Ndusụk N̄wed Emi Ẹsiakde ke N̄wed Mbono Esop Uwem ye Utom Nnyịn
MAY 1-7
it-1 105 ¶2
Anathoth
Jeremiah okoto Anathoth. Enye ekedi prọfet Abasi, edi nditọ obio mmọ ikokponoke enye. Mmọ ẹma ẹyom ndiwot enye ke ntak prọfesi emi enye eketịn̄de aban̄a mmọ. (Jer 1:1; 11:21-23; 29:27) Ntre, Jehovah ama ọdọhọ ke ẹyesobo obio mmọ. Mbon Babylon ẹma ẹnyụn̄ ẹsobo obio oro nte Jehovah eketịn̄de. (Jer 11:21-23) Mbemiso ẹkesobode Jerusalem, Jeremiah ama ọbọ eyen eyeneka ete esie isọn̄ ke Anathoth edep ndiwụt ke nditọ Israel ẹyefiak ẹnyọn̄ ẹdidụn̄ ke obio mmọ. (Jer 32:7-9) Anathoth edi kiet ke otu obio emi nditọ Israel ẹkefiakde ẹnyọn̄ọ ẹkedụn̄. Owo 128 emi ẹtode Anathoth ẹma ẹsịne ke akpa udịm owo emi ẹketienede Zerubbabel ẹnyọn̄ ẹdi. Emi owụt ke se Jeremiah eketịn̄de ama osu.—Ezr 2:23; Ne 7:27; 11:32.
MAY 8-14
it-2 1228 ¶3
Zedekiah
Zedekiah ekedi edidem emi efehede mme owo enyịn etieti. Ke ini mbọn̄ esie ẹkedọhọde enye ayak mmimọ iwot Jeremiah, ke Jeremiah etịn̄ ikọ emi anamde idem emem mme owo ndin̄wana ye mme asua, Zedekiah ama ọdọhọ mmọ ete: “Sese! Enye esịne mbufo ke ubọk. Koro idụhe baba n̄kpọ kiet emi edidem ekemede ndinam mbiọn̄ọ mbufo.” Edi ke ini Ebed-melech akakade ọkọdọhọ enye ayak imọ isio Jeremiah ke okpụk oro ẹkemende enye ẹkesịn, enye ama enyịme, onyụn̄ ọdọhọ Ebed-melech asan̄a ye owo 30 akanam emi. Nte ini akakade, Zedekiah ama ededịbe eneme nneme ye Jeremiah. Enye ama ọn̄wọn̄ọ ọnọ Jeremiah ke imọ idiyakke enye isịn ke ubọk mbon emi ẹyomde ndiwot enye. Jeremiah ama ọdọhọ enye ke Jehovah oyom enye asan̄a eyen eyen etiene mbon Babylon. Edi Zedekiah ikamaha ndinam emi ke ntak emi enye ekefehede mme Jew oro ẹkewọrọde ẹtiene mbon Chaldea. Ndịk ama anam Zedekiah tutu enye ọdọhọ Jeremiah okûtịn̄ se mmimọ mbiba ikenemede unọ mbọn̄ imọ.—Jer 38:1-28.
it-2 759
Nditọ Rechab
Jehovah ama ama nte nditọ Rechab ẹkekponode ete ete mmọ ẹnyụn̄ ẹkopde uyo esie. Mmọ iketiehe nte mme Jew emi mîkokopke uyo Jehovah Abasi emi okobotde mmọ. (Jer 35:12-16) Abasi ama ọn̄wọn̄ọ ọnọ nditọ Rechab ete: “Jonadab eyen Rechab idinanake owo eke adade ke iso mi kpukpru ini.”—Jer 35:19.
