Ibuot 32

Nte Ẹkekpemede Jesus

NDUSỤK ini Jehovah esinam n̄kpọ ke utịbe utịbe usụn̄ man ekpeme n̄kpri owo emi mîkemeke ndikpeme idemmọ. Edieke afo anamde isan̄ odụk obio, afo emekeme ndikụt usụn̄ kiet oro Jehovah anamde emi. Edi ekeme ndidi afo udutịmke ufiọk se itịbede ke ntọn̄ọ ntọn̄ọ.

Afo oyokụt nte inuen efede edisọrọ ke isọn̄ ekpere fi. Etie nte enye ada unan. Enye odụri mba esie kiet onyụn̄ efehe adaha ke ini afo odomode ndisan̄a n̄kpere enye. Nte afo etienede inuen oro, enye iyakke afo esịm imọ idem. Ekem, inikiet inikiet, inuen oro efe ọnyọn̄. N̄kpọ ndomokiet ikanamke mba esie! Nte afo ọmọfiọk se inuen oro akanamde?—

Ọfọn, nseknditọ esie ke ẹkedịbe ke ikọt ẹkpere itie emi inuen oro ọkọsọrọde. Eka inuen oro ama okop ndịk nte ke afo emekeme ndikụt mmọ onyụn̄ anam mmọ n̄kpọ. Ntre enye ama anam nte ke ida unan onyụn̄ ọwọn̄ọde ntịn̄enyịn fo ọkpọn̄ ebiet oro. Nte afo ọmọfiọk owo emi ekemede ndikpeme nnyịn ukem nte eka inuen ekpemede nseknditọ esie?— Ke Bible, ẹmen Jehovah ẹdomo ye inuen oro ẹkotde ntrukpom, emi esin̄wamde n̄kpri nditọ esie.—Deuteronomy 32:11, 12.

Eyen oro Jehovah amade akan edi edima Eyen esie, Jesus. Ke ini Jesus okodude ke heaven, enye ekedi okopodudu owo eke spirit ukem nte Ete esie. Enye ama ekeme ndise n̄kpọ mban̄a idemesie. Edi ke ini Jesus akamanade nte nsekeyen ke isọn̄, enye ikekemeke ndikpeme idemesie. Enye ama oyom ukpeme.

Man anam se Abasi ọkọdọn̄de enye ke isọn̄, Jesus ekenyene ndikọri n̄kpon nnyụn̄ n̄kabade ndi mfọnmma owo emi ọkọride esịm ọyọhọ idaha. Nte ededi, Satan ama odomo ndiwot Jesus mbemiso oro ekekemede nditịbe. Nte ẹkedomode ndiwot Jesus ke ini enye ekedide eyenọwọn̄ ye mme usụn̄ oro Jehovah ekekpemede enye ẹdi inem inem mbụk. Nte afo akpama ndikop mbụk emi?—

Esisịt ini ke Jesus amanade, Satan ama anam se itiede nte ntantaọfiọn̄ ayama ke ikpaenyọn̄ ke Edem Usiahautịn. Mme owo oro ẹsikpepde n̄kpọ ẹban̄a ntantaọfiọn̄ ẹma ẹtiene ntantaọfiọn̄ oro ke ediwak kilomita ke mme itie ikie ẹkesịm Jerusalem. Do mmọ ẹma ẹbụp ebiet oro enye emi edidide edidem mme Jew edimanade. Ke ini

ẹkebụpde mme owo oro ẹfiọkde se Bible etịn̄de aban̄a emi, mmọ ẹbọrọ ẹte: “Ke Bethlehem.”—Matthew 2:1-6.

Ke Herod, kpa idiọk edidem ke Jerusalem okopde aban̄a obufa edidem emi amanade ke ndondo oro ke obio Bethlehem emi odude ekpere, enye ọdọhọ mme asiak ntantaọfiọn̄ oro ete: ‘Ẹyom nsekeyen oro ẹkụt, ndien ekem ẹdi ẹdidọhọ mi.’ Nte afo ọmọfiọk ntak emi Herod oyomde ndifiọk ebiet ekemede ndikụt Jesus?— Edi koro Herod efịbe ufụp onyụn̄ oyom ndiwot enye!

