Ibuot 28

Ẹbụp Ẹban̄a Utre Udia

EKPERE ndidi isua kiet emebe tọn̄ọ nte Jesus akabuana ke Passover eke 30 C.E. Etisịm idahaemi, ẹma ẹsịn John Andinịm owo baptism ke ufọk-n̄kpọkọbi ke ediwak ọfiọn̄. Okposụkedi enye okoyomde mme mbet esie ẹkabarede ẹdi mme anditiene Christ, idịghe kpukpru mmọ ẹnam ntre.

Idahaemi, ndusụk mbet John emi odude ke ufọk-n̄kpọkọbi mi ẹdi ẹbịne Jesus ẹnyụn̄ ẹbụp ẹte: “Nsidi ntak eke nnyịn ye mme Pharisee iwakde nditre udia, edi mbet Fo mîtreke?” Mme Pharisee ẹsitre udia ikaba ke urua nte ibet ido ukpono mmọ etemede. Ndien ekeme ndidi nte ke mme mbet John ẹtiene ukem ido edinam emi. Ekeme n̄ko ndidi mmọ ẹtre udia ndifụhọ edikọbi oro ẹkọbide John ndien akpa mmọ idem ntak emi mme mbet Jesus mîtieneke mmọ ibuana ke edinam uwụt mfụhọ emi.

Ke ibọrọ, Jesus anam an̄wan̄a ete: “Nte nditọ ufọk ndọ ẹmekeme ndifụhọ adan̄a ini nte ebendọ odude ye mmọ? Edi mme usen ẹyedi eke ẹdibọde mmọ ebendọ; mmọ ẹyetre udia adan̄aoro.”

Mme mbet John ẹkpenyene nditi nte ke John ke idemesie ama etịn̄ aban̄a Jesus nte Ebendọ. Ntre ke adan̄aemi Jesus odude, John ikpekereke ke odot nditre udia, m̀mê mme mbet Jesus nde ndikpekere ntre. Ke ukperedem, ke ini Jesus akpade, mme mbet esie ẹfụhọ ẹnyụn̄ ẹtre udia. Edi ke ini enye esetde ke n̄kpa onyụn̄ ọdọkde ke heaven, mmọ inyeneke ntak efen kaban̄a mfụhọ mfụhọ utre udia.

Ekem, Jesus ọnọ mmọ uwụtn̄kpọ emi ete: “Baba owo kiet idaha ubak ọfọn̄ eke mîdiọn̄ke ikịm idian ke akani ọfọn̄idem; koro se ẹdade ẹsiri nde akabade awak ọfọn̄idem, onyụn̄ anam enye awaha ọdiọk akan. Owo inyụn̄ isịnke obufa wine ke akani ikpa; ama anam ntre, ikpa ẹsiaha, wine onyụn̄ ọduọhọ, ikpa ẹnyụn̄ ẹtak. Edi esịn obufa wine ke mbufa ikpa.” Mme uwụtn̄kpọ ẹmi ẹsan̄a nso ye utre udia?

Jesus akan̄wam mme mbet John Andinịm owo baptism ndifiọk nte ke owo ndomokiet ikpodorike enyịn ndikụt nte mme anditiene imọ ẹnamde n̄kpọ ẹtiene n̄kani edinam ido ukpono mme Jew, utọ nte edinam utre udia. Enye ikedịghe ndidiọn̄ nnyụn̄ nnam nkpakpa ndutịm utuakibuot emi ẹma ẹkebn̄e idem ndimen mfep akaiso. Owo idinamke Ido Ukpono Christ asan̄a ekekem ye ido ukpono mme Jew eke eyo oro ye mme ukpepn̄kpọ ifiọkowo esie. Baba, enye iditiehe nte obufa ubak ọfọn̄ ke enyọn̄ akani ọfọn̄idem m̀mê obufa wine ke akani ikpa. Matthew 9:​14-17; Mark 2:​18-22; Luke 5:​33-39; John 3:​27-29.

▪ Mmanie ẹnịm utre udia, ndien kaban̄a nso uduak?

▪ Ntak emi mme mbet Jesus mîtreke udiak utre ke adan̄aemi enye odude ye mmọ, ndien ke oro ebede, didie ke ntak utre udia edibe efep ke mîbịghike?

▪ Nso mme uwụtn̄kpọ ke Jesus eneme, ndien nso ke mmọ ẹwọrọ?