Obufa Ererimbot Emekpere!

MME andikara ẹmetịn̄ ekese ẹban̄a ndutịm obufa ererimbot emi mmọ ẹyomde ndinam. Mmọ ẹtịn̄ ẹban̄a edisio ndịk ye mme n̄kpọ oro ẹbiọn̄ọde edidianakiet ke ufọt mme owo ye mme ukara mfep ke ererimbot. Edi nte ana ọnọ mme owo ndida obufa ererimbot ndi?

Ubonowo emenyene ediwak isua ikie ndida ererimbot emem ye ifụre ndi. Nte eyịghe mîdụhe, ediwak owo ẹma ẹnen̄ede ẹnam akpanikọ ke mme utọ ukeme oro. Inamke n̄kpọ se ndutịm ukara oro mme owo ẹdade ndiyọhọ mme utọ uduak oro, nte ededi, ikọ Bible ẹmi ẹdi akpanikọ: “Owo eke asan̄ade inyụn̄ ikemeke ndinen̄ede ikpat esiemmọ.”—Jeremiah 10:23.

Ẹn̄wọn̄ọ Obufa Ererimbot

Edi, ukem Ikọ Abasi eke odudu spirit oro ọnọ nsọn̄ọ nte ke obufa ererimbot eyedu. Ke ama ekebem iso etịn̄ aban̄a utịt akani editịm n̄kpọ, Christian apostle Peter ama ọdọhọ ete: “Nnyịn itie ibet obufa enyọn̄ ye obufa isọn̄, nte un̄wọn̄ọ Esie edide; ndien edi do ke edinen ido edidụn̄.”—2 Peter 3:10-13.

Un̄wọn̄ọ anie edi emi? Idịghe owo en̄wen ọnọ ikan Jehovah, kpa “Ata Edikọn̄ ke ofụri ererimbot.” (Psalm 83:18) Enye eyenam se mme owo mîkemeke ndinam. Ih, Jehovah Abasi eyeda obufa ererimbot edi. Edi ini ewe?

Obufa ererimbot Otịm Ekpere!

Mbemiso obufa ererimbot oro Abasi ọn̄wọn̄ọde akabade edi ata idem n̄kpọ ke ọyọhọ-udomo, “ererimbot” oro odude kemi, m̀mê “editịm n̄kpọ,” ana osịm utịt esie. Ke se iban̄ade emi, mme mbet Jesus Christ ẹma ẹbụp ẹte: “Sian nnyịn, ini ewe ke mme n̄kpọ ẹmi ẹdidi? ndien nso ididi idiọn̄ọ edidi fo, ye eke utịt ererimbot?” (Matthew 24:3, King James Version) Nte New World Translation oro enende akan esịnde enye, mme anditiene Jesus ẹkebụp ẹte: “Sian nnyịn, Ini ewe ke mme n̄kpọ ẹmi ẹdidi, ndien nso ididi idiọn̄ọ edidu fo ye eke akpatre ini editịm n̄kpọ emi?”

Ke ibọrọ, Jesus ama ebemiso etịn̄ aban̄a ediwak ikpehe idiọn̄ọ edidu esie oro enyịn mîkwe nte owo eke spirit ke ukara Obio Ubọn̄ ke heaven. (1 Peter 3:18) Ke uwụtn̄kpọ, enye ama ọdọhọ ete: “Idụt eyedaha an̄wana ye idụt, obio edidem kiet eyenyụn̄ adaha an̄wana ye obio edidem efen: akan̄ ye unyekisọn̄ ẹyenyụn̄ ẹdu ke nsio nsio ebiet.” Ọtọn̄ọde ke “ntọn̄ọ ubiakuman” ke 1914, “emana emi” Jesus akanyande ubọk owụt omokụt n̄kaiso ekọn̄, unana udia, ye unyekisọn̄ nte ubak idiọn̄ọ edidu esie oro enyịn mîkwe.—Matthew 24:7, 8, 34.

Ekọn̄ ọmọnọmọ emana emi ke anana-mbiet usụn̄ toto ke 1914. Ekọn̄ Ererimbot I ama ada n̄kpọ nte uwem miliọn owo 14. Ke ini Ekọn̄ Ererimbot II, mbonekọn̄ ye mbio obio miliọn 55 ke ẹkewot. Kamse, toto ke 1914 se iwakde ikan uwem miliọn owo 100 ẹmetak ke ekọn̄! Ke akpanikọ, emi owụt ubak idiọn̄ọ edidu Jesus.

