Ndisio Usabaden̄kpọ Mfep—Ke Esịt ye ke Ekikere

JEHOVAH ikọnohọ mme owo udọn̄ ndima ndek m̀mê ndutịme. Ẹkenam ekondo ebietidụn̄ mmọ ndidi paradise emi asanade, asan̄ade ke ndutịm, onyụn̄ eyede. Uduak Abasi ikedịghe enye ndikabade ndi ifụm oro owo mîkemeke ndise.—Genesis 2:8, 9.

Nte ededi, ke mme owo ẹma ẹkesịn ndausụn̄ Abasi, mmọ ẹma ẹtọn̄ọ ndinam orụk ndutịm ererimbot eke idemmọ. Ye unana edibọ ufọn nto eti ibuot otode Abasi n̄ko ye unana ifiọk, ẹma ẹnyịk mmọ ndikpep n̄kpọ ke ndomonse. Mbụk ererimbot ọsọn̄ọ akpanikọ Bible oro nte ke mme owo ikemeke ndikara idemmọ uforo uforo; ke ediwak tọsịn isua “owo amakara owo tutu ọnọ enye unan.” (Ecclesiastes 8:9, NW; Jeremiah 10:23) Mfịna usabaden̄kpọ eke eyomfịn, ke kpukpru uduot esie, edi utịp idiọk ukara eke owo.

Ndinyịme Ekikere Abasi

Mme owo oro ẹnyenede udọn̄ ndinem Abasi esịt ẹdomo ọkpọsọn̄ ndidu uwem ekekem ye mme ndisana idaha Andibot. Ntem, Mme Ntiense Jehovah ẹma ẹsobo mfịna ke ini ẹkediomide ndinịm mbono ofụri ererimbot ke Prague, Czechoslovakia, ke ufọt ufọt 1991.a N̄kpọ nte mme owo 75,000 ẹkenyene ndidụk, kpa otuowo oro An̄wambre Strahov ekpekemde mfọn mfọn. Edi owo ikadaha an̄wambre emi inam n̄kpọ ke isua ition. Enye ama akabade ọdiọk oto ntak unana edidiọn̄, ke ntak eyo ye edịm. N̄kpọ nte Mme Ntiense Jehovah 1,500 ẹma ẹsịn se iwakde ibe hour 65,000 ndidiọn̄ nnyụn̄ mfiak nda ndom nyet enye. Etisịm ini mbono utom edinam asana oro ama anam an̄wambre oro odot ndidi itie emi ẹdade ẹkpono ata Abasi, kpa Jehovah.

Nso inụk Mme Ntiense Jehovah ndikpụhọde, ke adan̄aemi ererimbot ke ofụri ofụri mîfiọkke ufọn edinam n̄kpọ asana ye eti ndutịm? Edifiọk oro ẹfiọkde item Bible oro nte ke mme Christian ẹkpenyene ndisio ndiọi eduuwem, utọ nte ibụk, unana edikere mban̄a owo, idiọkitọn̄, ye unana ima mfep ke idem. Bible ọdọhọ ete, ‘Ẹsio akani owo ye utom esie ẹduọk.’ Ẹkpụhọ enye ye “obufa owo, emi ẹdiọn̄de-diọn̄ ẹnam enye edi obufa, enyene mbiet Andibot enye.” Edu emi otode ima oro ẹnyenede ẹnọ edinam n̄kpọ asana, eti ndutịm, ye uyai iyakke ufan̄ odu ọnọ ntụhọ edisabade n̄kpọ.—Colossae 3:9, 10; 2 Corinth 7:1; Philippi 4:8; Titus 2:14.

Obufa owo oyom ete mme Christian ẹdu ke ukpeme kaban̄a usabaden̄kpọ, idịghe ndikokoi nsabade n̄kpọ m̀mê ndisọn̄ ibuot mfụmi mme ibet oro ẹkpande usabaden̄kpọ oro mme ukara ẹnịmde. Enye an̄wam mmọ ndifep edu utop n̄kpọ nduọn̄ọ ntịme ntịme, ibụk, ye ifu oro osụn̄ọde ke edinam mme ebiet edehe. Ebede ke ndiwụt ukpono nnọ inyene mbon efen, emi anam ẹfep ediwet n̄kpọ ndian ke mme efak nte usụn̄ ndida ntịn̄ ikọ, nte ikpîkpu mbubru, m̀mê nte usụn̄ uwet ndise efen. Oyom ete ẹnịm ufọkidụn̄, moto, ọfọn̄, ye ikpọkidem ẹsana.—Men James 1:21 domo.

Amaedi mbon oro mînyịmeke ndimen obufa owo emi nsịne, nte ẹkeme ndiduọhọ Abasi ke ndikpan mmọ ndidu uwem ke Paradise esie oro edide? Owo ikemeke. Owo ekededi oro osụk enyenede mme ntụhọ edisabade mme n̄kpọ ẹdịbede ke esịt m̀mê ekikere esie eyebiat uyai paradise ekondo Isọn̄, adade mfụhọ ọsọk mmọ oro ẹyomde nditịm enye n̄kama. Ubiere Abasi ‘ndisobo mmọemi ẹsobode isọn̄’ edi edinen ye ima ima.—Ediyarade 11:18; 21:8.

Ndibuana Ifịk Ifịk?

Nte ededi, nte emi ọwọrọ ete ke ẹyom mme Christian ẹtọn̄ọ ndutịm edibiọn̄ọ usabaden̄kpọ m̀mê edinịm isọn̄ asana?

