Elizabeth Aman Eyen

Ke isua 400 ama ekebe tọn̄ọ ẹkefiak ẹbọp ibibene Jerusalem, oku kiet emi ekekerede Zechariah ye Elizabeth n̄wan esie ẹma ẹdụn̄ ẹkpere Jerusalem. Mmọ ẹma ẹdọ ndọ ẹbịghi edi inyeneke eyen. Usen kiet, ke ini Zechariah okosụk ọfọpde incense ke ebiet emi ẹkotde Edisana ke temple, angel Gabriel ama ọbiọn̄ọde. Idem ama enyek Zechariah etieti. Edi Gabriel ama ọdọhọ enye ete: ‘Kûyak idem enyek fi. Jehovah ọnọ mi eti mbụk nditịn̄ nnọ fi. Elizabeth n̄wan fo ayaman eyen erenowo; enye edikere John. Jehovah emek John ete anam san̄asan̄a utom.’ Zechariah ama ọdọhọ enye ete: ‘Ndinam didie nnịm se etịn̄de oro? Ami ye n̄wan mi imọsọn̄ ibe ndinyene eyen.’ Gabriel ama ọdọhọ enye ete: ‘Abasi ọkọdọn̄ mi nditobo fi etop emi. Edi sia mûnịmke se ntịn̄de, udûkemeke nditịn̄ ikọ tutu eyen oro amana.’

Zechariah ama esịne do ebịghi akan nte esibịghide. Ntre ke ini enye ọwọrọde edi, mbon emi ẹkedade ẹbet enye ke an̄wa ẹma ẹyom ndidiọn̄ọ se ikanamde enye ebịghi ntre. Edi enye ikekemeke nditịn̄ ikọ aba. Enye akada ubọk anam idiọn̄ọ ọnọ mmọ. Mmọ ẹma ẹda oro ẹdiọn̄ọ ke Abasi ọnọ enye etop.

Ekem Elizabeth ama oyomo onyụn̄ aman eyen erenowo kpa nte angel ọkọdọhọde. Mme ufan esie ye mbon mmọ ẹma ẹdise nsekeyen oro. Esịt ama enem mmọ etieti. Elizabeth ama ọdọhọ ke eyen oro edikere John. Edi mmọ ẹma ẹdọhọ enye ẹte: ‘Owo ndomokiet ke ubon mbufo ikereke John. Men enye sio Zechariah, ete esie.’ Edi Zechariah ama ewet ke itiatn̄wed ete: ‘Enye edikere John.’ Kpa idahaoro, Zechariah ama afiak ọtọn̄ọ nditịn̄ ikọ! Mbụk eyen oro ama asuana ke ofụri Judea, mme owo ẹma ẹnyụn̄ ẹkere ẹte: ‘Nso ke eyen emi edidi enye ama okpon?’

Edisana spirit ama anam Zechariah etịn̄ prọfesi ete: ‘Ekọm enyene Jehovah. Enye ama ọn̄wọn̄ọ ọnọ Abraham ke iyọnọ Messiah edinyan̄a nnyịn. John edidi prọfet, enye edinyụn̄ idiọn̄ usụn̄ inọ Messiah.’

Enyene akpan n̄kpọ emi eketịbede n̄ko ọnọ iman Elizabeth kiet emi ekekerede Mary. Iyokụt oro ke Ibuot 69.