Ntọt M’ọkwọrọ Obio Ubọn̄
N̄wan N̄ka Ido Ukpono Kiet ke Isua 25 ke Akpatre Ekpep Akpanikọ
BIBLE ama ebemiso etịn̄ ete ke “akwa otuowo” ẹmi ẹtode kpukpru idụt ẹyedi edituak ibuot ke temple eke spirit Jehovah. (Ediyarade 7:9) Emi ke ada itie mfịn, ndien nnyịn imadat esịt ndikụt nte ediwak owo, ye un̄wam akpanikọ Abasi, ke ntem ẹkịbede ẹbọhọ n̄kpọkọbi nsunsu ido ukpono. Mme ifiọkutom ẹtienede mi ẹnam emi an̄wan̄a.
◻ N̄wan kiet ke Rome, Italy, obụk ete: “Ọtọn̄ọde ke ini n̄kedide ekpri owo n̄kpon n̄kan udọn̄ mi ekedi ndikabade ndi n̄wan n̄ka ido ukpono, sia n̄kaduakde ke ofụri esịt mi ndinam n̄kpọ Abasi. Mma n̄keme ndiyọhọ udọn̄ mi ke n̄kedide isua 32 ke emana, ke December 8, 1960, ke ini n̄kadade akpa en̄wọn̄ọ nsụkibuot, edidi ubuene, ye itie unana ndọ mi. Utom mi ekedi ndise mban̄a n̄kpọ nte nditọ ubuene 30, ẹsịnede mbon oro ẹduọn̄ọde, ẹmi ẹkedide nditọakpa m̀mê nditọ mbon-n̄kpọkọbi ke uwemeyo ye okoneyo. Mma n̄kop uyụhọ ke utom emi.
“Ẹma ẹnyen̄e mbuọtidem mi ke isua iduop eke utom oro ẹbede ke ini utọk okotịbide ke itieutom oro. Mma nyịk ntak emi, edieke edide Abasi akada nnyịn usụn̄, enye akpayakde utọ utọk ye ndutịme oro ẹdu ke ufọk esie.”
N̄wan n̄ka ido ukpono oro ama enyene eyeneka an̄wan emi okodụn̄de ke France onyụn̄ edide kiet ke otu Mme Ntiense Jehovah. Enye ama ọnọ n̄wan n̄ka ido ukpono oro ikọ ntiense ebe ke leta onyụn̄ ọnọ New World Translation of the Holy Scriptures ẹsọk enye. N̄wan n̄ka ido ukpono oro obụk ete: “Ke isua 23 ẹma ẹkebe, oro ekedi akpa ini n̄kosobode ye Ikọ Abasi.” Ekedi adan̄aoro ke enye okonyịme ukpepn̄kpọ Bible ye Mme Ntiense Jehovah. Enye ọdọhọ ete: “Nte n̄kanamde n̄kọri ke ukpepn̄kpọ oro mma ndifiọk Jehovah Abasi ye mme n̄kpọ oro enye oyomde ọkọrọ ye mme utịbe utịbe edu esie. Ama ọdiọk mi ke idem etieti ke ini n̄kekpepde ke enye inyịmeke edikama ndisọi mbiet, sia itieutom oro ọkọyọhọde ye ndisọi mbiet ke kpukpru udomo ye orụk. Mma ndifiọk nte ke edieke nyomde ndinem Jehovah esịt, ami n̄kemeke ndidu ke ebiet oro. Ke ifịk ifịk utom isua 25 ẹbede nte n̄wan n̄ka ido ukpono, ami mma ndikụt akpanikọ, ntre ke ata n̄kpaidem mme esenyịn mi, ke October 1, 1985, mma nsịn n̄wed unyọn̄ mi.
“Ima ima nditọete mi iren ye iban ẹma ẹn̄wam mi ke n̄kan̄ eke spirit ye n̄kan̄ eke obụk. Ekọm enyene Jehovah ye esop esie, ami mma nna baptism ke August 30, 1986, nnyụn̄ ntọn̄ọ isan̄ usụn̄ oro adade osịm nsinsi uwem.”
