Mme N̄wed Emi Ẹsiakde ke N̄wed Mbono Esop Uwem ye Utom Nnyịn
DECEMBER 7-13
MME AKPAN N̄KPỌ KE IKỌ ABASI | LEVITICUS 10-11
“Ana Ima Jehovah Ikan Mbonubon Nnyịn”
it-1-E 1174
Esen N̄kpọ
Esen Ikan̄ ye Incense. Leviticus 10:1 ọdọhọ ke nditọ Aaron, Nadab ye Abihu, ẹma “ẹda esen ikan̄ ẹdi ke iso Jehovah, emi enye mîkowụkke mmọ ite ẹnam.” Ndien Jehovah ama anam ikan̄ oto enyọn̄ edita mmọ owot. (Le 10:2; Nu 3:4; 26:61) Ke oro ebede, Jehovah ama ọdọhọ Aaron ete: “Kûn̄wọn̄ wine m̀mê ọkpọsọn̄ mmịn, afo ye nditọiren fo emi ẹdude ye afo, ke ini mbufo ẹdụkde tent usopidem, mbak mbufo ẹdikpan̄a. Emi edi nsinsi ewụhọ ke ofụri emana mbufo, man ẹnam ukpụhọde odu ke ufọt edisana n̄kpọ ye n̄kpọ emi ẹsabarede ye ke ufọt se idehede ye se isanade, man ẹnyụn̄ ẹkpep nditọ Israel kpukpru mme ewụhọ oro Jehovah akadade Moses owụk mmọ.” (Le 10:8-11) Emi owụt ke etie nte Nadab ye Abihu ẹkenam n̄kpọ ke enyịn mmịn, oro akanam mmọ ẹsọn̄ esịt ẹmen ikan̄ emi Jehovah mîkowụkke mmọ ẹdi iso esie. Anaedi ini emi mmọ ẹkemende ikan̄ oro ẹdi, itie emi mmọ ẹkemende ikan̄ oro, m̀mê nte mmọ ẹkemende ikan̄ oro ẹdi iso Jehovah akanam ẹkot enye esen ikan̄. Onyụn̄ ekeme ndidi mmọ ikadaha mme n̄kpọ oro ẹsiakde ke Exodus 30:34, 35 inam incense oro mmọ ẹkefọpde. Abasi ikọdọhọke yak ifen inọ imọ sia mmọ ẹkenamde oro ke enyịn mmịn.
Yom N̄kpọuto ke Ikọ Abasi
it-1-E 111 ¶5
Unam
Enyene ndusụk unam emi Ibet Moses ọkọdọhọde owo okûta. Ibet emi ọkọbọp nditọ Israel kpọt sia Leviticus 11:8 ọdọhọ ete: “Mmọ ẹdi ndedehe n̄kpọ ẹnọ mbufo,” oro edi, nditọ Israel. Tọn̄ọ Jesus akakpa onyụn̄ abiat Ibet Moses efep, idụhe ibet ndomokiet emi etịn̄de utọ unam emi owo akpatade ye utọ emi owo mîkpataha. Kpukpru owo ẹkeme ndita unam ekededi nte Abasi ọkọdọhọde Noah ke Ukwọ ama okokụre.—Col 2:13-17; Ge 9:3, 4.
