Ibuot 3
Se Obio Ubọn̄ Oro Ọwọrọde Ọnọ Isọn̄ Nnyịn
1, 2. Didie ke edidi Obio Ubọn̄ oro owụt nte ke Abasi emekere aban̄a isọn̄ ye mme andidụn̄ enye?
AKAM uwụtn̄kpọ Jesus akaiso ye mme ikọ ẹmi: “Yak obio ubọn̄ fo edi. Yak ẹnam uduak fo ke isọn̄, kpasụk nte ẹnamde ke heaven.” (Matthew 6:10, NW) Abasi emenen̄ede ekere aban̄a isọn̄ nnyịn emi ye kpukpru mbon oro ẹdude uwem m̀mê ẹkedude ke esịt esie. Oro edi ntak anade Obio Ubọn̄ oro edi, man ‘edisobo mmọ eke ẹsobode isọn̄,’ edinam mme akpan̄kpa ẹset, edisio n̄kpa emi edide asua owo efep onyụn̄ anam ekondo isọn̄ nnyịn edi edinem, emem emem itieidụn̄ ọnọ ubonowo ndidụn̄.—Eriyarare 11:15, 18; 21:1, 3, 4.
2 Ye ọkpọsọn̄ udọn̄, didie ntem, ke nnyịn ikpada mme ikọ akam oro, “Yak obio ubọn̄ fo edi” ibọn̄ akam! Emi edi obio ubọn̄ Abasi ke ubọk Eyen esie, kpa Ọbọn̄ Jesus Christ. Ke usụn̄ emi ke edinam uduak Jehovah, emi ke idemesie edide “nsinsi Edidem,” ke isọn̄ emi. Kere se oro ediwọrọde ọnọ mme owo eke kpukpru idụt:
“ỌBỌN̄ EMEM” AKARA
3, 4. (a) Kpa ye oro adade nso ntịn̄nịmikọ etịn̄ aban̄a idemesie ke Esop Edidiana M’idụt okpu, ndien ntak-a? (b) Nso n̄kpọutom kpọt ekeme ndinọ emem emi ebịghide, ndien ebede ke nso usụn̄?
3 Ke odoride enyịn aban̄a edikara Christ ke Obio Ubọn̄, prọfet Abasi etịn̄ aban̄a enye nte “Ọbọn̄ Emem,” onyụn̄ adian do ete, “Ubọn̄ itie edikara ye emem ididopke ke nsinsi.” Kpasụk ukem prọfet oro ọsọn̄ọ ọnọ nnyịn ete: “Mmọ ẹyeda ofụt mmọ ẹdom n̄kpọ ufụn̄isọn̄, ẹnyụn̄ ẹda eduat mmọ ẹdom ikwa udiọn̄ eto: idụt idimenke ofụt itiene idụt, m̀mê mmọ ndikpep ekọn̄ aba.” Okposụkedi ẹwetde akpatre udịmikọ emi ke n̄kan̄ ibibene emi owụtde ọkpọusụn̄ ke ufọk Esop Edidiana M’idụt, idịghe n̄ka ererimbot emi en̄wan abaharede do osu mme ikọ ntịn̄nịmikọ ẹmi. Esop Edidiana M’idụt ama okpu mfụhọ mfụhọ nte n̄kpọutom ndida emem ye ifụre nsọk mme idụt.—Isaiah 2:4, AV; Isa 9:6, 7, NW.
4 Ata emem oro ebịghide oyom ete unenikpe odu ọnọ kpukpru owo, ata ata edinam edinen ido. Obio ubọn̄ “Ọbọn̄ Emem” ikpọn̄îkpọn̄ ekeme ndinọ ubiọn̄ kaban̄a emi; enye eyedi se ‘ẹsọn̄ọde ẹwụk ẹnyụn̄ ẹnịmde ke edinen ido.’ Ih, obio ubọn̄ oro edi isụn̄utom Abasi ndinam “emem onyụn̄ odu ke isọn̄ ke otu owo ẹmi Enye enende iso ye mmọ.”—Isaiah 9:7; 32:17; Luke 2:14.
