Ẹdọhọ Mme Andikụre Ufọkn̄wed Gilead Ẹkọri Nti Ukeme Unyene Nneme

KE SUNDAY, March 4, 1990 se ibede owo 4,100 ẹma ẹyọhọ Ufọkmbono Mme Ntiense Jehovah ke Jersey City kaban̄a edinam ukụre ufọkn̄wed eke nditọ ufọkn̄wed ọyọhọ otu 88 eke Watchtower Bible School of Gilead. Owo 24 ẹmi ẹbede ẹwọrọ mi ẹketo idụt 6 ẹdi ndien idahaemi ẹnọ mmọ ẹka idụt 13 ke ofụri ofụri.

Ndutịm ọkọtọn̄ọ ke n̄kanika 10 usenubọk. Ke ẹma ẹkekwọ ikwọ ẹkụre, George Gangas, emi idahaemi ebede isua 90 ke emana onyụn̄ edide owo Otu Ukara, ama eberede edinam oro ye akam ofụri esịt oro ẹbọn̄de ẹnọ Jehovah. Ke emi ebede, etieibuot-okpokoro, C. W. Barber emi n̄ko edide owo Otu Ukara, onyụn̄ edide andikokụre ufọkn̄wed Gilead ọyọhọ otu 26, ama eneme ibio ibio aban̄a ndusụk usọp usọp ukpụhọde oro ẹdade itie ke ererimbot onyụn̄ ọdọhọ ete: “Akananam utịbe ifet idụhe ntem ndidi mme ntiense nnọ akakan idaha Jehovah ye edinen ido esie.” Ekem enye ama akaiso ndikot nsio nsio etịn̄ikọ ke edinam usenubọk oro.

Vernon Wisegarver, andibuana ke Kọmiti Itie Umịn̄-N̄wed ke Brooklyn, ama emek ibuotikọ emi “Ẹnyene Usọ ke Utom Mbufo.” Ke adade uwụtn̄kpọ odomutịm obio-in̄wan̄ oro odomde ọkpọsọn̄ n̄kpọkọbi emi edide, ke ẹmende ẹtebe ke ukwak ubom, esinyan̄a uwem kpukpru mbon oro ẹdude ke esịt nsụn̄ikan̄ ke ini oyobio, enye ekemen mme andikụre ufọkn̄wed Gilead odomo ye odomutịm oro. Ke ndikpep mme owo Bible, ẹyen̄wam mmọ ẹdom n̄kpọkọbi unyan̄a uwem edide mme edu Abasi, ẹdade mme ukeme oro mmọ ẹkọride ke ukpep oro mmọ ẹkebọde ke ufọkn̄wed Gilead ẹnam n̄kpọ. Enye ama esịn udọn̄ ọnọ mme andikụre ufọkn̄wed oro ndikaiso mban mme ukeme unọ ukpep mmọ ọsọp nnyụn̄ nsọn̄ọ nda ke iso n̄kpon n̄kan kpukpru Ndidem nte “mme anamutom ẹmi ẹnyenede usọ.”

Ekem, John Barr, owo Otu Ukara, ama etịn̄ ikọ ke ibuotikọ emi “Ẹtabi, Ẹnyụn̄ Ẹse Nte Jehovah Ọfọnde.” Utịn̄ikọ esie ọkọkọn̄ọ ke Psalm 34:8 emi ọdọhọde ete: “O mbufo ẹtabi, ẹnyụn̄ ẹse nte Jehovah ọfọnde: ọfọfọn ọnọ owo eke eberede idem ye enye.” Enye ama ọnọ mmọ item ete: “Ẹtabi kpukpru n̄kpọ ẹse ke utom isụn̄utom mbufo. Ẹdomo kpukpru n̄kpọ ẹse. Ẹkûnyene ndịk ẹban̄a n̄kpọ. Ndien mbufo ẹyekeme ndikụt mfọnido Jehovah ke usụn̄ oro akananam mbufo mîkwe. Ẹkûdedei ẹtie odusat odusat. Ẹkûdedei ẹdọhọ ẹte, ‘Ami mmaha enyeemi.’ Ẹtabi enye ẹse.”