Unana udia, oro Jesus ekebemde iso etịn̄ n̄ko, ama osobo ediwak idụt ke ekọn̄ ererimbot iba oro ẹma ẹkebe. Kpa ye n̄kọri ke ifiọk ntaifiọk, se ikperede mbahade inan̄ ke otu mme andidụn̄ ererimbot ẹtie biọn̄ mfịn. Ke isua kiet kiet, nditọn̄wọn̄ ye mbon en̄wen ke mme itie miliọn ẹsikpan̄a ke ntak unana eti udia. The World Book Encyclopedia ọdọhọ ete: “N̄wakn̄kan idụt oro ẹtọn̄ọde-tọn̄ọ ndinyene uforo ke Africa, Asia, ye Latin America inyeneke udia oro awakde ekem inọ mbio obio mmọ. Ediwak miliọn owo ke mme idụt ẹmi ẹsitie biọn̄. Ke ini udia oro ẹnamde m̀mê oro ẹtobode-tobo osụhọrede ke ntak ekededi, akan̄ ekeme ndidu ndien ediwak tọsịn m̀mê miliọn owo ẹkeme ndikpan̄a.”

Unyekisọn̄ amada ediwak uwem ke emana emi onịmde “utịt ini” idiọn̄ọ. (Daniel 12:4) Ibat n̄kpan̄a unyekisọn̄ oro ẹnọde okpụhọde. Edi toto ke 1914 nsobo otode unyekisọn̄ ama ọdọk ke ofụri isọn̄, ndien mmọemi ẹma ẹda uwem ediwak tọsịn owo ke mme itie ikie. Ke etịn̄de otụk sụk iba ke otu mmọemi Yorkshire Post eke October 19, 1989, ọkọdọhọ ete: “Ke 1920 unyekisọn̄ ke mbahade ikpehe obio Jiangsu China ama owot owo 180,000, ndien ke July 28, 1976, ndiọkn̄kan unyekisọn̄ ke mbụk eyomfịn esie ama ọnọmọ China. Ke nsuhọde n̄kaha owo 240,000 ẹkekpan̄a ke ini unyekisọn̄ edide 7.8 ke udomon̄kpo Richter ekekperede ndifụk edere edere edem usiahautịn obio Tangshan.” N̄wedmbụk n̄kpọntịbe oro ama asiak se iwakde ikan ikpọ unyekisọn̄ 30 ke isua ikie-20 emi.

Ẹma ẹbemiso ẹtịn̄ ẹban̄a utom ukwọrọikọ Obio Ubọn̄ n̄ko nte kiet ke otu ikpehe idiọn̄ọ edidu Jesus oro enyịn mîkwe. Enye ama asian mme mbet esie oro ẹkebụpde mbụme ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Nte Jesus eketịn̄de ke prọfesi, Mme Ntiense Jehovah oro ẹwakde ekan 4,000,000 ke ẹnam utom ukwọrọikọ emi ke ofụri isọn̄ ke idụt 212.

Mme prọfesi ẹmi ye mmọ en̄wen ndisu ke eyomfịn ẹwụt ke nnyịn ke akpanikọ idu uwem ke “ukperedem ini.” (2 Timothy 3:1-5) “Akwa ukụt” oro Jesus Christ ekebemde iso etịn̄ n̄ko odu nnyịn ke iso. Ke osịmde utịt ke “ekọn̄ akwa usen Abasi, Andikara kpukpru n̄kpọ” ke Har–Magedon, enye eyeda utịt ọsọk idiọk editịm n̄kpọ emi odude kemi. (Matthew 24:21; Ediyarade 16:14-16) Adan̄aoro obufa ererimbot oro Abasi ọn̄wọn̄ọde eyekabade edi ata idem n̄kpọ.a

Mme Edidiọn̄ Oro Owo Mîkemeke Ndida Ndi

Mme andikara ẹkpọ inua ẹban̄a ndutịm obufa ererimbot oro mmọ ẹyomde ndinam. Edi Jehovah, kpa Abasi enyọn̄ ye isọn̄, akananam idọhọke mme owo ẹkpụhọ editịm n̄kpọ oro odude kemi ye obufa ererimbot. Enye ke idemesie eyenam oro ke usen ye ke hour oro enye ikpọn̄ ọfiọkde. (Matthew 24:34, 36) Akanieren apostle John ama ebemiso ada okụt se Abasi, idịghe owo, edinamde:

“Ekem n̄kụt obufa enyọn̄ ye obufa isọn̄; koro akpa enyọn̄ ye akpa isọn̄ ẹma ẹbe ẹfep, inyan̄ibom inyụn̄ idụhe aba. Ndien n̄kụt edisana obio, Obufa Jerusalem, nte otode ke Abasi osụhọde ke heaven edi, ẹma ẹnyụn̄ ẹtịm enye idem nte n̄wanndọ ẹmi ẹbanade ẹben̄e ebe. Ndien n̄kop ọkpọsọn̄ uyo nte otode ke ebekpo ọwọrọ ete, Sese, ebietidụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep. Anditie ke ebekpo onyụn̄ ọdọhọ ete, Sese, mmanam kpukpru n̄kpọ ẹdi mbufa. Enye onyụn̄ ọdọhọ ete, Wet: koro mme ikọ ẹmi ẹdi akpanikọ ye se owo okponịmde.”—Ediyarade 21:1-5.

