Ibuot 53

Akakan Andikara oro Ẹyomde

KE INI Jesus ọnọde uwak tọsịn owo udia ke utịbe utịbe usụn̄, mme owo oro ẹdu ke n̄kpaidem. Mmọ ẹdọhọ ẹte, “Ke akpanikọ emi edi prọfet emi edidụkde edi ke ererimbot.” Mmọ ẹbiere ẹte ke anaedi Jesus edi prọfet emi okponde akan Moses ye nte ke enye n̄ko eyedi andikara oro ẹtịmde ẹyom. Ntre mmọ ẹdiomi ndimụm enye nnịm ke edidem.

Nte ededi, Jesus ọfiọk aban̄a se mmọ ẹdiomide. Ntem enye ọsọsọp ọkpọn̄ ebiet oro mbak mmọ ẹdimụm enye. Enye anam otuowo ẹnyọn̄ọ onyụn̄ akpak mme mbet esie ndidiere ke ubom nnyụn̄ mfiak nsio n̄ka Capernaum. Enye ndien ọdọk ke obot ndibọn̄ akam. Jesus odu do ikpọn̄ ofụri okoneyo oro.

Esisịt ini mbemiso eyo esierede, Jesus ada ke enyọn̄ obot oro okụt nte akpa adahade ọnọ ọkpọsọn̄ ofụm eke ofụmede. Ke un̄wana ọfiọn̄ oro ekperede ndiyọhọ idịbi, sia Passover ekperede, Jesus ada okụt ubom oro ye mme mbet esie ẹn̄wanade ndibe mbufịt mmọn̄ oro. Iren oro ke ẹwat ubom ke ofụri odudu mmọ.

Ke okụtde emi, Jesus osụhọde ke obot oro onyụn̄ ọtọn̄ọ ndisan̄a mbịne ubom oro ke ufọt mbufịt mmọn̄ oro. Ubom oro ama asan̄a n̄kpọ nte itiat ita m̀mê inan̄ ke ini Jesus osịmde enye. Nte ededi, enye akaiso asan̄a nte n̄kpọ eke oyomde ndibe mmọ. Ke ini mme mbet ẹkụtde enye, mmọ ẹfiori ẹte: “Edi ekpo.”

Jesus ke ikọ ndọn̄esịt ọdọhọ ete: “Edi Ami; ẹkûfehe ndịk.”

Edi Peter ọdọhọ ete: “Ọbọn̄, edieke edide Afo, kot mi nsan̄a ke enyọn̄ mmọn̄ ntiene Fi.”

Jesus ọbọrọ ete, “Di.”

Mmọdo, Peter, ke ọwọrọde ke ubom, asan̄a ke enyọn̄ mmọn̄ etiene Jesus. Edi ke esede oyobio oro ofụmede, enye okop ndịk, ndien ke ọtọn̄ọde ndiden̄, ofiori ete: “Ọbọn̄, nyan̄a mi.”

Ke osiode ubọk usọp usọp anyan, Jesus omụm enye, ọdọhọ ete: “O afo owo ekpri mbuọtidem, nsidi ntak afo eyịkde?”

Ke Peter ye Jesus ẹdụkde ubom, ofụm oro odobo, ndien mme mbet ẹdu ke n̄kpaidem. Edi nte mmọ ẹkpenyene ndidu ke n̄kpaidem? Edieke mmọ ‘ẹkpeketịmde ẹfiọk se uyo ẹmi ẹdade ẹban̄a’ ke ndiwụt esịtekọm mban̄a utịben̄kpọ oro Jesus akanamde ke n̄kpọ nte hour ifan̄ emi ebede ke ndibọk uwak tọsịn owo ke uyo ition ye n̄kpri iyak iba kpọt, do ikpetiehe nte n̄kpọ n̄kpaidem ikaha ke enye ndikeme ndisan̄a ke enyọn̄ mmọn̄ nnyụn̄ nnam ofụm odobo. Nte ededi, idahaemi mme mbet ẹtuak ibuot ẹnọ Jesus ẹnyụn̄ ẹdọhọ ẹte: “Ke akpanikọ Afo edi Eyen Abasi.”

Ke ekpri ini, mmọ ẹsịm Gennesaret, kpa ediye on̄wụm mfri unaisọn̄ emi ekperede Capernaum. Do ke mmọ ẹyịri ubom. Edi ke ini mmọ ẹdọkde obot, mme owo ẹdiọn̄ọ Jesus ẹnyụn̄ ẹfehe ẹka mbọhọ obio oro, ndikada mmọ oro ẹdọn̄ọde ndi. Ke ini ẹmende mmọemi ke n̄kpana mmọ ẹdi ẹnyụn̄ ẹtụkde mben ọfọn̄ Jesus, mmọ ẹkop ọyọhọ nsọn̄idem.

Mi kan̄a, otuowo oro ẹkekụtde utịben̄kpọ eke edibọk uwak tọsịn owo ẹdifiọk ẹte ke Jesus ama ọnyọn̄. Mmọdo ke ini n̄kpri ubom ẹtode Tiberias ẹbehede, mmọ ẹdiere ke ubom ẹmi ẹnyụn̄ ẹsio ẹka Capernaum ndiyom Jesus. Ke ini mmọ ẹkụtde enye, mmọ ẹbụp ẹte: “Rabbi, Afo ekedi mi ini ewe?” Jesus asua ọnọ mmọ, nte nnyịn idikụtde ke mîbịghike. John 6:​14-25; Matthew 14:​22-36; Mark 6:​45-⁠56.

▪ Ke Jesus ama ọkọnọ uwak tọsịn owo udia ke utịbe utịbe usụn̄, nso ke mme owo oro ẹyom ndinam ye enye?

▪ Nso ke Jesus ada ke obot emi enye ọkọdọkde aka okụt, ndien nso ke enye anam?

▪ Ntak emi mme n̄kpọ ẹmi mîkpakpaha mme mbet idem ntre?

▪ Nso itịbe ke mmọ ẹma ẹkesịm obot?