Ntak Emi Ọfọnde Isụk Ibuot Inọ Abasi

EDIEKE iyomde Jehovah etịm nnyịn idem man inam uduak esie, ana isụk ibuot inọ enye sia enye edi Andikara enyọn̄ ye isọn̄. Ana isụk ibuot n̄ko inọ Eyen esie sia enye edi Ibuot esop Christian. Edi enyene mbon en̄wen emi Abasi oyomde isụk ibuot inọ. Ndinam emi edi ke ufọn nnyịn.

² Ikọ nsụkibuot emi ọkọtọn̄ọ ko ke In̄wan̄ Eden. Ikụt emi ke ewụhọ emi Abasi ọkọnọde Adam ye Eve ke Genesis 1:28 ye 2:16, 17. Abasi ọkọdọhọ mmọ ẹkara unam, ẹsụk ibuot ẹnọ imọ, ẹnyụn̄ ẹnam uduak imọ. Ekpedi Adam ye Eve ẹma ẹnam emi, kpukpru n̄kpọ akpakasan̄a ke nde ke nde, emem okponyụn̄ odu ke isọn̄ emi. Akpa Corinth 11:3 asiak mbon emi ikposụkde ibuot inọ. Apostle Paul ekewet do ete: “Nyom mbufo ẹfiọk ẹte Christ edi ibuot ọnọ kpukpru irenowo; erenowo onyụn̄ edi ibuot ọnọ n̄wan; Abasi onyụn̄ edi ibuot ọnọ Christ.” Emi ọwọrọ ke kpukpru owo ẹnyene owo emi anade mmọ ẹsụk ibuot ẹnọ; Jehovah kpọt mînyeneke.

³ Ata ediwak owo mfịn iyomke-yom ndisụk ibuot nnọ owo ndomokiet. Ntak-a? Mfịna emi ọkọtọn̄ọ ke In̄wan̄ Eden ini Adam ye Eve ẹkekoide-koi ẹsịn ndisụk ibuot nnọ Abasi. (Gen. 3:4, 5) Emi iwọrọke ke mmọ ikosụkke ibuot inọ owo ndomokiet aba. Nsọn̄ibuot mmọ akakam anam mmọ ẹkabade ẹsụk ibuot ẹnọ Satan emi edide ọbọn̄ ibak. Nsọn̄ibuot emi akadian̄ade ubonowo ọkpọn̄ Abasi. (Col. 1:21) Emi anam ata ediwak owo mfịn ẹdụk ufụn ẹnọ Satan.—1 John 5:19.

⁴ Edieke ikpepde Ikọ Abasi inyụn̄ inamde se Abasi ọdọhọde nnyịn inam, emi idiyakke idụk ufụn inọ Satan. Sia ima ikayak idem inọ Jehovah Abasi inyụn̄ ina baptism, Enye edi Akakan Owo ke uwem nnyịn. Imonyụn̄ inyịme se Edidem David eketịn̄de ete ke Jehovah edi “andikon̄ n̄kan kpukpru” owo ye kpukpru n̄kpọ ke ekondo. (1 Chron. 29:11) Nnyịn imọdiọn̄ọ ke “Jehovah edi Abasi. . . . Enye akanam nnyịn, idịghe nnyịn ikanam idem nnyịn. Nnyịn idi ikọt esie ye erọn̄ emi enye ọbọkde.” (Ps. 100:3) Imọfiọk n̄ko ke idụhe eke okponde nte Jehovah, ntre akpana isụk ibuot inọ enye ke kpukpru n̄kpọ sia enye okobot kpukpru n̄kpọ. (Edi. 4:11) Nnyịn mme asan̄autom Abasi ikpebe Jesus Christ emi okosụkde ibuot ọnọ Abasi ke kpukpru n̄kpọ.

⁵ Nso ke ofụri ukụt oro Jesus okokụtde ke isọn̄ ekekpep enye? Mme Hebrew 5:8 ọbọrọ ete: “Okposụkedi enye ekedide Eyen, enye ama ekpep n̄kopitem oto ndutụhọ oro enye okokụtde.” Ke akpanikọ, Jesus ama aka iso osụk ibuot ọnọ Ete esie eke heaven idem ke ini enye okokụtde ukụt. Enye ikanamke baba n̄kpọ kiet ke odudu idemesie. Emi ọwọrọ ke enye ikesitịn̄ke ikọ idemesie, ikonyụn̄ iyomke ubọn̄ idemesie. (John 5:19, 30; 6:38; 7:16-18) Ke ini enye akasan̄ade ọkwọrọ ikọ, ekesinenem enye ndinam uduak Ete esie kpa ye oro mme owo ẹkekọbọde enye ke ntak emi. (John 15:20) Enye ama aka iso osụk ibuot ọnọ Abasi. Jesus ama “osụhọde idem” tutu enyịme ‘ndikpa ke eto ndutụhọ.’ Enye ndikosụk ibuot nnọ Abasi ke kpukpru n̄kpọ ama ada ediwak ufọn edi: emi anam mme owo ẹkeme ndinyene edinyan̄a, anam ẹmenede enye itie, onyụn̄ anam ẹnọ Abasi ubọn̄.—Phil. 2:5-11; Heb. 5:9.