Jehovah Ọdiọn̄ Udọn̄ Uyen Kiet Ndinam N̄kpọ Abasi
◻ Andikpep ufọkn̄wed kiet ke Brazil emi ekedide kiet ke otu Mme Ntiense Jehovah ama okụt ke adan̄aemi anamde edinen̄ede ke babru nditọ ufọkn̄wed nte ke eyen ufọkn̄wed kiet ọsọn̄de isua-14 ama ewet aban̄a udọn̄ esie ndikpep n̄kpọ efen efen mban̄a Abasi. Enye ama ọtọn̄ọ ukpepn̄kpọ Bible ye eyen ufọkn̄wed oro, edi nte n̄kaiferi emi akanamde n̄kọri, ubon esie edide mbon Catholic ẹma ẹkpan ukpepn̄kpọ oro ẹnyụn̄ ẹwai n̄wed esie. Uyen eyen ufọkn̄wed emi ama ọtọn̄ọ ndikpep Bible ke ini ẹwọrọde mbre ke ufọkn̄wed, edi ẹma ẹdifiọk emi. Ntre ẹma ẹkaiso ke ukpepn̄kpọ oro ebe ke leta. Ikebịghike, nte ededi, mbonubon ẹma ẹkụt mme leta esie ẹnyụn̄ ẹfọp mmọ. Ete ama ọtọn̄ọ ndinyịk enye ndidụk Mass. Enye ama esitiene aka edi ama esida Enyọn̄-Ukpeme kiet man okokot ke ini edinam oro, odịpde enye ke esịt ekpri n̄wed ufọkederi. Emi ama akaiso ke ọfiọn̄ itiokiet, tutu usen kiet enye ama edịbe ọwọrọ ke ufọk aka Ufọkmbono Obio Ubọn̄. Ke mbonoesop oro akade iso ete esie ama edida ke enyịnusụn̄ ọdọhọ nditọete ẹdọhọ eyenan̄wan esie ete ke imọ iyemia enye ke enye ọnyọn̄de edisịm ufọk. Ofụri ukeme ẹmi nditọete ẹkesịnde ndikọk ibuot ye enye ọkọwọrọ ikpîkpu.
Ndan̄nsiere, ye inemesịt ye iso imam, enye ama aka ndise nditọete. Enye ama owụt mmọ ediwak nde unan ke idemesie emi ete esie okosụk amiade enye okụre. Ndien, ntak emi enye okokopde inemesịt-e? Ke ama ọkọkpọn̄ Ufọkmbono Obio Ubọn̄, ete esie ama obụp ediwak owo ke obio, esịnede etubom obio oro, aban̄a mme ufọn ye idiọk ẹdude ke eyenan̄wan imọ ndidi kiet ke otu Mme Ntiense Jehovah. Etubom obio ama ọdọhọ enye ke Mme Ntiense ẹdi nti owo, ẹdot se ẹbuọtde idem. Enye ama adian do ete ke mmọ ẹnyene mfọnn̄kan ido uwem n̄ko nte ke ekpedi ata eti n̄kpọ ndinyene eyen enyenede mme utọ edumbet ẹmi ẹtịmde ẹkon̄ ẹkan eke mme uyen ke ofụri ofụri.
Kpa ye emi, n̄kaiferi emi ama ọbọ umia esie. Edi ete akasian enye ete ke ikamia enye koro enye ọkọkpọn̄de ufọk ye unana edibọ unyịme. Ndien enye ama ọdọhọ ke imọ iyefiak imia enye edieke enye ke ini ekededi editrede ndikpep Bible m̀mê ndidụk mme mbonoesop Mme Ntiense Jehovah! Eyenan̄wan oro idahaemi edi ifịk ifịk asuanetop ndien ndusụk mbonubon esie ke ẹwụt udọn̄ ke akpanikọ.
Edi akpanikọ, Jehovah esidiọn̄ n̄kpri owo oro ẹnyenede udọn̄ esịt-akpanikọ ndinam n̄kpọ esie, nte ifiọkutom emi owụtde.—Psalm 148:12, 13.