Mme N̄wed Emi Ẹsiakde ke N̄wed Mbono Esop Uwem ye Utom Nnyịn
NOVEMBER 2-8
MME AKPAN N̄KPỌ KE IKỌ ABASI | EXODUS 39-40
“Moses Ama Anam Kpukpru Se Jehovah Ọkọdọhọde”
Yom N̄kpọuto ke Ikọ Abasi
it-2-E 884 ¶3
Ikpa Seal
Nte Nditọ Israel Ẹkesan̄ade Ẹnyene. Edieke taʹchash oro ẹtịn̄de ẹban̄a ke Bible edide seal oro nnyịn idiọn̄ọde mfịn, owo ekeme ndibụp m̀mê nditọ Israel ẹkesan̄a didie ẹnyene ikpa seal. Kpa ye oro edide seal esiwak ndidu ke n̄kan̄ Arctic ye Antarctica sia ẹnen̄erede ẹbịt, ndusụk seal ẹsima ndidu ke ikpehe ererimbot emi mîbịtke ntre. Mfịn, enyene utọ seal emi ẹsụk ẹdude ke Inyan̄ Mediterranean ye mme inyan̄ en̄wen oro mînen̄ekede ibịt. Ke ediwak isua emi ebede tọn̄ọ ẹkewet Bible, mme owo ẹwot ata ediwak seal, edi ekeme ndidi seal ẹkeyọyọhọ Inyan̄ Mediterranean ye Ididuot Inyan̄ ke eyo Bible. Idem ke 1832, Dictionary of the Holy Bible emi Calmet ekewetde (p. 139) ọkọdọhọ ke ẹkụt seal ke ediwak n̄kpri isuo Ididuot Inyan̄, emi ẹdude ẹkpere Sinai.—Se n̄ko The Tabernacle’s Typical Teaching, p. 47, emi A. J. Pollock ke London ekewetde.
NOVEMBER 9-15
MME AKPAN N̄KPỌ KE IKỌ ABASI | LEVITICUS 1-3
“Se Ikanamde Ẹsiwa Nsio Nsio Uwa”
it-2-E 525
Mme Uwa
Edifọp uwa. Ẹkesiwa edifọp uwa ofụri ofụri ẹnọ Abasi, owo isụhọke n̄kpọ ndomokiet ke idem unam oro inọ owo emi awade. (Men Jg 11:30, 31, 39, 40 domo.) Ẹkesiwa uwa emi ẹben̄e Jehovah ẹte enyịme uwa idiọkn̄kpọ mîdịghe ẹwa man ẹwụt ke Jehovah enyịme uwa idiọkn̄kpọ. Ndusụk ini, ẹkesiwa edifọp uwa ke ẹma ẹkewa uwa idiọkn̄kpọ. Jesus Christ akawa ofụri idem esie nte “edifọp uwa” ọnọ Abasi.
it-2-E 528 ¶4
Mme Uwa
Uwa n̄kpasịp. Ndusụk ini, ẹkesiwa uwa n̄kpasịp ke ini ẹwade uwa ebuana, edifọp uwa, ye uwa idiọkn̄kpọ, ẹnyụn̄ ẹwa enye nte akpa mbun̄wụm. Ke mme ini en̄wen, ẹkesiwa enye ikpọn̄. (Ex 29:40-42; Le 23:10-13, 15-18; Nu 15:8, 9, 22-24; 28:9, 10, 20, 26-28; ib. 29) Ẹkesiwa uwa emi ndiwụt nte Abasi enen̄erede ọdiọn̄ ikọt esie onyụn̄ anamde mmọ ẹforo. Ẹma ẹsiwak ndisịn aran ye frankincense ke uwa emi. Ẹma ẹsida eti ndomuyo, edifọp barley m̀mê wheat, ekara uyo m̀mê mfefere uyo emi ẹsan̄de ke usan̄uyo, ke akpan̄kpan̄, m̀mê ke eso ufran̄n̄kpọ ẹwa uwa n̄kpasịp. Ẹma ẹsidori ndusụk uwa n̄kpasịp ke itieuwa edifọp uwa, mme oku ẹta ndusụk, ndien owo emi awade etiene ata edieke edide uwa ebuana. (Le 6:14-23; 7:11-13; Nu 18:8-11) Owo ikesisịnke leaven m̀mê “aranọkwọk” ke uwa n̄kpasịp (etie nte “aranọkwọk” oro ẹtịn̄de ẹban̄a mi idịghe ata ata aranọkwọk, edi edi mmọn̄ fig m̀mê mmọn̄ mfri en̄wen).—Le 2:1-16.
