Ibuot 13

Nso ke N̄kpanam man Nnen̄ede Ndiọn̄ọ N̄wed?

YAK idọhọ ke odu ke esịt akai. Ikpọ eto iyakke un̄wana utịn esịm ebiet emi odude. Sia akai oro aban̄de, afo ukemeke ndisan̄a ifụre ifụre. Man ọwọrọ do, ana ada ofụt asiak ikọt ebe.

Ndusụk nditọ ufọkn̄wed ẹdọhọ ke se iwọrọde mmimọ ke ufọkn̄wed etie nte se isụk itịn̄de emi. Esitie nte ẹbọbọp mmọ ẹtem ke ubet ukpepn̄kpọ ofụri uwemeyo, owo itịn̄ke-tịn̄ utomufọk emi anade mmọ ẹtaba idap ẹnam. Ndi esitie fi ntre n̄ko? Ke udịm oro ẹdụride mi, wet ukpepn̄kpọ oro esisọn̄de fi akan ke ufọkn̄wed.

․․․․․

Ekeme ndidi ete ye eka fo ọkọrọ ye mme andikpep ẹsidọhọ fi enen̄ede esịn idem ekpep n̄kpọ oro. Edieke edide ntre, kûkere ke mmọ ẹyom ndinam uwem ọsọn̄ ye afo. Mmọ ẹkam ẹyom esịn ofụri ukeme fo ekpep n̄kpọ. Ntre, edieke nte ẹfịnade fi ẹte esịn idem ekpep n̄kpọ anamde n̄wed odorode fi, nso ke akpanam? Kpa nte owo emi odude ke esịt akai adade ofụt asiak ikọt man ọwọrọ, oyom anam mme n̄kpọ oro ẹtienede mi:

● Akpa N̄kpọ: Ma ndisikpep n̄kpọ. Ekeme ndisọn̄ fi ndisịn idem n̄kpep n̄kpọ ke ufọkn̄wed edieke mûmaha se ẹkpepde. Ntre domo ndifiọk ufọn oro edibọde ito ufọkn̄wed. Apostle Paul ekewet ete: “Owo emi ofụn̄de isọn̄ ekpenyene ndifụn̄ ye idotenyịn ndien owo eke edịghide wheat akpanam ntre ye idotenyịn nditiene mbuana.”—1 Corinth 9:10.

Ọtọin̄wan̄ ndifiọk ke iyadia utịp utom imọ esinam enye esịn idem ofụn̄ isọn̄. Edi ekeme ndidi ukwe ntak emi akpanade esịn idem ekpep ndusụk n̄kpọ idahaemi. Nte ededi, ndikpep nsio nsio n̄kpọ ayanam ọfiọk ekese n̄kpọ. Ayanam fi ‘akabade edi kpukpru n̄kpọ ọnọ kpukpru orụk owo,’ oyonyụn̄ anam ekeme ndinyene nneme ye mme owo emi ẹtode nsio nsio ebiet. (1 Corinth 9:22) Ke nsụhọde n̄kaha, ndikpep nsio nsio n̄kpọ ayanam ofori ukeme ukere n̄kpọ fo, ndien emi eyenyene ufọn ọnọ fi ke ini iso.

● Udiana N̄kpọ: Ma mme n̄kpọ oro ekemede ndinam. Ufọkn̄wed ekeme ndinam ọfiọk mme n̄kpọ oro ekemede ndinam. Paul ekewet ọnọ Timothy ete: ‘Nam enọ Abasi emi afo ọkọbọde asak nte ikan̄.’ (2 Timothy 1:6) Anaedi ẹma ẹnọ Timothy san̄asan̄a ifetutom ke esop Christian. Edi akana enye ofori enọ oro Abasi ọkọnọde enye mbak editatak. Nte ededi, Abasi idisiakke-siak fi ibuot isịn ifiọkn̄wed. Edi enye ọnọ fi ukeme ye enọ emi ẹkpụhọrede ye eke mbon en̄wen. Ufọkn̄wed ekeme ndinam ọfiọk ukeme oro mûkpukereke ke emenyene.

