Item Emi Ọfọnde Ye Kpukpru Owo Ke Ofụri Emana—Ma Mme Owo

SE BIBLE ETỊN̄DE: “Ẹmen ima ẹsịne, koro enye edi mfọnmma mbọbọ edidianakiet.”—Colossae 3:14.

UFỌN ORO IDIDIADE: Ima emi Bible awakde nditịn̄ mban̄a idịghe ima erenowo ye n̄wan, edi edi orụk ima emi esinamde owo atua owo mbọm, efen ọnọ owo, ọfọn ido, etie emem emem, osụhọde idem, enyene ime, onyụn̄ ọsọn̄ọ ada. (Micah 6:8; Colossae 3:12, 13) Ima enye emi itiehe nte ima emi eren ye n̄wan ẹsinyenede ẹnọ kiet eken, edi nte ini akade mmọ imaha aba idemmọ. Ata ima inyeneke utịt; esidi eyo esiere ọdọdiọn̄ ofiop.

Brenda, emi ọdọde ndọ ekpere isua 30, ọdọhọ ete: “Ima emi mbufa mme ọdọ ndọ ẹnyenede ẹnọ kiet eken imenke udomo ye ima emi n̄wan ye ebe emi ẹma ẹkedọ ndọ ẹbịghi ẹnyenede ẹnọ kiet eken.”

Sam, emi ọdọde ndọ ebe isua 12, ọdọhọ ete: “Esinem mi ye n̄wan mi ndikụt nte item Bible enyenede ufọn esinyụn̄ ọsọpde an̄wan̄a owo; esinyụn̄ akpa nnyịn idem ndusụk ini. Edieke owo anamde item Bible, n̄kpọ iditreke ndifọn enye. Okposụkedi emi nsin̄wanade ndinam item emi kpukpru ini, ndusụk ini nsinamke, akpan akpan ke ini nyakde n̄kpri n̄kpri n̄kpọ ayat mi, ke ini n̄kerede mban̄a idemmi kpọt, m̀mê ke ini idem ememde mi. Ke mme ini ntem ke nsibọn̄ akam ndọhọ Jehovah an̄wam mi. Ekem, mmesimụm n̄wan mi mfat, ndien etise itiehe nte ima inyene mfịna ndomokiet.”

Jesus Christ ọkọdọhọ ke “utom ọniọn̄ ẹwụt ke ọniọn̄ enen.” (Matthew 11:19) Ntem, nti item emi ẹdude ke Bible ẹwụt ke enye edi ata n̄wed ọniọn̄. Se Bible ekpepde ye nte enye ọdọhọde ẹdu uwem ọfọn etieti. Kpa ye oro ẹkewetde Bible ke ata eset, enye osụk enyenyene ufọn. Enye ọfọn ye kpukpru owo, inamke n̄kpọ m̀mê owo oto m̀mọ̀n̄. N̄ko, se Bible etịn̄de owụt nte nnyịn mme owo itiede. Emi owụt ke Jehovah Abasi emi okobotde kpukpru n̄kpọ akanam ẹwet Bible. Edieke oyomde ndikụt ufọn Bible, nam se Bible ọdọhọde. Bible ọdọhọ ‘itabi inyụn̄ ise nte Jehovah ọfọnde.’ (Psalm 34:8) Ndi ayanam oro?