Charles Woody, andibuana ke Kọmiti Itie Utịmutom ke Brooklyn, ama etịn̄ ikọ ke ibuotikọ oro enye ekemekde ete, “Ndinyene Ekikere oro Adade Ukem Ukem Mban̄a Idem Nnyịn.” Enye ọkọdọhọ ete: “Nnyịn imesikop inem ndidu ye mbon oro ẹnyenede ekikere oro adade ukem ukem ẹban̄a idemmọ, ẹmi mîsitieneke usụn̄ idemmọ kpukpru ini, ẹmi ẹsisọpde ẹtoro ẹnyụn̄ ẹnam mbon en̄wen ẹkọri, ye mbon oro, okposụkedi ẹnyenede ifiọk, mîsiyakke mbon efen ẹkere ẹte ke mmimọ inyeneke.” Enye ama akaiso ọdọhọ ete: “Nte mme isụn̄utom, mbufo ẹyeyom ndidụri mme owo nnọ akpanikọ, idịghe ndibebịn mmọ. Edu nsụhọdeidem mbufo edidi ọsọn̄urua n̄kpọ ke ndin̄wam mbufo ẹnam emi.” etịn̄ ikọ ke ibuotikọ emi “Mme Udiana Mbụk Uwem, Nso Ke Mmọ Ẹdisian Nnyịn?” Enye ama ọtọn̄ọ ke ndidọhọ ete: “Mfịn mbufo ẹmetọn̄ọ obufa mbụk ke uwem mbufo. Nso ke mbufo ẹdiwet ke obufa mbụk uwem emi tọn̄ọde kemi tutu osịm ini iso?” Enye ama eti mmọ ete: “Kpukpru n̄kpọ oro mbufo ẹnamde ekpenyene ndida ukpono ye ubọn̄ nsọk Jehovah,” onyụn̄ adian ete: “Ẹkụt ẹte ke mme ubiere mbufo ẹkọn̄ọ ke Ikọ Abasi. Ẹti Mme N̄ke 3:7 emi ọdọhọde ete: ‘Kûse idemfo ke ọfiọkn̄kpọ.’ Ẹnam akpanikọ ke utom oro ẹdọn̄de mbufo.” Enye ama eberi ke ndidọhọ ete: “Nnyịn imenyene mbuọtidem ite ke mbufo tutu amama ididaha ediwet mbụk uwem mbufo ikosịm utịt, nte ke mbufo ẹyedu uwem ke nsinsi.”

Ekem, Jack Redford, kiet ke otu mme andikpep ke ufọkn̄wed oro, ama eteme mme andikụre ufọkn̄wed oro ete: “Ẹdi Mme Odu-Uwem Uwa.” Enye ọkọtọn̄ọ ke ndidọhọ ete: “Utom isụn̄utom edi uwem n̄waidem. . . . Nnyịn imama mbufo ke ntak edu n̄waidem mbufo.” Ke okotde oto N̄wed Mbon Philippi 2:17, ke ebiet apostle Paul ọkọdọhọde ete ke ẹma ẹn̄wan̄a imọ ẹduọk nte edin̄wọn̄ uwa, emi ọwọrọde ete ke enye ama onyịme ndiyak idem nnọ nte odu uwem uwa, enye ama obụp ete: “Edi didie ke mme isụn̄utom ẹsiwak nditie nte edin̄wọn̄ uwa?” Enye ndien ama ọnọ ifiọkutom iba ẹmi aban̄ade mme isụn̄utom ẹmi ẹkeyakde idemmọ ẹnọ ke udomo oro ebede se ẹkeyomde. Isụn̄utom kiet ama ada ubọk esie otịm itiat 16,000, onyụn̄ ọbọp akpa Ufọkmbono Obio Ubọn̄ ke idụt oro ẹkenọde enye akanam utom. Ifiọkutom enye eken akaban̄a eyenete an̄wan emi akasan̄ade ye ebe esie ẹka esịt obio-in̄wan̄, ke ebiet emi mme idaha udu uwem ẹketiede ata akani akani. Kpukpru nditọeka iban obio oro ẹma ẹwụt esịtekọm ẹnọ enye koro mmọ ẹma ẹdiọn̄ọ ẹte ke enye ama ayak idem esie ofụri ofụri ọnọ nte ‘odu uwem uwa.’ Edi ekem etịn̄ikọ oro ama eti nditọ ufọkn̄wed oro ete ke uwa isinyeneke ufọn edieke enye mîsan̄ake ye n̄kopitem. Ke adade mbụk Edidem Saul ye mbon Amalek, enye ama eteme mmọ ete: “Kpukpru ini ẹti ẹte ke n̄kopitem ọfọn akan uwa. Ẹkûdedei ẹfan̄a mfan̄a ye Jehovah. Kpukpru ini ẹn̄wana ndinam se enye ọdọhọde mbufo ẹnam.”