Yom N̄kpọuto ke Ikọ Abasi
NOVEMBER 16-22
MME AKPAN N̄KPỌ KE IKỌ ABASI | LEVITICUS 4-5
“Nọ Jehovah Ofụri Se Ekemede”
it-2-E 527 ¶9
Mme Uwa
Uwa ubiomikpe. Ẹkesiwa uwa ubiomikpe n̄ko ke ntak idiọkn̄kpọ, sia idiọkn̄kpọ ekesinam ẹbiom owo ikpe. Ẹkesiwa uwa emi ke ini owo anamde ndusụk idiọkn̄kpọ. Uwa ubiomikpe ama okpụhọde esisịt ye mme uwa idiọkn̄kpọ eken. Etie nte ẹkesiwa uwa emi ke ini owo eduede Jehovah m̀mê anamde idiọkn̄kpọ adian owo. Ẹkesiwa uwa ubiomikpe ẹnọ Jehovah man enye efen idiọkn̄kpọ oro owo akanamde mîdịghe ẹwa man owo emi akabarede esịt afiak ekeme ndinyene ifụre nnam se enye ekesinamde onyụn̄ etre ndibọ ufen idiọkn̄kpọ esie.—Men Isa 53:10 domo.
Yom N̄kpọuto ke Ikọ Abasi
it-1-E 1130 ¶2
Edisana
Unam ye Mbun̄wụm In̄wan̄. Akpa eyen enan̄ emi edide ayara, akpa okukịm erọn̄ emi amanade, ye akpa okpo-ebot emi amanade ẹkedi ndisana ẹnọ Jehovah, ndien ikanaha ẹfak mmọ. Akana ẹwawa mmọ, ndien mme oku ẹkenyene ndusụk n̄kpọ ke idem unam oro. (Nu 18:17-19) Akpa mbun̄wụm in̄wan̄ ye ọyọhọ mbak duop ẹkedi ndisana, kpa ntre n̄ko ye kpukpru uwa ye enọ oro ẹkenamde asana man ẹda ẹnam utom ke edisana ebiet. (Ex 28:38) Jehovah okoyom ẹda kpukpru n̄kpọ emi enye ọdọhọde ke ẹdi ndisana n̄kpọ ke akpan n̄kpọ. Enye ikoyomke owo ada mmọ anam n̄kpọ ọnọ idemesie m̀mê asabade mmọ. Yak ida ibet emi Abasi ọkọnọde aban̄a ọyọhọ mbak duop ke uwụtn̄kpọ. Edieke owo okosiode ndusụk wheat enịm nte ọyọhọ mbak duop, ekem enye m̀mê owo ke ufọk esie edue emen wheat oro etem, enye edue ibet oro Abasi ọkọnọde aban̄a ndisana n̄kpọ. Akana enye ọnọ usiene n̄kpọ oro, afiak adian mbahade kiet ke itie ition ke n̄kpọ oro ọnọ oku, onyụn̄ awa okukịm erọn̄ oro eyede idem. Emi ama owụt ke ikpanaha owo ada n̄kpọ emi Jehovah ọkọdọhọde ke edi edisana ebre mbre.—Le 5:14-16.