“Obufa enyọn̄” edi Obio Ubọn̄ Jesus Christ eke heaven. “Obufa isọn̄” idịghe ererimbot isọn̄ en̄wen, edi edi obufa n̄kaowo ke ekondo emi—kpukpru mmọ ẹdide mme okopitem andidu ke idak Obio Ubọn̄ Christ, ye unana ubahade eke orụk, idụt, m̀mê usem. (Men Psalm 96:1 domo.) Ndamban̄a enyọn̄ ye isọn̄ ẹdude kemi—kpa editịm n̄kpọ Devil ye ndutịm ukaraidem esie oro Satan ye mme demon esie ẹnyenede odudu ke idemesie—eyedi se ẹsobode ẹfep. (1 John 5:19) Okposụkedi mme ata ata inyan̄ibom ẹdisụk ẹdude, ndamban̄a inyan̄ibom ntịme ntịme, idiọk ubonowo eyebe efep. Nsan̄a mme andikara ye Jesus ke heaven ẹnam Obufa Jerusalem ndien ke ebuana ye enye ẹnam akpan esop oro edikarade edinen n̄kaowo. Abasi ‘eyedụn̄ ye’ okopitem ubonowo ke ndamban̄a usụn̄ ke adan̄aemi ẹdade mmọ ẹdisịn ke ọyọhọ emem ye enye ebe ke Christ ke ufan̄ tọsịn-isua Usen Ikpe.—Ediyarade 14:1-4; 20:6.

Ke idak ukara Obio Ubọn̄ ediwak ntak eyedu ndidat esịt mban̄a. Eseme, ntuan̄a, ye ubiak oro ẹsụn̄ọde ẹto udọn̄ọ, mfụhọ, ye mme n̄kpọ ntre edidi mme n̄kpọntịbe eset. Idem n̄kpa oro atarade osịm ubonowo oto akpa ete nnyịn, kpa anamidiọk Adam, ididụhe aba. (Rome 5:12) Nso idara ididu ntem ke ini n̄kpọ ẹmi ẹnamde mmọn̄eyet odu ke ofụri ererimbot mi ẹdibede ẹfep ke nsinsi!

Idịghe n̄kpakpa owo edi edi Abasi ke idemesie ọnọ ubiọn̄ aban̄ade mme edidiọn̄ ẹmi. Enye edi owo emi ọdọhọde ete Edi 21:5: “Sese, mmanam kpukpru n̄kpọ ẹdi mbufa.” Ih, ndien Jehovah ama asian apostle John ete: “Wet: koro mme ikọ ẹmi ẹdi akpanikọ ye se owo okponịmde.”

Ẹyụhọ Mme Akpan Udọn̄ Ọyọhọ Ọyọhọ

Ke obufa ererimbot Abasi, isọn̄ eyekabade edi paradise ofụri ofụri. Emi edi akpanikọ, koro Jesus ama ọn̄wọn̄ọ ọnọ anamidiọk oro akatuade n̄kpọfiọk, emi ẹkekọn̄de ẹdian enye ete: “Ke akpanikọ ke ndọhọ fi mfịn emi, Afo eyedu ye ami ke Paradise.” (Luke 23:43, NW) Ke mme idaha paradise, ẹyenọ mme utọ n̄kpọ nte udia ye ufọkidụn̄ oro ubonowo oyomde.

Unana udia ke ada uwem ediwak miliọn owo mfịn. Inamke n̄kpọ sededi nti ukeme oro ẹsịnde ndinọ mbon ọbiọn̄ udia, idiọkitọn̄ ye n̄kpọ efen ẹsibiọn̄ọ owo ndikọk mme utọ mfịna oro. Ke uwụtn̄kpọ, Saturday Star, kpa n̄wedmbụk n̄kpọntịbe Johannesburg, South Africa, ọtọt ete: “Mme eneni ukaraidem, ekọmurua aran uwat ndidọk ye mfekuwem oro omụmde kpukpru owo ye mme en̄wan oro etiede nte inyeneke utịt ke Africa ẹdiana kiet ẹnam un̄wam oro ẹnọde okûwara . . . Ke Sudan, kpa kiet ke otu ndiọkn̄kan idụt oro akan̄ ọnọmọde, ọtọn̄ọde ke miliọn owo 5 sịm 6 ẹtie biọn̄ ke 1991.” Edi ẹyefre ẹban̄a akan̄ ke obufa ererimbot Abasi. Ke idak ukara Obio Ubọn̄ “uwak ibokpot eyedu ke isọn̄ ke nsom ikpọ obot.”—Psalm 72:16.

