Ibuot 7

Jesus ye Mme Ọfiọkn̄kpọ Owo

EDIWAK owo ẹmeto Edem Usiahautịn ẹdi. Mmọ ẹdi mme ọfiọkn̄kpọ owo—mme owo ẹmi ẹdọhọde nte ifiọkde n̄kpọ iban̄a mme ntantaọfiọn̄. Ke adan̄aemi mmọ ẹkedude ke ufọk ke Edem Usiahautịn, mmọ ẹma ẹkụt obufa ntantaọfiọn̄, ndien mmọ ẹma ẹtiene enye ke ediwak itiat ikie ẹsịm Jerusalem.

Ke ini mme ọfiọkn̄kpọ owo ẹmi ẹsịmde Jerusalem, mmọ ẹbụp ẹte: “Enyeemi akamanade nte Edidem mme Jew odu m̀mọ̀n̄? Koro nnyịn ikokụt ntantaọfiọn̄ Esie ke edem usiahautịn, imonyụn̄ idi ndituak ibuot nnọ Enye.”

Ke ini Edidem Herod ke Jerusalem okopde aban̄a emi, esịt otịmede enye ata etieti. Ntre ke enye okot ikpọ oku obụp aban̄a ebiet emi Christ enyenede ndimana. Ke ẹkọn̄de ibọrọ mmọ ke N̄wed Abasi, mmọ ẹbọrọ ẹte: “Ke Bethlehem.” Kemi Herod ọdọn̄ ẹkot mme ọfiọkn̄kpọ owo ẹdi onyụn̄ ọdọhọ mmọ ete: “Ẹka ẹketịm ẹbụp ẹban̄a nsekeyen emi; ndien ẹma ẹkụt Enye, ẹdi ẹdidọhọ mi, man ami n̄ko n̄ka n̄katuak ibuot nnọ Enye.” Edi, ke akpanikọ, Herod oyom ndikụt eyen emi man owot enye!

Ke mmọ ẹma ẹkedaha, ndyọ ndọ n̄kpọ otịbe. Ntantaọfiọn̄ emi mmọ ẹkekụtde ke ini ẹdude ke Edem Usiahautịn ebem mmọ iso. Nte an̄wan̄ade, emi idịghe ikpîkpu ntantaọfiọn̄, edi ẹkenọ enye san̄asan̄a ndida mmọ usụn̄. Mme ọfiọkn̄kpọ owo ẹmi ẹkaiso nditiene enye tutu enye atuak ada ke enyọn̄ ufọk emi Joseph ye Mary ẹdude.

Ke ini mme ọfiọkn̄kpọ owo ẹmi ẹdụkde ufọk oro, mmọ ẹkụt Mary ye nsekeyen esie, Jesus. Ntem ke kpukpru mmọ ẹtuak ibuot ẹnọ enye. Mmọ ẹnyụn̄ ẹsion̄o gold, ufuọn̄n̄kpọ, ye myrrh ke ekpat mmọ ẹnọ enye. Edikem, ke mmọ ẹyomde ndifiak n̄ketịn̄ nnọ Herod ebiet oro eyen emi odude, Abasi odụri mmọ utọn̄ ke ndap ete ẹkûnam ntre. Ntre mmọ ẹsan̄a ke usụn̄ efen ẹnyọn̄ ke obio mmọ.

Afo ekere ete anie ọkọnọ ntantaọfiọn̄ emi akasan̄ade ke ikpaenyọn̄ ndida mme ọfiọkn̄kpọ owo oro usụn̄? Ti ete, ntantaọfiọn̄ emi ikadaha mmọ usụn̄ nnennen isịm Jesus ke Bethlehem. Utu ke oro, akada mmọ aka Jerusalem ke ebiet mmọ ẹkesobode Edidem Herod, emi okoyomde ndiwot Jesus. Ndien enye akpakanam ntre ke Abasi mîkpekesịnke ubọk inyụn̄ idụri mme ọfiọkn̄kpọ owo oro utọn̄ ite ẹkûtịn̄ ẹnọ Herod ebiet emi Jesus okodude. Ekedi asua Abasi oro, Satan kpa Devil, okoyom ẹwot Jesus, ndien enye ama ada ntantaọfiọn̄ oro an̄wana ndiyọhọ uduak esie. Matthew 2:1-12; Micah 5:2.

▪ Nso iwụt ite ke ntantaọfiọn̄ emi mme ọfiọkn̄kpọ owo oro ẹkekụtde ikedịghe ikpîkpu ntantaọfiọn̄?

▪ M̀mọ̀n̄ ke Jesus odu ke ini mme ọfiọkn̄kpọ owo oro ẹkutde enye?

▪ Ntak emi ifiọkde ite ke Satan ọkọnọ ntantaọfiọn̄ emi ndida mme ọfiọkn̄kpọ owo usụn̄?