Se Nsụkibuot Nnọ Abasi Oyomde Oto Nnyịn

“Ẹsụk idem ndien ẹnọ Abasi.”—JAMES 4:7.

1. Nso ke ẹkeme nditịn̄ mban̄a orụk Abasi emi nnyịn ikponode?

NSO utịbe utịbe Abasi ke Jehovah edi ntem! Inyeneke mbiet, inyeneke ubọkn̄ka, inyeneke udomo, inyeneke mbiet ke ata ediwak usụn̄! Enye edi Ata Edikon̄, kpa Andikara Ekondo emi enyenede ata ofụri odudu. Enye odu ke nsinsi nsinsi, okpon ke ubọn̄ tutu owo baba kiet ikemeke ndikụt enye nnyụn̄ ndu uwem. (Exodus 33:20; Rome 16:26) Enye inyeneke adan̄a ke odudu ye ifiọk, edi ata mfọnmma ke unenikpe, onyụn̄ edi ata mfọnmma uwụtn̄kpọ ima. Enye edi Andibot nnyịn, Ebiereikpe nnyịn, Owụk-ewụhọ nnyịn, ye Edidem nnyịn. Kpukpru nti edinọ ye kpukpru ẹnọ eke ẹfọnde ẹma ẹto enye.—Psalm 100:3; Isaiah 33:22; James 1:17.

2. Nsụkibuot nnọ Abasi abuana nso mme n̄kpọ?

² Ke ikerede iban̄a kpukpru akpanikọ ẹmi, eyịghe baba kiet idụhe kaban̄a mbiomo nnyịn ndidu ke nsụkibuot nnọ enye. Edi nso ke emi abuana ọnọ nnyịn? Ata ediwak n̄kpọ. Sia nnyịn ke idem nnyịn mîkemeke ndikụt Jehovah Abasi, nsụkibuot nnọ enye abuana nditiene ndausụn̄ ubieresịt oro ẹma ẹkenọ ukpep, ndidiana kiet ye esop Abasi eke isọn̄, ndidiọn̄ọ mme odudu ukara ererimbot, ye edikpono edumbet itieibuot ke esịt ubon.

Ndinyene Eti Ubieresịt

3. Man inyene eti ubieresịt, nnyịn inyene ndinịm nso orụk ukpan?

³ Man inyene eti ubieresịt, ana nnyịn idu ke nsụkibuot inọ n̄kpọ oro owo mîkemeke ndinyenyịk owo anam—oro edi, mme ibet m̀mê mme edumbet oro mme owo mîkemeke ndinyenyịk owo ẹnam. Ke uwụtn̄kpọ, ọyọhọ ibet duop eke Ibet Duop, oro ẹkenọde ndikpan edisịn esịt ke n̄kpọ owo, ikedịghe se mme andikara ẹdide owo ẹkenyịkde-nyịk owo ndinịm. Nte ededi, emi ọsọn̄ọ nte ke Ibet Duop oto Abasi, koro idụhe n̄ka unamibet eke owo ndomokiet emi akpanamde ibet oro owo mîkemeke ndinyenyịk owo ndinịm ebe ke ndinọ ufen edieke ẹbiatde. Ebede ke ibet emi, Jehovah Abasi ama ọnọ eyen Israel kiet kiet mbiomo edidi bodisi nnọ idemesie—edieke enye oyomde ndinyene eti ubieresịt. (Exodus 20:17) Kpasụk ntre, ke otu ubọkutom obụkidem oro ekemede ndikpan owo ndida Obio Ubọn̄ Abasi nnyene edi “ufụp” ye “udu”—mme edinam oro mme ebiereikpe ẹdide owo mîkemeke ndinọ ufen. (Galatia 5:19-21) Edi man inyene eti ubieresit, ana nnyịn ifep mmọemi.

