Bible—Nte Enye Enen̄ede Edi Edisana?
OWO ifan̄ mfịn ise Bible nte edisana, Ikọ Abasi? Ke emana eyịghe emi, ediwak owo ẹda enye nte se mîkemke ye ifiọk eyomfịn mînyụn̄ inyeneke ufọn, ẹyịkde m̀mê enye ke akpanikọ edi edisana. Idem ndusụk mme adaiso ido ukpono Christendom ẹkpep nte ke Bible ọyọhọ ye nsunsu mbụk ye n̄ke. Mmọ ẹyịk ‘m̀mê mbụkeset oro ẹsiakde ke Bible edi kiet oro mme ọfiọkn̄kpọ owo ẹkemede ndinyịme.’—The Interpreter’s Dictionary of the Bible, Eboho 2, page 611.
Mme ọwọrọiso nditọ ukpepn̄kpọ ke ẹtọ n̄kpasịp eyịghe kaban̄a nte enende nditịn̄ mban̄a Bible nte Ikọ Abasi. Owo kiet ọkọdọhọ ete “edieke owo oyomde ndida utọ usem nte Ikọ-Abasi, ikọ oro odotde ndikot Bible edi Ikọ Israel, Ikọ ndusụk mme ọwọrọiso akpa Christian.” (The Bible in the Modern World, eke James Barr) Nso ke afo ekere? Nte Bible edi Ikọ Abasi? Nte enye enen̄ede edi edisana?
Mmanie Ẹkewet Bible?
Nte ido edide ẹbuan ediwet Genesis, akpa n̄wed eke Bible, ye Moses, owo Hebrew emi okodude uwem ke n̄kpọ nte isua 3,500 ẹmi ẹkebede. Nte ekemde ye Bible ke idemesie, n̄kpọ nte irenowo 40 ẹtode nsio nsio ikpehe ke uwem ẹma ẹbuana ke ndiwet nsụhọ N̄wed Abasi eken, osụn̄ọde ke editan̄ n̄wed 66 mbok, m̀mê n̄kpri ikpehe, eke Bible. Nte ededi, irenowo ẹmi ikadaha idemmọ nte mme ata andiwet Bible. Andiwet kiet ọkọdọhọ ete: “Ẹda odudu spirit Abasi ẹwet kpukpru N̄wed Abasi.” (2 Timothy 3:16, NW) Efen ama ewet aban̄a mme andiwet Bible ete: “Mme owo ẹtịn̄ ikọ eke otode Abasi, nte edisana spirit esịnde mmọ ẹtịn̄.”—2 Peter 1:21.
Emi onịm mme andiwet ke udịm mme ewetn̄wed, ẹmi Abasi akarade, m̀mê adade usụn̄. Nte ekemde ye Bible, ẹma ẹsiyak andiwet nte ido edide emek mme ikọ idemesie ke nditịn̄ ntọt oro Abasi ọnọde. (Habakkuk 2:2) Ntak edi oro ediwak usụn̄ uwetn̄kpọ odude ke ofụri Bible. Edi se ẹwetde kpukpru ini okodu ke ndausụn̄ Abasi.
Nte ẹnyịmede, edidọhọ oro mme andiwet ẹmi ẹdọhọde ke Abasi ọnọ mmimọ odudu idịghe uyarade ke idemmọ nte ke Bible edi etop otode Abasi kpa Andibot osịm ubonowo. Edi, ẹkpenyene ndikụt in̄wan̄în̄wan̄ m̀mê Ata Edikọn̄ edi Andiwet Bible m̀mê idịghe oto ke edidụn̄ọde n̄wed oro ke idemesie ye unana asari ye ntịn̄enyịn. Nte Bible ọnọ uyarade nte ke andiwet edi Abasi? Nte nnyịn ke akpanikọ imekeme ndidọhọ ye mbuọtidem nte ke Bible enen̄ede edi edisana?