Ibuot 85

Ndiyom se Ikosopde

JESUS enyene udọn̄ ndiyom nnyụn̄ n̄kụt mme owo oro ẹdisụhọrede idem inam n̄kpọ inọ Abasi. Ntre enye ke oyom ke onyụn̄ etịn̄ ikọ ọnọ kpukpru owo aban̄a Obio Ubọn̄, esịnede mme anam idiọkn̄kpọ oro ẹtịmde ẹdiọn̄ọ. Mme utọ owo oro ẹsan̄a ẹkpere idahaemi man ẹkpan̄ utọn̄ ẹnọ enye.

Ke ẹkụtde emi, mme Pharisee ye mme scribe ẹsụk Jesus uyo ke ndisan̄a ye mme owo oro mmọ ẹkerede ke idotke. Mmọ ẹkụni ẹte: “Owo emi adadara mme idiọkowo, onyụn̄ adia n̄kpọ ye mmọ.” Didie ke oro otịm osụhọrede uku mmọ itie ntem! Mme Pharisee ye mme scribe ẹnam n̄kpọ ye mme usụhọde owo nte mbio emi ẹdude ke idak ikpat mmọ. Ke akpanikọ, mmọ ẹda ikọ Hebrew oro ‛am ha·’aʹrets, “mbon idụt [ererimbot],” man ẹwụt nte mmọ ẹsịnde mme utọ owo ẹmi ke ndek.

Ke n̄kan̄ eken, Jesus anam n̄kpọ ye kpukpru owo ukpono ukpono, mfọnido mfọnido, ye mbọm mbọm. Nte utịp, ediwak ke otu mme usụ­họde owo ẹmi, ẹsịnede mme owo ẹmi ẹtịmde ẹdiọn̄ọ nte mme anam idiọkn̄kpọ, ẹnyene udọn̄ ndikpan̄ utọn̄ nnọ enye. Edi nso kaban̄a edisụk oro mme Pharisee ẹsụkde Jesus uyo ke ndisịn ukeme ke ufọn mmọ oro mme Pharisee ẹkerede ke idotke?

Jesus ọbọrọ eneni mmọ ke nditop n̄ke kiet. Enye etịn̄ etiene idaha ukere n̄kpọ mme Pharisee, nte n̄kpọ eke ẹdọhọde ke mmọ ẹdi nti owo ẹnyụn̄ ẹdu ke ifụre ke otuerọn̄ Abasi, ke adan̄aemi, mme usụhọde owo ‛am ha·’aʹrets ẹyode-yo ẹnyụn̄ ẹdude ke idaha oro ẹsopde-sop usụn̄. Kpan̄ utọn̄ nte enye obụpde ete:

“Ewe owo ke otu mbufo edinyene erọn̄ ikie, ndien kiet osop, idikpọn̄ke anan̄-ye-efụtenan̄ ke desert, ibịne erọn̄ oro osopde, tutu okụt. Ndien ama okụt enye, odori ke afara esie adat esịt. Ndien ke ini enye osịmde ufọk, okot mme ufan ye mbọhọidụn̄ esie ẹdi, ete mmọ, Ẹdara ye ami, koro mma n̄kụt erọn̄ mi emi okosopde.”

Jesus ndien ada ebuana oro mbụk esie enyenede ke n̄kpọ emi edisịn, anamde an̄wan̄a ete: “Ndọhọ mbufo nte, Kpasụk ntre ke idara edidu ke heaven aban̄a idiọkowo kiet emi akabarede esịt, akan nti owo anan̄-ye-efụtenan̄, ẹmi mînyeneke se ẹkabarede esịt ẹban̄a.”

Mme Pharisee ẹda ke mmimọ idi nti owo ndien ke ntre inyeneke se ikabarede esịt iban̄a. Ke ini ndusụk mmọ ẹkesụkde Jesus uyo ke isua ifan̄ ke edem edem ke enye ndidia n̄kpọ ye mme ọbọ a-⁠tax ye mme idiọkowo, enye ama etịn̄ ọnọ mmọ ete: “N̄kedịghe ndikot ndinen owo, edi mme idiọkowo.” Mme Pharisee oro ẹbatde idemmọ ke ndinen owo, ẹnyụn̄ ẹkpude ndikụt ufọn edikabade esịt, idaha idara ndomokiet idi ke heaven. Edi ke akpanikọ mme anam idiọkn̄kpọ oro ẹkabarede esịt ẹda idara ẹdi.

Man anam akpan n̄kpọ emi enen̄ede ọsọn̄ odudu nte ke edifiak nda mme anam idiọkn̄kpọ oro ẹkesopde ndisịn ke itie edi n̄kpọ idara, Jesus otop n̄ke efen. Enye ọdọhọ ete: “Ewe n̄wan edinyene mbak silver duop, ndien kiet ọbọhọ enye osop, ididomoke utuenikan̄ ikpọri ufọk itịm iyom, tutu ọfiọhọ. Ndien ama ọfiọhọ, okot mme ufan ye mbọhọidụn̄ esie ẹdi, ete mmọ, Ẹdara ye ami, koro mma mfiọhọ okụk emi okosopde.”

Jesus ndien ada mbiet ebuana oro mbụk emi enyenede edisịn. Enye akaiso ndidọhọ ete: “Ndọhọ mbufo nte, Kpasụk ntre ke idara odu ke iso mme angel Abasi aban̄a owo kiet emi akabarede esịt.”

Nso n̄wọrọnda ima ima edikere mban̄a ke mme angel Abasi ẹnyene ntem ẹnọ edifiak nda oro ẹdade mme anam idiọkn̄kpọ oro ẹkesopde ẹdisịn ke itie! Emi enen̄ede edi ntre sia mme owo ẹmi inikiet ẹkedide usụhọde owo mi, kpa mbon ẹmi ẹkesịnde ke ndek ‛am ha·’aʹrets ke akpatre ẹdide ẹdidụk ke udịm mme andibuana ke Obio Ubọn̄ Abasi eke heaven. Nte utịp, mmọ ẹnyene idaha ke heaven oro okon̄de akan eke mme angel! Edi utu ke ndifụbe ufụp m̀mê ndinam asari, mme angel ẹmi ke nsụhọdeidem ẹnyịme akpanikọ oro nte ke mme idiọkowo ẹmi ẹma ẹsobo ẹnyụn̄ ẹkan mme idaha ke uwem oro ẹditịmde mmọ idem ndinam utom nte ndidem ye mme oku eke heaven ẹmi ẹkopde mbọm ẹban̄a owo. Luke 15:​1-10; Matthew 9:13; 1 Corinth 6:​2, 3; Ediyarade 20:⁠6.

▪ Ntak emi Jesus enyenede ebuana ye mme idiọkowo oro ẹtịmde ẹdiọn̄ọ, ndien nso nsụkuyo ke mme Pharisee ẹsụk enye?

▪ Didie ke mme Pharisee ẹse mme usụhọde owo?

▪ Mme uwụtn̄kpọ ewe ke Jesus ada, ndien nso ke nnyịn ikeme ndikpep nto mmọ?

▪ Ntak emi idara mme angel ẹdide n̄wọrọnda n̄kpọ-⁠ọ?