Mme Asiak Ntantaọfiọn̄ Ẹkese Jesus

Mme owo ẹto Edem Usiahautịn ẹdi. Mmọ ẹdi mme asiak ntantaọfiọn̄ emi ẹdọhọde ke imekeme nditịn̄ se iditịbede ke ndise ebiet emi ntantaọfiọn̄ adade ke ikpaenyọn̄. (Isaiah 47:13) Mmọ ẹkekụt ntantaọfiọn̄ kiet ke ini mmọ ẹkedude ke edem mmọ, ẹnyụn̄ ẹtiene enye. Enye imenke mmọ ika Bethlehem, edi emen aka Jerusalem.

Ke ini mmọ ẹsịmde Jerusalem, mmọ ẹbụp ẹte: “Enye emi amanade nte edidem mme Jew odu m̀mọ̀n̄? Koro nnyịn ikokụtde ntantaọfiọn̄ esie ke ini ikodude ke edem usiahautịn, ndien nnyịn imedi ndinụhọ nnọ enye.”—Matthew 2:1, 2.

Edidem Herod okop n̄kpọ emi ndien esịt enen̄ede ayat enye. Ntre, enye okot kpukpru mbọn̄ oku ye mme adaiso ido ukpono mme Jew eken obụp ebiet emi Christ edimanade. Mmọ ẹda N̄wed Abasi ẹwụt enye ke edidi “ke Bethlehem.” (Matthew 2:5; Micah 5:2) Herod ọdọhọ ẹdedịbe ẹda mme asiak ntantaọfiọn̄ oro ẹsọk imọ. Ke ini mmọ ẹsịmde ufọk esie, enye ọdọhọ mmọ ete: “Ẹka ẹketịm ẹyom ekpri eyen oro, ndien ẹma ẹkụt enye ẹfiak ẹditịn̄ ẹnọ mi, man ami n̄ko n̄kpaka n̄konụhọ nnọ enye.” (Matthew 2:8) Edi idịghe ukpono ke Herod oyom ndikpono eyen oro, enye oyom ndifiọk ebiet emi eyen oro odude man okowot!

Ata ndyọ ndyọ n̄kpọ etịbe ke ini mmọ ẹkpọn̄de do. Mmọ ẹfiak ẹkụt nte ntantaọfiọn̄ emi mmọ ẹkekụtde ke obio mmọ ọtọn̄ọde isan̄. Idịghe ata ntantaọfiọn̄ edi emi. Enyene owo emi adade ntantaọfiọn̄ emi odomo ndiwụt mmọ ebiet emi enye oyomde mmọ ẹka. Mme asiak ntantaọfiọn̄ oro ẹtiene ntantaọfiọn̄ emi tutu enye edisịm ufọk emi Joseph ye Mary ẹdụn̄de ye ekpri eyen mmọ.

Ke ini mmọ ẹdụkde ufọk oro, mmọ ẹkụt Mary ye ekpri eyen esie, Jesus. Mme asiak ntantaọfiọn̄ oro ẹnụhọ ẹnọ Jesus ẹnyụn̄ ẹnọ enye gold ye frankincense ye myrrh. Mmọ ẹyom ndifiak mbịne Herod, edi Abasi ọdọhọ mmọ ke ndap ete ẹkûfiak uka ubịne enye. Ntre mmọ ẹbe usụn̄ usụn̄ ẹnyọn̄ obio mmọ.

Ekere ke anie enyene ntantaọfiọn̄ oro akadade mme asiak ntantaọfiọn̄ oro usụn̄? N̄kọ emeti ke ntantaọfiọn̄ oro ekebem iso emen mmọ aka Jerusalem, ikemenke mmọ ika ikowụt Jesus ke Bethlehem. Do ke Edidem Herod okokop n̄kpọ emi onyụn̄ oyom usụn̄ nte okpowotde Jesus. Ndien mîkpedịghe emi Abasi ọkọdọhọde mme asiak ntantaọfiọn̄ oro ke ndap ete ẹkûka ubịne Herod, Herod okpokowot Jesus. Emi owụt ke Satan, asua Abasi, akada ntantaọfiọn̄ oro usụn̄ man okpowot Jesus.