Didie ke Abasi ekpeme Eyen esie?— Ọfọn, ke ini mme asiak ntantaọfiọn̄ ẹkụtde Jesus, mmọ ẹnọ enye mme enọ. Nte ini akade Abasi eteme mme asiak ntantaọfiọn̄ ke ndap ete ẹkûfiak ẹbịne Herod. Ntre mmọ ẹsan̄a usụn̄ efen ẹnyọn̄ọ, ifiakke ika Jerusalem. Ke ini Herod ọfiọkde ete ke mme asiak ntantaọfiọn̄ ẹma ẹnyọn̄ọ, enye ayat esịt etieti. Ntre man owot Jesus, Herod anam ẹwot kpukpru nditọiren emi mîyọhọke isua iba ke emana ke Bethlehem! Edi Jesus idụhe do aba etisịm ini oro.

Nte afo ọmọfiọk nte Jesus asan̄ade ọbọhọ?— Ke mme asiak ntantaọfiọn̄ ẹma ẹkenyọn̄ọ, Jehovah eteme Joseph ebe Mary ete adaha ada onyụn̄ efehe aka Egypt. Do Jesus ọbọhọ idiọk Herod. Ke ediwak isua ẹma ẹkebe, ke ini Mary ye Joseph ẹtode Egypt ẹdi ye Jesus, Abasi ọnọ Joseph ntọt efen. Enye ọdọhọ enye ke ndap ete aka Nazareth, ebiet emi Jesus edinyenede ifụre.—Matthew 2:7-23.

Nte afo omokụt nte Jehovah ekekpemede Eyen esie?— Afo ọkpọdọhọ ke anie etie nte n̄kpri inuen emi ẹdịbede ẹkpere eka mmọ ke ikọt m̀mê nte Jesus ke ini enye ekedide eyenọwọn̄? Nte afo utiehe nte mmọ?— Mme owo oro ẹyomde ndinam fi n̄kpọ ẹdu n̄ko. Nte afo ọmọfiọk mmọ?—

Bible ọdọhọ ke Satan etie nte lion emi okụnide oyom ndita nnyịn. Ndien kpa nte mme lion ẹsiyomde n̄kpri unam, Satan ye mme demon esie ẹsiyom nditọwọn̄. (1 Peter 5:8) Edi Jehovah okop odudu akan Satan. Jehovah ekeme ndikpeme nditọ esie m̀mê ndikọk unan ekededi oro Satan ọnọde mmọ.

Ndi afo emeti ke Ibuot 10 n̄wed emi se Devil ye mme demon esie ẹdomode ndinụk nnyịn inam?— Ih, mmọ ẹdomo ndinam nnyịn inyene orụk ebuana idan̄ oro Abasi ọdọhọde ke ọdiọk. Edi mmanie kpọt ẹkpenyene ebuana idan̄?— Ih, eren ye n̄wan emi ẹdọde kiet eken.

Nte ededi, edi n̄kpọ mfụhọ nditịn̄ nte ke ndusụk ikpọ owo ẹsima ndinam idan̄ ye nditọwọn̄. Ke ini mmọ ẹnamde emi, n̄kpri nditọiren ye iban ẹkeme nditọn̄ọ ndinam ndiọi n̄kpọ oro mmọ ẹkpepde ẹto ikpọ owo emi. Mmọ n̄ko ẹsitọn̄ọ ndida ndido idan̄ mmọ nnam n̄kpọ ke idiọk usụn̄. Oro edi se iketịbede anyan ini ko ke obio Sodom. Bible ọdọhọ ete ke mme owo do, ‘ọtọn̄ọde ke nditọwọn̄ esịm n̄kani iren’ ẹma ẹdomo ndinam idan̄ ye iren oro ẹkedide ndise Lot.—Genesis 19:4, 5.