MAY 15-21
it-2 1228 ¶4
Zedekiah
Ẹsobo Jerusalem. Mbon Babylon ẹma ẹbụn̄ ẹdụk Jerusalem ke isua 607 mbemiso eyo Christ, “ke ọyọhọ isua duopekiet emi Zedekiah akarade, ke ọyọhọ ọfiọn̄ inan̄, ke ọyọhọ usen usụkkiet ke ọfiọn̄ oro.” Zedekiah ye kpukpru mbonekọn̄ esie ẹma ẹfen̄e okoneyo ẹwọn̄ọ ke obio. Ẹma ẹbịne Zedekiah ẹkemụm ke Jericho ẹda ẹsọk Nebuchadrezzar ke Riblah. Ẹma ẹwot nditọiren Zedekiah ke iso esie. Enye ekedi isua 32 ini oro, ntem, anaedi nditọ esie ẹkedi nditọwọn̄. Ke ẹma ẹkewot nditọ esie, ẹma ẹtịbi enye enyịn, ẹkọbi enye ke ebuka okpoho, ẹnyụn̄ ẹda enye ẹka Babylon ẹkesịn ke ufọk-n̄kpọkọbi tutu enye esịne do akpa.—2Nd 25:2-7; Jer 39:2-7; 44:30; 52:6-11; men Jer 24:8-10; Eze 12:11-16; 21:25-27 domo.
it-2 482
Nebuzaradan
Nebuzaradan ama asana Jeremiah ayak, kpa nte Nebuchadrezzar ọkọdọhọde enye anam. Enye ama etịn̄ ikọ ye Jeremiah emem emem onyụn̄ ọdọhọ enye emek ebiet emi enye edimade ndidụn̄, ọdọhọ ke iyese iban̄a enye inyụn̄ inọ enye se enye oyomde. Nebuzaradan ekedi etịn̄ikọ ke ibuot edidem Babylon sia enye ekemek Gedaliah ete akara mbon emi ẹkesụhọde ke Jerusalem. (2Nd 25:22; Jer 39:11-14; 40:1-7; 41:10) Ke isua 602 mbemiso eyo Christ, oro edi, ke n̄kpọ nte isua ition ama ekebe, Nebuzaradan ama atan̄ mme Jew en̄wen ọnyọn̄ Babylon. Anaedi mbon emi ẹkefen̄e ẹkedun̄ ke mme obio emi ẹkperede Jerusalem.—Jer 52:30.
it-1 463 ¶4
Ini ye Isua
Akpatre ini emi mbonekọn̄ Babylon ẹkekande Jerusalem ẹkụk ekedi ke ọyọhọ isua ukara Zedekiah usụkkiet, oro edi, ke isua 609 mbemiso eyo Christ. Ndien ẹkesobo obio oro ke ọyọhọ isua ukara Zedekiah 11, oro edi, ke isua 607 mbemiso eyo Christ. Emi ekedi ọyọhọ isua ukara Nebuchadnezzar 19, edieke ẹtọn̄ọde ke isua 625 mbemiso eyo Christ, emi Nebuchadnezzar ọkọtọn̄ọde ukara esie ẹbat. (2Nd 25:1-8) Ke ọyọhọ ọfiọn̄ ition isua oro, (oro edi ọfiọn̄ Ab, emi edide ufọt ufọt July esịm ufọt ufọt August), mbon Babylon ẹma ẹfọp Jerusalem, ẹwụri ibibene esie, ẹnyụn̄ ẹtan̄ ediwak nditọ Israel ẹnyọn̄ Babylon. Edi ẹma ẹkpọn̄ “ndusụk mme usụhọde owo” ke obio tutu ekem ini emi ẹkewotde Gedaliah, owo emi Nebuchadnezzar ẹkemekde ete akara obio. Ke oro ebede, mme Jew emi ẹkesụhọde ke obio ẹma ẹfen̄e ẹnyọn̄ Egypt, ndien Judah ama ana ndon. (2Nd 25:9-12, 22-26) Emi eketịbe ke ọyọhọ ọfiọn̄ itiaba (oro edi, ọfiọn̄ Ethanim m̀mê Tishri, emi edide ufọt ufọt September esịm ufọt ufọt October). Ntem, isua 70 emi Jerusalem akanade ndon ọkọtọn̄ọ ke October 1, 607 mbemiso eyo Christ etre ke 537 mbemiso eyo Christ. Akpa udịm mme Jew emi ẹkenyọn̄ọde ke Babylon ẹkedisịm Judah ke ọyọhọ ọfiọn̄ itiaba ke isua 537 mbemiso eyo Christ. Emi ekedi isua 70 nnennen nnennen tọn̄ọ mmọ ẹkekpọn̄ obio mmọ.—2Ch 36:21-23; Ezr 3:1.
