Ibuot 3

Andidiọn̄ Usụn̄ Amana

AYAK esisịt Elizabeth ndiman eyen. Ke ọfiọn̄ ita ẹmi ẹkebede, Mary okodụn̄ ye enye. Edi idahaemi ini ekem Mary ndidọhọ tie sụn̄ nnyụn̄ n̄n̄wat anyanusụn̄ oro nnyọn̄ ke Nazareth. Ke n̄kpọ nte ọfiọn̄ itiokiet, enye n̄ko, eyeman eyen.

Ibịghike ke Mary ama ọkọnyọn̄, Elizabeth aman eyen. Nso idatesịt idu ntem kemi uman edide ifụre ifụre ndien Elizabeth ye eyen oro ẹdude ke nsọn̄idem! Ke ini Elizabeth okotde mme mbọhọidụn̄ ye mme iman esie owụt nsekeyen emi, kpukpru mmọ ẹdara ye enye.

Ọyọhọ usen itiaita ke enye ama akamana, nte ekemde ye Ibet Abasi, ana ẹnịm eyen erenowo mbobi ke Israel. Ke ini edinam emi, mme ufan ye mme iman ẹdi ndise enye. Mmọ ẹdọhọ ẹsio eyen oro enyịn̄ ete esie, Zechariah. Edi Elizabeth afan̄a. Enye ọdọhọ ete, “Baba; enye edikere John.” Ti ete, ke oro edi enyịn̄ emi angel Gabriel ọkọdọhọde nte ẹkpenyenede ndisio eyen oro.

Nte ededi, mme ufan mmọ ẹfan̄a ẹte: “Baba owo kiet ke orụk fo ikereke enyịn̄ oro.” Ekem, ke ẹdade idiọn̄ọ ẹtịn̄ ikọ, mmọ ẹbụp ete esie enyịn̄ oro enye oyomde ndisio eyen oro. Ke ọdọhọde ẹnọ imọ itiatn̄wed, Zechariah, ke n̄kpaidem kpukpru owo, ewet ete: “Enyịn̄ esie edi John.”

Idahaoro, Zechariah ke utịbe utịbe usụn̄ afiak etịn̄ ikọ. Afo eyeti ete ke enye akakabarede edi imụm ke ini enye mîkonịmke ntọt angel oro nte ke Elizabeth eyeman eyen. Ọfọn, ke ini Zechariah etịn̄de ikọ, kpukpru mbon oro ẹdụn̄de ke n̄kann̄kụk oro ẹdu ke n̄kpaidem ẹnyụn̄ ẹdọhọ ẹte: “Nso orụk owo ke eyen emi edidi?”

Zechariah kemi ọyọhọ ye edisana spirit, enye onyụn̄ adara ye ọkpọsọn̄ itoro ete: “Itoro enyene Jehovah Abasi Israel; koro Enye emedi ndise ikọt Esie, onyụn̄ afak mmọ; onyụn̄ anam nnụk edinyan̄a otịbe ọnọ nnyịn ke ufọk owo Esie David.” “Nnụk edinyan̄a,” emi ke akpanikọ, edi Ọbọn̄ Jesus, oro mîmanake kan̄a. Ebede ke enye, Zechariah ọdọhọ ete, Abasi ete, “Ke ima isio nnyịn ke ubọk mme asua nnyịn, iyeyak nnyịn inam n̄kpọ inọ Imọ ke ifụre, ke edisana ido ye edinen ido ke iso Imọ ke ofụri uwem nnyịn.”

Ekem Zechariah etịn̄ ntịn̄nnịm ikọ aban̄a eyen esie, John, ete: “Edi afo, eyen mi, eyekere prọfet Andikon̄ n̄kan: Koro afo eyebem Ọbọn̄ iso ndidiọn̄ usụn̄ Esie; ndinọ ikọt Esie ifiọk edinyan̄a ke edifen mme idiọkn̄kpọ mmọ, oto ke esịt mbọm Abasi nnyịn, emi esịnde usiere oto ke enyọn̄ edisịm nnyịn, ndiyama nnọ mmọ eke ẹtiede ke ekịm ye mfụt n̄kpa; nditeme ukot nnyịn ndidụk ke usụn̄ emem.”

Ke ini emi, Mary, emi nte an̄wan̄ade osụk edide n̄wan emi mîdọhọ ndọ kan̄a, omosịm ufọk ke Nazareth. Nso iditịbe inọ enye ke ini ẹdiọn̄ọde ẹte ke enye omoyomo? Luke 1:​56-80; Leviticus 12:​2, 3.

▪ John ọsọn̄ Jesus adan̄a didie?

▪ Mme n̄kpọ ewe ida itie ke ini John edide usen itiaita ke emana?

▪ Didie ke Abasi ọwọn̄ọrede ntịn̄enyịn esie ọnọ ikọt esie?

▪ Nso utom ke ẹbemiso ẹtịn̄ ẹnịm ẹnọ John ndinam?