4. Man inyene eti ubieresịt, mme edumbet Bible ewe ke ana nnyịn ida idu uwem?

⁴ Ih, ana nnyịn ida mme edumbet Bible idu uwem. Ẹkeme nditan̄ mme utọ edumbet oro ndọn̄ ọtọkiet ke mbet iba oro Jesus Christ eketịn̄de ke ibọrọ mbụme oro ẹkebụpde m̀mê ewe edi n̄kponn̄kan ibet ke ibet Moses. “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo. . . . Ma mbọhọidụn̄ fo nte idemfo.” (Matthew 22:36-40) Mme ikọ Jesus oro ẹwetde ke Matthew 7:12 ẹwụt n̄kpọ oro abuanade ke ọyọhọ ibet iba eke mme ibet ẹmi: “Ntre se ededi mbufo ẹyomde owo ẹnam ye mbufo, ẹnam kpa ntre ye mmọ; koro emi edi ibet ye mme prọfet.”

5. Didie ke nnyịn ikeme ndinyene eti itie ebuana ye Jehovah Abasi?

⁵ Ana nnyịn inam se nnyịn idiọn̄ọde ite ke enen inyụn̄ ifep ndinam se nnyịn idiọn̄ọde ite ke akwan̄a, edide mbon efen ẹkụt m̀mê ikwe. Oro edi ntre idem okposụkedi ekemede ndidi owo idinọhọ nnyịn ufen ke nditre ndinam se akpanade nnyịn inam m̀mê ndinam se mîkpanaha nnyịn inam. Enye ọwọrọ ndinyene eti itie ebuana ye Ete nnyịn eke heaven, inyenede ke ekikere ntọt oro apostle Paul ọnọde ke Mme Hebrew 4:13 ete: “Baba n̄kpọ kiet eke odịbede Enye ke enyịn inyụn̄ idụhe; edi kpukpru n̄kpọ ẹna iferi ye ata in̄wan̄în̄wan̄ ke enyịn Abasi, emi nnyịn isan̄ade n̄kpọ ye Enye.” Ndisọn̄ọ nyire ke ndinam se inende eyen̄wam nnyịn ndin̄wana mbiọn̄ọ n̄kûkan Devil, ndibiọn̄ọ mme mfịghe ererimbot, inyụn̄ in̄wana ye ndammana udọn̄ ibụk.—Men Ephesus 6:11 domo.

Nsụkibuot nnọ Esop Abasi

6. Nso usụn̄ unyene nneme ke Jehovah akada anam n̄kpọ mbemiso eyo mme Christian?

⁶ Jehovah Abasi isanake nnyịn iyak ikpọn̄ ofụri ofụri ndisịm ubiere ke idem nnyịn nte nnyịn ididade mme edumbet Bible isịn ke edinam ke uwem nnyịn. Ọtọn̄ọde ke ntọn̄ọ mbụk ubonowo, Abasi amada ubonowo nte usụn̄ unyene nneme. Ntem, Adam ekedi anditịn̄ ikọ ke ibuot Abasi nnọ Eve. Ẹkenọ Adam ewụhọ aban̄ade mfri eto oro ẹkekpande mbemiso ẹkebotde Eve, ntre anaedi Adam ama etịn̄ ọnọ Eve se Abasi okoyomde oto enye. (Genesis 2:16-23) Noah ekedi prọfet Abasi ọnọ ubon esie ye ererimbot oro okodude mbemiso Ukwọ. (Genesis 6:13; 2 Peter 2:5) Abraham ekedi anditịn̄ ikọ ke ibuot Abasi nnọ ubon esie. (Genesis 18:19) Moses ekedi prọfet ye usụn̄ oro Abasi akadade enyene nneme ye idụt Israel. (Exodus 3:15, 16; 19:3, 7) Ke enye ama akakpa, tutu osụhọde osịm John Andinịm Owo Baptism, Abasi ama ada ediwak prọfet, mme oku, ye ndidem nditịn̄ uduak esie nnọ ikọt esie.

7, 8. (a) Ye edidi Messiah, anie ke ẹkeda nte anditịn̄ ikọ ke ibuot Abasi? (b) Nso ke nsụkibuot nnọ Abasi oyom oto Mme Ntiense Jehovah mfịn?