MAY 22-28
it-1 430
Chemosh
Ke ini profet Jeremiah ẹketịn̄de ke ẹyesobo Moab, enye ama ọdọhọ ke ẹyemen abasi Moab emi ekerede Chemosh, ẹmen mme oku ye mbọn̄ Moab ẹka idụt en̄wen. Bụt ayanam mbon Moab ke ntak emi abasi mmọ mîdikemeke ndinyan̄a mmọ, kpa nte bụt akanamde esien Israel duop aban̄a Bethel, eyedi ke ntak emi mmọ ẹketuakde ibuot do ẹnọ eyenenan̄.—Jer 48:7, 13, 46.
it-2 422 ¶2
Moab
Idụhe owo ndomokiet emi ekemede ndifan̄a ke se Jeremiah eketịn̄de aban̄a Moab ikosụhu. Ẹma ẹsobo Moab ke ata ediwak isua emi ekebede. (Jer 48:42) Ediwak obio emi ẹkedude ke Moab, utọ nte Nebo, Heshbon, Aroer, Beth-gamul, ye Baal-meon ẹdi ndon idahaemi. Owo idiọn̄ọke-diọn̄ọ mme obio eken aba.
MAY 29–JUNE 4
it-1 54
Asua
Ke ini nditọ Isreal ẹkẹsọn̄de ibuot ye Jehovah, enye ama ayak mme asua ẹkan mmọ. (Ps 89:42; Ese 1:5, 7, 10, 17; 2:17; 4:12) Ke ini Jehovah akayakde emi etịbe, mme asua ẹkekere ke mme abasi mmimọ ẹkenam mmimọ ikan. Mmọ ẹkekere ke Jehovah idimiaha mmimọ ufen ke se mmọ ẹnamde ikọt esie. (De 32:27; Jer 50:7) Ntre, Jehovah ama ekpep mmọ nsụhọdeidem, amia mmọ ufen (Isa 1:24; 26:11; 59:18; Na 1:2); ndien enye akanam kpukpru emi ke ntak edisana enyịn̄ esie.—Isa 64:2; Eze 36:21-24.
it-1 94 ¶6
Nditọ Ammon
Tiglath-pileser III ye edidem en̄wen emi akadade itie esie ẹma ẹtan̄ esien Israel duop ẹnyọn̄ Assyria. (2Nd 15:29; 17:6) Etie nte ke ẹma ẹketan̄ mmọ ẹnyọn̄ Assyria ke nditọ Ammon ẹkeka ẹkedụn̄ ke isọn̄ Gad. Nditọ Ammon ẹma ẹn̄wana ye Jephthah ẹyom ndibọ isọn̄ emi, edi ikekemeke. (Men Ps 83:4-8 domo.) Jehovah ama ayat esit ye nditọ Ammon ke ndikemen isọn̄ nditọ Gad, onyun̄ ọdọhọ Jeremiah ọdọhọ mmọ ke iyosobo mmọ ye abasi mmọ, Malcam (Milcom). (Jer 49:1-5) Nditọ Ammon ẹma ẹn̄yụn ẹdọn̄ mbon n̄wo ẹkesịn mfịna ye mbon Judah ke utịt utịt isua ukara Edidem Jehoiakim.—2Nd 24:2, 3.