Ibuot 5

Didie ke N̄kpanam N̄kpọ ke Emi Ete M̀mê Eka Mi Afiakde Ọdọ Ndọ Mi?

ESỊT ekeme ndinen̄ede nnem ete m̀mê eka fo ke usen emi enye afiakde ọdọ ndọ. Edi ekeme ndidi esịt idinemke fi. Ntak-a? Sia enye ndidọ owo en̄wen abiat idotenyịn ekededi oro afo ekenyenede nte ke usen kiet ata ete ye eka fo ẹyefiak ẹdidụn̄ kiet. Edi ete m̀mê eka fo ndifiak ndọ ndọ ekeme ndinen̄ede mbiak fi akpan akpan edieke edide ibịghike edima ete m̀mê eka fo akakpa.

Eketie fi didie ke idem ke ini ete m̀mê eka fo ọkọdọde owo en̄wen? Sịn idiọn̄ọ emi ✔ ke ekebe oro owụtde nte eketiede fi ke idem.

Mma . . .

□ N̄kop inemesịt

□ N̄kere ke okịm okụre

□ N̄kere ke owo imaha mi

□ Mfụbe n̄wan ete mi m̀mê ebe eka mi

□ N̄kere ke ẹkeme ndidọhọ ke mmaha aba ata ete m̀mê eka mi sia mmọtọn̄ọ ndima n̄wan ete mi m̀mê ebe eka mi

Ekeme ndidi se ikanamde ekere akpatre n̄kpọ emi edi sia emenen̄ede ama ata ete m̀mê eka fo. Edide ima m̀mê n̄kpọ en̄wen akanam, se idude edi ke mme n̄kpọ oro ẹsiakde mi ẹkeme ndinam oyom ndiwụt ke ete m̀mê eka fo ndifiak ndọ ndọ enen̄ede abiak fi; edieke mûkpemeke, emekeme ndiwụt emi ke idiọk usụn̄.

Ke uwụtn̄kpọ, emekeme ndisisịn n̄wan ete fo m̀mê ebe eka fo mfịna ke idem. Amakam ekeme ndisidomo ndisịn mfịna ke ufọt ete m̀mê eka fo ye owo emi enye ọdọde man mmọ ẹdian̄ade. Edi n̄ke ọniọn̄ kiet ọdọhọ ete: “Owo ekededi emi adade afanikọn̄ ọsọk ufọk esie, edinyene ofụm,” oro edi, enye idibọhọ ufọn ndomokiet ito edinam esie. (Mme N̄ke 11:29) Kûyak oro etịbe ọnọ fi. Odu nti n̄kpọ emi ekemede ndida ntre ubiak fo. Kere ban̄a uwụtn̄kpọ ifan̄ emi.

Mfịna 1: Ndikop Uyo Nnọ N̄wan Ete Fo M̀mê Ebe Eka Fo

Imemke utom ndikop uyo nnọ n̄wan ete fo m̀mê ebe eka fo. Ke ini enye ọdọn̄de fi utom, ekeme nditie fi ke idem nte ọkpọdọhọ, ‘Ọdọn̄ nte ọdọn̄ eyen fo!’ Nditịn̄ orụk ikọ oro ekeme ndinam ofụm idem ke ọfọn̄ ekere ke emenyene se etịn̄de, edi emi edikam owụt ke osụk anam n̄kpọ nte ata eyenọwọn̄.

Nte ededi, ndikop uyo nnọ n̄wan ete fo m̀mê ebe eka fo edi usụn̄ kiet emi ekemede ndiwụt ke amanam item Bible emi ọdọhọde ‘ọkọri ke ukeme ufiọk n̄kpọ.’ (1 Corinth 14:20) Ke nditịm ntịn̄, n̄wan ete fo m̀mê ebe eka fo ke anam se ata ete m̀mê eka fo akpanamde, ndien odot okpono enye.—Mme N̄ke 1:8; Ephesus 6:1-4.

N̄wan ete fo m̀mê ebe eka fo nditụnọ fi owụt ke enye ama onyụn̄ ekere aban̄a fi. (Mme N̄ke 13:24) Yvonne ọdọhọ ete: “Ebe eka mi esitụnọ nnyịn, edi se ata ete akpanamde ye eyen esie edi oro. N̄kere ke ndisịn item esie ọkpọwọrọ ke n̄wụtke esịtekọm mban̄a mme n̄kpọ udu uwem ye mme n̄kpọ eke spirit oro enye ọnọde nnyịn ke ediwak isua idahaemi. Oro ikpọfọnke.”