5. Ke ndiwụk ata emem, nso mme n̄kpọ n̄kpaidem ke Obio Ubọn̄ oro anam?
5 Obio Ubọn̄ oro edisan̄a didie anam emi? Enye edidi ke n̄wọrọnda usụn̄, oto ke ‘edidi’ obio ubọn̄ Abasi ke ubọk “Ọbọn̄ Emem” esie ndin̄wana ye mme ama-ekọn̄ idụt ererimbot. Psalm 46:8, 9 okot nnyịn ete: “Mbufo ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat: eyenyụn̄ ọfọp mme chariot [ekọn̄] ke ikan̄.” Obio Ubọn̄ oro eyebiat kpukpru n̄kpọekọn̄ afai efep. Akande oro, enye idinyịmeke ndiọi owo ye mbon idan̄ n̄kanubọk ẹsan̄a ke mme efak esie, koro ke idak obio ubọn̄ Abasi “mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”—Psalm 37:9-11.
NTỊN̄NỊM UWỤTN̄KPỌ
6. Nso ubọn̄ ubọn̄ edisu ke ntịn̄nịmikọ Bible ekenyene ke ọyọhọ isua ikie itiokiet B.C.E.?
6 Ediwak ntịn̄nịmikọ Bible ẹnyene n̄kpọ ndinam ye edida Israel eset ke mbuotekọn̄. Ke ẹma ẹkenam n̄kpọ Babylon ke isua 70, mme anam-akpanikọ nsụhọ nditọ Israel ẹma ẹfiak ke isọn̄ emana mmọ ke 537 B.C.E. Ke ofụri mme isua oro, isọn̄ akana ke ndon, ke wilderness. Edi idahaemi, ye edidiọn̄ oro Jehovah ọnọde ikọt esie, n̄wọrọnda edifiak n̄wụk ama odu. Ntịn̄nịmikọ oro ẹkewetde ke ediwak isua ikie ke mbemiso ama edinyene ubọn̄ ubọn̄ edisu:
“Wilderness ye nsatisọn̄ ẹyedara; desert eyenyụn̄ ebre, onyụn̄ asiaha ikọn̄ nte rose. Eyediọn̄ asiaha ikọn̄, onyụn̄ ebre mbre, onyụn̄ ọkwọ: ẹyenọ enye ubọn̄ Lebanon, ye uyai Carmel ye Sharon; mmọ ẹyekụt ubọn̄ Jehovah, uyai Abasi nnyịn.”—Isaiah 35:1, 2; se n̄ko Isaiah 65:18-25; Micah 4:4.
7. Nso, ndien, ke nnyịn ikeme ndidori enyịn̄ mban̄a isọn̄ nnyịn ke ini obio ubọn̄ Abasi ‘edide’?
7 Nte mbụkeset ọsọn̄ọde, mme ntịn̄nịmikọ ẹmi ẹma ẹnyene n̄wọrọnda edisu kaban̄a ikọt Abasi oro ẹkefiakde ẹtan̄ ẹbok ke isua ikie oro eketienede edisana mmọ nyak ke Babylon. Ndien ke ini obio ubọn̄ Abasi ‘edidide’ kaban̄a edidiọn̄ kpukpru nditọ Abasi ẹmi ẹdude mi ke isọn̄, nte enye eyenam se isụhọrede ikan oro ke ndifiak n̄wụk mme idaha eke paradise nnọ isọn̄ nnyịn? Ibọrọ edi ekwado emi ọdọhọde Baba! Obio Ubọn̄ oro ke akpanikọ eyekụt nte ke ẹmenam akpa uduak Abasi kaban̄a owo ‘ndikan isọn̄,’ nnyụn̄ nnam kpukpru ikpehe esie edi paradise Eden, ọyọhọ ọyọhọ.—Genesis 1:28; 2:8-14; Isaiah 45:18.
PARADISE OFỤRI ERERIMBOT
8. Ke idak Obio Ubọn̄ oro, nso iditịbe inọ udomo udia ye aranuwat emi ẹdidude, ndien ke ntak edida nso ibet nsịn ke edinam?
8 Ke ini obio ubọn̄ Abasi ‘edide,’ unana udia ye edidọk eke ekọmurua mme n̄kpọ ẹyesop inikiet, koro “uwak ibokpot ẹyedu ke isọn̄ ke nsom ikpọ obot.” Edima Ete nnyịn eyefiak “anam udia otịbe ke isọn̄, ye wine emi anamde esịt owo adat, ndinam iso esie ayama ye aran, ye udia emi anamde esịt owo odu uwem.” (Psalm 72:16; 104:14, 15, NW) Mfịna ididụhe ke ndinam udia asuana osịm nsio nsio idụt, edideme mfọi mfọi ididụhe, anyan udịm mme andiyom ndidep aranuwat ididụhe. Mme ọdiọkitọn̄ mme adia idiọk udori urua ẹyebe ẹfep. Kpukpru ubonowo ẹyenam ewụhọ edidem oro, “Ma mbọhọidụn̄ fo nte amade idemfo,” ẹbuanade n̄kpọ ye kiet eken nte ekemde ye se udọn̄ edide.—James 2:8.