NOVEMBER 23-29
MME AKPAN N̄KPỌ KE IKỌ ABASI | LEVITICUS 6-7
“Uwa Emi Ẹkesidade Ẹkọm Jehovah”
Yom N̄kpọuto ke Ikọ Abasi
it-1-E 833 ¶1
Ikan̄
Enye emi ekesisakde ke tent utuakibuot ye ke temple. Ikan̄ ama esidu ke tent utuakibuot ye ke temple emi nditọ Israel ẹkesituakde ibuot ẹnọ Jehovah. Kpukpru usenubọk ye mbubreyo, akana akwa oku ọfọp incense ke itieuwa ufọp incense. (Ex 30:7, 8) Abasi ama ọnọ ibet ete ẹkûyak ikan̄ enịme ke itieuwa edifọp uwa. (Le 6:12, 13) Mme Jew ẹdọhọ ke Abasi ekesịn ikan̄ ke itieuwa oro. Kpa ye oro ediwak owo ẹnịmde ikọ mmọ oro, idịghe se N̄wed Abasi etịn̄de edi oro. Jehovah ama ọdọdọhọ Moses ọdọhọ nditọ Aaron ete ‘ẹbara ikan̄ ke itieuwa ẹnyụn̄ ẹtịm ifia ẹdọn̄ ke ikan̄’ oro mbemiso ẹdoride uwa ke itieuwa oro. (Le 1:7, 8) Ekedi ke ẹma ẹkemek Aaron ye nditọ esie oku, ẹnyụn̄ ẹfọp uwa emi ẹkedade ẹmek mmọ, ke ikan̄ okoto Jehovah edita uwa emi ẹkedoride ke itieuwa oro. Etie nte ikan̄ oro okoto obubit enyọn̄ emi okofụkde tent utuakibuot. Emi owụt ke idịghe Jehovah ekedisịn ikan̄ ke ifia emi ẹkedọn̄de ke itieuwa oro; ikan̄ oro okotode Jehovah ekedita ‘edifọp uwa ye mbak oro ẹnyenede isek emi ẹkedorode ke itieuwa’ oro. Ntre etie nte ikan̄ oro ẹma ẹkesesịn ke itieuwa oro ye enye emi okotode Jehovah edita edifọp uwa oro akaka iso asak oro ke itieuwa. (Le 8:14–9:24) Ikan̄ ama onyụn̄ oto Jehovah edita uwa ndondo oro Solomon ọkọbọn̄de akam ama ke ini ẹkeyakde temple ẹnọ Jehovah.—2Ch 7:1; se n̄ko Jg 6:21; 1Nd 18:21-39; 1Ch 21:26 man okụt mme ini en̄wen emi ikan̄ okotode Jehovah edita uwa emi ikọt esie ẹkewade ẹnọ enye.
si-E 27 ¶15
Leviticus—Ọyọhọ N̄wed 3 ke Bible
15 (3) Abasi ọkọdọhọ ke ana owo emi eduede anam idiọkn̄kpọ awa uwa idiọkn̄kpọ. Utọ owo emi enye edide ekebiere utọ unam emi enye ediwade. Idịghe ukem unam ke oku, ofụri esop Israel, ọbọn̄, m̀mê ikpîkpu owo ẹkesida ẹwa uwa idiọkn̄kpọ. Uwa idiọkn̄kpọ ama okpụhọde ye uwa ebuana ye uwa ekọm sia enye ikedịghe n̄kpọ emi edide owo akpama anam. Akana owo ekededi emi anamde idiọkn̄kpọ awa uwa idiọkn̄kpọ.—Le 4:1-35; 6:24-30.
