Mme San̄asan̄a Mfịna Mbuaha Ubon
MBUAHA UBON ORO ẸKOPDE INEMESỊT ẸKEME NDIDU! DIDIE?
Mbuaha ubon amakabade edi ọsọ orụk ubon ke ediwak ikpehe ke ererimbot. Edi, mbuaha ubon ẹnyene mme san̄asan̄a mfịna. Nte eyịghe mîdụhe enye oro akamade n̄kpọ-ata akan edi edibọk nditọ. Nte ededi, nte ibuotikọ iba oro ẹtienede ẹdidomode ndiwụt, ẹkeme ndikụt unen ke ndibọk nditọ ke ufọk mbuaha ubon.
NTE IDO EDIDE, OWO ISITỊN̄KE ETI N̄KPỌ IDIAN MME EBEEKA YE IBANETE. KE INI NNYỊN ikedide nditọwọn̄, ediwak nnyịn ima ikop ndusụk n̄ke ẹban̄ade Cinderella, emi n̄wanete esie oro ekedide owo ibak okotụhọrede ata idiọk idiọk. Nditọwọn̄ ke Europe n̄ko ẹma ẹkpep n̄ke oro Snow White and the Seven Dwarfs (Snow White ye Amamaisịm Itiaba). N̄wanete Snow White ekedi idiọk ifọt!
Ndi mme utọ n̄ke oro ẹnọ nnennen ekikere ẹban̄a mbuaha ubon? Ndi kpukpru ebeeka ye ibanete ẹdi mbon ibak? Baba. Ata ediwak mmọ ẹyom se idide mfọnn̄kan kpọt ẹnọ nditọ oro mmọ ẹdade ẹnyene ke ndọ. Edi mmọ ẹnyene ndisobo ndusụk n̄kpọsọn̄ mfịna oro ẹdide ndammana n̄kpọ ẹnọ mbuaha ubon.
Mme Mfịna Edibọk Nditọ
Ke ini akpa ndọ abiarade, ntak esiwak ndidi unana ebe ye n̄wan ndikọri nsịm ọyọhọ idaha. Ke udiana ndọ, ndinam n̄kpọ ye nditọ ekeme ndida nsịn̄ede ndi ke itie ebuana oro. Ndusụk ibat ẹwụt ẹte ke se ibede 4 ke otu mbuaha ubon 10 ẹsitre ke usiondọ ke ufan̄ akpa isua ition.
Ekeme ndidi mbufa mme ọdọ ndọ oro ifiọkke editịmede esịt, ekikere aban̄ade m̀mê ikpada ye anie, ye ekikere ufụp ye iyatesịt oro ebeeka m̀mê n̄wanete ndidi adade ọsọk nditọ ebe m̀mê nditọ n̄wan. Nditọ ẹmi ẹkeme ndikere ke ata ete m̀mê eka mmimọ ama n̄wanete m̀mê ebeeka akan mmimọ. Akan oro, nditọ ndika iso mma akani nsan̄a ekeme nditre ndin̄wan̄a ata ete m̀mê eka oro nsan̄a ndọ ekesịnde. Eyeneren kiet ama odomo ndinam eti itie ebuana esie ye ata ete esie an̄wan̄a, ọdọhọde ete, “Mama, mmọfiọk nte ke Papa ikanamke n̄kpọ ye afo nte ọfọnde, edi enye ọfọn ye ami!” Ke adan̄aemi utọ ikọ oro edide akpanikọ, enye ekeme ndinam eka enyene ata idiọkesịt aban̄a ete eyen oro.
Ebeeka kiet ama ayarade ete: “N̄kenen̄ekede ntịm idem ndinam n̄kpọ mban̄a kpukpru mfịna oro ẹnyenede ebuana ye edibọk nditọ n̄wan mi. Mma ndụk idaha oro n̄kerede nte ke idahaemi mma n̄kọdọ eka mmọ mi, ke ami nyedi ete mmọ. N̄kekere ke okụre ke oro! N̄kọfiọkke nte nditọ oro ẹkemade ata ete mmọ, ndien mma nnam ediwak ndudue.”
Nsịn̄ede ẹkeme ndidemede akpan akpan ke n̄kpọ aban̄ade ntụnọ. Nditọ ẹyom ima ima ntụnọ, edi mmọ ẹsiwak nditre ndinyịme oro idem ke ini otode ata ete m̀mê eka. Etịm ọsọn̄ didie ntem ndibọ nto ebeeka m̀mê n̄wanete! Ediwak ini, ke ini ẹbọde orụk ntụnọ oro, eyen n̄wan ekeme nditịn̄ n̄kpọ nte, “Afo udịghe ata ete mi!” Mme utọ ikọ oro ẹkeme ndibiak ebeeka emi enyenede eti uduak didie ntem!
Ndi ẹkeme ndikụt unen ke ndibọk nditọ ke mbuaha ubon? Ndi ebeeka ye n̄wanete ẹkeme ndinyene eti udeme ke ndibọp mbuaha ubon oro okụtde unen? Ibọrọ mbụme mbiba ẹmi edi ih edieke kpukpru owo oro ẹbuanade ẹtienede item oro odude ke Ikọ Abasi eke odudu spirit, kpa Bible.
[Ndise ke page 3]
“Afo udịghe ata ete mi!”