Ufọkidụn̄ edi n̄kpọ en̄wen oro owo oyomde emi ediwak owo mînyeneke ke usen nnyịn. Ediwak miliọn owo ẹdụn̄ ke ikpîkpu ataya mîdịghe inyeneke-nyene ufọkidụn̄ ndomokiet. Nte ekemde ye The New York Times, ke idụt Edem Usiahautịn kiet, “ke usiakifia udiọn̄ mme n̄kpọmbre . . . , mme anamutom ẹsọn̄de ke isua 20 ẹdu ke udịm mbon oro ẹtiede ẹbet edinyene ufọkidụn̄ ke isua-73,” ndien ntọt otode ukara owụt nte ke ana ndusụk owo ẹdụn̄ “ke mme ufọk ubon n̄kpọurua, mme ọfis m̀mê idem mme itie ukaikọt.” Edi didie ke ukpụhọde edidu ntem ke obufa ererimbot! Ke Paradise ini iso, “mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄ vine ẹnyụn̄ ẹdia mfri mmọ. Mmọ idibọpke, ndien owo en̄wen odụn̄, iditọhọ; ndien owo efen adia: koro usen ikọt mi ebietde usen eto, ndien ndimek ikọt mi ẹyedia se ubọk mmọ ẹnamde.”—Isaiah 65:21, 22.

Mme mfịna n̄kann̄kụk ẹyebe ẹfep ke obufa ererimbot oro Abasi ọn̄wọn̄ọde. Usabade ofụm oro esịnde nsọn̄idem ke itiendịk onyụn̄ abiatde mfri ididụhe aba. Usabade n̄kpọ ye usobo itieidụn̄ oro ẹsịnde ediwak orụk eto ye unam ke itiendịk ididịghe n̄kpọndịk ke ini oro. Ndien mme utọ n̄kpọ nte edibiat ofụm ẹkotde ozone ididịghe n̄kpọndịk inọ uwem ke isọn̄. Nnyịn imekeme ndinịm ke akpanikọ nte ke Jehovah Abasi eyesio kpukpru mfịna ẹmi efep, koro Ikọ esie ọsọn̄ọ ọnọ nnyịn ete ke ibịghike enye “[eyesobo] mmọemi ẹsobode isọn̄.”—Ediyarade 11:18.

Ke obufa ererimbot, ekọn̄ n̄ko edidi n̄kpọ eset edi idighe koro mme andikara ẹmekụt unen ke ndinam mme idụt ẹtre ukama n̄kpọekọn̄. Utu ke oro, Abasi eyenam n̄kpọ ke ebiet emi mme akara ukaraidem ẹkpụde. Enye eyeda emem ọsọk okopitem ubonowo ke ndinam mme ikọ andiwet psalm emi: “Mbufo ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat: eyenyụn̄ ọfọp mme chariot ke ikan̄.” (Psalm 46:8, 9) Ke obufa ererimbot oro Abasi ọn̄wọn̄ọde emi otịmde ekpere, mme owo idin̄wanake aba ekọn̄ ẹdi ẹyenyene ata emem ye ifụre.—Micah 4:2-4.

Nte Afo Eyedu Do?

Afo emekeme ndinyene mbuọtidem ke obufa ererimbot oro Jehovah Abasi ọn̄wọn̄ọde. Enye isisụhe nsu. (Mme Hebrew 6:17, 18) Ikọ esie, kpa Bible, edi akpanikọ, ndien se enye ọn̄wọn̄ọde kpukpru ini esisu.—John 17:17.

Eti mbụk oro akamade utịbe utịbe edidiọn̄ ọnọ okopitem ubonowo edi se Mme Ntiense Jehovah ẹsịnde ukeme ndibuana ye kpukpru mbon nti esịt. Afo emekeme ndisịn ukeme idahaemi ndinyene ifiọk uduak Abasi, onyụn̄ anam n̄kpọ aban̄a mme utịbe utịbe un̄wọn̄ọ ẹkụtde ke Edisana N̄wed Abasi. Edinam emi ekeme ndida nsịm anana utịt uwem, koro Jesus ọkọdọhọ ete: “Ndien nsinsi uwem oro ndifiọk Fi, ata Abasi kierakiet, ye Enyeemi afo ọkọdọn̄de, kpa Jesus Christ.” (John 17:3) Do afo eyenyene ifet ndidara ini inemesịt oro odude ke iso, koro obufa ererimbot Abasi emekpere!

[Mme Ikọ idakisọn̄]