Mme Mbụme Ẹtode Mme Andikot
Nso mbiomo ke mme Christian ẹnyene ke ndisụhọde edisabade n̄kann̄kụk nnyịn—isọn̄, inyan̄, ye ofụm?
Nte Mme Ntiense Jehovah, nnyịn imenyene ntotụn̄ọ udọn̄ iban̄a ediwak mfịna n̄kann̄kụk ẹmi ẹnọmọde ebietidụn̄ isọn̄ nnyịn idahaemi. Ke udomo oro akande eke ata ekese owo, nnyịn imọfiọk ite ke ẹkebot isọn̄ ndidi edisana, eti ebietidụn̄ mfọnmma ubonowo. (Genesis 1:31; 2:15-17; Isaiah 45:18) Nnyịn n̄ko imenyene un̄wọn̄ọ Abasi oro nte ke enye ‘eyesobo mmọ eke ẹsobode isọn̄.’ (Ediyarade 11:18) Emi ke ntre enen ndisịn ukeme oro owụtde eti ibuot onyụn̄ adade ukem ukem man ifep nditịp n̄kpọ nsịn nte mîdotke ke edibiat ererimbot oro owo osụk abiatde. Nte ededi, tịmfiọk ikọ oro “eti ibuot.” Enye n̄ko ekem ye N̄wed Abasi ndikpeme man idiyak mme mbubehe ye mme edinam n̄kann̄kụk ẹkabade ẹdi mme ebeubọk ekikere nnyịn.
Idem owo ndidu uwem nte akpanade odu esision̄o mme ndek edi. Ke uwụtn̄kpọ, utọ n̄kpọ, edikabade n̄kpọ nsịn ke n̄kpọ efen, ye edidia mme n̄kpọ oro ẹdade udia ẹnam ẹsiwak ndida ndek ndi, kpa ye oro ediwak mmọ ẹkemede ndidi se mme oduuwem n̄kpọ efen ẹyomde. (Psalm 1:4; Luke 3:17) Ekeme ndidi udia ọfọpiyak emi Jesus oro ekesetde akanamde ọnọ mme mbet esie ama osion̄o nsụn̄ikan̄, ntọn̄, ye mbio ọkpọiyak. (John 21:9-13) Edi ẹkenam ndutịm oduuwem n̄kpọ ye mme n̄kpọ oro mîdụhe uwem ke isọn̄ man ufan̄ odu ọnọ utọ n̄kpọ oro.
Ikọt Abasi inyeneke ndifre mban̄a mme n̄kpọ ẹban̄ade n̄kann̄kụk. Jehovah ama oyom ikọt esie eke eset ẹnam n̄kpọ ẹban̄a edifụk mme ndek, kpa edinam emi ekenyenede ufọn ke n̄kann̄kụk ọkọrọ ye usanaidem. (Deuteronomy 23:9-14) Ndien sia nnyịn ima ikọfiọk ekikere esie kaban̄a mbon oro ẹsobode isọn̄, nnyịn ke akpanikọ ikpofụmike mme n̄kpọ oro nnyịn ikemede ndinam man inịm n̄kann̄kụk asana. Nnyịn imekeme ndiwụt emi ke ndiduọn̄ọ nsụhọ udia oro owo mîyomke m̀mê ndek ke usụn̄ ọfọnde, akpan akpan mme n̄kpọ oro ẹkemede ndiwot owo. Nnyịn ke ofụri esịt imesidiana ye ukeme oro ẹsịnde ndifiak ndiọn̄ mme n̄kpọ, imenyene udiana ntak ndinam ntre edieke emi edide ibet Caesar. (Rome 13:1, 5) Ndien ndusụk owo ẹkop uyụhọ ke ndinam mme usio-ukot efen, utọ nte edida mme n̄kpọ oro mme oduuwem n̄kpọ efen ẹyomde nnam n̄kpọ akan ndidadian n̄kpọ ke mme otu mbio ke obot ye ke inyan̄.
Udomo oro Christian ekemede ndinam n̄kpọ n̄kosịm ke afan̄ emi, nte ededi, edi mbubehe idemowo ibọhọke edi se ibet oyomde. Otode mbụk n̄kpọntịbe ana in̄wan̄în̄wan̄ nte ke mme anana mfọnmma owo ẹsiduọ mmemmem mmemmem ẹdụk afia edinam n̄kpọ mbe ubọk. Item Jesus ke akpanikọ otịm odot: “Ẹkûsion̄o owo ndo, mbak ẹdision̄o mbufo ndo . . . Nsinam afo esede ekpri mbio eke odude ke enyịn eyenete fo, edi mûkereke obukpọk oro odude fi ke enyịn?” (Matthew 7:1, 3) Ndinyene emi ke ekikere ekeme ndin̄wam nnyịn nditre ndifụmi mme akpan n̄kpọ eken.
Prọfet Jeremiah ekewet ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Edifụmi edumbet emi amada “ndiọk eyo” ọsọk ubonowo iso-ye-iso, nte ẹwụtde ke 2 Timothy 3:1-5. Ndien se Abasi akanamde ewet ke Ediyarade 11:18 owụt ete ke mme ukeme owo ndisio mme akpan mfịna n̄kann̄kụk ke isọn̄ mfep, abuanade usabade n̄kpọ, idikwe ọyọhọ unen. N̄kpri n̄kọri ẹkeme ndidu mi ye ko, edi n̄kukụre usọbọ oro edibịghide oyom Abasi osịbe odụk.
Ke ntak emi nnyịn iwọn̄ọde mme ukeme ye inyene nnyịn isịn ke usọbọ emi otode Abasi, utu ke ndidomo ndiyom usọbọ oro edide enyọn̄ enyọn̄. Kaban̄a emi nnyịn itiene uwụtn̄kpọ Jesus, emi akadade n̄kponn̄kan ikpehe utom ukwọrọikọ esie ‘etie ntiense ọnọ akpanikọ.’ (John 18:37) Utu ke ndinọ ererimbot udia m̀mê ndiyom usọbọ nnọ ntatara mfịna n̄kaowo—esịnede usabade n̄kpọ—Jesus akanyan ubọk owụt ọyọhọ usọbọ kaban̄a mme mfịna oro ọnọmọde ubonowo.—John 6:10-15; 18:36.
Ke adan̄aemi ima oro inyenede inọ ekemmọ owo onụkde nnyịn ndifep ndisabade isọn̄, ofụm, m̀mê mmọn̄ nte mîdotke, nnyịn imakaiso nditie ntiense nnọ akpanikọ. Edi esịne edikpep mme owo ndida akpanikọ Bible nsịn ke edinam ndien ke ntre ẹfepde ndisobo idemmọ ye nsụn̄ikan̄, ebeubọk ọkpọsọn̄ mmịn, m̀mê n̄kpọsọn̄ ibọk oro ẹbiatde owo idem. Nte ediwak miliọn mbufa owo ẹkabarede ẹdi mme mbet, mmọ ẹmekpep mme edu usanaidem ye ediwụt mmọ en̄wen edikere mban̄a. Ntre utom ukwọrọikọ omotịp n̄kpọ ke ataata usụn̄ esịn ke edisụhọde mfịna usabade n̄kpọ mfịn ke ofụri ofụri. Edi ke edide akpan n̄kpọ akan, mme mbet ẹdide Christian ẹdomo ndikpụhọde edu ye ido mmọ idahaemi man mmọ ẹkpedot ndidu ke edisana Paradise isọn̄ oro Abasi edinamde ke mîbịghike ọnọ mme ata andituak ibuot nnọ enye.