Kpa ye oro, omosụk ekeme ndikụt n̄kpọ emi oyomde osioro uyo. Ke edide ntre, wụt ke imọ idịghe aba eyenọwọn̄ ke ndinam se Colossae 3:13 ọdọhọde mi ete: “Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye owo.”

Ke udịm oro ẹdụride mi, wet nti edu iba m̀mê akande oro, emi n̄wan ete fo m̀mê ebe eka fo enyenede.

․․․․․

Didie ke nditi nti edu n̄wan ete fo m̀mê ebe eka fo edinam enen̄ede okpono enye?

․․․․․

Mfịna 2: Ndisibuana N̄kpọ Nnyụn̄ Nnyịme N̄kpọ Atak Fi

Aaron emi edide isua 24 ọdọhọ ete: “Ete mi ama afiak ọdọ ndọ ikaba. Ama esinen̄ede ọsọn̄ mi ndima mbufa iban esie ye nditọ mmọ. Ke ntọn̄ọ, n̄kada mmọ nte isenowo, edi ẹkedọhọ ke ana mma mmọ. N̄kọfiọkke se n̄kpanamde.”

Ekeme ndidi enyene se ifịnade fi n̄ko. Ke uwụtn̄kpọ, ete m̀mê eka fo ndidọ owo en̄wen ekeme ndinam fi okûdi aba akpan m̀mê adiaha m̀mê n̄kukụre eyen emi ete m̀mê eka fo enyenede. Edieke edide erenowo, ekeme ndidi ama esikere ke imọ idida iso ke ufọk mbufo—edi idahaemi ebe eka fo edibọ fi itie oro. Mîdịghe, ekeme ndidi se iketịbede inọ Yvonne etịbe ọnọ fi. Enye ọdọhọ ete: “Ata ete mi ikesidọn̄ke eka mi enyịn. Ntre eka mi ekesidu ye ami kpukpru ini. Edi ke eka mi ama ọkọdọ owo en̄wen, ebe eka mi ama enen̄ede ọnọ enye ntịn̄enyịn. Mmọ ẹma ẹsiwak ndidu kiet nneme nneme, ndien eketie nte ke enye ọbọ mi eka mi ada. Edi nte ini akade, mma n̄kpụhọ ekikere oro.”

Akpanam didie okpụhọ ekikere ukem nte Yvonne? Bible ọdọhọ ‘ayak kpukpru owo ẹkụt eti ibuot fo.’ (Philippi 4:5) Akpasarade ikọ oro ẹkabarede nte “eti ibuot” ọwọrọ “edinyịme nnọ,” onyụn̄ aban̄a edu owo emi mîsisọn̄ọke iyịre ke kpukpru unen esie. Didie ke ekeme ndinam item oro? (1) Kûsuma ndikere mban̄a n̄kpọ oro ama ekebe. (Ecclesiastes 7:10) (2) Nyịme ndibuana n̄kpọ ye n̄wan ete fo m̀mê ebe eka fo, ọkọrọ ye nditọ esie. (1 Timothy 6:18) (3) Kûda mmọ nte isenowo.

Ewe ke otu n̄kpọ ita emi ke oyom enen̄ede anam n̄kpọ aban̄a? ․․․․․

Mfịna 3: Edieke Owo Mînamke N̄kpọ ye Afo Nte Ẹnamde ye Mbon Eken

Tara ọdọhọ ete: “Ebe eka mi enen̄ede ama nditọ esie akan mi ye adiahaeka mi. Enye esidep udia ekededi oro mmọ ẹmade ọnọ mmọ onyụn̄ ọbọ fim oro mmọ ẹmade ọsọk mmọ. Enye esinam se ededi oro edinemde mmọ esịt.” Isimemke ndiyọ utọ n̄kpọ oro. Edi nso ikeme ndin̄wam fi? Domo ndifiọk ntak emi enye amade nditọ esie akan. Ekeme ndidi idịghe ke ntak emi edide enye okobon mmọ, edi edi sia mmọ ẹnen̄ede ẹmehe ye kiet eken. Kamse, anaedi afo n̄ko emenen̄ede ama ata ete m̀mê eka fo akan n̄wan ete fo m̀mê ebe eka fo.

