Ibuot 44

Ndinam Enyene-Ndịk Oyobio Odobo

USEN Jesus osụk ọyọhọ ye utom, esịnede edikpep otuowo n̄kpọ ke mbenesụk ndien ke oro ebede asiakde mme n̄ke oro ndịbe ndịbe ọnọ mme mbet esie. Ke osịmde mbubịteyo, enye ọdọhọ ete: “Ẹyak iwat ibe ika ke edem oko.”

Ke ẹbede ẹsịm esụk edem usiahautịn eke Inyan̄ Galilee, do ke ikpehe obio oro ẹkotde Decapolis odu, emi ikọ Greek oro deʹka, ọwọrọde “duop,” ye poʹlis, emi ọwọrọde “obio.” Mme obio Decapolis ẹdi ibuot obio ido edinam mbon Greek, okposụkedi mmọ ye unana eyịghe n̄ko ẹdide ebiet ẹmi ediwak mme Jew ẹdụn̄de. Nte ededi, utom Jesus ke ebiet emi, edi ata esisịt. Idem ke isan̄ emi, nte nnyịn idikụtde ke ukperedem, owo iyakke enye odu do ebịghi.

Ke ini Jesus eben̄ede ete mmimọ ikpọn̄ ika edem inyan̄ eken, mbet esie ẹda enye ẹkedụk ubom. Nte ededi, mme owo ẹfiọk ẹban̄a edidaha oro mmọ ẹdahade. Ibịghike mmọ eken ẹdụk ubom ẹtiene mmọ. Ndibe inyan̄ inen̄ekede iyom usụn̄. Ke akpanikọ, Inyan̄ Galilee edi sụk akwa n̄kpọdiọhọ mmọn̄ oro ọniọn̄de ke n̄kpọ nte itiat 13 onyụn̄ atarade ke itiat 7 1/2.

Nte an̄wan̄ade Jesus amakpa mba. Ntre, ndondo oro ke mmọ ẹwatde ẹsio, enye osụhọde ana ke etak ubom, odori ibuot esie ke udori-ibuot, onyụn̄ ede ọkpọsọn̄ idap. Ediwak mme apostle ẹmi ẹdi mme nta awat-inyan̄, ẹmi ẹma ẹkenam utom ukọ iyak akamba akamba ke Inyan̄ Galilee. Ntre mmọ ẹse n̄kpọ ẹban̄a uwat ubom emi.

Edi emi ikenyeneke ndidi mfefere isan̄. Ke ntak ufiop ufiop eyo ke enyọn̄ mmọn̄, emi otụn̄ọde ke n̄kpọ nte ikpat 700, ye mbịt mbịt ofụm ke mme obot n̄kann̄kụk oro, ọkpọsọn̄ ofụm esifụme ke ndusụk idaha onyụn̄ anam idiọk oyobio ofụme tutu akpa adaha. Emi edi se itịbede idahaemi. Ibịghike, mbufụt mmọn̄ ọtọn̄ọ ndimia ke mben ubom onyụn̄ ọdọn̄ mmọn̄ ke esịt ubom, tutu ayak esisịt enye ndisịp. Kpa ye oro, Jesus ke akaiso ndide!

Mme nta awat-inyan̄ ẹmi ẹn̄wana ọkpọsọn̄ ndinam ubom ada ọfọn. Nte eyịghe mîdụhe, mmọ ẹma ẹsin̄wana ẹbe utọ oyobio emi ke mbemiso. Edi isan̄ enyeemi odudu ekpere ndikụre mmọ. Ke ẹfehede ndịk ndiduọk uwem mmọ, mmọ ẹdemede Jesus ke idap. Mmọ ẹfiori ẹte: ‘Andikpep, nte afo ukereke? Nnyịn ke iden̄! Nyan̄a nnyịn, nnyịn imọn̄ itak!’

Ke adahade ada, Jesus ọdọhọ ofụm ye inyan̄ oro ete: “Dobo, na sụn̄.” Ndien oyobio etre, inyan̄ onyụn̄ ana sụn̄. Ke ọwọn̄ọrede ese mme mbet esie, enye obụp ete: “Nsinam mbufo ẹfehede ndịk? Nte mbufo inyeneke kan̄a mbuọtidem?”

Ke oro ebede, ndịk anam mme mbet esie etieti. Mmọ ẹbụp kiet eken ẹte, “Anie nan̄a edi emi, emi kpa ofụm ye inyan̄ ẹkopde uyo Esie?”

Nso odudu ke Jesus enyene ntem! Didie ke edi n̄kpọ nsịnudọn̄ ntem ndidiọn̄ọ nte ke Edidem nnyịn emenyene odudu ndikan mme oto-obot afanikọn̄ ndien nte ke ini enye ediwọn̄ọrede ntịn̄enyịn esie ọyọhọ ọyọhọ ese isọn̄ nnyịn ke ini ukara Obio Ubọn̄ esie, kpukpru owo ẹyedụn̄ ke ifụre oro mme enyene-ndịk oto-obot afanikọn̄ mîdụhe!

Esisịt ini ke oyobio oro odobode, Jesus ye mme mbet esie ẹbehe ke mben inyan̄ edem usiahautịn eken ke ifụre. Ekeme ndidi mme ubom eken ẹma ẹbọhọ ọkpọsọn̄ oyobio oro ẹnyụn̄ ẹnyọn̄ọ ke ifụre. Mark 4:⁠35–5:⁠1; Matthew 8:​18, 23-27; Luke 8:​22-⁠26.

▪ Nso idi Decapolis, ndien enye odu ke m̀mọ̀n̄?

▪ Nso mme n̄kpọ ẹdi ntak afai afai oyobio ke Inyan̄ Galilee?

▪ Ke ini ifiọk uwat-inyan̄ mmọ mîkemeke ndinyan̄a mmọ, nso ke mme mbet ẹnam?