Nte Afo Emeti?

Nte afo ama ekere ye ntịn̄enyịn aban̄a mme nsiondi Enyọn̄-Ukpeme eke ndondo emi? Ke edide ntre, afo iso-ọfọn eyekeme nditi se itienede emi:

◻ Didie ke n̄wetnnịm mbụk Bible aban̄ade mme ekọn̄ Jehovah ọnọ nnyịn ntak ndinyene mbuọtidem ke ndisak iso nse “akwa ukụt”? (Matthew 24:21)

Sia akarade kpukpru ini, Jehovah owụt nte ke imọ imekeme ndikere n̄kpọ n̄kan mme asua imọ nnyụn̄ nnam mme idaha ẹdu ẹnọ edinyana ikọt imọ.—8/15, page 27.

◻ Nso ke ana mme ete ye eka ẹnyịme ndinam man ẹmụm nneme ke ufọt idemmọ ye nditọ mmọ ẹkama?

Ana mme ete ye eka ẹda ini ẹdu ye nditọ mmọ. N̄ko, ana mmọ ẹnyịme ndiyak n̄kpọ atak mmọ ke ibuot nditọ mmọ ke ntak n̄kọri eke ekikere, ntụk, ikpọkidem, ye eke spirit mmọ—9/1, page 22.

◻ Nso ke edikpụhọde mbiet Jesus ọwọrọ ọnọ nnyịn mfịn? (Mark 9:2-4)

Edikpụhọde mbiet oro ekeme ndibọp mbuọtidem ke ntịn̄nnịm ikọ Jehovah onyụn̄ ọsọn̄ọ edinịm oro nnyịn inịmde Jesus Christ ke akpanikọ nte eyen Abasi ye Messiah oro ẹken̄wọn̄ọde. Enye nde ekeme ndisọn̄ọ edinịm oro nnyịn inịmde ediset ke n̄kpa Jesus ndụk uwem eke spirit ke akpanikọ onyụn̄ ọkọri mbuọtidem nnyịn ke ukara Abasi.—9/15, page 23.

◻ Nso ke ikọ oro “ke esisịt ini” ke Isaiah 11:6 (NW) ọwọrọ?

Edikabade ufan̄ikọ emi ye ntịn̄enyịn owụt nte ke wolf ye eyenerọn̄ ididụhe kpukpru ini ye kiet eken ke obufa ererimbot. Anaedi mme utọ unam oro ẹyesụk ẹnyene san̄asan̄a itieidụn̄ ndien ẹyedidu ke otu ‘ufene ye unam obot’ nte okodude ke akpa Paradise. (Genesis 1:24) Nte ededi, mme unam ẹyedu ke emem ye kiet eken ẹkeme ndisan̄a n̄kpere kiet eken ye unana ndịk.—9/15, page 31.

◻ Nso idi ukpọhọde ata ido ukpono Christ?

Ima edi ukpọhọde ata ido ukpono Christ. Mbuọtidem, utom, ye nnennen ebuana edi ata akpan n̄kpọ, edi ke ima mîdụhe owo ikwe ufọn mmọ. Emi edi ntre koro Jehovah edi akakan Abasi ima. (1 Corinth 13:1-3; 1 John 4:8)—10/1, page 20.

◻ Nte ikọ oro “ini eke ẹmande, ye ini eke ẹkpade” ke Ecclesiastes 3:2 ọsọn̄ọ ekikere oro nte ke Abasi ama ebebiere ini n̄kpa nnyịn onịm?

Baba. Solomon n̄kukụre ekeneme aban̄a n̄kaiso ndutịm edisan̄a n̄kanade eke uwem ye n̄kpa oro ọnọmọde anana mfọnmma ubonowo. Ecclesiastes 7:17 ọdọhọ ete: “Kûnam idiọkn̄kpọ ukan, kûnyụn̄ udi ndisịme owo: afo edinam didie akpa ke mîkemke kan̄a ke ini fo?” Item emi ekpenyene nso ufọn ke ekpedide ẹma ẹbebiere ini n̄kpa owo ẹnịm?—10/15, page 5-6.

◻ Nso ifan̄a nte ke apostle Peter ikedịghe akpa pope ke Rome?

Uyarade ndomokiet idụhe nte ke Peter akananam ama aka Rome; m̀mê Peter akananam nditịn̄ mban̄a idemesie nte n̄kpọ ekededi akan kiet ke otu mme apostle Christ. (2 Peter 1:1)—10/15, page 8.

◻ Nte enen mme Christian ẹnọ mme frawa ẹka itie ubụkowo?

Edieke ẹtịmde ẹdiọn̄ọ nte ke ido edinam (m̀mê ndudiọn̄, utọ nte cross) kemi enyene se ọwọrọde ke n̄kan̄ ido ukpono ke ebiet owo otode, ẹkpenyene nditre. Ntre mme Christian idinọhọ mme frawa ke mbiet cross ẹka m̀mê ndikama mmọ ke ndusụk ido oro ẹmehede oro nte an̄wan̄ade ẹnyenede se ọwọrọde ke n̄kan̄ nsunsu ido ukpono. Nte ededi, idahaemi ke ediwak idụt, ido unọ owo frawa ye unana edinyene ebuana ye ido ukpono edi ntatara n̄kpọ. Ndusụk mme Christian ẹma ẹnọ mme frawa ẹka man ẹkọnọ inemesịt ke mfụhọ mfụhọ idaha ẹnyụn̄ ẹwụt mbọm ye edikere mban̄a.—10/15, page 31.

◻ Mme akpan ukabade ẹnam nso n̄kpọ ẹban̄ade Abasi-Ita-ke-Kiet an̄wan̄a?

Mmọ ẹnam an̄wan̄a nte ke ukpepn̄kpọ Abasi-Ita-ke-Kiet idịghe mmemmem ekikere. Utu ke oro, enye edi awak n̄kukọhọ otu ekikere oro ẹketan̄de ẹdian ọtọkiet ke ediwak isua ikie ẹnyụn̄ ẹdọn̄de ẹkọbi ke kiet eken. Ediwak nditọ ukpepn̄kpọ, esịnede mme ekpep ukpepn̄kpọ Abasi-Ita-ke-Kiet, ẹnyịme ete ke Bible ke akpanikọ isịneke ukpepn̄kpọ Abasi-Ita-ke-Kiet.—11/1, page 21-22.

◻ Ntak emi 29 C.E. edide akpan usenọfiọn̄ ke mbụk Bible?

Koro ke ndidian nnennen ntọt Bible ye usenọfiọn̄ ukara Tiberius eke ererimbot, nditọ ukpepn̄kpọ Bible ẹkeme ndibat nte ke utom ukwọrọikọ John ọkọtọn̄ọ ke ini utọ eke 29 C.E. ye nte ke ọfiọn̄ itiokiet ke ukperedem, ke ndaeyo eke 29 C.E., John ama onịm Jesus baptism.— 11/15, page 31.

◻ Nso ke “utuakibuot” ọkọwọrọ ọnọ mbon oro ẹsemde usem Hebrew, ndien didie ke emi abuana Mme Ntiense Jehovah mfịn?

Ekeme ndikabade ukem ikọ Hebrew oro adade ọnọ “utuakibuot” nte “utom.” Ke ekikere mbon Hebrew, ke ntre, utuakibuot ọkọwọrọ utom. Emi edi se enye ọwọrọde ọnọ ikọt Jehovah mfịn, ntre ata akpan idiọn̄ọ ido ukpono akpanikọ edi utom ukwọrọikọ ẹnamde ẹnọ Abasi. —12/1, page 19.