Kûdedei ukere ke udukemeke ndinam n̄kọri sia oro ọkpọwọrọ ndinam idemfo ibak. Edieke utọ ekikere oro odụkde fi esịt, kere ban̄a mme n̄kpọ oro ekemede ndinam. Ke uwụtn̄kpọ, ke ini mme owo ẹkedọhọde ke Paul ikemeke nditịn̄ ikọ ọfọn, enye ama ọbọrọ ete: “Ekpedi ami ndi ọkọi ke nditịn̄ ikọ, ke akpanikọ ndịghe ọkọi ke ifiọk.” (2 Corinth 10:10; 11:6) Paul ama ọfiọk mmeme esie. Enye ama ọfiọk n̄ko mme n̄kpọ oro enye ekemede ndinam.

Nso kaban̄a fi? Nso ye nso ke ekpekeme ndinam? Edieke mûfiọkke, bụp akwa owo emi amade fi. Utọ ufan oro ekeme ndin̄wam fi ọfiọk mme n̄kpọ oro ekpekemede ndinam ye nte akpadade mmọ anam n̄kpọ ke eti usụn̄.

● Ọyọhọ N̄kpọ Ita: Sịn idem kpep n̄kpọ. Idụhe nte ekemede ndidiọn̄ọ n̄wed edieke mûsịnke idem ukpep n̄kpọ. Imọfiọk ke ndusụk nditọ ufọkn̄wed isimaha ndikpep n̄kpọ. Edi ndikpep n̄kpọ enyene ekese ufọn. Edieke esịnde ukeme, edikam enenem fi.

Man ekeme ndisịn idem n̄kpep n̄kpọ, oyom esisio ini enịm ọnọ n̄kpọ kiet kiet oro anade anam. Ti ete ke akpa n̄kpọ ke uwem eyenufọk edi ndisịn idem n̄kpep n̄kpọ. Edi akpanikọ ke Bible ọdọhọ ke odu “ini eke ẹsakde imam” ye “ini eke ẹnekde unek.” (Ecclesiastes 3:1, 4; 11:9) Ntre, ukem nte mme uyen eken, ọkpọfọn osio ini enịm ọnọ mme edinam ini nduọkodudu.a Nte ededi, Ecclesiastes 11:4 ọdọhọ ete: “Owo eke esede ofụm idisuanke n̄kpasịp; owo eke onyụn̄ esede ikpaenyọn̄ idikpen̄eke ukpen̄e.” Nso ke afo ekpep oto emi? Kpep n̄kpọ mbemiso akade mbre! Kûkere ke udunyeneke ini unam mbiba.

Nte Ekpesinamde Utomufọk Fo

Edi nso ke akpanam edieke utomufọk oro ẹnọde fi awakde akaha? Ekeme nditie fi ke idem nte eketiede Sandrine emi edide isua 17. Enye ọdọhọ ete: “Mmesida hour iba esịm ita nnam utomufọk kpukpru okoneyo, mmesinyụn̄ nnam n̄ko ke utịturua.” Edinam didie okụre kpukpru utomufọk oro ẹnọde fi? Domo ndinam mme ekikere oro ẹnọde ke page 119.

Ndikan Mme Mfịna Oro Osobode

Ke ini Paul eketemede Timothy nte enye akpanamde n̄kọri ke n̄kan̄ eke spirit, enye ọkọdọhọ ete: “Tie kere mme n̄kpọ emi; sịn idem ke mmọ ofụri ofụri, man kpukpru owo ẹkpekụt n̄kọri fo.” (1 Timothy 4:15) Kpasụk ntre, edieke esịnde ukeme, ọyọtọn̄ọ ndidiọn̄ọ n̄wed.

Kere ban̄a uwụtn̄kpọ oro ikọnọde ke ntọn̄ọ ntọn̄ọ ibuotikọ emi. Edieke odude ke esịt akai, oyoyom ada ofụt asiak ikọt ọwọrọ. Ukem oro ke edi ye ufọkn̄wed. Utu ke ndiyak ediwak n̄kpọ oro ete ye eka fo ọkọrọ ye mme andikpep ẹyomde ẹto fi anam akpa mba, nam n̄kpọ ita oro inemede ke ibuotikọ emi man enen̄ede ọdiọn̄ọ n̄wed. Ama ọtọn̄ọ ndidiọn̄ọ n̄wed, oyokụt ke ọfọn nte akanamde se itịn̄de mi.