⁷ Ye edidi Messiah, Jesus Christ, Abasi ama ada enye ye mme n̄kpet n̄kpet apostle ye mme mbet esie ndinam n̄kpọ nte mme anditịn̄ ikọ ke ibuot Esie. Nte ini akade, mme anam-akpanikọ anditiene Jesus Christ emi ẹkeyetde aran akana ẹnam n̄kpọ nte “asan̄autom emi anamde akpanikọ, onyụn̄ enyenede ọniọn̄” ke nditịn̄ nnọ ikọt Jehovah mban̄a nte ẹkpedade mme edumbet Bible ẹsịn ke edinam ke uwem mmọ. Nsụkibuot nnọ Abasi ọwọrọ ndidiọn̄ọ n̄kpọutom oro Jehovah Abasi adade anam n̄kpọ.—Matthew 24:45-47; Ephesus 4:11-14.

⁸ Akpanikọ ẹwụt mfịn nte ke “asan̄autom emi anamde akpanikọ, onyụn̄ enyenede ọniọn̄” abuana ye Mme Ntiense Jehovah ndien Otu Ukara eke Mme Ntiense ẹmi ada ke ibuot esie. Otu oro, ndien, emek mme esenyịn ọdọn̄ ke nsio nsio ifetutom—utọ nte mbiowo ye mme andida ke ibuot oro ẹsan̄ade-san̄a—ndinọ utom ndausụn̄ ke n̄kann̄kụk. Nsụkibuot nnọ Abasi oyom Ntiense kiet kiet oro ama akayak idem ọnọ odu ke nsụkibuot ọnọ mme esenyịn ẹmi ke n̄kemuyo ye Mme Hebrew 13:17: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọemi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.”

Ndibọ Ntụnọ

9. Nso ke nsụkibuot nnọ Abasi esiwak ndibuana?

⁹ Nsụkibuot nnọ Abasi esiwak ndidi n̄kpọ oro aban̄ade edibọ ntụnọ nto mbon oro ẹnamde utom nte mme esenyịn. Edieke nnyịn mînọhọ idem nnyịn ntụnọ oro eyomde kpukpru ini, ekeme ndiyom mbon oro ẹnyenede ifiọk ye odudu ndinam ntre ẹnọ nnyịn item ye ntụnọ, utọ nte mbiowo esop nnyịn. Ndinyịme utọ item oro edi edinam oro owụtde eti ibuot.—Mme N̄ke 12:15; 19:20.

10. Nso mbiomo ke mbon oro ẹnọde ntụnọ ẹnyene?

¹⁰ Nte an̄wan̄ade, ana mbiowo ẹmi ẹnọde ntụnọ ke idemmọ ẹdi uwụtn̄kpọ ke nsụkibuot nnọ Abasi. Didie? Nte N̄wed Mbon Galatia 6:1 ọdọhọde, idịghe mmọ ndinyene eti ido unọ item ikpọn̄îkpọn̄ edi ana mmọ ẹdi nti uwụtn̄kpọ: “Nditọete, edieke ẹkụtde owo ke ndudue ekededi, mbufo, ẹmi ẹdide mbon spirit, ẹsan̄a ke spirit ifụre ifụre ido, ẹda enye ẹfiak ẹsịn ke itie; nyụn̄ kpeme idem, mbak ẹdidomo fi n̄ko.” Ke nditịn̄ ke usụn̄ efen, ana item ebiowo asan̄a ekekem ye uwụtn̄kpọ esie. Emi odu ke n̄kemuyo ye item ẹnọde ke 2 Timothy 2:24, 25 ye ke Titus 1:9. Ih, ana mbon oro ẹnọde nsuannọ m̀mê nnen̄ede, ẹnen̄ede ẹdu ke ukpeme ẹkûdede ẹsọn̄ ido. Mmọ kpukpru ini ẹkpenyene nditie sụn̄sụn̄, ẹfọn ido, edi kpa ye oro ẹnyene iwụk ke ndimụm mme edumbet oro ẹdude ke Ikọ Abasi n̄kama. Mmọ ẹkpenyene ndidi mme andikpan̄ utọn̄ oro mîtụhọke ke ikpe, ẹnọde mbon oro ẹkpade mba ẹnyụn̄ ẹbiomde edidobi mbiomo nduọkodudu.—Men Matthew 11:28-30 domo.