Etieibuot-okpokoro ndien ama okot andikpep en̄wen ke ufọkn̄wed oro, kpa Ulysses Glass. Brọda Glass ama ọtọn̄ọ ke ndidọhọ ete: “Nditọ ufọkn̄wed ọyọhọ otu 88 ekedi onyụn̄ edi otu inemesịt. Otu nditọ ufọkn̄wed eken ẹma ẹkop inemesịt n̄ko. Ntak, ndien, inemesịt mbufo ọwọrọde ada-a?” Enye ama owụt ete ke inemesịt “idịghe utịt mbuba edi edi utịp otode nti utom. Edikam nsosịm do esida n̄kpọ eyenutom edi.” Enye ndien ama okot oto ewetn̄wed oro uwem esie okokpụhọrede ke ndikụt ikọ emi: “Edikụt unen unam isan̄, idịghe ebiet oro ẹkade.” Ewetn̄wed oro ama ọn̄wọn̄ọ ete ke imọ iyetre ndibat nte ke inemesịt ọkọn̄ọ ke edisịm mme ebiet oro ikade utu ke ndida ofụri uwem imọ nte isan̄ oro akade-ka iso. Enye ọkọdọhọ ete, “Usụn̄ ndomokiet idụhe oro ẹsan̄ade ẹkenyene inemesịt, inemesịt edi usụn̄ oro.” Brọda Glass ndien ama etịn̄ ete ke otu nditọ ufọkn̄wed emi ẹdiọn̄ọ se ikọ emi ọwọrọde. Enye ama eberi ke ndinọ kpukpru nditọ ufọkn̄wed item ete: “Ẹkaiso ndisan̄a ke mmọn̄ nduọkodudu.’ Sededi mfịna oro mbufo ẹdisobode, inemesịt oro enyenede mbon oro ẹmade ẹnyụn̄ ẹten̄ede Jehovah akpakam akaiso ndidi eke mbufo.”

Ndien Karl Klein, owo Otu Ukara efen, ama ọnọ akpan utịn̄ikọ eke usenubọk oro, emi ekemekde ibuotikọ emi, “Ndikọri Ukeme Unyene Nneme Christian.” Enye ọkọtọn̄ọ ke nditi kpukpru owo nte ke Jehovah edi akakan ke otu kpukpru mme eneme nneme. Ikpọn̄îkpọn̄ edibon Eyen esie, kpa Logos, ke ẹkeda nte Etubom Etịn̄ikọ Jehovah, ndien enye ama etịn̄ uduak ye ntọt Abasi ọnọ edibotn̄kpọ eke isọn̄. Ke ini Jesus okodude ke isọn̄, otuowo ẹma ẹkop n̄kpaidem ke usụn̄ nte enye ekekpepde n̄kpọ. Akananam mmọ ikokopke owo etịn̄de ikọ nte enye. Ke Matthew 28:19, 20, Jesus ama esịn udọn̄ ọnọ mme mbet esie ndidi nti mme enyene nneme ke ndiwọrọ n̄ka ke ererimbot nnyụn̄ n̄kekpep mbon en̄wen ewụhọ esie nnyụn̄ nnam mmọ ẹdi mbet n̄ko.