NSIO NSIO USỤN̄ ORO IKPOWỤTDE KE IMOSỤK IBUOT INỌ ABASI

⁶ Edieke isụkde ibuot inọ Abasi inyụn̄ inamde uduak esie, esịt iditịmekede nnyịn nte esitịmerede mbon emi mîmaha ndisụk ibuot nnọ enye. Nnyịn idinyụn̄ inyeneke utọ mfịna emi mmọ ẹsinyenede. Devil emi edide asua nnyịn etie nte ekpeikọt emi oyomde ndita nnyịn kpukpru ini. Edi Jehovah ayafak nnyịn osio enye ke ubọk edieke isụhọrede idem inyịme ndisụk ibuot nnọ Jehovah nnyụn̄ n̄n̄wana ye Satan.—Matt. 6:10, 13; 1 Pet. 5:6-9.

⁷ Imosụk ibuot inọ Christ sia enye edi Ibuot esop Christian. Imonyụn̄ isụk ibuot inọ “ofụn emi anamde akpanikọ onyụn̄ enyenede ọniọn̄” sia Christ ọnọ ofụn emi odudu ete ada nnyịn usụn̄. Emi anam idiọn̄ọ nte idude uwem inyụn̄ inamde n̄kpọ ye mme owo ke esop. Ndisụk ibuot nnọ Abasi ayanam inam kpukpru se Ikọ Abasi ọdọhọde inam. Emi esịne ndika ukwọrọikọ, ndidụk mme mbono esop nnyụn̄ ntiene nnam n̄kpọ ke mbono esop, ndikop item mbiowo nnyụn̄ nnam se ededi oro esop Abasi ẹdọhọde inam.—Matt. 24:45-47; 28:19, 20; Heb. 10:24, 25; 13:7, 17.

⁸ Edieke isụkde ibuot inọ Abasi, emem ye ifụre oyodu ke esop, n̄kpọ oyonyụn̄ asan̄a ke nde ke nde. Nte inamde n̄kpọ ayanam mme owo ẹkụt ke Jehovah edi Abasi emem, idịghe Abasi ndutịme. (1 Cor. 14:33, 40) Se ikụtde ke esop Jehovah anam nnyịn itiene itịn̄ se Edidem David eketịn̄de. Ke David ama eketịn̄ nte mme asan̄autom Jehovah ẹdide isio ye mme idiọkowo, enye ama ọdọhọ ete: “Mbon emi Jehovah edide Abasi mmọ ẹkop inemesịt!”—Ps. 144:15.

⁹ “Erenowo . . . edi ibuot ọnọ n̄wan” esie, Christ edi Ibuot ọnọ irenowo, Abasi onyụn̄ edi Ibuot ọnọ Christ. (1 Cor. 11:3) Ana iban ẹsụk ibuot ẹnọ mme ebe mmọ, kpa nte mme ebe ẹsụkde ẹnọ Christ. Nditọ n̄ko ẹnyene ndisụk ibuot nnọ mme ete ye eka mmọ. (Eph. 5:22-24; 6:1) Emem esidu ke ufọk emi ebe osụkde ibuot ọnọ Christ, n̄wan osụk ọnọ ebe, nditọ ẹsụk ẹnọ mme ete ye eka.

¹⁰ Ana ebe ama n̄wan esie nte Christ amade esop Abasi. (Eph. 5:25-29) Edinenem n̄wan ye nditọ esie ndisụk ibuot nnọ enye edieke enye anamde se akpanade enye anam, mînyụn̄ ifiomoke mmọ. Utom n̄wan edi ndin̄wam ebe esie. (Gen. 2:18) Edieke n̄wan esin̄wamde ebe esie onyụn̄ okponode enye, emi ayanam ebe esie enen̄ede ama enye, oyonyụn̄ ọnọ Abasi ubọn̄. (1 Pet. 3:1-4) Ke ini ebe osụkde ibuot ọnọ Christ, n̄wan onyụn̄ osụk n̄ko ọnọ ebe nte Bible ọdọhọde, mmọ ẹwụt nditọ mmọ nte ẹkpesụkde ibuot ẹnọ Abasi.

¹¹ Sia edide ‘Abasi ayak mbon emi ẹkarade idahaemi ẹka iso ẹdu,’ nte inamde n̄kpọ ye mmọ oyowụt n̄ko m̀mê imosụk ibuot inọ Abasi. (Rome 13:1-7) Mme Christian isibiatke ibet ukara, mmọ ẹsikpe tax man “ẹnọ Caesar se inyenede Caesar, ẹnyụn̄ ẹnọ Abasi se inyenede Abasi.” (Matt. 22:21) Akpana ẹkụt ẹte ke ndutịm oro ẹnamde man ẹkwọrọ ikọ ke efakutom ibiatke ibet ukara emi aban̄ade ndibọ owo enyịn̄, nọmba fon, ye adres esie edieke utọ ibet oro odude ke idụt mbufo. Edieke isụkde ibuot inọ ukara inyụn̄ inamde se mmọ ẹdọhọde ke ini emi mîbiatke ibet Jehovah, emi idiyakke isọp idụk mfịna, edi iyada odudu ye ini nnyịn ikwọrọ ikọ.—Mark 13:10; Utom 5:29.

¹² Se inemede emi owụt ke ana isụk ibuot inọ Abasi ke kpukpru n̄kpọ. Nnyịn itie ibet ini emi kpukpru owo ke isọn̄ ẹdisụkde ibuot inọ Jehovah Abasi. (1 Cor. 15:27, 28) Jehovah ọyọdiọn̄ kpukpru mbon emi ẹdade enye nte Andikara enyọn̄ ye isọn̄, ẹnyụn̄ ẹnyịmede ndisụk ibuot nnọ enye ke nsinsi nsinsi!