Nsụkibuot nnọ Mme Ẹnyene Odudu Ẹmi Ẹkarade

11. Nso ke ẹyom ẹto mme Christian ke ebuana mmọ ye mme odudu ukara?

¹¹ Nsụkibuot nnọ Abasi n̄ko oyom nnyịn ikop uyo inọ mme enyene-odudu ẹmi ẹkarade. Ẹnọ nnyịn item ke N̄wed Mbon Rome 13:1 ete: “Kpukpru owo ẹsụk idem ẹnọ mme enyene-odudu ẹmi ẹkarade; koro odudu idụhe ke mîtoho Abasi; ndien mme enyene-odudu ẹmi ẹdude kemi, edi Abasi okonịm mmọ.” Mme ikọ ẹmi, ke otu mme n̄kpọ eken, oyom nnyịn inịm mme ibet uwat inyụn̄ ikpe tax ye utomo ke ofụri esịt, nte apostle Paul owụtde ke N̄wed Mbon Rome 13:7.

12. Ke nso usụn̄ ke nsụkibuot nnyịn nnọ Ukara edi ukeuke?

¹² Nte an̄wan̄ade, nte ededi, kpukpru utọ nsụkibuot oro nnọ Ukara anaedi ukeuke. Ana nnyịn kpukpru ini inyene edumbet oro Jesus Christ ọkọnọde ke ekikere nte ẹwetde ke Matthew 22:21 ete: “Ẹnọ Caesar ndien n̄kpọ eke enyenede Caesar; ẹnyụn̄ ẹnọ Abasi n̄kpọ eke enyenede Abasi.” Ikọ idakisọn̄ ke N̄wed Mbon Rome 13:1 ke Oxford NIV [New International Version] Scofield Study Bible owụt ete: “Emi iwọrọke ite ke ana ẹnịm mme ewụhọ oro mîfọnke m̀mê oro ẹtuahade ye edu Christian. Ke mme utọ idaha ntre edi mbiomo esie ndikop uyo Abasi n̄kan eke owo (Utom 5:29; cp. Dan. 3:16-18; 6:10ff).”

Nsụkibuot nnọ Abasi ke Esịt Ubon

13. Nsụkibuot nnọ Abasi ke esịt ubon oyom nso oto mme andibuana?

¹³ Ke esịt ubon, ebe ye ete anam n̄kpọ nte ibuot. Emi oyom ibanndọ ẹnam item oro ẹnọde ke N̄wed Mbon Ephesus 5:22, 23 ete: “Iban, ẹsụk idem ẹnọ mme ebe mbufo, nte ẹnam ẹnọ Ọbọn̄. Koro ebe edi ibuot ọnọ n̄wan, kpa nte Christ edide Ibuot ọnọ ufọk Abasi.”a Amaedi nditọ, mmọ inamke ewụhọ idemmọ edi ẹnyene mbiomo ndisụk ibuot nnọ ete ye eka nte usụn̄ nsụkibuot nnọ Abasi, nte Paul anamde an̄wan̄a ke N̄wed Mbon Ephesus 6:1-3 ete: “Nditọ, ẹkop uyo mme ete ye mme eka mbufo ke Ọbọn̄; koro emi enende. Kpono usọ ye uka (emi edi akpa ibet eke asan̄ade ye un̄wọn̄ọ), man ọkpọfọn ye afo, afo okponyụn̄ odu uwem ebịghi ke isọn̄.”

14. Nsụkibuot nnọ Abasi oyom nso oto mme ibuotufọk?

¹⁴ Ke akpanikọ, esinam edi mmemmem n̄kpọ ọnọ ibanndọ ye nditọ ndiwụt utọ nsụkibuot nnọ Abasi oro ke ini mme ebendọ ye mme ete ke idemmọ ẹwụtde nsụkibuot nnọ Abasi. Mmọ ẹnam emi ke ndikama itieibuot mmọ ke ndinam mme edumbet Bible, utọ nte mmọ oro ẹkụtde ke N̄wed Mbon Ephesus 5:28, 29 ye 6:4: “Kpa ntre ke mme ebe ẹkpema iban mmọ nte idemmọ. Owo eke amade n̄wan esie ama idemesie: koro akananam baba owo kiet isuaha obụkidem esie, edi ọbọbọk enye, onyụn̄ otịm ekpeme enye, kpa nte Christ anamde ye ufọk Abasi.” “Mme ete, ẹkûfiomo nditọ mbufo; edi ẹkama mmọ ke ntụnọ ye item Ọbon̄.”