DECEMBER 14-20
MME AKPAN N̄KPỌ KE IKỌ ABASI | LEVITICUS 12-13
“Se Ikpepde Ito Ibet Oro Ẹkenọde Ẹban̄a Akpamfia”
it-2-E 238 ¶3
Akpamfia
Ke ufọk ye ke ọfọn̄. Akpamfia ama esidụk ọfọn̄ idet erọn̄, ọfọn̄ linen, m̀mê n̄kpọ ekededi emi ẹdade ikpa ẹnam. Akpamfia oro ama esikụre edieke eyetde n̄kpọ oro, ẹma ẹsinyụn̄ ẹnịm n̄kpọ oro nsannsan. Edi edieke udọn̄ọ oro edide awawa ye utouto m̀mê eyịbede mînyụn̄ imaha ndikụre, ekedi ata idiọk akpamfia, ndien akana ẹfọp n̄kpọ oro enye odude. (Le 13:47-59) Edieke akpamfia emi edide awawa ye utouto m̀mê eyịbede odude ke ibibene ufọk, oku ekenyene ndidọhọ owo okûdụk ufọk oro. Ẹkeme ndiyom ẹsion̄o itiat itie emi udọn̄ọ oro odude, ẹnyụn̄ ẹkwat ibibene esịtufọk oro ẹkanade, ndien ẹkenyene nditop itiat oro ye mbat ukọkufọk oro mmọ ẹkwatde ẹdian̄ade nduọn̄ọ ke edem obio ke ebiet emi edehede. Edieke udọn̄ọ oro ọtọn̄ọde ntak odụk ufọk oro, oku ekenyene ndidọhọ ke ufọk oro edehe ndien akana ẹwụri ufọk oro ẹnyụn̄ ẹbiom kpukpru n̄kpọ ẹkeduọn̄ọ ke ebiet emi edehede. Edi edieke oku esede ufọk oro onyụn̄ ọdọhọde ke asana, enyene se akanade ẹnam man ufọk oro asana ọbọhọ idiọkn̄kpọ. (Le 14:33-57) Ẹdọhọ ke etie nte akpamfia emi ekesidụkde ọfọn̄ ye ufọk ekedi mfụt m̀mê n̄kọrọsi; edi owo inen̄ekede idiọn̄ọ.
Yom N̄kpọuto ke Ikọ Abasi
DECEMBER 21-27
MME AKPAN N̄KPỌ KE IKỌ ABASI | LEVITICUS 14-15
“Ana Mbon Oro Ẹtuakde Ibuot Ẹnọ Jehovah Ẹsana”
it-1-E 263
Ndiyere Mmọn̄
Enyene nsio nsio n̄kpọ emi akanamde nditọ Israel ẹdehe, ndien akana mmọ ẹyere mmọn̄ man ẹsana. Ke uwụtn̄kpọ, owo emi udọn̄ọ akpamfia okụrede, owo emi otụkde n̄kpọ emi owo oro “n̄kpọ ọwọrọde ke idem” okotụkde, erenowo emi nsene ọwọrọde ke idem, n̄wan emi itieisọn̄ esie okụrede m̀mê emi iyịp etrede ndiwọrọ enye ke idem, m̀mê owo emi enyenede ebuana idan̄, ama ‘edehe’ ndien akana enye eyere mmọn̄. (Le 14:8, 9; 15:4-27) Owo emi odude ke tent emi okpo owo odude m̀mê otụkde okpo owo, ama ‘edehe’ ndien akana ẹda mmọn̄ ẹnam enye asana. Edieke owo ekededi eketrede ndinam se Jehovah ọkọdọhọde mbon oro ẹdehede ẹnam, ẹkenyene “ndisịbe [owo] oro mfep ke otu mbon esop, koro enye asabarede edisana ebiet Jehovah.” (Nu 19:20) Imosụk ise edide Bible ama oyom ndidọhọ ke owo asana ke enyịn Jehovah, enye ọdọhọ ke owo oro eyet ubọk m̀mê anam idem esie asana. (Ps 26:6; 73:13; Isa 1:16; Eze 16:9) Ndida ikọ Jehovah, emi ẹmende ẹdomo ye mmọn̄, nyet idem ekeme ndinam owo asana.—Eph 5:26.