Nte an̄wan̄ade, usabaden̄kpọ ababiat nsọn̄idem ye ifụre mbio obio. Jehovah enyene nnennen udọn̄ aban̄a mme utọ n̄kpọ ẹmi, nte nnyịn ikemede ndikụt ke mme ibet oro enye ọkọnọde nditọ Israel. (Exodus 21:28-34; Deuteronomy 22:8; 23:12-14) Edi akananam enye ikọnọhọ mmọ ndausụn̄ ndikpek mbon efen nsịn ke mme mbubehe ẹban̄ade ukpeme mbio obio; m̀mê ndidi ẹma ẹdọhọ mme Christian akpa isua ikie ẹnam ntre.

Mfịn, mme n̄kpọ ẹban̄ade n̄kann̄kụk ẹkeme ndikabade ndi mbubehe ukaraidem mmemmem mmemmem. Ke akpanikọ, ẹmesiak ndusụk n̄ka ukaraidem san̄asan̄a kaban̄a edikọk mme mfịna n̄kann̄kụk. Christian oro ayakde idem ọnọ ẹwọn̄ọde ẹsịn ke n̄kan̄ ukara idaha aba san̄asan̄a ke mbubehe ukaraidem. Jesus ama onịm edumbet emi ọnọ mme mbet esie ete: “Mmọ idịghe eke ererimbot, kpa nte Ami mmendịghe eke ererimbot.” Christian oro ofụmide se ẹyomde oro esịn idemesie ke itiendịk edida ke n̄kan̄ “mme andikara eyo emi, emi ke ẹkabade ẹdi ikpîkpu.”—John 17:16; 1 Corinth 2:6.

Jesus ikodomoke ndikọk kpukpru mfịna n̄kaowo eke eyo esie; m̀mê enye ndikọdọhọ mme mbet esie ndinam ntre. Ewụhọ oro enye ọkọnọde mmọ ekedi: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism . . . : ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” Enye ikọnọhọ mmọ ewụhọ iban̄a mme ido edinam n̄kann̄kụk.—Matthew 28:19, 20.

Ke anamde an̄wan̄a se ikpenyenede ndidi ebeiso n̄kpọ ke uwem Christian, Christ ọkọdọhọ ete: “Ẹkam ẹbemiso ẹyom Obio Ubọn̄ Esie ye edinen ido Esie.” (Matthew 6:33) Ke ini Jehovah, ebede ke Obio Ubọn̄ Messiah, edinamde ẹsịn ndinen edumbet esie ke edinam ke udomo ofụri ererimbot, ẹyekọk mme mfịna n̄kann̄kụk taktak ye ke usụn̄ oro oyụhọde kpukpru owo.

Ntem, Mme Ntiense Jehovah ẹda idaha oro adade ukem ukem. Ke ẹkerede ẹban̄a N̄wed Mbon Rome 13:1-7, ana mmọ ke ofụri esịt ẹnịm ibet ukara oro akarade n̄kann̄kụk. Ke adianade do, ima Abasi ẹnyenede ẹnọ mbọhọidụn̄ onụk mmọ ndiwụt ukpono nnọ inyene mbon efen—eke obio m̀mê eke owo kiet kiet—ke nditre ndibiat enye ye ke nditre ndiduọn̄ọ mbio ntịme ntịme. Edi nte an̄wan̄ade owo inọhọ mmọ ndausụn̄ ndida iso ke ndutịm unam ebiet asana eke ofụri ererimbot. Mmọ nte enende ẹnịm edikwọrọ etop Obio Ubọn̄ Abasi akpa, ẹdiọn̄ọde ẹte ke emi edi usụn̄ ndinam ufọn oro ebịghide akan.

Edinam Asana eke Spirit

Ẹma ẹdụri nditọ Israel eke eset utọn̄ ndien ndien ẹban̄a se ididide utịp edieke mmọ ẹsabarede isọn̄ ke ndiduọk iyịp, ke ndidụk oburobụt usụn̄uwem, m̀mê ke ndiwụt unana ukpono nnọ ndisana n̄kpọ. (Numbers 35:33; Jeremiah 3:1, 2; Malachi 1:7, 8) Ke edide akpan n̄kpọ akan oro, ẹkebiom mmọ ikpe ke ntak edisabade emi ke n̄kan̄ eke spirit, idịghe ke ntak edisabade ekededi ke obụkidem oro ekemede ndidi mmọ ẹma ẹnyene ubiomikpe n̄ko.b

Ke ntre, edi usabaden̄kpọ m̀mê ndek ke n̄kan̄ eke spirit akpan akpan ke Christian mfịn oyom ndifep. Enye anam emi ke ndimen “obufa owo” nsịne, emi osiode mme ntụhọ edisabade n̄kpọ ke esịt ye ke ekikere efep. Se iwakde ibe Mme Ntiense Jehovah miliọn inan̄ ke ẹbọ ufọn ẹto edinam asana eke n̄kan̄ spirit emi, ẹnyenede edisana idaha ke n̄kan̄ ido ukpono ye eke ido uwem ke otu mmọ, ọkọrọ ye n̄wọrọnda edisana idaha ke ikpọkidem.—Ephesus 4:22-24.

Mfịn edi ini ubịnikọt edinam asana ke n̄kan̄ eke spirit. Ubịnikọt edinam asana eke ikpọkidem ke ofụri ererimbot eyetiene ke ekemini ndien eyenyan̄a ebietidụn̄ nnyịn osio ke ndikabade ndi ifụm ofụri ererimbot ebe ke ndinọ enye n̄kann̄kụk oro enye odotde ndinyene emi ọbọhọde usabaden̄kpọ.—Ecclesiastes 3:1.

[Mme Ikọ idakisọn̄]