Ibuot 33

Ndisu Prọfesi Isaiah

KE JESUS ọfiọkde ete ke mme Pharisee ye n̄ka mme anditiene Herod ẹdiomi ndiwot imọ, enye ye mme mbet esie ẹsio ẹka Inyan̄ Galilee. Mi akwa otuowo ẹtode Palestine, idem ye mbon oro mîdụn̄ke ke n̄kann̄kụk esie, ẹwọrọ ẹtiene enye. Enye anam udọn̄ọ okụre ediwak owo, ye utịp edide nte ke kpukpru mmọ oro ẹnyenede ata ndiọi udọn̄ọ ẹfaha ẹka iso nditụk enye.

Sia otuowo ẹwakde etieti, Jesus ọdọhọ mme mbet esie ete yak ẹda ubom ẹbet imọ. Ke edierede ọkpọn̄ mbenesụk, otuowo ikemeke ndifịk enye aba. Enye ekeme ndisịne ke esịt ubom n̄kpep mmọ n̄kpọ m̀mê anamde isan̄ aka ebiet en̄wen ke mbenesụk oro man an̄wam mme owo do.

Mbet oro, Matthew, owụt ete ke utom ukwọrọikọ Jesus omosu “nte prọfet Isaiah eketịn̄de.” Ekem Matthew okot oto prọfesi oro Jesus osude ete:

“Sese owo Mi emi n̄kemekde; Ama Mi emi nnemde esịt ye Enye: nyedori Enye spirit Mi ke idem, ndien Enye eyenam ikpe ọwọrọ ọnọ mme Gentile. Enye iditọhọke, idinyụn̄ ifiorike: baba owo kiet idinyụn̄ ikopke uyo Esie ke efak. Enye idibụn̄ke nyanyan̄a eke anuahade, idinyụn̄ inịmeke ọfọn̄ utuenikan̄ eke osiode nsụn̄ikan̄, tutu Enye edinam ubiereikpe ọwọrọ ada onyụn̄ akan. Ndien mme Gentile ẹyedori enyịn ke enyịn̄ Esie.”

Ke akpanikọ, Jesus edi edima asan̄autom emi Abasi onyịmede. Ndien Jesus amanam se ata unenikpe edide an̄wan̄a, emi mme ido edinam nsunsu ido ukpono odịpde. Ke ntak emi mmọ ẹbuande ibet Abasi ukwan̄ ukwan̄, mme Pharisee ikemeke ndin̄wam owo oro ọdọn̄ọde ke Sabbath! Ke anamde unenikpe Abasi ọwọrọ ada, Jesus omobiomode mme owo mbiomo ukwan̄ ido edinam, ndien ke ntak emi, mme adaiso ido ukpono ẹdomo ndiwot enye.

Nso ke ikọ oro ọwọrọ nte ke “enye iditọhọke, idinyụn̄ ifiorike: baba owo kiet idinyụn̄ ikopke uyo Esie ke efak”? Ke ini ọkọkde mme owo udọn̄ọ, Jesus esisọn̄ọ “akpan mmọ ete ẹkûyarade Imọ.” Enye iyomke uyom uyom ntọt oro ẹsuande ẹban̄a enye ke mme efak m̀mê ndisuan nsunsu ntọt oro owo ke nduaidem etịn̄de ọnọ owo efen.

N̄ko, Jesus ada etop ndọn̄esịt esie ọsọk mme owo oro ke ndamban̄a usụn̄ ẹbietde nyanyan̄a oro anuahade, ẹnyụkde ẹnịm ẹnyụn̄ ẹfịkde ke ukot. Mmọ ẹbiet ọfọn̄ utuenikan̄, emi ekperede ndinịme akpatre edeme-ikan̄ esie. Jesus inuakke nyanyan̄a oro anuahade m̀mê ndinịme ọfọn̄ utuenikan̄ oro osiode nsụn̄ikan̄. Edi ke mbọm ye ima, enye ada usọ emenede sụn̄sụn̄ owo. Ke akpanikọ, Jesus edi enyeemi mme idụt ẹkemede ndidori enyịn mban̄a! Matthew 12:​15-21; Mark 3:​7-12; Isaiah 42:​1-⁠4.

▪ Didie ke Jesus anam unenikpe ọwọrọ ada, mînyụn̄ itọhọke m̀mê ndimenede uyo esie ke mme efak?

▪ Mmanie ẹbiet nyanyan̄a oro anuahade ye ọfọn̄ utuenikan̄, ndien didie ke Jesus anam n̄kpọ ye mmọ?