9. Nso ụnwọn̄ọ ke nnyịn inyene nte ke n̄kpọ baba kiet idinamke ubonowo idiọk ini oro?
9 N̄ko, nnyịn imekeme ndidori enyịn nte ke Obio Ubọn̄ oro eyekara mme oto obot afanikọn̄, utọ nte mme unyekisọn̄ ye ikpọ oyobio. Jesus ama owụt nte edikemede ndinam emi ke ini akanamde “akwa oyobio” odobo. Ntem, mbet esie ẹma ẹkụt nte ke “kpa ofụm ye inyan̄ [ẹma ẹkop] uyo Esie.” (Mark 4:37-41) Ke ofụri ikpehe isọn̄ eke ukara obio ubọn̄ Abasi, n̄kpọ ididụhe ndinam idiọk, ndinọ unan m̀mê ndibiat n̄kpọ.—Men N̄wed Isaiah 11:6-9 domo.
10. Nso ke ediwak utịben̄kpọ Jesus ẹkewụt ẹban̄a Obio Ubọn̄ oro?
10 Owo idiyomke ikpọ ufọkibọk aba ndidọn̄ mbon udọn̄ọ ikpọkidem ye eke mbeibuot. Akwa Abiaibọk oro, Jesus Christ, eyeda ufọn uwa ufak esie kaban̄a ‘edikọk mme idụt udọn̄ọ,’ anam n̄kpọ ndisọhi udọn̄ọ esịt, udọn̄ọ cancer ye ndiọi udọn̄ọ eken mfep. Ediwak utịben̄kpọ Jesus eke ndinam mbon udọn̄ọ ẹkop nsọn̄idem nnyụn̄ nnam mme akpan̄kpa ẹset, oro enye akanamde ke ini okodude ke isọn̄, edi ekpri uwụtn̄kpọ kaban̄a se enye edinamde ebe ke okop odudu ukara Obio Ubọn̄ esie. Ẹyesio idem idaha n̄kpa emi ubonowo ẹkedade ẹmana ẹfep, koro ẹsọn̄ọ ẹn̄wọn̄ọ ẹnọ nnyịn ẹte ke “n̄kpa idinyụn̄ idụhe aba.”—Eriyarare 21:4; 22:1, 2; Matthew 11:2-5; Mark 10:45; N̄wed Mbon Rome 5:18, 19.
11. Ke ini edikara Jesus ke Obio Ubọn̄, nso idara ediyọhọ enye ofụri ofụri?
11 Ndien idara akan idara!—mme itie ubụkowo idibiatke aba uyai isọn̄, koro mmọemi ẹyena ukpọk. “Akpa mbun̄wụm” ediset ke n̄kpa, kpa mme anam-akpanikọ mme mbet Jesus 144,000, ẹyediana ye enye ke heaven nte mme nsan̄a esie ke obio ubọn̄ esie. Ụnwọn̄ọ Jesus oro eyesu n̄ko nte ke mme akpan̄kpa eken ‘ẹmi ẹdude ke udi ẹyekop Enye uyo ẹwọn̄ọ . . . ẹdụk ke ediset.’ Mmọemi ẹyedara ediye ifet edidi se ẹnamde ẹsịm mfọnmma eke owo nte mme andidu ke idak Obio Ubọn̄ oro mi ke isọn̄.—John 5:28, 29; Eriyarare 14:1-5; 20:4-6, 11, 12.
12. (a) Ntak emi afo okpoyomde ndidu uwem ke nsinsi ke paradise? (b) Nte N̄wed John 17:3 ọdọhọde, nso ke ana nnyịn inam man idu do?
12 Nte afo omoyom ndidi kiet ke otu mbon oro ẹdidude uwem ẹkụt ẹnamde isọn̄ emi asana ọbọhọ idiọkido ẹnyụn̄ ẹwọn̄ọrede enye ẹsịn ke paradise inemesịt? Nte omoyom ndidu mi ndidara mme akpan̄kpa oro ẹsetde ẹdi? Nte akpama ndidu uwem ke nsinsi ke isọn̄ emi ẹnamde enyene ubọn̄—ke ebiet oro baba owo kiet mîkopke mmemidem ke ntak usọn̄ m̀mê idem ndikpa mba tutu amama mban̄a mme idara oro ẹsan̄ade ye usiere usen uwem kiet kiet? Afo emekeme, edieke anamde se Abasi oyomde kaban̄a edinyene uwem. Jesus ekesịn enye ke usụn̄ ememde, ke ini ọkọdọhọde Ete esie ke akam ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Nso ifet ke edidi ntem, ndidu uwem ke nsinsi ke paradise, ke ini ‘ifiọk ubọn̄ Jehovah ediyọhọde ke ererimbot, kpa nte mmọn̄ ofụkde inyan̄’!—Habakkuk 2:14.