KOT N̄KPỌ EFEN EFEN BAN̄A IBUOTIKỌ EMI KE IBUOT 18 KE EBOHO 1

[Ikọ Idakisọn̄]

AKPAN ITIE N̄WED ABASI

“Owo eke esede ofụm idisuanke n̄kpasịp; owo eke onyụn̄ esede ikpaenyọn̄ idikpen̄eke ukpen̄e.”​—Ecclesiastes 11:4.

ITEM

Ke ini oyomde ndikpep n̄kpọ, bem iso dụn̄ọde se oyomde ndikpep man ọfiọk se ukpepn̄kpọ oro aban̄ade. Ekem, bụp idemfo mme mbụme oro ekemede ndikụt ibọrọ ke ekpri ibuotikọ kiet kiet. Ndien kot ebiet oro oyomde ndikpep nyụn̄ yom ibọrọ mbụme oro. Ke akpatre, se m̀mê eyekeme nditi se okokotde.

NDI AMA ỌFIỌK . . . ?

Ndiyịp udomo idiyakke mme owo ẹnyene mbuọtidem aba ke idemfo idinyụn̄ iyakke ọsọp ọdiọn̄ọ n̄wed. Se ikam idiọkde ikan edi ke enye idiyakke Abasi aka iso edi ufan fo.—Mme N̄ke 11:1.

SE NDINAMDE

Isan̄ en̄wen, nyom ndinyene ․․․․․ ke n̄wed ibọrọ udomo mi ke ukpepn̄kpọ emi: ․․․․․

Nyesịn ukeme man nnen̄ede ndiọn̄ọ n̄kpọ emi ke ndinam se itienede mi: ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Ntak emi ekpesịnde idem ekpep n̄kpọ ke ufọkn̄wed?

● Man okụt ete ke emekpep n̄kpọ onyụn̄ anam utomufọk oro ẹnọde fi, ewe ndutịm ọkpọfọn ye afo?

● Ke ufọk mbufo, m̀mọ̀n̄ ke okụt ke ekpenen̄ede ọfọn esitie anam utomufọk onyụn̄ ekpep n̄kpọ?

● Nso ke akpanam mbak mbre edinam fi okûbe udomo nte ekpebede?

[Se ẹwetde ke ikpọ abisi ke page 117]

“Mmokụt nte ndusụk uyen oro ẹdide ubọkn̄ka mi ẹsinamde n̄kpọ. Nte ndusụk mmọ ẹkesikpepde n̄kpọ ke ufọkn̄wed, ntre n̄ko ke mmọ ẹsikpep Bible ye mme n̄wed esop Abasi. Mbon oro mîkamaha ndisịn idem n̄kpep n̄kpọ ke ufọkn̄wed isinyụn̄ imaha ndisịn idem n̄kpep Bible.”​—Sylvie

[Ekebe/Ndise ke page 119]

Nyene ebiet emi esitiede ekpep n̄kpọ. Ikpanaha ayak n̄kpọ etịmede fi do. Tie ke okpokoro edieke ekemede. Kûdomo TV.

Bem iso nam se idide akpan n̄kpọ. Sia ufọkn̄wed edide akpan n̄kpọ ọnọ fi, biere ke ududomoke TV tutu afo okụre utomufọk oro ẹkenọde fi.

Kûsịk unịm. Nịm ini emi edisinamde utomufọk, nyụn̄ nam enye ke ini oro ekenịmde.

Biere se edinamde. Biere m̀mê nso ke ekpebem iso anam, m̀mê ewe ekpedi udiana, ye ntre ntre. Wet mmọ sịn ke n̄wed, nyụn̄ wet udomo ini oro edidade anam mmọ kiet kiet. Sọhi enye oro okụrede fep.

Siduọk odudu. Edieke ekikere oyode fi aka n̄kpọ en̄wen, da ekpri ini duọk odudu. Edi kûduọk odudu ebịghi akaha; fiak kanam utomufọk fo.

Nịm ke emekeme ndidi eti eyen ufọkn̄wed. Ti ke se ẹsidade ẹdiọn̄ọ ke owo edi eti eyen ufọkn̄wed edi nte enye esịnde idem ekpep n̄kpọ, idịghe ifiọk ibuot esie. Nịm ke emekeme ndidiọn̄ọ n̄wed edieke esịnde idem ekpep.

[Ndise ke page 116]

Ndisika n̄wed ekeme nditie nte ndisiak akai n̄wọrọ​—emekeme ndinam mbiba edieke ọfiọkde nnennen n̄kpọ oro akpanamde