso ke utuakibuot akpanikọ, edi esịt mmọ ikodụhe do. Ndinam n̄kpọ ntiene ido eset ekedi akpan n̄kpọ ọnọ mmọ akan eti edu uwem. Ke ukem ini oro, mme adaiso ido ukpono mme Jew ke ekebian̄a idụt oro ndinyene ekikere nte ke mmimọ idu ke ifụre, ẹdọhọde ẹte, “Emem [odu], emem [odu];” ke ini emem ndomokiet mîkodụhe. (Jeremiah 6:14; 8:11) Ih, mmọ ẹkebabian̄a mme owo oro ndinịm ke akpanikọ nte ke mmimọ ikodu ke emem ye Abasi. Mmọ ẹkekere ẹte ke n̄kpọ ndomokiet idụhe ndifịna idem, sia mmimọ idide ikọt Jehovah oro ẹma ẹkenyan̄a, inyenede edisana obio oro ye temple esie. Edi nte usụn̄ oro ke Jehovah ekese se ikade iso?
w88 4/1 12 ¶9-10
Jeremiah—Prọfet Oro Owo Mîmaha Emi Ọnọde Ubiereikpe Abasi
9 Jehovah ama ọdọhọ Jeremiah ete enye aka akada ke ebiet emi mbio obio ẹdikụtde enye mfọn mfọn ke inuaotop temple onyụn̄ atan̄a etop Imọ ọnọ mme andituak ibuot oro ẹkedụkde do. Enye ekenyene ndidọhọ mmọ ete: “Mbufo ẹkûbuọt idem ke ikọ nsu, ẹte, temple Jehovah, temple Jehovah, temple Jehovah ẹdi mme mmmọ ẹmi. . . . [enye iditreke-tre ndidi n̄kpọ] eke mîdoroke owo udori.” Mme Jew ẹkesan̄a ke se ẹkụtde ke enyịn, ikasan̄ake ke mbuọtidem, nte mmọ ẹkebụrede mbụre ẹban̄a temple mmọ. Mmọ ẹma ẹfefre ikọitem Jehovah: “Enyọn̄ edi ebekpo mi, isọn̄ onyụn̄ edi udorikot mi: nso ufọk ke mbufo ẹdibọp ẹnọ mi?” Ke akpanikọ, Jehovah, kpa Ọbọn̄ Akara akwa ekondo emi, ikodụhe ke temple mmọ, enye ekpetie ubọn̄ ubọn̄ nte editetie!—Jeremiah 7:1-8; Isaiah 66:1.
10 Jeremiah ama akaiso ye ubiak ubiak, an̄wan̄wa nsuannọ esie ete: “Nte mbufo ẹyịp inọ, ẹwot owo, ẹnyụn̄ ẹsịn efịbe, ẹnyụn̄ ẹtomo Abasi ke nsu, ẹnyụn̄ ẹfọp n̄kpọ ẹnọ Baal, ẹnyụn̄ ẹtiene Abasi efen eke mbufo mîkọfiọkke, . . . ẹnyụn̄ ẹdọhọ, ẹte, Nnyịn imọbọhọ man inam ofụri mbubiam ẹmi?” Mme Jew, nte ‘edimek ikọt’ Abasi, ẹkekere ẹte ke enye eyenyịme orụk edu uwem ekededi, adan̄a nte mmimọ ikadade mme uwa idi temple. Nte ededi, edieke mmọ ẹkekerede ẹte ke enye edi ete mmemmem esịt oro obokde-bok idiọk, n̄kukụre eyen akaha, mmọ ẹkeyom ẹkama mmimọ ke ọkpọsọn̄ ubọk.—Jeremiah 7:9, 10; Exodus 19:5, 6.
w88 4/1 13 ¶15
Jeremiah—Prọfet Oro Owo Mîmaha Emi Ọnọde Ubiereikpe Abasi
Judah Ọbọ Utịp
15 Etisịm n̄kpọ nte isua 632 B.C.E., Assyria ama ọduọ ke ubọk mbon Chaldea ye mbon Media, ẹma ẹnyụn̄ ẹsụhọde Egypt ẹnịm ke ekpri odudu ukara ke edem usụk Judah. Se ikedide ata n̄kpọndịk inọ Judah edito usụn̄ uda ekọn̄ ndụk obio oro odude ke edem edere. Ntem, Jeremiah ekenyene ndinọ ekemmọ mme Jew ndusụk idiọk etop! “Sese, idụt kiet oto ke edem edere edi . . . mmọ ẹwai enyịn, inyụn̄ ituaha owo mbọm; . . . ẹtịm idem nte mbonekọn̄ ẹban̄a fi, O adiaha Zion.” Odudu ukara ererimbot oro akakarade ini oro ekedi Babylon. Emi edidi n̄kpọutom oro Abasi edidade ndinọ Judah anana-mbuọtidem ufen.—Jeremiah 6:22, 23; 25:8, 9.
MARCH 20-26
“Se Mme Owo Ẹnamde Idinyeneke Ibuot Edieke Mmọ Mîyakke Abasi Ada Mmọ Usụn̄”
it-1 555
Cucumber
Nso idi “nnabikịm ke in̄wan̄ cucumber”? (Jer 10:5) Enye edi anyan eto m̀mê mme n̄kpọ ntre emi ọtọin̄wan̄ ekesiwụkde ke in̄wan̄ cucumber man unam ama okụt, enye ekere ke owo ada, ndien emi ikesiyakke unam odụk ata cucumber ke in̄wan̄. Jeremiah ọkọdọhọ ke ndisọi mbiet oro nditọ Israel ẹkesituakde ibuot ẹnọ ẹkenyụn̄ ẹtie nte ikpîkpu eto emi mîkemeke nditịn̄ ikọ ke in̄wan̄ cucumber.
MARCH 27–APRIL 2
“Nditọ Israel Ẹma Ẹfre Jehovah”
it-1 1121 ¶2
Isịn
Jehovah ọkọdọhọ ke ufọk Israel ye Judah ẹtie nte ubọpisịn m̀mê n̄kpahaisịn oro imọ ikpahade ke isịn. Emi owụt ke Jehovah ama emen mmọ enen̄ede adian ke idem man mmọ ẹdi n̄kpọ itoro ye ediye n̄kpọ ẹnọ enye. (Jer 13:11) Prọfet Isaiah ama etịn̄ n̄ko ete ke Jesus Christ edibọbọ edinen ido ye akpanikọ nte n̄kpahaisịn ke ini enye edikarade. Anaedi emi ọwọrọ ke Jesus Christ edida ofụri odudu esie inam se inende ye se idide akpanikọ. Ukem nte n̄kpahaisịn ekemede ndinam ọfọn̄ ọsọn̄ owo ke isịn, edinen ido anam Jesus ekeme ndibiere ikpe nte Jehovah oyomde.—Isa 11:1, 5.