“UDIA EKE EKEMDE NNYỊN KE USEN MFỊN”
13. Ntak emi nnyịn ikemede ndibọn̄ akam ye ọyọhọ mbuọtidem mben̄e “udia eke ekemde nnyịn ke usen mfịn”?
13 Edi, nnyịn mfịn imekere ntotụn̄ọ ntotụn̄ọ iban̄a se iyomde idahaemi. Ye ediwak nnyịn, edikeme ndidu uwem nnyụn̄ mbọk mme ubon nnyịn amakabade edi ata n̄kpọ ata. Mmọdo inan̄a nnyịn n̄kukụre ibọn̄ akam ite Ete anam akwa enyịn̄ esie asana onyụn̄ anam ẹnam uduak esie ke isọn̄ ebe ke edidi obio ubọn̄ esie emi; oyom ibọn̄ akam inọ Abasi n̄ko ite ọnọ nnyịn mme n̄kpọ oro iyomde ke usen ke usen, kpa “udia eke ekemde nnyịn ke usen mfịn.” Imekeme ndinam emi ye ọyọhọ idotenyịn nte, edieke nnyịn in̄wanade ndidu uwem nte ekemde ye ndinen edumbet Abasi inyụn̄ inịmde mme ufọn obio ubọn̄ esie nte akpa n̄kpọ ke uwem nnyịn, Abasi eyenam udeme esie nte Akwa Andinọ. Enye edi ukem ukem nte Jesus akakade iso nditịn̄ nnọ nnyịn nte: “Mmọdo ẹkûtịmede esịt ẹbụp ẹte, Nso ke nnyịn ididia? Nso ke nnyịn idin̄wọn̄? Nso ke nnyịn idisịne? Koro mme Gentile ẹyom kpukpru n̄kpọ ẹmi: koro Ete mbufo ke heaven ọmọfiọk ete kpukpru n̄kpọ ẹmi ẹnana mbufo. Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ ẹmi ẹnọ mbufo.”—Matthew 6:11, 31-33.
“DAHADO KE ISỌN EKE IKAMADE FI”
14, 15. (a) Ke ndida mme ikọ eke N̄wed Matthew 6:12 mbọn̄ akam, didie ke nnyịn ikpodu ke mben̄eidem ndinam n̄kpọ? (b) Kaban̄a emi, nso mme utịbe uwụtn̄kpọ ke ikeme ndikpebe?
14 Ke ndikọri ntotụn̄ọ itie ebuana ye Ete nnyịn, oyom nnyịn ke nsụhọdeidem idiọn̄ọ iban̄a isọn oro nnyịn ikamade enye, inyụn̄ idiọn̄ọ iban̄a idiọkn̄kpọ oro inamde idian Abasi ye ekemmọ owo. Omotịm odot, ndien, ndibọn̄ akam nnọ Abasi nte: “Dahado ke isọn eke ikamade Fi, nte emi nnyịn ikadahadedo inọ mmọ ẹmi ẹkamade nnyịn isọn.”—Matthew 6:12.
15 Nte utịbe mfọnido, oro nnyịn ke n̄kan̄ nnyịn mîkodotke ndomo ata esisịt, Abasi ama ọdọn̄ Eyen esie, Jesus, edi ererimbot, man enye “ọnọ uwem Esie ndifak ediwak owo,” kpa nnyịn ẹmi. Emi ọnọ isọn̄ kaban̄a edifen mme idiọkn̄kpọ nnyịn. (Matthew 20:28) Mfọn oro Abasi owụtde anam-idiọkn̄kpọ ubonowo okpon adan̄a didie ntem! Nso ntak ẹnyịkdenyịk ke nnyịn, ke ntre, inyene ntem, ndifen mme n̄ken̄e ndudue ekemmọ owo nnyịn! Nnyịn ikpenyene ndiben̄e idem ndinam ebe oro: ndifen ekpedi akwa idiọkn̄kpọ oro ẹnamde nnyịn. Ke usụn̄ emi ke nnyịn ikeme ndiwụt mbon efen edu ọkpọsọn̄ ima oro Jesus ọkọdọhọde nte edidide se ẹdade ẹdiọn̄ọ mme Christian akpanikọ.—John 13:35; Colossae 3:13; 1 Peter 1:22.
