Ntọt M’ọkwọrọ Obio Ubọn̄

Mme Ntiense Jehovah Ẹkwọrọ Ikọ ke Ido Nneme ye Nti Utịp

ẸKEMEN akpanikọ Bible ẹwụt ediwak owo ke akpa ini ke ini kiet ke otu Mme Ntiense Jehovah ọkọkwọrọde ikọ ọnọ mmọ ke ido nneme. Ke emi Mme Ntiense etiene uwụtn̄kpọ Jesus Christ, emi ọkọkwọrọde ikọ ke ido nneme ọnọ n̄wan Samaria ke obube mmọn̄ ke ini enye ekedide ndikoi mmọn̄. (John, ibuot 4) Ke Edem Usiahautịn Africa, kiet ke otu Mme Ntiense Jehovah ama ọkwọrọ ikọ ke ido nneme ọnọ n̄wan n̄ka nun Catholic kiet. Ọfis n̄kọk itieutom Watch Tower Society obụk se ekedide utịp ete:

◻ Ke tụhi tụhi usenubọk kiet nte enye akakade obio, Ntiense oro ama osobo ye n̄wan n̄ka nun Catholic kiet. Enye ama ada ifet oro ndibụp n̄wan n̄ka nun oro ete: “M̀mọ̀n̄ ke afo aka ke utọ ini emi?” Ibọrọ ekedi: “N̄ka ndibọn̄ akam nnọ Abasi mi.” Ekem enye ama obụp n̄wan n̄ka nun oro ete: “Ndi afo ọmọfiọk enyịn̄ Abasi fo?” N̄wan n̄ka nun oro ama ọbọrọ ete, “Nte enyịn̄ esie idịghe Abasi?” Ntiense oro ama onyịme ndika ufọk esie ke uwemeyo oro nnyụn̄ nkeneme enyịn̄ Abasi ye enye. Ke nneme oro ama okokụre n̄wan n̄ka nun oro ama aka ufọkederi esie onyụn̄ okobụp kiet ke otu mme oku m̀mê enye ọmọfiọk se Jehovah ọwọrọde. Ibọrọ ekedi, “Enye edi enyịn̄ Abasi.” N̄wan n̄ka nun oro ama odu ke ata n̄kpaidem ndikop nte ke oku oro ama ọfiọk emi edi akanam ikpepke imọ.

Ntiense emi ama aka ebịne n̄wan oro ke usen usụkkiet ke adiana ke adiana onyụn̄ ekpep enye akpanikọ aban̄ade Abasi-Ita-ke-Kiet, ukpọn̄, hell ikan̄, ye idọtenyịn mme akpan̄kpa. N̄wan emi ama ọbọ kpukpru n̄kpọ ẹmi ndien ekem ọdọhọ Ntiense oro ete yak ọnọ imọ ndusụk ini ndikere mban̄a kpukpru mbufa ukpepn̄kpọ ẹmi. Ke urua iba ẹma ẹkebe n̄wan emi ama afiak okosobo ye Ntiense oro onyụn̄ ọdọhọ enye ete yak enyene n̄kaiso nneme. Etisịm ini emi n̄wan n̄ka nun oro ama anam ubiere ndikpọn̄ ufọkederi oro ndien ama ababiat ndisọi mbiet, n̄kwa akam, ye cross esie efep. Oku oro ama an̄wana ndikpek enye afiak edi, edi enye ama ebiere ndibịne akpanikọ. Enye ama ana baptism ke ukperedem ndien amanam utom nte asiakusụn̄ unọ un̄wam ofụri ini ke ediwak ọfiọn̄ kpa ye unana nsọn̄idem ye edisọn̄ oro enye ọsọn̄de ke emana.

Sia ufọk esie okponde, enye ama ọkpọn̄ ọnọ esop akama nte Ufọkmbono Obio Ubọn̄. Nditọete ẹma ẹyarade akani enyọn̄ ẹfep, ẹwụri mme ibibene esịtufọk, enyụn̄ ẹnam akamba ikpehe ufọk oro akabade edi ediye itie mbonoesop. N̄wan emi ke akpa ekedide n̄wan n̄ka nun Catholic mi odụn̄ ke ubet kiet ke edem ufọkmbono oro. Enye okop inemesịt etieti ndikeme nditịp emi nsịn ke utuakibuot Jehovah.

◻ Ifiọkutom efen oro owụtde eti ibuot oro odude ke unọ ikọ ntiense ido nneme oto Kampalo, Uganda. Ke usụn̄ akade ọfis ukara, Ntiense kiet oro edide isụn̄utom ama enyene nneme ye mbon oro ẹkedude ye enye ke esịt n̄kpọ umen owo ndọk ufọkenyọn̄. Eren kiet, Mr. L​——​——, ama owụt udọn̄ ndibọ n̄wed oro ẹkenọde edi ikekemeke ndibọ ke ebe oro. Ntre enye ama ọnọ isụn̄utom oro enyịn̄ ye adres ọfis esie. Nte ini akade isụn̄utom oro ama aka do okobụp aban̄a Mr. L​——​——. Ẹma ẹkot enye edi ke n̄kpaidem isụn̄utom oro, owo efen ọkọwọrọ edi. Owo iba ekenyene ukem enyịn̄ oro, ẹnamde utom ke ọfis oro. Ẹma ẹnọ Mr. L​——​—— ọyọhọ iba ibio ibio ikọ ntiense, ndien enye ama owụt ata ọkpọsọn̄ udọn̄. Ke adan̄aemi akpa Mr. L​——​—— mîkenyeneke udọn̄ aba, ẹma ẹtọn̄ọ ukpepn̄kpọ Bible ye Mr. L​——​—— ọyọhọ iba. Enye idahaemi edi Ntiense oro ama akana baptism, ndien n̄wan esie ye nditọiren esie ke ẹnam eti n̄kọri ẹbịne baptism.

Jesus Christ edi Eti Ekpemerọn̄ onyụn̄ ọfiọk mbon mbieterọn̄ oro ẹnyenede eti esịt. Mme ifiọkutom ẹmi ẹwụt ke enye esida mme anditiene enye usụn̄ ebịne utọ mbon oro. Ukwọrọikọ ido nneme ekeme ndision̄o mbun̄wụm!—John 10:14.