Edi akwa ukpụhọde odu ke owo ndinam n̄kpọ ye afo nte anamde ye mbon eken ye ndinam n̄kpọ ye afo nte ọfọnde. Mme owo ẹnyene nsio nsio edu ẹsinyụn̄ ẹma n̄kpọ nsio nsio. Utu ke ndisụk n̄kere ke n̄wan ete fo m̀mê ebe eka fo inamke n̄kpọ ye afo ukem nte enye anamde ye nditọ esie, domo ndise m̀mê enye ke akam ọnọ fi se oyomde.

Mme n̄kpọ ewe ke afo esiyom emi n̄wan ete fo m̀mê ebe eka fo esinọde fi?

․․․․․

Mme n̄kpọ ewe ke afo ekere ke enye isinọhọ fi?

․․․․․

Edieke ekerede ke enye inamke ndusụk n̄kpọ oro oyomde inọ fi, ntak emi mûnemeke oro ye enye ukpono ukpono?

Ọfọn Enyene Ime

Nte ido edide, ediwak isua ẹyebe mbemiso mbufo ẹnen̄erede ẹmehe ye kiet eken ẹsịm udomo oro mbufo mîsọpke ndinyene mfịna. Ini oro ndien ke ẹdikeme ndidụn̄ ke emem kpa oro ẹnyenede nsio nsio edu. Ntre nyene ime! Kûkere ke ubon mbufo ẹyemehe ẹnyụn̄ ẹma kiet eken inikiet inikiet.

Ama enen̄ede afịna Thomas ke ini eka esie akafiakde ọdọ ndọ. Eka esie ekenyene nditọ inan̄, edi ebe eka esie ama enyenyene nditọ ita. Thomas ekewet ete: “Ima isin̄wana en̄wan, ifan̄a mfan̄a, isịn ntịme; nnyịn ikesibọhọ emem.” Nso ikanam mmọ ẹtre kpukpru oro ke akpatre? Thomas ọdọhọ ete: “Ndida item Bible nsịn ke edinam akanam mfịna nnyịn etre.”

AKPAN ITIE N̄WED ABASI

“Utịt n̄kpọ ọfọn akan editọn̄ọ. Owo eke emede ime ọfọn akan owo eke eseride iseri.”—Ecclesiastes 7:8.

ITEM

Emekeme nditọn̄ọ ndinyene udọn̄ idan̄ ke idem nditọ n̄wan ete fo m̀mê nditọ ebe eka fo oro ẹdụn̄de kiet. Ntre kûdedei uyak utọ udọn̄ emi odụk fi esịt, nyụn̄ kụt ete ke nte esịnede n̄kpọ onyụn̄ anamde n̄kpọ inamke owo mmọ ndomokiet enyene utọ udọn̄ emi ke idem fo.

NDI AMA ỌFIỌK . . . ?

Ekeme n̄ko ndisọn̄ nditọ n̄wan ete fo m̀mê nditọ ebe eka fo ndimehe ye ubon mbufo.

SE NDINAMDE

N̄kpọ iba ke otu nti n̄kpọ emi n̄wan ete mi m̀mê ebe eka mi anamde ọnọ ubon nnyịn emi ẹdinamde nnen̄ede n̄kpono enye ẹdi: ․․․․․

Edieke nditọ n̄wan ete mi m̀mê nditọ ebe eka mi mîmaha mi, nyetiene edumbet emi odude ke Rome 12:21 nnyụn̄ nnam se itienede mi: ․․․․․

Se ndibụpde ete m̀mê eka mi m̀mê n̄wan ete mi m̀mê ebe eka mi mban̄a n̄kpọ emi edi ․․․․․

AFO EKERE DIDIE?

● Nso ikeme ndinam n̄wan ete fo m̀mê ebe eka fo m̀mê nditọ esie ẹkop ndịk ndidụn̄ ye mbufo?

● Ntak emi ọfọnde ọfiọk ke obufa ubon mbufo ẹkeme ndidiana kiet nte ini akade?

[Se ẹwetde ke ikpọ abisi ke page 38]

“Mama ama afiak adian̄ade ndọ. Edi tutu esịm mfịn, nsụk mmama nditọ akani ebe esie oro. Ndikenyene mmọ nte nditọete ekedi kiet ke otu mfọnn̄kan n̄kpọ ke uwem mi.”—Tara

[Ndise ke page 39]

Ndinam ubon iba ẹdiana kiet etie nte ndibuak mmọn̄ ke simen—esiyom ẹsịn ukeme ẹnyụn̄ ẹda ini ẹbuak—edi se idiwọrọde idi ke akpatre ọyọsọn̄ idem onyụn̄ ebịghi