Ibuot 1
Mme Etop Ẹtode Heaven
OFỤRI Bible, ke akpanikọ, edi etop otode heaven, koro Ete nnyịn eke heaven ọkọnọ enye kaban̄a item nnyịn. Nte ededi, angel kiet oro ‘adade ke iso Abasi’ ama ọnọ akpan etop iba ke se ikperede ndidi isua 2,000 ẹmi ẹkebede. Enyịn̄ esie edi Gabriel. Ẹyak nnyịn idụn̄ọde mme idaha oro ẹkesịnde ẹnam akpan isan̄ iba ẹmi ẹdi isọn̄.
Edi isua 3 B.C.E. Ke obot Judea, emi ekemede ndidi itịmke iyom usụn̄ ikpọn̄ Jerusalem, ke oku Jehovah emi ekerede Zechariah odụn̄. Enye ọmọsọn̄ ke emana, n̄wan esie Elizabeth onyụn̄ ọsọn̄ n̄ko. Ndien mmọ inyeneke baba eyen kiet. Zechariah ke anam utom oku esie ke temple Abasi ke Jerusalem. Ke mbuari Gabriel ọbiọn̄ọde ke nnasia itie-ufọp incense.
Zechariah okop ndịk ata etieti. Edi Gabriel anam ndịk esie etre, ọdọhọde ete, “kûfehe ndịk, Zechariah; koro ẹma ẹkop n̄kpeubọk fo; ndien n̄wan fo Elizabeth eyeman eyeneren ọnọ fi, afo eyenyụn̄ osio enye enyịn̄ John.” Gabriel akaiso nditan̄a nte ke John “eyekpon ke iso Jehovah” ye nte ke enye eyenyụn̄ “anam mmọemi ẹkenịmde ẹnọ Ọbọn̄ [“Jehovah ,”New World Translation ] ẹben̄e idem ẹbet Enye.”
Nte ededi, Zechariah ikemeke ndinịm emi ke akpanikọ. Enye etie nte se mîkemeke-keme nditịbe nte ke enye ye Elizabeth ẹkpekeme ndinyene eyen ke ini usọn̄ mmọ. Ntre Gabriel ọdọhọ enye ete: “Afo eyedi imụm, udunyụn̄ ukemeke nditịn̄ ikọ, tutu osịm usen eke n̄kpọ emi edisude, koro mûkonịmke ikọ mi ke akpanikọ.”
Ọfọn, kan̄a kemi, mbon oro ẹbetde ke an̄wa ke ẹdu ke n̄kpaidem ẹban̄a se inamde Zechariah ebịghi ntre ke temple. Ke ini enye ọwọrọde edi ke akpatre, enye ikemeke nditịn̄ ikọ ibọhọke ndida ubọk esie nnam mme idiọn̄ọ, ntre ke mmọ ẹfiọk ẹte ke enye ama okụk n̄kpọ oro akande odudu owo.
Ke Zechariah okụrede utom esie ke temple, enye ọnyọn̄ ufọk. Ndien ekpri ini ke oro ebede, n̄kpọ emi enen̄ede ada itie—Elizabeth oyomo! Ke adan̄aemi ebetde ini emi eyen esie edimanade, Elizabeth odịbe ke ufọk ke ọfiọn̄ ition.
Ekem Gabriel afiak ọbiọn̄ọde. Ndien anie ke enye etịn̄ ikọ ọnọ? Edi n̄kaiferi oro mîdọhọ ndọ, emi ekerede Mary, otode obio Nazareth. Nso etop ke enye ọnọ isan̄ emi? Kpan̄ utọn̄! “Afo ama okụt mfọniso ke iso Abasi,” ntre ke Gabriel ọdọhọ Mary. “Sese, afo eyeyomo, eyenyụn̄ aman eyeneren, onyụn̄ osio Enye enyịn̄ Jesus.” Gabriel adian do ete: “Enye eyekpon, eyenyụn̄ ekere Eyen Andikon̄ n̄kan; . . . Enye eyeda ubọn̄ ufọk Jacob ke nsinsi; Ubọn̄ Esie idinyụn̄ ikụreke.”
Nnyịn imekeme nditịm nnịm nte ke Gabriel ama abat ke edi akwa ifet ke ẹnọ imọ nditịn̄ etop ẹmi. Ndien nte nnyịn idikotde ekese iban̄a John ye Jesus, nnyịn iyetịm ikụt in̄wan̄în̄wan̄ ntak emi mme etop ẹtode heaven ẹdide ata akpan n̄kpọ. 2 Timothy 3:16; Luke 1:5-33.
▪ Nso akpan etop iba ke ẹnọ ẹto heaven?
▪ Anie ọnọ mme etop oro, ndien ẹnọ mmanie?
▪ Ntak emi mme etop oro ẹsọn̄de owo idem ndinịm ke akpanikọ-ọ?