Edikem, ke etịn̄de ikọ nnennen ọnọ mme isụn̄utom ini iso emi, Brọda Klein ama ọdọhọ ete ke mme isụn̄utom ẹnyene usụn̄ inan̄ ndikere mban̄a ke ndikọri nti ukeme unyene nneme: ke ufọt ebe ye n̄wan, ye mbon en̄wen ke ufọk isụn̄utom, ye mbon oro ẹdude ke n̄kọk itieutom emi ẹnọde mmọ ẹkenam utom, ye mbon oro mmọ ẹsobode ke an̄wautom. Brọda Klein ọkọdọhọ ete, “Mbufo ẹtọn̄ọ ndineme nneme mbemiso ẹkûbọrede inua mbufo. Eduuwem ye ukamaidem ẹsitịn̄ ikọ ọnọ enyeneufọk.” Enye ndien ama ọnọ ediwak uwụtn̄kpọ ndisọn̄ọ ikọ esie onyụn̄ eberi ye item emi ete: “Ẹsụhọde idem. Ẹnam usụn̄ nneme ẹna in̄wan̄. Ẹn̄wana ndidi nti mme eneme nneme.”

Ke ẹma ẹkekot etop ekọm ẹma, etieibuot-okpokoro ama ayak n̄wed itoro esịn eyen ufọkn̄wed kiet kiet ke ubọk. Ekem otu nditọ ufọkn̄wed oro ẹma ẹkot Ubiere oro mmọ ẹkewetde ẹnọ ẹsọk Otu Ukara ye mbonufọk Bethel, emi Paul Angerville otode Guadeloupe okokotde.

Ikpehe edinam uwemeyo ọkọtọn̄ọ ye ukpepn̄kpọ Enyọn̄-Ukpeme. Ke oro ebede, nditọ ufọkn̄wed oro ẹma ẹnam edinam oro ọkọnọde otuowo ifet ndikụt nte n̄kpọ eketiede ke ubet ukpepn̄kpọ mmọ, ndinyụn̄ n̄kụt mme mbono unọ idem inemesịt oro ẹkesinyenede ke ubet mmọ, nnyụn̄ n̄kop ediwak ifiọkutom an̄wautom mmọ tọn̄ọ nte ẹkedi ufọkn̄wed Gilead ọfiọn̄ ition ẹmi ẹkebede. Ke akpatre, ẹma ẹwụt ediye drama oro enyenede ibuotikọ emi Ndinam Se Inende ke Enyịn Jehovah. Edi mme asuanetop ẹmi ẹtode Esop Lyndhurst, New Jersey, ẹkewụt drama emi. Usen oro ama osịm utịt ye ikwọ ediberi, adianade ye akam oro Fred Franz, etieibuot N̄ka oro ọsọn̄de ke isua 96, ọkọbọn̄de.

[Ekebe ke page 27]

IDAHA NDITỌ UFỌKN̄WED

Ibat idụt oro mmọ ẹtode: 6

Ibat idụt oro ẹnọde mmọ ẹka: 13

Ibat nditọete oro mîdọhọ ndọ: 2

Ibat mme ọdọ-ndọ: 11

Ibat nditọ ufọkn̄wed: 24

Ukem mbahade isua emana: 32.7

Ukem mbahade isua ke akpanikọ: 14

Ukem mbahade isua ke utom uyọhọ-ini:9

[Ndise ke page 26]

Mme Andikụre Ufọkn̄wed Ọyọnọ Otu 88 eke Watchtower Bible School of Gilead

Ke udịm enyịn̄ ẹtienede mi, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.