Mme N̄kpọ Un̄wam ke Ndiwụt Nsụkibuot nnọ Abasi

15. Ewe mbun̄wụm spirit edin̄wam nnyịn ndiwụt nsukibuot nnọ Abasi?

¹⁵ Nso idin̄wam nnyịn ndiwụt nsụkibuot nnọ Abasi ke nsio nsio ikpehe ẹmi? Akpa, odu ima unana ibụk—ima oro inyenede inọ Jehovah Abasi ye mbon oro ẹnịmde ndise mban̄a nnyịn. Ẹsian nnyịn ke 1 John 5:3 ete: “Ndima Abasi edi emi, ete, nnyịn inịm mbet Esie; ndien mbet Esie ibiakke owo idem.” Jesus ama etịn̄ ukem ikọ oro ke John 14:15 ete: “Mbufo ẹma ẹma Mi, ẹyenịm mbet Mi.” Ke akpanikọ, ima—akakan mfri spirit—eyen̄wam nnyịn ndiwụt esịtekọm mban̄a kpukpru n̄kpọ oro Jehovah anamde ọnọ nnyịn ndien ke ntem eyen̄wam nnyịn ndiwụt nsụkibuot nnọ Abasi.—Galatia 5:22.

16. Nso un̄wam ke mbak Abasi enyene ke ndiwụt nsụkibuot nnọ Abasi?

¹⁶ Ọyọhọ iba, edi mbak Abasi. Ẹdinyene mbak man idiyat Jehovah Abasi esịt eyen̄wam nnyịn koro enye ọwọrọ “ndisua idiọk.” (Mme N̄ke 8:13) Nte eyịghe mîdụhe, mbak ediyat Jehovah esịt eyekpeme nnyịn osio ke ndikan̄ mbuọtidem ke ntak uten̄e owo enyịn. Enye n̄ko eyen̄wam nnyịn ndinam item Abasi inamke n̄kpọ m̀mê nso mme mfịna ke ana ikan. N̄ko-n̄ko, enye eyekpeme nnyịn osio ke ediduọ ndụk mme idomo m̀mê mme ntụhọ unam idiọk. N̄wed Abasi owụt nte ke ekedi mbak enyenede ọnọ Jehovah akanam Abraham odomo ndiwa edima eyen esie Isaac nte uwa, ndien ekedi mbak ediyat Jehovah esịt akanam Joseph okụt unen ke ndibiọn̄ọ mme oburobụt edinam n̄wan Potiphar.—Genesis 22:12; 39:9.

17. Nso udeme ke mbuọtidem enyene ke ediwụt nsụkibuot nnọ Abasi?

¹⁷ Ọyọhọ un̄wam ita edi mbuọtidem ke Jehovah Abasi. Mbuọtidem eyen̄wam nnyịn ndinam item oro ẹnọde ke Mme N̄ke 3:5, 6: “Buọt idemfo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo onịm.” Mbuọtidem eyen̄wam nnyịn akpan akpan ke ini etiede nte nnyịn ikụt ndutụhọ nte mîdotke m̀mê ke ini nnyịn ikerede ke ẹnam n̄kpọ ye nnyịn ke asari ke ntak orụk m̀mê idụt nnyịn m̀mê ke ntak utọk ye owo. Ndusụk owo ẹkeme n̄ko ndikere nte ke ẹfụmi mmimọ ke ini owo mîtoroke mmọ ndinam utom nte ebiowo m̀mê asan̄autom unamutom. Edieke nnyịn inyenede mbuọtidem, nnyịn iyebet Jehovah ndinen̄ede mme n̄kpọ mbon ke ekemini esie. Kan̄a kemi ekeme ndiyom nnyịn ikọri ime ime ediyọ.—Eseme 3:26.