NOVEMBER 30–DECEMBER 6
MME AKPAN N̄KPỌ KE IKỌ ABASI | LEVITICUS 8-9
“Jehovah Owụt ke Imọ Imek Mme Oku”
it-1-E 1207
Ini Ẹkemekde Oku
Moses ama eyet Aaron ye nditọ Aaron idem, oro edi, Nadab, Abihu, Eleazar, ye Ithamar (mîdịghe ọdọhọ mmọ ẹyere mmọn̄) ke besịn okpoho emi okodude ke okụre tent utuakibuot. Enye ama onyụn̄ esịne Aaron ọfọn̄ akwa oku. (Nu 3:2, 3) Ediye ọfọn̄ emi ẹkesịnede Aaron do ama anam ẹdiọn̄ọ utọ owo emi enye edide ye utọ utom emi ẹmekde enye ẹte anam. Ekem Moses ama ada aran oro ẹsidade ẹyet owo eyet ke tent utuakibuot ye ke kpukpru se idude ke esịt, onyụn̄ eyet ke itieuwa edifọp uwa ye ke besịn ye ke kpukpru se idude ke itieuwa oro onyụn̄ anam mmọ ẹsana. Owo ikenyeneke ndida mme n̄kpọ oro nnam n̄kpọ en̄wen ekededi, ke mîbọhọke utom oro Abasi ọkọdọhọde ẹda mmọ ẹnam. Ke akpatre, Moses ama ada ndusụk aran oro ẹsidade ẹyet owo ọtọhọ Aaron ke ibuot man owụt ke ẹmek enye oku.—Le 8:6-12; Ex 30:22-33; Ps 133:2.
it-1-E 1208 ¶8
Ini Ẹkemekde Oku
Ke ọyọhọ usen itiaita ke ẹma ẹkemek Aaron ye nditọ esie oku, mmọ ẹma ẹtọn̄ọ utom mmọ (ikoyomke Moses an̄wam mmọ aba). Usen oro ke mmọ ẹkewa akpa uwa mmọ. Mmọ ẹma ẹwa uwa usio-isop ke ibuot nditọ Israel ke ntak idiọkn̄kpọ emi mmọ ẹkedade-da ẹmana ye ke ntak emi mmọ ẹkewade uwa ẹnọ eyen enan̄ o-gold, edi ẹte ke iwa inọ Jehovah, ndien oro ikenemke Jehovah esịt. (Le 9:1-7; Ex 32:1-10) Jehovah ama anam ikan̄ edita nyọhọ nsụhọ uwa emi mme oku ẹkewade, emi okodorode ke itieuwa, ndien oro okowụt ke Jehovah enyịme mmọ ẹdi oku. Etie nte ikan̄ oro okoto obubịt enyọn̄ oro okodude ke enyọn̄ tent utuakibuot.—Le 9:23, 24.
Yom N̄kpọuto ke Ikọ Abasi
it-2-E 437 ¶3
Moses
Abasi ama emek Moses esịne-ufọt ke ediomi oro Abasi akanamde ye nditọ Israel. Jesus edi Esịne-ufọt ke obufa ediomi. Ntre, Moses ye Jesus kpọt ke Abasi ọnọ utọ ifetutom emi. Moses ama ada iyịp unam oro ẹkewade esịme ke n̄wed ediomi oro Abasi akanamde ye nditọ Israel. Moses akada ke ibuot Jehovah ke ediomi emi, ndien etie nte mbiowo Israel ẹkeda ke ibuot ofụri idụt Israel. Moses ama okot n̄wed ediomi oro ọnọ mmọ, mmọ ẹnyụn̄ ẹdọhọ ẹte, “Nnyịn imenyịme ndinam kpukpru se Jehovah ọdọhọde nnyụn̄ n̄kop uyo esie.” (Ex 24:3-8; Heb 9:19) Sia Moses ekedide esịne-ufọt ke ediomi emi Abasi akanamde ye nditọ Israel, Abasi ama ọnọ enye ediwak utom. Moses ama okụt ete ke ẹbọp tent utuakibuot ẹnyụn̄ ẹnam mme n̄kpoduoho esie nte Abasi ọkọdọhọde. Enye okonyụn̄ ada iso ke edinam emi ẹkedade ẹmek mme oku, ada san̄asan̄a aran eyet ke tent utuakibuot, onyụn̄ ada eyet Aaron emi ekedide akwa oku. Ekem, enye ama eteme mme oku oro nte ẹkpewade akpa uwa mmọ.—Ex ib. 25-29; Le ib. 8, 9.