Ntre kpa nte okoyomde ẹkpeme Jesus, oyom ẹkpeme fi n̄ko mbak ikpọ owo—ye idem nditọwọn̄ efen—emi ẹkemede ndidomo ndinam idan̄ ye afo. Mme owo emi ẹyewak ndinam nte ke idi mme ufan fo. Mmọ ẹkeme ndikam nnọ fi n̄kpọ edieke afo ọn̄wọn̄ọde nditre nditịn̄ nnọ mbon en̄wen mban̄a se mmọ ẹyomde ndinam ye afo. Edi mme owo emi ẹyom ufọn idemmọ, ukem nte Satan ye mme demon esie, ndien mmọ n̄kukụre ẹyom inemesịt idemmọ. Ndien mmọ ẹdomo ndinyene inemesịt emi ebe ke ndinam idan̄ ye nditọwọn̄. Emi ọdiọk etieti!

Nte afo ọmọfiọk se mmọ ẹkemede ndinam man ẹnem mmọ?— Ọfọn, mmọ ẹkeme ndidomo ndifiọn̄ọ ndido idan̄ fo. Mîdịghe mmọ ẹyeda ndido idan̄ mmọ ẹfiọn̄ọ ye okwo. Edi afo ukpudehede uyak owo ndomokiet ebre mbre ye ekpọrọ m̀mê itịt fo. Idem ọkpọkọm owo oro edi eyeneka fo eren m̀mê eyeneka fo an̄wan m̀mê eka m̀mê ete fo. Mme ndido idem fo emi ẹdi okwo.

Didie ke afo ekeme ndikpeme idemfo mbiọn̄ọ mme owo oro ẹnamde ndiọi n̄kpọ nte mmọ emi?— Akpa kan̄a, kûyak owo ndomokiet ebre mbre ye ndido idan̄ fo. Edieke owo odomode ndinam emi, tịn̄ sọn̄ uyo ete: “Tre n̄kpọ oro! Nyetịn̄ se anamde oro!” Ndien edieke owo oro ọdọhọde nte ke oto ke ntak fo imọ inam se ikanamde oro, kûnịm. Oro idịghe akpanikọ. Ka ketịn̄ se enye akanamde, inamke n̄kpọ m̀mê enye edi anie! Afo ekpenyene ndinam ntre idem ọkpọkọm enye ọdọhọ ke imọ ye afo kpọt inyene ndifiọk se mbufo ẹkenamde. Idem ọkpọkọm owo oro ọn̄wọn̄ọ ndinọ fi ndiye enọ m̀mê esịn fi ndịk ke idem, afo ekpenyene ndidaha n̄kpọn̄ enye onyụn̄ eketịn̄ se enye akanamde.

Inaha afo okop ndịk, edi oyom afo odu ke ukpeme. Ke ini ete ye eka fo ẹtọtde fi ẹban̄a mme owo m̀mê mme ebiet oro ẹkemede ndida mfịna nsọk fi, oyom afo akpan̄ utọn̄ ọnọ mmọ. Edieke afo akpan̄de utọn̄, ufan̄ ididụhe idiọk owo ndinam fi n̄kpọ.

Kot nte ekemede ndikpeme idemfo nsio ke ndiọi edinam idan̄ ke Genesis 39:7-12; Mme N̄ke 4:14-16; 14:15, 16; 1 Corinth 6:18; ye 2 Peter 2:14.

[Ndise ke page 167]

Didie ke eka inuen emi ekpeme n̄kpri nditọ esie?

[Ndise ke page 168]

Ke mme asiak ntantaọfiọn̄ emi ẹma ẹkeka ẹkese Jesus, nso ntọt ke Abasi ọnọ mmọ oro anyan̄ade uwem Jesus?

[Ndise ke page 169]

Didie ke ẹfiak ẹnyan̄a ekpri Jesus?

[Ndise ke page 171]

Nso ke afo ekpetịn̄ onyụn̄ anam edieke owo odomode nditụk fi ke idiọk usụn̄?