“SIO NNYỊN KE UBỌK ANDIDIỌK”
16, 17. (a) Nso ke mme ikọ oro “Kûnyụn̄ uda nnyịn usịn ke idomo” ọkpọwọrọ ọnọ nnyịn? (b) Didie ke nnyịn ikeme ndinam n̄kpọ nte ekemde ye akam oro nte ‘ẹsio nnyịn ke ubọk andidiọk’?
16 Ke akpatre, Jesus ama eteme nnyịn ndibọn̄ akam nnọ Abasi nte: “Kûnyụn̄ uda nnyịn usịn ke idomo; Edi sio nnyịn ke ubọk andidiọk.” (Matthew 6:13) Yak nnyịn ikûkere nte ke Abasi esinịm mme n̄kpọ idomo ke usụn̄ nnyịn, anamde nnyịn iduọ. Utu ke oro, edi andidiọk oro ọkọsọn̄de ibuot ye Abasi do, Satan, edi enyeemi oyomde nnyịn iwọn̄ọde ikpọn̄ Abasi.
17 Nte ededi, Ete omotịm nnyịn idem ọyọhọ ọyọhọ ‘ndisọn̄ọ nda n̄n̄wana ye n̄kari Satan,’ ih, ndin̄wana uforo uforo ye enye ye udịm mme idiọk spirit oro enye akarade. Man ‘ẹkûda nnyịn ẹsịn ke idomo,’ Abasi ọmọnọ nnyịn ofụri n̄kpọekọn̄ eke spirit, emi nnyịn ikemede ndisịne. Apostle Paul anam enye an̄wan̄a ke N̄wed Mbon Ephesus 6:10-18. Nte nnyịn isọn̄ọde ida ke ndikama n̄kpọekọn̄ otode Abasi mi, ikọbọde ke akam, Ete eyekụt ete ke ‘nnyịn idụkke ke idomo,’ edi ‘eyenyan̄a nnyịn osio ke ubọk andidiọk.’—1 Peter 5:6-9.
18. Ke nditịn̄ ibio ibio, nso ke Akam Uwụtn̄kpọ oro aban̄a?
18 Yak ẹwara ẹnam ọwọrọetop enyịn̄ Jehovah asana ebe ke ‘edidi obio ubọn̄ esie.’ Yak ẹnam uduak esie ke isọn̄ oto ke ndikpọri kpukpru idiọkn̄kpọ mfep ye ke edinam ofụri ekondo emi akabade edi paradise kaban̄a itoro esie. Adan̄a nte idiọk editịm n̄kpọ emi osụk odude, edima Ete nnyịn eke heaven akpakam ọnọ nnyịn mme n̄kpọ oro iyomde ke uwem, an̄wam nnyịn ndisọn̄ọ mmụm edifọn itie ebuana ye mmọ en̄wen n̄kama onyụn̄ osio nnyịn ke afia Satan. Mmọemi ẹdi mme n̄kpọ oro Jesus ekekpepde nnyịn ndibọn̄ akam mban̄a. Akam uwụtn̄kpọ esie ọdọn̄ọ kpukpru fap.
[Ndise ke page 25]
SE OBIO UBỌN̄ ABASI EDINAMDE
● Ọsọn̄ọ omụm itie edikara ofụri ekondo eke Jehovah akama, etre ukara Satan.
● Anam isọn̄ ọbọhọ nsunsu ido ukpono ye ufịk ufịk mme andikara.
● Ada ukara Christ nte “Ọbọn̄ Emem” edi.
● Anam ofụri isọn̄ esehe nte ubọn̄ ubọn̄ paradise.
● Osio kpukpru mfịna unana ufọk efep, unana udia ye unana aranuwat.
● Owụk n̄ka eke owo emi ọkọn̄ọde ke ima mbọhọidụn̄.
● Akara mme oto-obot odudu ke isọn̄, akpan mme afanikọn̄.
● Osio editịmede esịt, iduọesịt, n̄kọn̄ibuot, ubiak, usọn̄ efep.
● Osobo asua oro, n̄kpa, udọn̄ọ ye kpukpru mfụhọ.
● Anam ediwak billion mme akpan̄kpa ẹset, ndidu uwem ke nsinsi ke isọn̄.