Mme N̄wed Emi Ẹsiakde ke N̄wed Mbono Esop Uwem ye Utom Nnyịn
OCTOBER 12-18
MME AKPAN N̄KPỌ KE IKỌ ABASI | EXODUS 33-34
“Nti Edu Jehovah Emi Anamde Ima Enye”
it-2-E 466-467
Enyịn̄
Mme n̄kpọ oro Abasi okobotde ẹwụt ke Abasi odu, edi mmọ inamke idiọn̄ọ enyịn̄ Abasi. (Ps 19:1; Ro 1:20) Ndidiọn̄ọ enyịn̄ Abasi ikụreke ke ndidiọn̄ọ ke enye ekere Jehovah. (2Ch 6:33) Ndidiọn̄ọ enyịn̄ Abasi esịne n̄ko ndidiọn̄ọ se Abasi aduakde, se enye anamde, ye mme edu esie nte ẹtịn̄de ke Bible. (Men 1Nd 8:41-43; 9:3, 7; Ne 9:10 domo.) Ke uwụtn̄kpọ, ke ini Jehovah ọkọdọhọde ke imọ imọdiọn̄ọ Moses “ke enyịn̄,” oro ọkọwọrọ ke enye enen̄ede ọdiọn̄ọ Moses. (Ex 33:12) Moses ama okụt ubọn̄ Jehovah, onyụn̄ okop Jehovah ‘atan̄ade enyịn̄ Esie.’ (Ex 34:5) Jehovah ikokotke enyịn̄ esie kpọt inọ Moses, enye ama etịn̄ mme edu esie n̄ko ye nte enye esinamde n̄kpọ. Enye ọkọdọhọ ete: “Jehovah, Jehovah, Abasi mbọm ye mfọn, isọpke iyatesịt edi awak ima-mfọnido ye akpanikọ, enịm ima-mfọnido ọnọ ediwak tọsịn, efen ndudue ye ubiatibet ye idiọkn̄kpọ, edi ididehedei iyak owo ọbọhọ ufen idiọkn̄kpọ, ada ufen idiọkn̄kpọ mme ete amia nditọ ye nditọ nditọ, onyụn̄ ada amia ọyọhọ emana ita ye ọyọhọ emana inan̄.” (Ex 34:6, 7) Kpasụk ntre, ke ini Moses ọkọkwọde ete “nyatan̄a enyịn̄ Jehovah,” enye ama etịn̄ nte Jehovah akanamde n̄kpọ ye nditọ Israel onyụn̄ asiak mme edu Jehovah.—De 32:3-44.
OCTOBER 19-25
OCTOBER 26–NOVEMBER 1
MME AKPAN N̄KPỌ KE IKỌ ABASI | EXODUS 37-38
“Mme Itieuwa Oro Okodude ke Tent Utuakibuot ye Se Ẹkesinamde Do”
it-1-E 82 ¶3
Itieuwa
Itieuwa ufọp incense. Ẹkeda n̄ko eto acacia ẹnam itieuwa ufọp incense, emi ẹkotde n̄ko “itieuwa emi ẹnamde ke gold.” (Ex 39:38) Ẹma ẹda gold ẹfụk enyọn̄ ye n̄kan̄ esie, ẹnyụn̄ ẹda gold ẹnam mben esie ẹkanade. Itieuwa oro ekedi n̄kpọ nte ikpat kiet ye ubak ke ofụri n̄kan̄ mbinan̄ onyụn̄ okon̄ n̄kpọ nte ikpat ita. Ẹma ẹnam nnụk ẹdori ke inụk mbinan̄ ke enyọn̄ itieuwa oro. Ẹkeda eto acacia ẹnam nnyan eto emi ẹkesidade ẹmen itieuwa oro ẹnyụn̄ ẹda gold ẹfụk eto oro. Ẹma ẹnyụn̄ ẹda gold ẹnam ẹkara n̄kpọ inan̄ emi ẹsisịnde eto oro, ndien ẹkesịn ẹkara n̄kpọ inan̄ oro ke mben itieuwa oro, iba ke n̄kan̄ emi, iba ke n̄kan̄ eken. (Ex 30:1-5; 37:25-28) Ẹma ẹsifọp san̄asan̄a incense ke itieuwa oro ikaba ke usen, usenubọk ye mbubreyo. (Ex 30:7-9, 34-38) Mme itien̄wed en̄wen ẹwụt ke ẹma ẹsikama n̄kpọ ufọp incense ẹfọp incense, ndien oro owụt ke etie nte n̄kpọ ufọp incense ama odu n̄ko ke itieuwa ufọp incense. (Le 16:12, 13; Heb 9:4; Edi 8:5; men 2Ch 26:16, 19 domo.) Itieuwa ufọp incense okodu ekpere ikpehe emi abaharede Ata Edisana, ntak edi oro ẹdọhọde ke enye okodu “ke iso ekebe ntiense.”—Ex 30:1, 6; 40:5, 26, 27.