it-2-E 372 ¶2
itieisọn̄
N̄wan emi iyịp ọwọrọde ke idem ebịghi ke ini mîsịmke ini emi enye esidude ke itieisọn̄, m̀mê n̄wan emi iyịp ọwọrọde enye ke idem ebịghi akan ini itieisọn̄ esie, ama edehe. Ndien n̄kpọ ekededi emi enye anade m̀mê etiede ini oro ama edehe, owo eke onyụn̄ otụkde mme n̄kpọ oro ama edehe n̄ko. Ke ini n̄kpọ emi ọkọwọrọde enye ke idem okụrede, enye ekenyene ndibat usen itiaba nnọ idemesie, ndien ke oro ebede enye ayasana. Ke ọyọhọ usen itiaita, enye ekenyene ndida mbomon̄kuku iba m̀mê nditọ ibiom iba nsọk oku. Ndien oku ekenyene ndiwa inuen kiet nte uwa idiọkn̄kpọ nnọ Jehovah onyụn̄ awa enye eken nte edifọp uwa man osio isop ọnọ enye.—Le 15:19-30.
it-1-E 1133
Edisana Ebiet
2. Tent utuakibuot ye temple nte ini akade. Tent utuakibuot ye okụre esie ye temple ye okụre esie ẹkedi edisana ebiet. (Ex 38:24; 2Ch 29:5; Ut 21:28) Akpan n̄kpọ emi okodude ke okụre oro ekedi itieuwa edifọp uwa ye besịn okpoho. Mmọ n̄ko ẹkedi ndisana n̄kpọ. Mbon oro ẹsanade kpọt ẹkesidụk okụre tent utuakibuot; n̄ko ikanaha owo emi edehede odụk okụre temple. Ke uwụtn̄kpọ, ikanaha n̄wan emi edehede otụk edisana n̄kpọ ekededi m̀mê odụk edisana ebiet. (Le 12:2-4) N̄ko, ọkpọkọm owo edehe ke ata anyan ini, owo ikayakke enye odụk edisana ebiet. (Le 15:31) Mbon oro ẹkesimende uwa ẹdi man ẹnam mmọ ẹsana ke akpamfia ama okokụre mmọ ẹkesida ke inuaotop okụre tent utuakibuot ẹnọ se mmọ ẹkedade ẹdi. (Le 14:11) Owo emi edehede ikesitieneke ita unam uwa ebuana ke tent utuakibuot m̀mê ke temple. Edieke enye atade, ẹkenyene ndiwot enye.—Le 7:20, 21.
Yom N̄kpọuto ke Ikọ Abasi
it-1-E 665 ¶5
Utọn̄
Ke ini ẹkemekde mme oku ke Israel, Abasi ama ọdọhọ Moses ada iyịp okukịm erọn̄ oro ẹkedade ẹmek mme oku eyet Aaron ye nditọiren esie kiet kiet ke mben utọn̄ nnasia, ye ke akpan nnuenubọk nnasia, ye ke akpan nnuenukot nnasia. Ndien oro okowụt ke ana mmọ ẹkop uyo Abasi, ẹnam n̄kpọ Abasi, ẹnyụn̄ ẹsan̄a ke usụn̄ Abasi. (Le 8:22-24) Kpasụk ntre, ke ini ẹkenamde owo emi akpamfia okụrede asana, Ibet ọkọdọhọ ke oku enyene ndida ndusụk iyịp okukịm erọn̄ emi owo oro ọkọnọde nte uwa ubiomikpe ye aran emi enye akadade edi nyet enye ke mben utọn̄ nnasia. (Le 14:14, 17, 25, 28) Ẹma ẹsinyụn̄ ẹnam n̄kpọ oro akade nditie ntre ke ini ofụn ọdọhọde ke iyom ndidu ye eteufọk imọ ke ofụri eyouwem imọ. Edieke ofụn ọdọhọde ntre, eteufọk esie ekenyene ndida enye nsan̄a n̄kpere enyịnusụn̄ onyụn̄ ada utịbin̄kpọ etịbi enye utọn̄. Etie nte idiọn̄ọ oro ẹkenịmde ofụn oro ke utọn̄ do okowụt ke enye eben̄e idem ndika iso n̄kop uyo eteufọk esie.—Ex 21:5, 6.