18. Nso edi ọyọhọ un̄wam inan̄ ke nnyịn ndiwụt nsụkibuot nnọ Abasi?

¹⁸ Ọyọhọ un̄wam inan̄ edi nsụhọdeidem. Owo oro osụhọrede idem inyeneke mfịna ndomokiet ke ndiwụt nsụkibuot nnọ Abasi koro ‘enye ke nsụhọde esịt abat ete, owo efen ọfọn akan imọ.’ Owo oro osụhọrede idem onyịme ndinịm idemesie nte “enyeemi ekpride akan.” (Philippi 2:2-4; Luke 9:48) Edi owo ntan̄idem asasua ndidu ke nsụkibuot onyụn̄ ayat esịt aban̄a emi. Ẹsidọhọ ẹte ke utọ owo oro eyekụt nsobo ke itoro akan ndinyan ubọk n̄wụt ndudue.

19. Nso eti uwụtn̄kpọ nsụhọdeidem ke akani etieibuot Watch Tower Society ọkọnọ?

¹⁹ Inikiet ko Joseph Rutherford, udiana etieibuot Watch Tower Bible and Tract Society ama ọnọ eti uwụtn̄kpọ nsụhọdeidem ye nsụkibuot nnọ Abasi. Ke ini Hitler akakpande utom Mme Ntiense Jehovah ke Germany, nditọete do ẹma ẹwet ẹbụp enye se mmimọ ikpanamde kaban̄a ukpan oro ẹdoride ke mme mbonoesop ye utom ukwọrọikọ mmimọ. Enye ama eneme n̄kpọ emi ọnọ mbonufọk Bethel onyụn̄ onyịme in̄wan̄în̄wan̄ ete ke imọ ifiọkke se ikpọbọrọde nditọete Germany, akpan akpan ke ẹkerede ẹban̄a n̄kpọsọn̄ ufen oro ẹkebuanade. Enye ama ọdọhọ ete edieke owo ekededi ọfiọkde se ẹkpetịn̄de ẹnọ mmọ, ke imọ iyedat esịt ndikop. Nso utọ edu nsụhọdeidem!b

Mme Ufọn Ẹtode Ediwụt Nsụkibuot nnọ Abasi

20. Nso mme edidiọn̄ ẹsụn̄ọ ẹto ediwụt nsụkibuot nnọ Abasi?

²⁰ Ẹkeme ndibụp nte enende ẹte, Nso idi mme ufọn ẹbọde ẹto ediwụt nsụkibuot nnọ Abasi? Ke akpanikọ, ediwak. Nnyịn imọbọhọ editịmede esịt ye edikpu emi mbon oro ẹnamde n̄kpọ ye edu nda-ke-idem ẹkụtde. Nnyịn imadara eti itie ebuana ye Jehovah Abasi. Nnyịn imenyene mfọnn̄kan itie ebuana ye nditọete Christian nnyịn. N̄ko-n̄ko, ebede ke ndikama idem nnyịn nte ekemde ye ibet, nnyịn imefep ndinyene mme mfịna oro mîdotke ye mme enyene-odudu ẹmi ẹkarade. Nnyịn n̄ko imadara inem inem uwem ubon nte mme ebe ye ibanndọ, nte mme ete ye eka ye nditọ. Akande oro, ke ndiwụt nsụkibuot nnọ Abasi, nnyịn imanam n̄kpọ ke n̄kemuyo ye item oro ẹnọde ke Mme N̄ke 27:11 ete: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”

[Mme Ikọ idakisọn̄]

Mme Mbụme Ndụn̄ọde

◻ Mmanie ke Abasi akada nte usụn̄ unyene nneme, ndien nso isọn ke mme asan̄autom esie ẹkekama mmọ?

◻ Ke nso nsio nsio itie ebuana ke nsụkibuot nnọ Abasi abuana?

◻ Mme edu ewe ẹdin̄wam nnyịn ndiwụt nsụkibuot nnọ Abasi?

◻ Nsụkibuot nnọ Abasi osụn̄ọ ke mme edidiọn̄ ewe?

[Ndise ke page 16]

Abasi akada ndutịm temple eke Jerusalem nditịn̄ uduak esie nnọ ikọt esie

[Mme ndise ke page 18]

Mme ikpehe oro nnyịn ikemede ndiwụt nsụkibuot nnọ Abasi