it-1-E 1195
Incense
Ẹkeda mme ọsọn̄urua n̄kpọ ẹnam incense oro ẹkesifọpde ke tent utuakibuot oro okodude ke wilderness. Nditọ Israel ẹketịp mme n̄kpọ oro ẹkedade ẹnam incense oro. (Ex 25:1, 2, 6; 35:4, 5, 8, 27-29) Jehovah ama etịn̄ nte ẹdisan̄ade ibuak incense oro. Enye ọkọdọhọ Moses ete: “Da mme ufuọn̄n̄kpọ emi: ufuọn̄n̄kpọ emi ẹdade ẹnam incense ye onycha ye edifuọn̄ galbanum ye ata eti frankincense. Mmọ kiet kiet ẹnyene ndidi ukem udomo. Nyụn̄ nam enye akabade edi incense, mbuaha ufuọn̄n̄kpọ, nte emi anam edifuọn̄ aran anamde, ẹsịnde inụn̄, ẹnyụn̄ ẹnamde edi ata eti, edisana n̄kpọ. Nyụn̄ tịm ndusụk enen̄ede ọdọrọ nyụn̄ diọk ndusụk ke iso Ntiense ke tent usopidem, emi ndiwụtde fi idem. Enye enyene ndidi ata edisana n̄kpọ nnọ mbufo.” Kop se Jehovah eketịn̄de mi ndiwụt ke incense enye emi edi edisana, ke owo inyeneke ndinam enye nnọ idemesie: “Owo ekededi eke anamde n̄kpọ eke ebietde enye ete ikop inem utebe esie, yak ẹsịbe enye ẹfep ke otu orụk esie.”—Ex 30:34-38; 37:29.
it-1-E 82 ¶1
Itieuwa
Mme Itieuwa Tent Utuakibuot. Ke ini ẹkebọpde tent utuakibuot, Abasi ama ọdọhọ ẹnam itieuwa iba, enye ama onyụn̄ etịn̄ nte mme itieuwa oro ẹditiede. Ẹkeda eto acacia ẹnam itieuwa edifọp uwa ẹnyụn̄ ẹda okpoho ẹfụk enye. Enye ikenyeneke okukịp, idak esie okonyụn̄ ana in̄wan̄. Itieuwa emi ke ẹkenyụn̄ ẹkot “itieuwa okpoho.” (Ex 39:39) Enye ekedi n̄kpọ nte ikpat itiaba ye ubak ke n̄kan̄ mbinan̄ onyụn̄ ọniọn̄ n̄kpọ nte ikpat inan̄ ye ubak. Enye ama enyene “nnụk” emi ọwọrọde ke inụk esie mbinan̄. Ẹma ẹda okpoho ẹnam n̄kpọ un̄wan n̄kpọ ẹsịn ke esịt itieuwa oro, “ke ufọt ufọt” esie. Ẹma ẹsịn ekara n̄kpọ ke inụk esie mbinan̄ ekpere itie emi ẹkesịnde n̄kpọ un̄wan n̄kpọ, ndien etie nte ekara n̄kpọ emi ke ẹkesịn nnyan eto emi ẹkedade okpoho ẹfụk, emi ẹkesidade ẹmen itieuwa oro. Etie nte ẹkesiak itieuwa oro ke n̄kan̄ mbiba man ẹkpekeme ndisịn n̄kpọ un̄wan n̄kpọ ke ufan̄ oro, ndien ekara n̄kpọ oro ọwọrọ ada ke n̄kan̄ mbiba. Ntaifiọk emi ẹsinamde ndụn̄ọde ẹban̄a Bible ẹtịn̄ nsio nsio n̄kpọ ẹban̄a nte ẹkenamde n̄kpọ emi, ndien ediwak mmọ ẹdọhọ ke ẹkara n̄kpọ itiaita ẹkedu ke itieuwa oro, inan̄ ẹkeyịre ke n̄kpọ un̄wan n̄kpọ ke esịt itieuwa oro, inan̄ ẹnyụn̄ ẹdu ke an̄wa itieuwa oro. Mmọ ẹdọhọ ke mbon oro ẹkedude ke an̄wa ke ẹkesisịn nnyan eto emi ẹkesidade ẹmen itieuwa oro. Ẹkeda okpoho ẹnam eso ye udọk emi ẹkesidade ẹsio ntọn̄, usan emi ẹkesidọn̄de iyịp unam, fork emi ẹkesidade ẹkịm obụk unam, ye n̄kpọ ufọp incense.—Ex 27:1-8; 38:1-7, 30; Nu 4:14.
Yom N̄kpọuto ke Ikọ Abasi
it-1-E 36
Acacia
Eto acacia enyene ediwak nnyan n̄kukịm ke n̄kọk esie, ndien n̄kọk esie esinen̄ede atara. Eto emi esikọri ekpere kiet eken, ndien n̄kọk mmọ ẹsiwan̄a kiet. Etie nte emi anam Bible awak ndikot eto acacia shit·timʹ emi ọwọrọde ediwak eto acacia. Eto acacia ekeme ndikọri nsịm ikpat 20 m̀mê ikpat 26. Ikọn̄ esie esiwak tutu onyụn̄ ememem. Eto emi esision̄o flawa emi edide utouto onyụn̄ enem utebe, enye esinyụn̄ osion̄o n̄kpasịp. Ikpọk eto oro edi obubịt obubịt onyụn̄ etie n̄kpotụk n̄kpotụk. Eto acacia esisat onyụn̄ ọsọn̄ tutu nnuene ye n̄ken̄e unam eken ikemeke ndita enye. Nte eto acacia etiede ye nte enye akawakde ke wilderness akanam ẹda enye ẹbọp tent utuakibuot ye mme n̄kpọ oro ẹkedude do. Ẹkeda eto acacia ẹnam ekebe ediomi (Ex 25:10; 37:1), okpokoro emi ẹkesidoride uyo iso Abasi (Ex 25:23; 37:10), nsio nsio itieuwa (Ex 27:1; 37:25; 38:1), nnyan eto emi ẹkesidade ẹmen mme n̄kpọ emi (Ex 25:13, 28; 27:6; 30:5; 37:4, 15, 28; 38:6), mme adaha emi ẹkeyịride ọfọn̄ enyịnusụn̄ ye ikpehe (Ex 26:32, 37; 36:36), obubọk tent utuakibuot (Ex 26:15; 36:20), ye mbiọn̄ eto mmọ (Ex 26:26; 36:31).