Nte Bible Enen̄ede Edi Enọ Otode Abasi?
“AMI mmonịm nte ke Bible edi mfọnn̄kan enọ oro akanam Abasi ọnọde owo.” Abraham Lincoln, adaibuot ukara United States ọyọhọ 16 eketịn̄ ikọ oro.a Enye idịghe n̄kukụre owo emi owụtde esịtekọm ọnọ n̄wed emi odude ke ediwak emana mi.
Owo ukara Britain eke ọyọhọ isua ikie-19, William E. Gladstone ọkọdọhọ ete: “Bible enyene Mfọnn̄kan Ntọn̄ọ, ndien enye ndidu ke uniọn̄ ini oro owo mîkemeke ndidomo abahade enye ọkpọn̄ n̄wed efen ekededi.” Ke ukem usụn̄ ekikere oro, owo ukara America eke ọyọhọ isua ikie-18, Patrick Henry ọkọdọhọ ete: “Bible ọfọn akan kpukpru n̄wed eken oro akanam ẹmịn̄de.” Nte an̄wan̄ade ke edide se N̄wed Abasi otụkde ke idem, andikara France oro Napoléon Bonaparte ama etịn̄ ete: “Bible idịghe ikpîkpu n̄wed, edi edi Oduuwem Edibotn̄kpọ, ye odudu oro akande kpukpru n̄kpọ oro ẹbiọn̄ọde enye.”
Ye ndusụk owo, Bible edi itie ubọ un̄wam ye ndọn̄esịt. Akwa Owoekọn̄ N̄ka Ediomi Idụt America oro Robert E. Lee ọkọdọhọ ete: “Ke kpukpru nnanenyịn ye mfụhọ mi, Bible akananam ikpụho ndinọ mi un̄wana ye odudu.” Ndien ke ntak esịtekọm oro enye owụtde aban̄a n̄wed emi, adaibuot ukara U.S. John Quincy Adams ọkọdọhọ ete: “Ke ediwak isua ami mmanam edi ido mi ndisikot Bible n̄kụre ini kiet ke kpukpru isua.”
Edieke Ata Edikon̄ ọkọnọde ubonowo Bible, uyarade ekpenyene ndidu nte ke enye edi se ẹdade odudu spirit Abasi ẹwet. Enye ekpenyene ndikpon n̄kan n̄wed efen ekededi. Ndien man Bible edi ata itie ubọ odudu ye item, enye ekpenyene ndidi se ẹberide edem ke esịt ofụri ofụri. Ntre, ndien, mbụme emi ke osụk ososụhọ, Nte Bible enen̄ede edi enọ otode Abasi? Ẹyak nnyịn ndien iyom ibọrọ inọ mbụme oro.
[Mme Ikọ idakisọn̄]
[Mme Ndise ke page 3]
William E. Gladstone
[Ebiet Ẹdade N̄kpọ Ẹto]
U.S. National Archives photo
Abraham Lincoln
[Ebiet Ẹdade N̄kpọ Ẹto]
U.S. National Archives photo
Patrick Henry
[Ebiet Ẹdade N̄kpọ Ẹto]
Harper’s U.S. History
Napoléon Bonaparte
[Ebiet Ẹdade N̄kpọ Ẹto]
Emi E. Ronjat ewetde
John Quincy Adams
[Ebiet Ẹdade N̄kpọ Ẹto]
Harper’s U.S. History
Robert E. Lee
[Ebiet Ẹdade N̄kpọ Ẹto]
U.S. National Archives photo